Pilibbi 1

1Hay! Ɛkkɛ modg ɔɔn Ma Kiṭɔ waakɛnda ban Pilibbi, ɔɔn kienɔn worga ɛkkɛti, ɔci gaciicinti daŋkun, ɔci dikannti daŋkun. Gena ‘ya Buuluc ɔci mod ikin Timutawuc kɛɛnk Yaccu Kiṭɔ kienɔn worga ɛkkɛti neeni. 2Jwaŋa Tolan Wey ikin i Ciɛggɔn ikin Yaccu Kiṭɔyɛ, dala ɛkkɛn yomgɛn pwada a pwani ɛkkɛti, ɔci ɛkkɛ ‘wontɛ coodi pwani daŋkun. 3Gɔṭṭɛ, modg ɔɔn, oŋkanda ne ‘ya baala poŋa te ɛkkɛyɛ, ‘ya gɔk Jwaŋa Tolanti a pwatcin te ɛkkɛ. 4Ɔci oŋkanda ne ‘ya baala cɔka Juaŋti te ɛkkɛ waakida a ɔɔnyɛ, ‘ya cɔk te yoma ñɔyan. 5’Ya yomu ñɔy ñɔy acaan ɛkkɛ balgɛ mokɛ ‘ya oŋkanda te jyek Jwaŋa Tolan te oŋŋa ɛkkɛ tieŋnɛ jyek Juaŋ wanna ne acca neeniti ɔɔn. 6Çeej ‘ya ne pwadan, Jwaŋa Tolan mena poccin noŋi kanŋa pwadan ɛkkɛ yomgɔti neeniyɛ, ɛkɛ kanŋa neeni daldɛ budan amaam bɛɛ. Ɛkɛ kandi ne pwadan ɛkkɛti ɔɔn ne oŋŋa Yaccu Kiṭɔ bɛɛdi ɔɔn. 7Ɛkkɛ balgɛ ‘ya yomuti oŋkanda! A ɔŋŋiyɛ, yɔmjin ‘yati doki ne ‘ya noŋa a ɔɔn ɛkkɛtiy, acaan ɛkkɛ waakida ñoonin iki ‘ya te wɔɔka ‘ya ‘wonnata Juaŋ neeni. Kan ‘ya baal ciginji walla kan ‘ya baal borayɛ, ‘ya yuoc jyeka wonkɛn jyeka pwadin neeni. A ɔŋŋiyɛ, ɛkkɛ ñoonin iki ‘ya te jyeka neeni aŋka ‘ya jyeka neeni yɔɔtca iñɔ ne tɛyan. 8Yom ‘ya ŋeejɛ Juaŋ ne ‘ya baala ana ɛkkɛ a ɔkiy. ‘Ya yomu bala ɛkkɛti ne tolan ba ne Yaccu Kiṭɔ yomɛ baali ɛkkɛti wanna ɔɔn. 9’Ya cɔk Juaŋti te ɛkkɛ ka dala anna ɛkkɛ anɛ Juaŋ ɔci anna ɛkkɛ anɛ ma baan dala tola daŋkun. Ɔci ŋeejin ɛkkɛ jiek ŋeejɛ neeniyɛ, dala ciɛña a ciɛnñi gɔ moki ciɛñji ñamu ɔɔn. Dala ɛkkɛ ñingɔ tɛya gɔ moki ñingɔ tɛyin ɔɔn 10aŋka jiek jitkɛn ŋeeddɛ ɛkkɛ, jyeka neeni pwadɔ walla yeyɔ. Naa jyeka pookɛn gɛɛg bala ɛkkɛ yomgɔti bɛɛ. Dala ɛkkɛ ciedɛ te yoma ne cyɛɛlɔ ne oŋŋa Yaccu Kiṭɔ bɛɛdi ɔɔn. Ɔci dala ɛkkɛ ciedɛ ne pwadan, naa maka pookɛn ḍɛɛmdi iñɔ te naŋki ɛkkɛ bɛɛ. 11Ɔci ba bolji jana wyeñɛ kuumi te ṭɔlgɛ neeniyɛ, dala ɛkkɛ daŋkun yomgɔ kuma te naŋka pwadin naŋki Yaccu Kiṭɔ. Ɔci a ɔɔnyɛ, ma gɔrti ne naŋki Juaŋ pwadiyɛ, ɔci ɛkkɛn jieddi ɛkɛ. 12Hay! Modg ɔɔn, dala ŋeeddɛ ɛkkɛ ne ‘ya olkata ma ciginji a ɔɔnyɛ, ‘ya kanŋa Juaŋ yaañi te naŋka neeni bɛɛ. A ɔɔnyɛ, aŋka jiek ooddi baan konɛ warda. 13Jyek coodi ‘ya jiju ciginji te jyek Kiṭɔyɛ, ŋeecɔn ackan i ma akuuma nona neeni wɛnni waakɛnda. Ɔci jyek ‘ya ati baan konɛti warda daŋkun. 14Modg ikin modga coŋinyɛ, ne ɛkkɛn tieŋki jyek coodi ‘ya jiju ciginjiyɛ, ɛkkɛn yomgɛn tɛɛn te jyek Yaccu Kiṭɔ. Ɔci ɛkkɛn bala mieti ma te jyek Jwaŋa Tolan ne pwadan. Ɛkkɛn buayi menga moki bɛɛ. 15Awarɛ, hay! Modg ɔɔn, ma gɛɛg mieti ma te jyek Kiṭɔ te yoma pwadan bɛɛ. Ɛkkɛn korkɛn modɔ te naŋka naŋŋɛ Jwaŋa Tolan ‘yati neeni, ɛkkɛn yomgɛn pwadɔ mati bɛɛ. Yeti maka pookɛnyɛ, ɛkkɛn loṭi ma te yoma pwadan. 16Ɛkkɛn ani ‘ya acaan te kanŋa naŋdi ‘ya a kanŋa Kiṭɔ neeni, ɔci ŋeecɔn ɛkkɛn ‘ya baal jiju wɛnni te jyek kanŋa Yaccu. 17Maka loṭi ma te yoma yaayan neeniyɛ, ɛkkɛn korkɛn modɔ ‘yati, ɔci ɛkkɛn loṭi ma te yoma awarɛ bɛɛ. Ɛkkɛn poŋi gɔki agi ne ɛkkɛn lortinti ma a ɔɔnyɛ, agi aŋka ‘ya taabjɔ ne tolan ciginji wɛnni. 18Yeti baatɔ! Ne ma balki lorki ma te yoma yaayan walla te yoma awarɛyɛ, jyek Kiṭɔ bala ooddi mati men ɔɔn, ɔci acaan a ɔŋŋiyɛ, ‘ya yomu ñɔɔna ñɔɔno. 19Yom ‘ya mwondi te ñɔɔn bɛɛ. ‘Ya yomu ñɔɔna ñɔɔn oŋkanda ɔɔn. Ɛkkɛ balgɛ cɔkɛ Juaŋti te ‘ya, ɔci Boŋ Yaccu Kiṭɔ bala ‘yati, ɔci acaan a ɔŋŋiyɛ, ŋeej ‘ya ‘ya pɔkta Juaŋo. 20Yom ‘ya buagɔn dala ‘ya gɔkca mati ne pwadan acca, ɔci oŋkanda ɔɔn lɔɔdja bɛɛ. Kan ‘ya nokta ma, walla kan ‘ya ciy tɛɛt men ɔɔnyɛ, ‘ya buaga dala Kiṭɔ ŋeettan ma a Kiṭɔ tol tol te naŋki ‘ya neeni. 21Kan ‘ya ciy tɛɛt ɔɔnyɛ, ‘ya ciy noŋ kanŋa Yaccu Kiṭɔ. Yeti kan ‘ya tuudyɛ, pwatcin ne tolan nɔñji, acaan Juaŋ ‘woñi ‘ya te waka pwadin. 22Kan ‘ya ciy tɛɛtyɛ, ɔci ‘ya yaakati ma magdi te jyek Juaŋo. 23A ɔŋŋiyɛ, ‘ya waru yikcan ñaalɔ gena naŋdi ne cyɛɛlɔ yuarca bɛɛ, ‘ya yaakati gɔkca lien pwatcin, walla jyek tɛɛtin aŋka pwatcin bɛɛ. Yomg ‘ya a yyɛɛwɔ. Yoma ne cyɛɛlɔ gɛɛl buagɔn ‘ya ciy meni. Ɔci yoma parɛ buagɔn ‘ya tuudo. Ɔci gena yom ‘ya buagiti ne pɛñanyɛ, gena lyena ‘ya tuuda ɔci oodda ban Yaccuti ɛkɛ aŋka pwatcin ne tolan te coodda ciya ‘ya iñɔ wɛnniy. 24Yeti kan ‘ya yadi wɛnni te ɛkkɛyɛ, a ɔɔn yɔmjin. 25Ɛɛ, jwali gɛɛl ŋeej ‘ya ne pwadan, ‘ya yaddo. Ɔci ɛkkɛ magdin ‘ya aŋka ɛkkɛ ‘uottɛ ñamu, ɔci aŋka ɛkkɛ yomgɔ ñɔɔgdi te jyek jyenna ɛkkɛ jyettɛ Juaŋti neeni. 26Ɔci a ɔɔnyɛ, ne ‘ya bɛɛda ɛkkɛti mokiyɛ, ɛkkɛ jieddɛ Yaccu Kiṭɔ te naŋki ɛkɛ neeni. 27Yeti kan ‘ya bɛɛd ɛkkɛti ɔci walla kan ‘ya bɛɛd ɛkkɛti bɛɛyɛ, ‘ya buaga dala ɛkkɛ ciedɛ ne pwadan te yoma ne cyɛɛlɔ. Dala naŋka naŋdɛ ɛkkɛ oŋkanda neeniyɛ, dala bala ba naŋki jyeka wonkɛn jyeka pwadin neeni. Ɔci ne ɛkkɛ mietɛ ma te jyeka wonkɛn jyeka pwadin neeniyɛ, dala paŋi ɛkkɛ aga paŋŋa ne cyɛɛlɔ. 28Ɔci ne ma tiekti te jyeka neeniyɛ, naa ɛkkɛ yomgɔ yeyɔ te jyek ɛkkɛn neeni bɛɛ. Ɔci a ɔɔnyɛ, ŋeettan ɛkkɛn jiek bɛya ɛkkɛn wyetkɛnti ne baaṭi. Ɔci te naŋka wanna mokiyɛ, ŋeeddɛ ɛkkɛ, ɛkkɛ yɔɔdɛ Juaŋo. 29Ɛkkɛ jyettɛ Kiṭɔti doki, ɔci a ɔɔn pwatcin. Yeti jyek jyenna ɛkkɛ jyetti Kiṭɔti neeniyɛ, bala parɛ bɛɛ, jyek taab bala ɛkkɛti daŋkun. Kan taab bala ɛkkɛti te yenti Kiṭɔyɛ, a ɔɔn yaayɛ bɛɛ. A ɔɔn pwatcin daŋkun. 30Taab yuarŋɛ ɛkkɛ ‘yati te kanŋa Yaccu neeniyɛ, ɛkɛ bala ɛkkɛti daŋkun, ɔci bala ‘yati acca men ɔɔn. Ɛkɛ bawwin men bɛɛ.

will be added

X\