Pilibbi 2

1Tieŋdɛ, modg ɔɔn Ma Kiṭɔ, kan ɛkkɛ yomgɔ tɛy tɛy te naŋki ɛkɛ, ɔci kan lati ma korkɛn ŋeejɛ ɛkkɛ, ɔci kan Boŋ Juaŋ bala ɛkkɛti, ɔci kan yomg ɛkkɛ bala mati ne pwadanyɛ, 2dala ‘ya yomu ñɔya te naŋki ɛkkɛ neeni. Dala ɛkkɛ oondi yɔtin waakida. Ɔci dala yomg ɛkkɛ aga ba yoma ne cyɛɛlɔ, ɔci dala ɛkkɛ ciedɛ ba maka ne cyɛɛlɔ. 3Naa ɛkkɛ anɛ waak ɛkkɛ pookɔ bɛɛ. Ɔci naa ɛkkɛ noŋɛ naŋki yyɛji bɛɛ. Naa ɛkkɛ waakɔ naŋdɛ ba maka ḍwaŋin bɛɛ. Dala ɛkkɛ yomgɔ bala ba maka ḍyɛrin, ɔci dala ɛkkɛ poŋdɛ agi maka pookɛn ɛkkɛn aŋka pwadɔ te ɛkkɛ. 4Naa ɛkkɛ mokɛ waak ɛkkɛ pookɔ bɛɛ. Dala ɛkkɛ maka pookɛn magdɛ daŋkun. 5Dala yomg ɛkkɛ bala ba yom Yaccu Kiṭɔ ɔɔn. 6Ɛkɛ a Jwaŋa Tolan. Ɛkɛ a wara ne cyɛɛlɔ iki Jwaŋa Tolan, yeti ɛkɛ yookɔn te jyek ḍyɛrji bɛɛ. Ɛkɛ bala ‘yeṭi warɛ aŋka warɛ poortɛti Juaŋti te war tɛɛn ɛkɛ parɛ bɛɛ. 7Ɛkɛ warɛ naŋŋɛ ba ne ɛkɛ a genga bɛɛ no. Ɔci ɛkɛ aŋi ba bolji mena kɛɛngɔn. Ɛkɛ warɛ aaŋŋɛ aŋi men baano. 8Ɔci ɛkɛ jyek Juaŋ tiiññiyɔ waakɛnda iki jyek lyen ɛkɛ ɔɔn. Gena lyena tuuni ɛkɛ kakantiy. 9Ɔci a ɔŋŋiyɛ, Yaccu koomnɛ Jwaŋa Tolan ñaalɔ ɔci ‘wonnɛ Juaŋ yenta tolan. Ɔci yenta neeniyɛ, ɛkɛ tol tol te yenga pookɛn waakɛnda. 10Ɔci ne oŋ gɛɛltiyɛ, ma ḍwondi iñɔ ɛkɛ ñamɛti morti ɛkɛti waakɛnda. Gena maka ñaalɔ pɔliji i maka bala iñɔ ṭɛɛrji wɛnni, ɔci maka bala kolk jitin waakɛnda. 11Ɔci ma waakɛnda gɔkti te lɛmma ne cyɛɛlɔ waakɛnda, agi Yaccu Kiṭɔ ɛkta agi Ciɛggɔn tolɔ. Ɔci a ɔɔnyɛ, bala ba ma jieyi Wey ɛkkɛn Jwaŋa Tolan daŋkun. 12Munga ana ‘yay, ba bolja ɛkkɛ jyek ‘ya tiiññɛ ñin ne ‘ya balkin iki ɛkkɛ aŋan neeniyɛ, dala ɛkkɛ Jiek tiidɛyɔ ne pwadan waakɛnda ne ‘ya baawa loona ɔntɔ te ɛkkɛti ɔɔn. Jwaŋa Tolan bala kanŋan ɛkkɛ yomgɔti, ɔci te kanŋa ɛkɛ neeniyɛ, ɛkkɛ buagɛ noŋdɛ ba jyek ɛkɛ, noŋdɛ ba yomg ɛkkɛ pookɔ moki bɛɛ. Dala ɛkkɛ buattɛ Juaŋ te yoma awarɛ. Ɔci dala ɛkkɛ woŋgɔ tiittɛ te naŋki ɛkkɛ aŋka ɛkkɛ ‘uottɛ ñamu te yɔɔd Jwaŋa Tolan. 14Gɔṭṭɛ, gena ɛkkɛ buagɛ naŋdɛyɛ, naa ɛkkɛ noŋdɛ te yoma yaayan ywoñɛ waakɔ bɛɛ, ɔci naa ɛkkɛ tyewwɛ bɛɛ. Dala ɛkkɛ ciedɛ budan te nɔjjo. 15Naa ɛkkɛ a maka waaktan ma a maka noŋi naŋka yeyin bɛɛ. Ɛkkɛ agɛ kɛɛgin Jwaŋa Tolan, ɔci dala ɛkkɛ ciedɛ ne pwadan. Maka coŋinyɛ, ɛkkɛn ciyi amaam budan. Naŋki ɛkkɛn yeyɔ. Noon yaayɛ ɛkkɛn te nɔjjo. Nɔjiyɛ, ɛkɛ bala ba nona mielo. Yeti ɛkkɛyɛ, ɛkkɛ balgɛ ba kɛltan ne dɛkki nona mielti, 16acaan ɛkkɛ mietɛ ma te jyeka tɛɛtki ma neeni. Kan ɛkkɛ ciedɛ ne pwadanyɛ, ɔci ne oŋŋa Kiṭɔ bɛɛdiyɛ, ‘ya lɔɔdja te ɛkkɛ Juaŋ ñamɛti bɛɛ. ‘Ya aŋka yomu ñɔya ñɔɔn te naŋki ɛkkɛ neeni, acaan coodi ‘ya iñɔ wɛnni a coodda budan bɛɛ, ɔci kanŋa ‘ya iñɔ wɛnni aŋi kanŋa budan bɛɛ. 17Kan lyen ‘ya jyeni ɛkkɛ ‘uottɛtiyɛ, ‘ya yomu ñɔya ñɔɔn ne tolan. Ɔci ne ɛkkɛ yomgɔ ñɔɔki daŋkunyɛ, ɔci ‘ya daŋkun yomu ñɔɔna ñɔɔno. 18Ɔci ‘ya buaga dala ɛkkɛ yomgɔ ñɔya daŋkun ba ‘ya ɔɔn. 19Gɔṭṭɛ poca, ‘ya buaga Timutawuc cuoñña ɛkkɛti. Kan Ciɛggɔn ikin Yaccu buagɔn a ɔɔn daŋkunyɛ, ‘ya ɛkɛ cuoñña ɛkkɛti aŋan aŋka ɛkɛ ‘ya eekta jiek ṭɔlgɛn gɛɛg te ɛkkɛti aŋka ‘ya yomu luudɛ parun. 20Mena parɛ gɛɛl bala wɛnni yomɛ bala ɛkkɛti ba Timutawuc ɔɔn bɛɛ. 21Maka pookɛn waakɛnda ɛkkɛn poŋi te jyek kanŋa wak ɛkkɛn pookɛn budan. Ɛkkɛn bala poŋi te kanŋa wak Yaccu Kiṭɔ bɛɛ. 22Oŋ yeti Timutawucyɛ, ɛkɛ ŋeejɛ ɛkkɛ ne ɛkɛ pwadiy. Ɔci ŋeejɛ ɛkkɛ ne ɛkɛ baali kanŋin iki ‘ya ba kaci ne kanki iki weegɛn ɔɔn. 23Ne ‘ya gɔrta jyek godan ‘ya ne baali a ɔkiyɛ, ‘ya oŋ Timutawuc cuoñña ɛkkɛti oŋo. 24Dala ɛkkɛ ciedɛ ɔɔn, ŋeej ‘ya, ‘ya bɛɛd ooda Juaŋ ne cwakanti ḍieŋŋa ɛkkɛti. 25’Ya poŋ gɔk ka Ipaprodaaytoc cuoñña dɔwwa ‘ya nona ɛkkɛti ne cwakanti moki. Ɛkɛ bala ba mod ɔɔn, ɔci ɛkɛ bala kanŋin iki ‘ya, ɔci ɛkɛ a ackan Juaŋ ba ‘ya ɔɔn. Ɛkkɛ ɛkɛ cuonnɛ ‘yati wɛnni, ɔci ɛkɛ bala moki ‘ya. 26Ɛkɛ ñingɛ boŋi te ɛkkɛ ne tolan. Ne ɛkɛ tieŋni agi ma ɛkɛ tieŋnɔ agi ɛkɛ warɛ yaayɔyɛ, ɛkɛ bala poŋi jiek yomɛti. 27Ɛkɛ warɛ yaayɛ ne tolan, ɛkɛ noŋi tuwa doki. Yeti Juaŋ yomɛ pɔŋnɛ ɛkɛti, ɔci ɛkɛ warɛ pwani doki. Ɔci Juaŋ yomɛ pɔŋnɛ ‘yati daŋkun te ywaŋŋa ɛkɛ ‘wana neeni ywaŋŋɛy. Ɔci a ɔɔnyɛ, taab ‘ya bala moki bɛɛ. 28Ɔci acca ‘ya yomu noki warɛ ne tolan te bwakta ‘ya buagati ɛkɛ cuonda ɛkkɛtiy. Acaan ‘ya buaga dala ɛkkɛ yomgɔ ñɔya ɔci gɔktɛ a pwatcin ne ɛkkɛ ɛkɛ yuardɛy, ɔci a ɔɔnyɛ, ‘ya yomu pwada daŋkun. 29A ɔŋŋiyɛ, dala ɛkkɛ ɛkɛ magdɛ te yom ñɔɔn ba mod ɛkkɛ te yenti Ciɛggɔn. Maka pwadin ba Ipaprodaaytoc neeniyɛ, dala ɛkkɛ anɛ ɛkkɛn. 30Acaan Ipaprodaaytoc neeniyɛ, ɛkɛ noŋi tuwa te kanŋa Ciɛggɔn ikin Yaccu Kiṭɔ. Ɛkkɛ buagɛ ‘ya magdatɛ, yeti acaan ban ɛkkɛ looncin ɔntɔyɛ, aŋka ɛkkɛ Ipaprodaaytoc cuonnɛ ‘yati moki ‘ya neeni. Taab ɛkɛ tol tolo, yeti ɛkɛ buayi lyen ḍwaŋ ɛkɛ moki bɛɛ. Ɛkɛ bala moki ‘ya men ɔɔn.

will be added

X\