Pilibbi 3

1Jwali ṭɔɔlɛ gɛɛl bala ne cyɛɛlɔ. Modg ɔɔn, dala ɛkkɛ yomgɔ ñɔya oŋkanda, acaan ɛkkɛ balgɛ Ciɛggɔn ikinti doki. Kan ‘ya kiewa jyeka neeni ɛkkɛti oŋki ne coŋɔn ɔɔnyɛ, a ɔɔn yaayi ‘yati bɛɛ. Ɔci kan ɛkkɛ woŋgɔ tiittɛ te jyek ‘ya neeniyɛ, ɛkkɛ ciedɛ ne pwadan. 2Dala ɛkkɛ woŋgɔ tiittɛ te maka bala ba gɔki maka yeyin a laaban neeni. Acaan ɛkkɛn buagɔn ŋwoti ɛkkɛ aŋka ɛkkɛ naŋtɛ a Ma Yahuud ba ɛkkɛn budan ɔɔn. 3Ikin maka moṭi Jwaŋa Tolanti te Boŋ ɛkɛyɛ, ikin aŋka balkin jyek ŋwoti awarɛ. Ikin yomgɔ ñɔyɔ te Yaccu Kiṭɔ parɛ. Ɔci ikin poŋin gɔkin agi ikin yaakinti naŋka pwadan te waak tɛɛn ikin pookɔ bɛɛ. 4Kan men gɛɛl gɔki jieyi warɛ agi ɛkɛ yaakiti warɛ udjɛ te war tɛɛn ɛkɛ parɛ budanyɛ, ‘ya yaakati jyek ɛkɛ bwandi ‘ya daŋkun. 5Tieŋdɛ, ɛkkɛ poktin naŋki war ‘ya. Ne ‘ya jiennata mɛy ɔɔn, ɔci ne nink ne dɔɔyɔ wyetkɛn ne yyɛɛwɔ bɛɛki bora ba naŋki yɔrg ɔɔnyɛ, ‘ya ŋutka ma doki te ninna akki ne dɔɔyɔ wyetkɛn ne ḍoogɔ. ‘Ya jietka ma Icrayiil. ‘Ya bɛɛn te kɛɛn Benjaminti. ‘Ya jietka ma Icrayiil. ‘Ya a Pɛriciy, ɔci ba naŋki ma Pɛriciinyɛ, ‘ya baal tiec Jyek ganuun waakɛn ne pwadan. 6’Ya waru byerŋa byerŋ te kanŋa yɔɔro, ɔci ‘ya baal noŋ ne yaayan ma kaniicanti. Jyek ganuun jitkɛn tiiñiyɔ ‘ya waakɛnda. Gɛɛl bɛɛñiji bɛɛ. 7Gɔṭṭɛ, jyek yɔrg ɔɔn, ɔci jyek naŋki ‘ya neeniyɛ, ɛkkɛn pwadɔ ‘yati, yeti ɛkkɛn daljan ‘ya ɔntɔ waakɛnda a kucin te jyek Kiṭɔ. 8Awarɛ, jyeka pookɛn waakɛnda aŋi ba jyeka budan ‘yati. Gena jyek ŋeejiin Ciɛggɔn Yaccu Kiṭɔ ŋeeja ‘ya neeni aŋka pwatciny. Acaan ‘ya buaga jyek Yaccu Kiṭɔyɛ, waak waakɛnda yorkan ‘ya ŋoyu, yom ‘ya bala ɛkkɛnti moki bɛɛ. Dala ɛkkɛn ɔga ḍakti doki. ‘Ya buaga ɛkkɛn moki bɛɛ. ‘Ya buaga gena Yaccu Kiṭɔ parɛ. 9’Ya buaga dala ɛkɛ bala ‘yati. ‘Ya poŋ ka ‘ya pwani Juaŋ ñamɛti te naŋki ‘ya paru bɛɛ, walla te tiit jyek ganuun waakɛn bɛɛ. ‘Ya pwani ɛkɛ ñamɛti te jyenna ‘ya jyetta Kiṭɔti neeni. Acaan maka jyeddi Yaccu Kiṭɔtiyɛ, ɛkkɛn naŋdɛ Juaŋ pwaddi ɛkɛ ñamɛti. 10’Ya buaga dala Kiṭɔ ŋeejja ‘ya ne pwadan. Ɔci ‘ya buaga dala war tɛɛn jɔlni ɛkɛ ñaalɔ neeni ŋeejja ‘ya daŋkun. Ɔci ‘ya buaga dala taab Yaccu ŋeejja ‘ya daŋkun, ɔci dala lyen ɛkɛ aga ba lyen ‘ya, 11ɔci dala ‘ya jɔŋŋa ñaalɔ moki ba ɛkɛ ɔɔn. 12’Ya gɔkca te war ‘ya ka jyeka neeni ḍaaŋi ‘ya waakɛnda men bɛɛ. ‘Ya a mena domi jiek men. Yeti ‘ya ciɛñ ‘uocca ñamu te jyek Yaccu a ‘uoccin gɔ moki ‘uocci ɔɔn, aŋka gena odga ‘ya ñamuti neeni aga gen ‘ya bala ba ne ‘ya koonati Yaccu Kiṭɔ bora aŋŋa men ɛkɛ dokiy. Ɔci ‘ya buaga naŋka ‘ya koonati ɛkɛ bora neeniyɛ, dala ɛkɛ bala ‘yati. 13Modg ɔɔn, ‘ya gɔk ka naŋka neeni ḍaaŋi ‘ya waakɛnda doki bɛɛ. A’a. Naŋka coŋin bala men, yeti gen gɛɛl aŋka bala ne cyɛɛlɔ naŋdi ‘ya oŋkanda. Waka dollanyɔ ‘yayɛ, ‘ya poŋ te jyek ɛkkɛn moki bɛɛ. ‘Ya poŋ te waka bala ñamu, 14ɔci ‘ya ciɛñ ‘uocca ñamu a ‘uoccin gɔ moki ‘uocci ɔɔn. ‘Ya muona Jwaŋa Tolan bora te naŋki Yaccu Kiṭɔ, ɔci ‘ya buaga jyek naŋka pwadin neeni pookɛn. 15Ikin maka loonnin ñamu doki te jyek Yaccuyɛ, dala paŋŋa neeni bala ikinti oŋkanda ɔɔn. Ɔci kan men gɛɛl ɛkkɛti paŋi ɛkɛ bala ɔntɔyɛ, ɛkɛ myettɛ Jwaŋa Tolan agi paŋi ɛkta neeni baalɔ ɔntɔ. 16Dala ikin noŋtin ne pwadan ba jyeka ŋeecin ikiny. 17Modg ɔɔn, dala ɛkkɛ lɔktɛ ba naŋki ‘ya ɔɔn. Gena ɔɔn agɔn maka lwaktan ma te naŋka pwadin neeni. Dala ɛkkɛ gɔrtɛ maka lɔki naŋka neeni wanna ne pwadan. 18Ɛkkɛ myennin ‘ya te jyeka neeni oŋki kɔɔna kɔɔnno, ɔci ‘ya ɛkkɛ myettin acca moki ɔɔn. Ɔci gɔṭṭɛ maka coŋin maka yeyinyɛ, ɛkkɛn yookɔn te kakan Yaccu Kiṭɔ. Ne ‘ya baala gɔka ɛkkɛti te jyeka neeniyɛ, ‘ya baal gɔk a ɔɔn ne pieg bala ‘ya woŋguti ɔɔn. 19Ne baaṭi ɛkkɛn ñɔɔdi ɔci ḍakti budan. Jyek bwakti waak bala ñamu ɛkkɛn yomgɛnti aŋi ba jwaŋ ɛkkɛn. Ɛkkɛn jieyi waakɛn te naŋka naŋtan ɛkkɛn yaayan neeni budan. Ɛkkɛn bala poŋi te jyek waka bala iñɔ baanji ṭɛɛrji wɛnni budan. 20Ikinyɛ, ikin aŋka akin maka bana ñaalɔ pɔliji. Ɔci ikin kɛɛyin mena bɛya te aŋany, gena Ciɛggɔn ikin Yaccu Kiṭɔ. 21Ɔci ne ɛkɛ bɛɛdiyɛ, ɛkɛ waak ikin waaka yeyin neeniyɛ, agdiyɔ ɛkɛ aga ba war ɛkɛ wara pwadan neeni. Ikin aktinyɔ ɛkɛ te war tɛɛn ɛkɛ. Ɔci te war tɛɛn ɛkɛ neeniyɛ, ɛkɛ aga Ciɛggɔn noon warda, ɔci waak waakɛndayɛ, noŋdi ba jyek ɛkɛ.

will be added

X\