Matta 6

1“Tieŋdɛ ‘wota, naa ɛkkɛ noŋɛ naŋki ɛkkɛ naŋka pwadin neeni ma ñingɛnti budan bɛɛ. Kan ɛkkɛ noŋɛ a ɔɔnyɛ, ne baaṭi Wey ɛkkɛ ñaalɔ pɔlijiyɛ, ɛkɛ ɛkkɛ ‘wondɛ genga te naŋki ɛkkɛ moki bɛɛ. 2“Kan ma ‘wondɛ ɛkkɛ waak a ‘woñgin budanyɛ, naa ɛkkɛn ‘wondɛ ba ‘woñgin maka noŋi ma ñingɛn neeni bɛɛ. Ma gɛɛgyɛ, ɛkkɛn ma ‘wontan waak a ‘woñgin oorga morki ma Juaŋti ɔci bora moki. Yeti ɛkkɛn ma ‘wontan waka neeni te yoma awarɛ bɛɛ. Ɛkkɛn noŋi a ɔɔn acaan ɛkkɛn buagɔn dala ma jieddi ɛkkɛn. Maka neeni ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. 3Kan ɛkkɛ ma ‘wondɛ waak a ‘woñgin budanyɛ, dala ɛkkɛ ɛkkɛn ‘wondɛ lieda ɔɔn. 4Ɔci kan a ɔɔnyɛ, Wey ɛkkɛ mena naŋka bala iñɔ ŋeejɛyɛ, ɛkɛ ɛkkɛ ‘wondɛ waka pwadin te naŋki ɛkkɛ neeni. 5“Tieŋdɛ ‘wota, ne ɛkkɛ cɔkɛyɛ, naa ɛkkɛ cɔkɛ ba maka noŋi ma ñingɛn neeni bɛɛ. Ɛkkɛn ani naŋki ɛkkɛn. Ɛkkɛn yɔɔtti ñaalɔ oorga morki ma Juaŋti ɔci bora daŋkun, ɔci ɛkkɛn cɔkti ma ñomgɛnti ɔɔn. Ɛkkɛn buagɔn dala ɛkkɛn yuartan ma ne ɛkkɛn cɔkki ɔɔn. Awarɛ, maka neeni ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. 6Yeti ne i cɔktiyɛ, dala i ootta orɔ on i ɔci i on tukɛ ciekca, ɔci i oŋ cɔkca Wey ɛkkɛ mena yuartan ma te woŋgɛn bɛɛ neeniti. Ɔci Wey ɛkkɛ mena waka korkɛn a coggin neeni yuartɛjiyɛ, ɛkɛ i ‘wondi waka pwadin. 7“Ɔci ne i cɔktiyɛ, naa i gɔkca jyeka coŋin jyeka budan neeni bɛɛ. Ma gɛɛg noŋi a ɔɔn acaan ɛkkɛn poŋi gɔki agi kan ɛkkɛn gɔktinti jyeka coŋinyɛ, Jwaŋa Tolan tieŋdɔ. 8Naa i noŋja ba naŋki ɛkkɛn neeni bɛɛ. Dala i cɔkca te jiek korka wɔkin budan. Waka baaw itiyɛ, ne i toonni Wey ɛkkɛti te ɛkkɛn men bɛɛyɛ, ŋeejɛ ɛkɛ doki ne waka neeni baaki iti ɔɔn. 9Dala i cɔkca a ɔɔn agi, ‘Wey ɔɔn, Weya ñaalɔ pɔliji, dala yenti i tola. 10Dala ma gɔrti i a Ciɛggɔn Tolan noon warda. Dala naŋka ṭaga i naŋayɛ, dala naŋa iñɔ baanji wɛnni bala ba naŋka naŋŋi i ñaalɔ pɔliji. 11Ɔɔn ‘wondɔn oomdin te oŋŋa neeni. 12Ɔci ɔɔn bɔɔktɔn te nɔji ɔɔn, bala ba maka pookɛn bɔɔktɔn ɔɔn te nɔjja naŋtan ɛkkɛn ɔɔnti. 13Naa ɔɔn daldɔn ooddɔn non jyeka yeyinti bɛɛ. Dala i ɔɔn magdɔn te Mena Yaayan neeni. (Acaan i a Ciɛggɔn Tolan noon warda, ɔci naŋka tɛyan bala iti. Ɔci pwani i moki bala. Ɔci waka neeni bala oŋkanda, baadi bɛɛ. Amɛɛn.)’ 14“Ba jyek cɔŋŋa neeniyɛ, kan ɛkkɛ ma bɔɔktɛ te jyeka damtan ɛkkɛn ɛkkɛtiyɛ, ɔci ɛkkɛ daŋkun bɔɔktɛ Wey ɛkkɛ Weya ñaalɔ pɔliji. 15Kan ɛkkɛ ma bɔɔktɛ bɛɛyɛ, ɔci ɛkkɛ da bɔɔktɛ Wey ikin Weya ñaalɔ neeni daŋkun bɛɛ. 16“Tieŋdɛ ‘wota, ma gɛɛgyɛ, ɛkkɛn noŋi ma ñingɛn. Ne ɛkkɛn gworki koñyɛ, ɛkkɛn ñingɛn a cungin acaan ɛkkɛn buagɔn dala taab ɛkkɛn ŋeettan ma waakɛnda ne ɛkkɛn gworki koñy. Ɛkkɛn ‘wondɛ Juaŋ genga te naŋki ɛkkɛn neeni bɛɛ. Jiɛta ɛkkɛn buagiti aŋka jiɛtiti ma wanna aŋi ba gen ɛkkɛn doki. 17Yeti kan ɛkkɛ gwoṭɛ koñyɛ, naa ɛkkɛ ñingɔ a cungin bɛɛ, dala ɛkkɛ jyeyi biidɛ, ɔci ñingɔ kuodɛ. 18Acaan naa gworŋ koñ neeni ŋeettan ma agi ɛkkɛ gworcɛ koñ bɛɛ. Dala ŋeeddɛ gena Wey ɛkkɛ mena yuartan ma te woŋgɛn bɛɛ neeni parɛ. Ɔci a ɔɔnyɛ, Wey ɛkkɛ mena waka korkɛn a coggin yuartɛji waakɛnda neeniyɛ, ɛkɛ ɛkkɛ ‘wondɛ waka pwadin te naŋki ɛkkɛ neeni. 19“Gɔṭṭɛ moki, naa yomg ɛkkɛ buagɔn ḍɔci waka coŋin waka pwadin wak ṭɛɛr wyeñɛ bɛɛ. Iñɔ ṭɛɛrji wɛnniyɛ, waak amdɛ bɔŋni ɔci dalŋaañan, ɔci moki kaltan maka ɛyi maka kaatti oorgti amaam neeni. 20Dala ɛkkɛ aŋka ḍɔccɛ waak ñaalɔ ban Jwaŋa Tolan. Waak amdɛ bɔŋni aŋan bɛɛ, walla amtan dalŋaañan bɛɛ, ɔci maka ɛyi kaatti aŋan koṭi waak bɛɛ. 21Nona ḍɔccɛ ɛkkɛ waakyɛ, ɛkkɛ yomgɔ bala aŋan daŋkun ne tolan. 22“Woŋgi i ñoṭi noon ñortan war i warda. 23Kan woŋgi i gɔṭi ne pwadanyɛ, war i yaakinti nona oddɛ ŋeeddɛ. Kan woŋgi i pwadɔ bɛɛyɛ, war i nona oddɛ ŋeeddɛ bɛɛ. 24“Mena noŋi kanŋa yaakinti tieŋdi jyek weyyɛn ne yyɛɛwɔ bɛɛ. Ɛkɛ dita yooktan te jyek weya parɛ neeni dita, ɔci andi gena jyek weya parɛ neeni dita. A ɔŋŋiyɛ, ɛkkɛ yaakɛti noŋdɛ ba jyek Jwaŋa Tolan yaakkɛn iki jyek yoma buagɔn waka budan neeni bɛɛ. 25“Yeti ‘ya ɛkkɛ myettin, dala ɛkkɛ paŋi jiek daldɛ te jyek coodi ɛkkɛ wɛnni, ɔci te jyek waka amdɛ ɛkkɛ, ɔci te jyek waka maaddɛ ɛkkɛ, ɔci te jyek bworŋin waak ɛkkɛ. Yeti dala ɛkkɛ yomgɔ ḍuattɛ gena Juaŋti acaan waka neeni ɛkkɛn a waka bala ñamu aŋka ɛkkɛ woŋgɔ caŋdɛ te ɛkkɛn bɛɛ. Jwaŋa Tolan yaakinti ɛkkɛ ‘wondɛ ɛkkɛn. Yeti tɛɛtin aŋka yɔmjin ne tolan te oomdin. Ɔci war aŋka yɔmjin ne tolan te bworŋin. 26Gɔṭṭɛ, ḍiirga peyi ñaalɔ neeniyɛ, ɛkkɛn dwoki pok bɛɛ. Ɔci ɛkkɛn ɛṭi pok bɛɛ. Ɔci ɛkkɛn pok ḍuattan tuotk jitin bɛɛ. Yeti Wey ɛkkɛ ñaalɔ pɔlijiyɛ, ɛkɛ ɛkkɛn ‘wondɛ waka amtan ɛkkɛn oŋkanda. Oŋ ɛkkɛ, ɛkkɛ pwadgɛ Juaŋti ne tolan te ḍiirg bɛɛ? 27Ɔci moki men gɛɛl ɛkkɛti yaakinti tɛɛtin ɛkɛ ‘uottɛti parɛ te paŋi jiek boki? 28“Ɛkkɛ poŋɛ jiek te waka ‘yɛŋdɛ ɛkkɛ ogo? Dala ɛkkɛ poŋdɛ te jyek pɛɛppin. Ɛkkɛn noŋi kanŋa bɛɛ. Ɛkkɛn wieyi twalg bɛɛ, yeti ɛkkɛn pwanna pwanno. 29Cɔlamanyɛ, ɛkɛ bala ɛŋi bworŋin pwadin ne tolan, yeti ɛkɛ buanɛ pɛɛppin te pwanno. 30Hay, ɛkkɛ, maka jyettɛ jyek Juaŋ ne ḍiɛran ṭɔɔlɛ budan nɛ, tieŋdɛ poca! Pɛɛppinyɛ, ɛkkɛn bala luom jitin, ɔci kan luom iin dokiyɛ, ɛkɛ tontan ma maañ ɔci pɛɛppin ḍakti ne pɛñan doki. Ɔci kan Juaŋ waka ḍyɛrin neeni naŋdɛ ɛkɛ pwanna pwani a ɔɔnyɛ, oŋ ɛkkɛ daŋkun, ɛkkɛ ‘wondɛ ɛkɛ waka ‘yɛŋdɛ ɛkkɛ bɛɛ? 31“Jyek waka amdɛ ɛkkɛ, ɔci jyek waka maaddɛ ɛkkɛ, ɔci jyek waka ‘yɛŋdɛ ɛkkɛyɛ, naa paŋi ɛkkɛn bala ñamu ɛkkɛ yomgɔti bɛɛ. Naa ɛkkɛ yomgɔ wiak te jyek waka neeni bɛɛ. 32(Maka a ma Juaŋ bɛɛyɛ, ɛkkɛn lieṭi waka neeni ne tolan.) Yeti ɛkkɛyɛ, kan waka neeni baaw ɛkkɛtiyɛ, ŋeejɛ Wey ɛkkɛ ñaalɔ pɔliji, ne waka neeni baaki ɔɔn. Ɔci ŋeejɛ ɛkɛ ɛkkɛ yaakɛti ciyɛ budan te waka neeni bɛɛ. 33Dala ɛkkɛ liertɛ jyek cyɛgji Jwaŋa Tolan ñamu, ɔci jyek naŋki ɛkɛ, naŋka pwadin neeni. Ɔci ɛkɛ ɛkkɛ ‘wondɛ waka ciedɛ ɛkkɛ neeni waakɛnda daŋkun. 34“A ɔŋŋiyɛ, naa ɛkkɛ poŋɛ cooŋɛ ñingɔ te jyeka ne liidɔ bɛɛ. Acaan ne liidɔ Jwaŋa Tolan ɛkkɛ ‘wondɛ waka ɛkkɛ buagɛ daŋkun. Oŋki waakɛndayɛ, yɔmjin menga da te paŋi ɛkɛ. Juaŋ ɛkkɛ magdɛ te naŋka bɛya ɛkkɛtiy.

will be added

X\