Matta 8

1Ɔci ne Yaccu kooni iñɔ te poom wyeñɛtiyɛ, maka coŋin ati bootcin ɛkɛti. 2Ɔci mena naŋŋɛ cyɛc gɛɛl bɛɛn nona Yaccuti ɔci ḍwoñjin iñɔ ɛkɛ ñamɛti, ɔci gɔkcin agi, “I Ciɛggɔn, kan i buagi ‘ya pɔkta te waja neeniyɛ, i yaakiti.” 3Ɔci Yaccu bieŋɛ laŋnɛ ɛkɛti, ɔci topcin ɛkɛti, ɔci gɔkcin agi, “‘Ya buaga, i ywaŋdin.” Ɔci ne pɛñan mena naŋŋɛ cyɛc neeni warɛ pwani doki. 4Ɔci Yaccu gɔkcin ɛkɛti agi, “Gɔṭṭi, naa i menga myetka bɛɛ. Yeti i ɔgdi ootta, ɔci dala i waru lɛɛrka gaciic. Ɔci dala i ɛkɛ ‘woñga gena guaŋŋɛ Muuca mati agi ‘wondi ma gaciic. Ɔci a ɔŋŋiyɛ, ŋeettan ma i waru pwani te cyɛc awarɛ.” 5Ɔci ne Yaccu dɛnni ban Kapɛrnyamtiyɛ, mena ḍuaŋa ackan gɛɛl bɛɛn ɛkɛti. 6Ɔci gɔkcin ɛkɛti agi, “Ciɛggɔn, mena kanŋan ‘yati bala baanji warɛ yaayɛ. Ɛkɛ warɛ puottin, ɔci ɛkɛ wooci a waañi ne tolan. A ɔŋŋi ‘ya ḍɔn iti, ka da i ɛkɛ ywaŋa.” 7Ɔci Yaccu gɔkcin ɛkɛti agi, “‘Ya bɛɛd ɔci ɛkɛ ywaŋdo.” 8Yeti ḍuaŋa ackan ṭwokcin ɛkɛti agi, “‘Ya a mena ḍiɛran, ɔci i a mena tolan. Acaan a ɔŋŋiyɛ, naa i kaacca on ‘ya on mena ḍiɛran neeni bɛɛ. Acaan ‘ya a genga bɛɛ. Dala i gɔkca jwali te tuk i, ɔci mena kanŋan ‘yati neeni warɛ pwada. 9’Yayɛ, ma gɛɛg bala ñamu te ‘ya. Ɛkkɛn gɔkti ‘yati, ɔci ‘ya noŋ ba jyek ɛkkɛn. Ɔci ‘ya da balka ackan. ‘Ya a ḍuaŋa ɛkkɛn. Kan ‘ya gɔkca ackan gɛɛlti agi ɛkɛ ooddi noongatiyɛ, ɛkɛ ooddi. Ɔci kan ‘ya gɔkca ackan parɛti agi, ‘I bɛɛd wɛnniyɛ,’ ɛkɛ bɛya. Ɔci mena kanŋan ‘yatiyɛ, kan ‘ya gɔkca ɛkɛti agi, ‘I noŋja a ɔɔnyɛ,’ ɛkɛ noŋdi. A ɔŋŋiyɛ, jwali i tukuyɛ, yɔmjin doki, ɔci mena neeni warɛ pwada doki.” 10Ne Yaccu tieŋni jyeka neeniyɛ, ɛkɛ yomɛ buañi, ɔci ɛkɛ gɔkcin maka coŋinti neeni agi, “Hay! Mena jyeti ‘yati ne pwadan ba ‘wana neeniyɛ, gɛɛl yuarŋ ‘ya bɛɛ. Ɔci ma ɔɔn ma Icrayiilyɛ, men gɛɛl jyeti ‘yati ba ‘wana neeni ɔɔn bɛɛ. 11Tieŋdɛ, ‘ya ɛkkɛ myettin, keedin pookɛn maka coŋinyɛ, gɛɛg bɛya te pɔli ŋwayyɛti waakɛnda, ɔci ɛkkɛn cootti i Abrahim, ɔci Icaak, ɔci Yaakub. Ɛkkɛn cootti iñɔ omdi juma non cyɛgji Jwaŋa Tolan. 12Yeti Ma Icrayiil maka te kaatti non cyɛgji Juaŋyɛ, ɛkkɛn aŋka yiɛptɛ Juaŋ ɔntɔ nona ulanti bora. Ɔci ɛkkɛn wiakti, ɔci lɛkɛn tiittanti te yom yoño.” 13Ɔci Yaccu oŋ gɔkcin ḍuaŋa ackanti oŋ agi, “Dala i ɔgdi ootta, ‘ya noŋja naŋka neeni iti, acaan i jyetti doki.” Ɔci mena kanŋa ɛkɛti neeni warɛ pwani doki. 14Ɔci ne Yaccu dɛnni on Butructiyɛ, mari Butruc mɔŋnɛ niin iñɔ warɛ yaayɛ. Ɛkɛ warɛ myɛlla myɛllo. 15Ɔci Yaccu topcin ɛkɛ bieŋɛti, ɔci ɛkɛ warɛ pwani doki. Ɔci ɛkɛ jɔŋŋin ñaalɔ, ɔci ɛkɛ Yaccu ‘wonnɛ am i maka bɛɛn on ɛkɛti neeniy. 16Ɔci ne oŋ waŋɛ unniyɛ, ma eccin maka naŋɛ jɔkin yeyin ne coŋɔn, ɔci te jyek ɛkɛyɛ, ɛkɛ jɔkin yeyin koonɛ bora a ḍiɛkan bɛɛ. Ɔci maka waakɛn yeyinyɛ, ɛkkɛn ywaŋŋɛyɔ ɛkɛ waakɛnda moki. 17Naŋka neeni bala te oŋŋa wanna aŋka dala jyeka guaŋŋɛ Icaaya mena a bɔwa Jwaŋa Tolan bɛya bora waakɛnda. Icaaya gɔki agi, “Wajan ikin eññɛ ɛkɛ ɔntɔ ɔci pɛñi ikin eññɛ ɛkɛ ɔntɔ moki.” 18Ɔci te oŋa parɛ ne Yaccu gɔrni ma balki bɛɛti ɛkɛti kɔɔnki a kɔɔniyɛ, ɛkɛ gɔkcin maka laldɛ ɛkɛti agi, “Bɛɛdɛ oottin kuocɔ galŋ taaŋŋa parɛti.” 19Ɔci mena loṭi worga Juaŋ gɛɛl bɛɛni. Ɔci ɛkɛ gɔkcin Yaccuti agi, “Mena loṭi may, nona i ooddiyɛ, ‘ya bootta iti.” 20Ɔci Yaccu gɔkcin ɛkɛti agi, “Wɛɛk balki kolka cieki, ɔci ḍiirga peyi ñaalɔ neeniyɛ, ɛkkɛn balki kworkɛn moki. Yeti kan ne ɛkkɛ boottɛ ‘yatiyɛ, ɛkkɛ baltɛ nona ciyɛ ɛkkɛ daŋkun bɛɛ, acaan ‘ya Kaci Ma Baan balka nona niina ‘ya bɛɛ.” 21Ɔci ‘wana parɛ, ‘wana laldɛ Yaccu gɛɛl gɔkcin Yaccuti agi, “‘Ya ootta lakun aŋka ne wey ɔɔn tuudiyɛ, ɛkɛ jokca koolji ñamu, hayya ‘ya oŋ bɛɛd bootta iti oŋo.” 22Ɔci Yaccu gɔkcin ɛkɛti agi, “Dala i bɛɛd bootta ‘yati acca. Dala ma ɛkkɛn maka baaw jyek Juaŋtiyɛ, dala ɛkkɛn ma gwaltan ne ɛkkɛn tuuti ɔɔn.” 23Ɔci Yaccu taapcin murkaji iki maka laldɛ ɛkɛ. 24Ɔci jwamma tolan bɛɛn mɔṭṭinti ne pɛñan, ɔci pɔɔgi ati murka konɛti. Ɔci te wɔɔka wanna Yaccu bala wicɔ. 25Ɔci ma bɛɛn ɛkɛti ɔci bala jieci ɛkɛ warɛ agi, “Ciɛggɔn, ɔɔn magdɔn. Ikin ḍaŋnin doki, hay!” 26Ɔci Yaccu gɔkcin ɛkkɛnti agi, “Ɛkkɛ buayɛ ogo? Ba ɛkkɛ jyettɛ ‘yati ne pwadan bɛ?” Ɔci Yaccu jɔŋŋin ñaalɔ, ɔci ɛkɛ gɔkcin jwamiti ɔci pɔɔgiti, ɔci ɛkkɛn yɔɔnni. Genga bala moki bɛɛ. 27Ɔci ‘uaya neeni buañi ɔci ɛkkɛn bala gɔwwɔ yɔtin pookɛn agi, “‘Wana neeni tolcin awarɛ hay! Jwami ɔci pɔɔgi tieŋŋin jyek ɛkɛ.” 28Ɔci ɛkkɛn dɛñjin galŋ kwoña parɛti. Gena ban Gadara. (Bana neeni ma boṭi ‘wota agi Garaca.) Ɔci ne ɛkkɛn tocki borayɛ, ɛkkɛn koogjin iki maka ‘uay gɛɛg ne yyɛɛwɔ. ‘Uaya neeniyɛ, ɛkkɛn muogɛ jɔkin yeyin. Ɛkkɛn bɛɛn te non kolka jokki ma may. Acaan ɛkkɛn a luudginyɛ, ma yaakinti goṭi te pɔya ɛkkɛnti bɛɛ. 29Ɔci ɛkkɛn yaajjin te pwana tolan agi, “I Kaci Jwaŋa Tolan, i buagi gena ɔɔnti yeti? I bɛɛni noŋ ywobji ɔɔnti ne oŋ ywobji baaw men ɔɔn?” 30Ɔci poli kwotin polla tolan bala kɛñi luom nona wannati looncin ne ḍiɛran ṭɔɔlɛ. 31Ɔci jɔkin yeyin neeniyɛ, tooccin Yaccuti agi, “Kan i ɔɔn koodɔn borayɛ, dala ɔɔn cundɔn i kwotinti aŋka ɔɔn kaattɔn ɛkkɛnti.” 32Ɔci Yaccu gɔkcin ɛkkɛnti agi, “Ɔgdɛ ooddɛ.” Ɔci ɛkkɛn kooyin bora te mati, ɔci ɛkkɛn ati kaaccin kwotinti doki. Ɔci poli kwotin neeni ɛkkɛn yoŋŋin te ñaalɔ poom wyeñɛti, ɔci ɛkkɛn ḍɛɛmdin iñɔ galŋji ɔci ḍakcin waakɛnda galŋji. 33Ɔci ne maka cieti kwotin neeni gɔrki naŋka neeniyɛ, ɛkkɛn yiŋi baanji bana tolan, ɔci ma myetkɛ te naŋka neeni waakɛnda. Ɔci ɛkkɛn ma myetkɛ te jyek ‘uaya muogɛ jɔkin yeyin neeni daŋkun. 34Ɔci maka bana tolan neeniyɛ, ɛkkɛn ɔɔccin waakɛnda nona Yaccuti aŋka gɔrti ɛkɛ. Ɔci ne Yaccu yuarkiti ɛkkɛnyɛ, ɛkkɛn gɔkcin ɛkɛti agi, “Dala i ɔgdi ootta te ban ɔɔn wɛnni.”

will be added

X\