Matta 9

1Ɔci a ɔŋŋiyɛ, Yaccu ati taapcin murkati ɔci totcin bora galŋ kwoña parɛti. Ɔci ɛkɛ ati ban ɛkkɛn ban Kapɛrnyam. 2Ɔci ma gɛɛg bɛɛn kɛṭṭin mena ‘uan gɛɛl te aŋgan. Ɛkɛ a puono. Ɔci ne Yaccu gɔrni jyenna jyetki ɛkkɛn neeniyɛ, ɛkɛ gɔkcin ‘wana warɛ yaayan neeniti agi, “Kaci ‘ya, yomu tieka, i bɔɔŋnin ‘ya te nɔji i doki.” 3Ɔci maka loṭi worga Juaŋ gɛɛg bala wɛnan daŋkun, ɛkkɛn poŋi jiek yomgɛnti agi, “Mena gɔki ne yaayan neeni a menɛ yeti?” 4Yeti Yaccuyɛ, paŋi ɛkkɛn ŋeejɛ ɛkɛ doki. Ɔci ɛkɛ tooccin ɛkkɛnti agi, “Ɛkkɛ poŋɛ paŋŋa yaayan yomgɔti ogo? 5Kan ‘ya gɔkca agi ɛkɛ bɔɔka ‘ya te nɔji ɛkɛy, ɔci moki kan ‘ya gɔkca ɛkɛti agi dala ɛkɛ jɔŋdi ñaalɔ potti woony, jwali gɛɛl koy koy te jyeka neeniti yaakkɛn boki? 6Dala ŋeeddɛ ɛkkɛ ‘ya Kaci Ma Baan yaakati maka ciyi ṭɛɛrji bɔɔka te nɔji ɛkkɛn.” Ɔci ne Yaccu gɔŋni a ɔɔnyɛ, ɛkɛ warɛ yallɛ ‘wana warɛ yaayanti neeni ɔci gɔkcin ɛkɛti agi, “Jɔŋŋa ñaalɔ, aŋgan lula ɔgdi ootta baanji.” 7Ɔci ɛkɛ jɔŋŋin ñaalɔ aŋgan luullɛ, ɔci ɛkɛ ati baanji. 8Ɔci ne maka coŋin gɔrki naŋka neeniyɛ, ɛkkɛn korkɛn buañi ɔci bala jieyi Jwaŋa Tolan te naŋka tɛyan naŋka ‘wonnɛ ɛkɛ Yaccu neeni. 9Ɔci ne Yaccu jɔŋni te aŋan baali ati goṭi pɔɔjɔyɛ, ɛkɛ mena ‘uan gɛɛl mɔŋnɛ bala ciyi ona ḍɔcki ma tulba. Ɛkɛ yenti Matta. (Ɛkɛ yenti Laawi te tuk Ma Icrayiil.) Ɔci Yaccu gɔkcin ɛkɛti agi, “Bɛɛd, bootta ‘yati.” Ɔci ɛkɛ jɔŋŋin ñaalɔ bootcin Yaccuti. 10Ɔci oŋ gɛɛlti ne Yaccu baali ciyi orɔ omiyɛ, maka lyemi tulba bala ciyi omi i ɛkɛ a ḍiɛkan bɛɛ. Ɔci maka pookɛn maka waaktan ma bala daŋkun. Ɛkkɛn bala ciyi iñɔ iki Yaccu iki maka laldɛ ɛkɛ. 11Ɔci ma Pɛriciin ne ɛkkɛn gɔrki naŋka neeniyɛ, ɛkkɛn gɔkcin maka laldɛ Yaccuti agi, “Mena loṭi ɛkkɛ omi iki maka lyemi tulba ɔci maka yeyin ogo?” 12Ɔci ne Yaccu tieŋni jyeka toocki ma neeniyɛ, ɛkɛ gɔkcin mati agi, “Maka waakɛn pwadinyɛ, ɛkkɛn magdɛ kiimi bɛɛ. Gena maka waakɛn yeyin aŋka magdɛ kiimiy. 13Dala ɛkkɛ poŋdɛ te jyeka a kiigin neeni. Jyeka neeni gɔki agi, ‘‘Ya buaga a waka ‘yɛrdɛ ɛkkɛ budan bɛɛ. ‘Ya buaga dala ɛkkɛ yomgɔ pɔktɛ gena mati.’ ‘Ya bɛɛn boor maka pwadin bɛɛ. ‘Ya bɛɛn aŋka ‘ya boor maka nɔɔtko.” 14Ɔci maka laldɛ Yɔhannayɛ, ɛkkɛn bɛɛn Yaccuti ɔci tooccin Yaccuti agi, “Ɔɔn ɔci ma Pɛriciinyɛ, ɔɔn gwoṭɔn koñ oŋkanda. Yeti maka lala iyɛ, ɛkkɛn gwoṭi koñ bɛɛ ogo?” 15Ɔci Yaccu gɔkcin ɛkkɛnti agi, “‘War ñooniyɛ, kan ɛkɛ bala nona mung ɛkkɛntiyɛ, mung ɛkkɛn neeni kuuyi boki? Hayɛllɛ! ‘Ya baal ba ‘war ñoonno. Yeti ne oŋ gɛɛltiyɛ, ‘war ñooni eetan ma nona parɛ, ɔci ma oŋ gworti koñ oŋo. 16“Men gɛɛl yaakinti bworŋ ɛkɛ bworŋa woonɛ ŋwoddɛ jitin ɔci oldɛ ṭuortɛ jibba a daanti boki? Kan ɛkɛ noŋdi a ɔɔnyɛ, ɛkɛ bworŋa daan neeni yaadɛ ne yaajan nɔñji dita. 17Ɔci moki, men gɛɛl mooya wonkɛn neeni luaddɛ kucin a donk jitin bɛɛ. Kan men gɛɛl noŋdi a ɔɔnyɛ, ɔci mooya wonkɛn neeniyɛ, kotti ñaalɔ, ɔci kucin ṭontan jitin, ɔci ɛkkɛn ḍakti budan iki kucin ɔɔn. Mooya wonkɛn neeniyɛ, ɛkkɛn oltan ma kucin wonkɛnti oŋkanda ɔɔn. Ɔci mooy nina ne pwadan iki kucin a cyɛɛlɔ.” 18Ɔci ne Yaccu baali gɔki te jyeka neeniyɛ, ḍuaŋa gɛɛl yenti Jayroc bɛɛn ɔci morcin ɛkɛti. Ɛkɛ gɔki agi, “Kaci ‘ya, kacca a ɛɛŋ ṭɔɔlɛ, ɛkɛ tuun acca. Yeti dala i bɛɛd topca ɛkɛti te byeŋ i aŋka ɛkɛ ‘uodi.” 19Ɔci Yaccu jɔŋŋin ñaalɔ ɔci ati iki ɛkɛ. Ɔci maka laldɛ Yaccu ati daŋkun. 20Ɔci mena ɛɛŋ gɛɛl bala wooci yimg wɔyi a wɔɔn ba yuong ne inyaakkɛn wyetkɛn ne yyɛɛwɔ. Ɛŋa neeni bɛɛn pɔya Yaccu ŋoyɛti ɔci topcin bworŋ Yaccu lɛkɛti. 21Acaan ɛkɛ bala poŋi yomɛti agi, “Kan ‘ya topca bworŋ Yaccutiyɛ, ‘ya waru pwada lakun.” 22Ɔci Yaccu warɛ yallɛ ɔci ɛɛŋ yuarnɛ ɛkɛ. Ɔci Yaccu gɔkcin ɛkɛti agi, “Kaci ‘ya, dala i yomu pwada. Te jyenna jyetti i neeniyɛ, i waru pwani doki.” Ɔci ɛɛŋ warɛ pwani doki. 23Ɔci ne Yaccu dɛnni on mena a ḍuaŋa neeniyɛ, ɛkɛ ma mɔŋnɛ orɔ a ḍiɛkan bɛɛ. Ma gɛɛg bala kuoti killin, ɔci ma bala wiak a joono. 24Ɔci Yaccu gɔkcin mati agi, “Dala ɛkkɛ kaattɛ bora te orɔ wɛnni, acaan ṭɔɔl ṭɔɔlɛ neeniyɛ, ɛkɛ tuun awarɛ bɛɛ. Ɛkɛ wiccin a wiccin budan.” Ɔci ɛkkɛn bala lɛɛṭi Yaccu warɛ. 25Ɔci ne maka coŋin cuuñkiti ma borayɛ, Yaccu kaaccin orɔ ona niini ṭɔɔl ṭɔɔlɛy. Ɔci ɛkɛ muŋŋɛ te bieŋɛ, ɔci ṭɔɔl ṭɔɔlɛ jɔŋŋin ñaalɔ warɛ pwani doki. 26Ɔci jyek naŋki Yaccu neeni ati baan konɛ warda. 27Ɔci ne Yaccu baali ati goṭi pɔɔjɔyɛ, maka ‘uay maka ullin ne yyɛɛwɔyɛ, ɛkkɛn bala booti ɛkɛ. Ɔci ɛkkɛn bala boorɔ ɛkɛ agi, “I Yaccu Kaci Daawud, dala i yomu pɔkka ɔɔnti.” 28Ɔci ne Yaccu atti ɔci kaanni orɔyɛ, maka ullin neeni bɛɛn nona ɛkɛti. Ɔci Yaccu gɔkcin ɛkkɛnti agi, “Ɛkkɛ jyettɛ agi ‘ya yaakati ɛkkɛ pɔktin ñingɔtɛ?” Ɔci ɛkkɛn gɔkcin ɛkɛti agi, “Ɛɛ, Ciɛggɔn, ɔɔn gɔkɔn a ɔɔn.” 29Ɔci ɛkɛ topcin ɛkkɛn woŋgɛnti, ɔci gɔkcin ɛkkɛnti agi, “Acca dala ɛkkɛ woŋgɔ pɔktɛ te jyenna ɛkkɛ jyettɛ ‘yati neeni.” 30Ɔci ɛkkɛn ñingɛn pɔkki. Ɔci Yaccu gɔkcin ɛkkɛnti ne pɛñan agi, “Woŋgɔ tiittɛ, acaan naa naŋka neeni ŋeeddɛ menga bɛɛ.” 31Ɔci maka ñingɛn pɔkkɛ neeni ɛkkɛn ati, ɔci jyeka neeni miidɛ amaam ɔci jyek ɛkɛ ati noon warda doki. 32Ɔci ne maka ywaŋŋɛ Yaccu neeni luorki bora dokiyɛ, ma gɛɛg bɛɛn eccin mena miiŋ nona Yaccuti. Mena neeni a miiŋ acaan ɛkɛ muŋŋɛ jwaŋa yaayan. 33Ɔci ne jwaŋa yaayan koonɛ Yaccu borayɛ, ɔci mena ‘uan mena a miiŋ neeniyɛ, ɛkɛ oŋ yaakinti gɔki jiek oŋo. Ɔci maka coŋinyɛ, ɛkkɛn yomgɛn moottin ne pɛñan. Ɛkkɛn gɔki agi, “Bonk ikin bonk ma Icrayiil wɛnniyɛ, men gɛɛl naŋka neeni yuarŋɛ oŋgati boki?” 34Yeti ma Pɛriciin gɔki agi, “Ɛkɛ jɔkin yeyin koodɛ bora te yenti ciɛggɔn jɔkin yeyin neeni.” 35Ɔci Yaccu ati bonka ḍwaŋin boonnɛji waakɛnda, ɔci bonka ḍyɛrinti moki. Ɔci bala loṭi ɛkkɛn oorga morki ma Juaŋti, loṭi ma te jyeka wonkɛn jyeka pwadin, jyek cyɛgji Juaŋo. Ɔci bala yɔŋi ma te wajan jitkɛn waakɛnda. 36Ne ɛkɛ maka coŋin neeni yuarnɛyɛ, ɛkɛ yomɛ wiak te ɛkkɛn, acaan ɛkkɛn taabbin ne tolan. Ɔci ɛkkɛn bala ḍɔki a ḍwaŋi budan. Ɛkkɛn bala ba kulin ne weegɛn baawiy. 37Yaccu gɔkcin maka laldɛ ɛkɛti agi, “Maka buagɔn laltan ma te jyek ‘ya, ɛkkɛn bala kɔɔna kɔɔnno. Yeti maka noŋi kanŋa lali a ḍiɛkan ṭɔlgɛn budan. Kanŋa ‘yɛrŋ pok tol tolo, yeti maka noŋi kanŋa neeni a ḍiɛkan ṭɔlgɛn budan. 38Acaan a ɔŋŋiyɛ, dala ɛkkɛ gɔktɛ kanŋa weegɛnti agi, dala ɛkɛ ma kanŋa cundɛ kanŋa ‘yɛrŋ pokti.”

will be added

X\