Matta 7

1“Naa ɛkkɛ wookɛ ma te yomgɔti bɛɛ. Kan ɛkkɛ wookɛ ma te yomgɔti bɛɛyɛ, ɔci ɛkkɛ da waagdɛ Jwaŋa Tolan bɛɛ. 2Kan ɛkkɛ wookɛ ma te yomg ɛkkɛyɛ, ɔci ɛkkɛ da waagdɛ Juaŋ a ɔɔn daŋkun. Ba naŋka naŋdɛ ɛkkɛ matiyɛ, ɔci ɛkkɛ da naŋdɛ Juaŋ a ɔɔn daŋkun. 3“Te gena yeti i gɔr gena ḍiɛran neeni mod ɛkkɛ waŋɛti, ɔci gena tolan niin i waŋuti dalja a ɔɔn wannay? 4Te gena yeti i gɔk mod ɛkkɛti agi, ‘Mod ɔɔn, i bɛɛd wɛnni, ‘ya gena bala i waŋuti ḍiɛran neeni owwa bora,’ ne gena tolan bala niin i waŋuti men ɔɔny? 5Naa i agdi laaban a ɔɔn bɛɛ, hay! Gena tolan i waŋuti neeni owwa i bora ñamu bɛɛ? Ɔci i yaaktiti gwali, ɔci i oŋ gena bala mod ɛkkɛ waŋɛti neeni oodi bora oŋo. 6“Naa ɛkkɛ loṭɛ maka yeyin ba gɔki neeni bɛɛ, ɛkkɛn dita dɔɔkti ɛkkɛ ḍɔɔggɔti, ɔci ɛkkɛ kootɛ ɛkkɛn ba gɔkko. Naa ɛkkɛ loṭɛ maka wyetkɛn baaw ba kwotin neeni bɛɛ. Ɛkkɛn dita jiek kuoltanji ɔci waaktan te wyeñ boojo. 7“Gɔṭṭɛ moki, ‘ya ɛkkɛ myettin moki, dala ɛkkɛ cɔktɛ Jwaŋa Tolanti te gena ɛkkɛ buagɛy. Ɛkɛ a mena yomɛ pwadany, ɛkɛ ɛkkɛ ‘wondɛ gena ɛkkɛ buagɛy. Dala ɛkkɛ toottɛ ɔɔn. Naa ɛkkɛ waakɔ pola te taat bɛɛ. Ɔci moki kan gena yaayan gɛɛl bɛɛn ɛkkɛ ḍɔɔggɔtiyɛ, dala ɛkkɛ toottɛ ɛkɛti aŋka ɛkɛ ɛkkɛ ‘wondɛ ñing tɛɛno. Ɔci kan gen gɛɛl ɛkkɛ kɛgdɛ pɔy ɛkɛjiyɛ, ɛkɛ ɛkkɛ magdɛ, ɔci ɛkɛ gena wanna uuttɛ ɔntɔ te pɔɔjɔ. 9Men gɛɛl boki ɛkkɛti wɛnni, ne kaci ɛkɛ tootti ɛkɛti te amy, ɛkɛ kaci ‘wondɛ gena guonan boki? 10Ɔci walla kan kaci tooci te yeñña ‘yɛɛgɔn ɔci ɛkɛ kaci ‘wondɛ gena kaaŋɔ? 11Oŋ ɛkkɛ, ɛkkɛ agɛ maka yeyin, yeti ɛkkɛ yaakɛti kɛɛgin ɛkkɛ ‘wondɛ waka pwadin. Oŋ Wey ɛkkɛ ñaalɔ pɔliji kan ma tooci ɛkɛti te waka pwadiny, ɛkɛ yaakinti ɛkkɛn ‘wondɛ waka pwadin bɛɛ? Waka ‘wontan ma baan kɛɛgin bwantan waka ma ‘wondɛ Juaŋ neeni. 12“Tieŋdɛ ‘wota, kan naŋka naŋtan ma gɛɛl yaayɛ itiyɛ, naa i noŋja a ɔɔn maka pookɛnti bɛɛ. Dala i noŋja ne pwadan ɛkkɛnti daŋkun ɔɔn. A ɔɔnyɛ, gena jyek ganuun Muuca ɔci jyeka lorki maka a bɔwan Jwaŋa Tolan kon ɛkkɛn neeni. 13“Gɔṭṭɛ moki, dala ɛkkɛ kaattɛ pɔy Juaŋ te pɔy tuka ḍiɛran. Pɔy tuka tolanyɛ, ɛkɛ da parɛ. Ɛkɛ goob gob ne tolan, ɔci woon milla mili ɛkɛti. Pɔya neeniyɛ, gena pɔya eetan ma ɔci ḍakti may. Ɔci maka bala pɔya neenitiyɛ, ɛkkɛn kɔɔna kɔɔnno. 14Pɔya eetan ma ɔci utti ma neeniyɛ, tuk ɛkɛ ḍiɛrŋa ḍyɛrŋo. Ɔci won ɛkɛ tɛy tɛyo. Ɔci maka pɔya neeni yuarɛ dokiyɛ, ɛkkɛn a ḍiɛkan ṭɔlgɛn budan. 15“Dala ɛkkɛ woŋgɔ tiittɛ te maka jomi jiek agi ɛkkɛn aginti bɔwan Jwaŋa Tolany. Ɛkkɛn bɛya ɛkkɛti ɔci gɔkti ɛkkɛti te lɛmma pwadan, yeti yomg ɛkkɛntiyɛ, ɛkkɛn a ywobko. Ɛkkɛn noŋi ba ɛkkɛn pwatki ba kulin ɔɔn. Yeti ɛkkɛn pwadɔ bɛɛ. Ɛkkɛn a ywobk ba bowin. 16Ɔci ba jang ne ŋeeckiti ma te ṭɔlg ɛkkɛnyɛ, ɔci maka neeni ŋeeddɛ ɛkkɛ daŋkun te naŋki ɛkkɛn. Luutkin ṭɔlgɛn pwontan ma te toonti boki? Maka neeni noŋi naŋka pwadan gɛɛl bɛɛ. Ɔci ŋuap ṭɔlgɛn pwontan ma te janga balki kuwiti boki? 17Janga pwadin waakɛndayɛ, ɛkkɛn etti ṭɔlga pwadin. Ɔci janga yeyinyɛ, ɛkkɛn etti ṭɔlga yeyin daŋkun. 18Jana pwadanyɛ, ɛkɛ etti ṭɔlga yeyin bɛɛ. Jana yaayanyɛ, ɛkɛ etti ṭɔlga pwadin bɛɛ. 19Jang waakɛndayɛ, ɛkkin pwadin ŋeecɔn ma ɔci ɛkkin yeyin ŋeecɔn ma te ṭɔlga jiettan ɛkkɛny. Ɔci a ɔɔnyɛ, ma ŋeecɔn ma daŋkun te naŋki ɛkkɛn. Kan jang gɛɛg jied ṭɔlgɛn ne pwadan bɛɛyɛ, ɛkkɛn tɔɔttan ma iñɔ ɔci oltan ma maccu. 21“Maka boṭi ‘ya te tuggɛn budan agi, ‘Ciɛggɔnyɛ’, ɛkkɛn waakɛnda aga ma cyɛgji Jwaŋa Tolan awarɛ bɛɛ. Gena maka noŋi ba yom Wey ɔɔn ñaalɔ pɔliji ɛkkɛn aŋka a ma cyɛgji Jwaŋa Tolany. 22Ɔci te oŋŋa bɛya wanna ma gɛɛg gɔkti ‘yati agi, ‘I Ciɛggɔn, pari ɔɔn balgɔn loṭɔn ma te yenti i bɛɛ? Ɔci moki balgɔn koocɔn jɔkin yeyin bora ɔci noŋɔn naŋka tɛyan naŋka pookɛn te yenti i bɛɛ?’ 23Ɔci ‘ya gɔkca ɛkkɛnti ka ‘Ɛkkɛ ŋeejin ‘ya oŋgati a ma ‘ya bɛɛ. Ɛkkɛ maka ani naŋka yeyin nɛ, dala ɛkkɛ ɔgdɛ ooddɛ ɔntɔ te ‘yati wɛnni!’ 24“Tieŋdɛ jwalla ne ŋoyɔy, kan mena bala tyeŋi jyek ‘yayɛ, ɔci kan ɛkɛ noŋi ba jyeka loṭa ‘ya ma neeniyɛ, ɛkɛ bala ba ‘wana ñingɛ tɛyan. ‘Wana neeni on tuaŋŋɛ eññɛ ne iñɔ byɛliti. 25Ɔci ñaal bɛɛn ɔci jali yoŋŋin. Ɔci jwami bala wuopi ne tolan. Yeti on ḍɛmmin bɛɛ, acaan on tuaŋŋɛ weegɛn eññɛ ne iñɔ byɛliti. 26“Kan mena bala tyeŋi jyek ‘yayɛ, ɔci kan ɛkɛ noŋi ba jyeka loṭa ‘ya ma neeni bɛɛyɛ, ɛkɛ bala ba mena cɔti on ɛkɛ nona ŋɔmiti acaan ɛkɛ ñingɛ tɛy tɛy bɛɛ. 27Ɔci ñaal bɛɛn ɔci jali yoŋŋin. Ɔci jwami bala wuopi ɔci bala jiebi ono. Ɔci on ḍɛmmin iñɔ ne pɛñan, ɔci ḍakcin warda doki.” 28Ɔci ne Yaccu ḍookki te jyeka neeniyɛ, ɔci polla tolan neeniyɛ, ɛkkɛn buañi te jyeka loṭi ɛkɛ ma neeni. 29Ɔci ma korkɛn buañi acaan ɛkɛ bala loṭi ma ba mena war tɛɛn bala ɛkɛ bieŋɛti. Lali ɛkɛ bala ba lali ma ɛkkɛn maka loṭi worga Juaŋ neeni bɛɛ.

will be added

X\