Matta 5

1Ne ɛkɛ gɔrni maka coŋin yuartɛ bɛɛti ɛkɛtiyɛ, ɛkɛ ati ñaalɔ poom wyeñɛti. Ɔci ne ɛkɛ coonni iñɔ aŋanyɛ, maka laldɛ ɛkɛ bɛɛn nona ɛkɛti. 2Ɔci Yaccu bala loṭi ɛkkɛn agi, 3“Maka poŋi gɔki agi ɛkkɛn a maka ḍyɛrin, acaan jyek Juaŋ ɛkkɛntiyɛ, ɛkkɛn yomgɛn pwanna pwanno, acaan ɛkkɛn aga ma cyɛgji Jwaŋa Tolan awarɛ. 4Maka wiak te nɔjiyɛ, ɛkkɛn yomgɛn pwaddi te muni Juaŋ ɛkkɛnti. 5Maka loomgɛn tɛyanyɛ, ɛkkɛn yomgɛn pwanna pwanno, acaan ne baaṭi bonka iñɔ ṭɛɛrji wɛnniyɛ, muktan ɛkkɛn byeŋkɛnti. 6Maka buagɔn naŋka pwadin ne pɛñanyɛ, ɛkkɛn yomgɛn pwanna pwanno, acaan naŋka pwadin neeni yuartan ɛkkɛn te Jwaŋa Tolanti. 7Maka yomg ɛkkɛn pɔktan maka pookɛntiyɛ, ɛkkɛn yomgɛn pwanna pwanno, acaan ne baaṭi Jwaŋa Tolan yomɛ pɔktɛ ɛkkɛnti daŋkun. 8Maka balki paŋŋa yaayan gɛɛl yomgɛnti bɛɛyɛ, ɛkkɛn yomgɛn pwanna pwanno, acaan ne baaṭi ɛkkɛn Juaŋ yuartan te woŋgɛn. 9Maka yɔŋi jyek maka yoyi ñin aŋka jiek baatiyɛ, maka neeni yomgɛn pwanna pwanno. Ɛkkɛn bardɛ Jwaŋa Tolan a kɛɛgin ɛkɛ. 10Maka balki taab te naŋka naŋtan ɛkkɛn pwadin neeniyɛ, ɛkkɛn yomgɛn pwanna pwanno. Ɛkkɛn aga ma cyɛgji Jwaŋa Tolan awarɛ. 11Kan ma ḍor ɛkkɛ ɔci noŋdi ne yaayan ɛkkɛti, ɔci ɛkkɛ jomtɛyɔ te jyeka coŋin acaan ɛkkɛ aŋŋɛ ma ‘yayɛ, ɛkkɛ yomgɔ pwanna pwanno. 12Dala ɛkkɛ gɔktɛ jiek te yoma pwadan. Dala ɛkkɛ yomgɔ ñɔya. Acaan ne ɛkkɛ ooddɛ bana ñaalɔ pɔlijiyɛ, waka pwadin yuardɛ ɛkkɛ te taab ɛkkɛ neeni. Maka a bɔwan Jwaŋa Tolan te baaṭiyɛ, ɛkkɛn naŋɛ ma ne yaayan a ɔɔn daŋkun. A ɔŋŋiyɛ, dala ɛkkɛ yomgɔ tɛya ɔci lɔktɛ ba naŋki ɛkkɛn. 13“Ɛkkɛ agɛ toli killan iñɔ baanji wɛnni. Yeti kan toli poli dokiyɛ, ɛkɛ moki coda a ɔki? Ɛkɛ yɔmdi te genga moki bɛɛ. Ɛkɛ paktan ma ɔntɔ te wɛɛlji, ɔci moortan ma iñɔ ciegɛnti. 14“Ɛkkɛ agɛ maña dɛki iñɔ baanji wɛnni. Kan bana tolan bala poom wyeñɛtiyɛ, ma yaakinti oorg coktanyɔ boki? 15Kan men gɛɛl dyɛka tondɛ maañyɛ, dyɛka kwomdɛwi ɛkɛ te piil boki? Hayɛllɛ! Dyɛka ḍuattɛ ɛkɛ ñaalɔ nona ḍɔcki ma ɛkɛ aŋka ɛkɛ on jiñɛ dyɛgdɛ warda. 16Ɔci ɛkkɛyɛ, ɛkkɛ balgɛ ba dyɛka. Dala mañ ɛkkɛ dɛkti ma ñomgɛnti ne pwadan. Ɔci a ɔɔnyɛ, ɛkkɛn gɔrti naŋki ɛkkɛ naŋka pwadin. Ɔci ŋeettan ɛkkɛn ɛkkɛ noŋɛ naŋka neeni aŋka Jwaŋa Tolan yomɛ pwada. Ɔci ɛkkɛn jieddi Wey ɛkkɛ, mena bala ñaalɔ pɔliji neeniy. 17“Ɛkkɛ ma gɛɛg kaapun poŋi gɔki agi ‘ya bɛɛn aŋka dala jyek ganuun ɔci jyek maka a bɔwan Jwaŋa Tolan baadi kaapun no. A’a. ‘Ya bɛɛn aŋka ma jyek ganuun daltan te tiid waakɛn bɛɛ. Yeti ‘ya bɛɛn aŋka jyeka lorki Muuca i maka a bɔwan Jwaŋa Tolan te bɛɛn ‘ya neeni lɛɛlla bora. 18Tieŋdɛ ɛkkɛ myettin ne pwadan. Jyeka bala worga ganuun Jwaŋa Tolanji waakɛndayɛ, ɛkkɛn yɔɔda bɛɛ, ɛkkɛn ‘uotti ñamu ne jyeka guaktan ɛkkɛn neeni bɛɛtɛ bora awarɛ ɔɔn. 19Kan men gɛɛl jwali Jwaŋa Tolan jwalla ḍiɛran gɛɛl lɛgdɛji ɔci kan ɛkɛ maka pookɛn laldɛ te naŋka neeni daŋkunyɛ, mena neeni ɛkɛ bartan ma a mena ḍiɛran ñaalɔ pɔliji ban cyɛgji Jwaŋa Tolan. Yeti mena noŋi ba jyek Jwaŋa Tolan ɔci ɛkɛ maka pookɛn laldɛ aŋka noŋdi ba jyeka neeni daŋkunyɛ, ɛkɛ aga mena tolan non cyɛgji Jwaŋa Tolan. 20“Tieŋdɛ, dala ɛkkɛ bwagdɛ naŋka Juaŋ yomɛ pwaddɛ ne pɛñan aŋka ɛkkɛ kaattɛ non cyɛgji Juaŋo. Dala bwakta maka loṭi worga Juaŋ ɔci ma Pɛriciin buakkɛti noŋtɛ ne pwadan Juaŋtiyɛ, bwandɛ bwakta ɛkkɛ buakkɛ noŋdɛ ne pwadan Juaŋtiy. 21“Ɛkkɛ tieŋnɛ ne Jiek gɔkki agi, ‘Naa i menga noga bɛɛ.’ Agi kan i menga nogjiyɛ, ne godan baldi jiek oltan ma i wyeñuti. 22Yeti ‘ya gɔkka ɛkkɛti waakida, kan men gɛɛl ɛkkɛti looñi moodɛntiyɛ, maka gɔṭi jiek yaakinti jiek oltan ɛkɛ wyeñɛti. Ɔci kan men gɛɛl wooki mod ɛkkɛnyɛ, maka gɔṭi jiek yaakinti jiek oltan ɛkɛ wyeñɛti. Ɔci kan men gɛɛl mod ɛkkɛn bardɛ agi amgɔnyɛ, dala ɛkɛ waŋɛ tiittɛ te jyek bana maaño. 23“Kan i orniti gena ɛrki ma waak Juaŋti, ɔci kan i noŋ ḍɔcca gen Juaŋti budanyɛ, ɔci kan i poŋni yomuti agi mod ɛkkɛ gɛɛl looñi iti te gengayɛ, 24dala gena ooni i Juaŋti neeni naa ḍuacca men bɛɛ. Ɔci dala i ootta jiek ywaŋdɛ iki mod ɛkkɛ neeni. Ɔci i oŋ ootta Juaŋ ‘woñga gena i ɛkɛ eeŋni neeni oŋo. 25“Kan men gɛɛl buagɔn godan iki iyɛ, ɔci ne ɛkkɛ balgɛ atɛ yomu menyɛ, dala i pocca gɔkca ɛkɛti, dala ɛkkɛ jiek ywaŋdɛ, aŋka naa i eedi ɛkɛ nona noŋki ma godan bɛɛ. Kan i eedi ɛkɛ aŋanyɛ, ḍuaŋa godan gɔkti bɔlinti, ɔci i eedi oldi ɛkɛ ciginji. 26’Ya gɔkka iti awarɛ ka i kooya bora ne pɛñan te ciginji bɛɛ. Yeti ne i bilk ‘wondi mena neeni waakɛnda ba dɛn iyɛ, ɔci i yaakiti kooya bora oŋo. 27“Ɛkkɛ tieŋnɛ ne Jiek gɔkki agi, ‘Naa ɛkkɛ noŋdɛ tomi bɛɛ.’ 28Yeti ‘ya gɔkka ɛkkɛti ka kan mena ‘uan gɔrti ɛŋ mena parɛti ɔci yom ɛkɛ buagɔn ɛkɛyɛ, a ɔŋŋiyɛ, ɛkɛ noŋi tomi ɛɛŋti doki yomɛti. 29Dala te i waŋu lɔlni bora ñamu wona i noŋdi nɔji men bɛɛy. Kan nɔji bala iti te naŋki waŋ i waŋa byerɔnyɛ, dala i ɛkɛ dɔdda bora, ɔci ɛkɛ yiɛpca ɔntɔ. Kan war i warda ooddi maccu te gena naŋŋɛ waŋ i neeniyɛ, a ɔɔn yaayɛ ne tolan. 30Dala te i bieŋu ŋunni ɔntɔ ñamu wona i noŋdi nɔji men bɛɛy. Ɔci kan nɔji bala iti te naŋki byeŋ i byeŋa byerɔnyɛ, dala i ɛkɛ ŋutca ɔntɔ ɔci yiɛpca ɔntɔ. Kan war i warda ooddi maccu te gena naŋŋɛ byeŋ i neeniyɛ, a ɔɔn pwatcin bɛɛ. 31“Jiek gɔki moki agi, ‘Kan men gɛɛl ɛŋ ɛkɛ daldɛyɛ, dala ɛkkɛn byeŋkɛn tantan ɔci dala ɛkɛ ɛɛŋ ‘wondɛ worga doortin bieŋɛti.’ 32Yeti ‘ya gɔkka ɛkkɛti, kan ɛɛŋ noŋi tomi bɛɛ, ɔci kan ɛkɛ daldɛ ‘war ɛkɛ te jwalla parɛ gɛɛlyɛ, a ɔɔnyɛ, ɛkɛ ɛɛŋ naŋŋɛ a ɛŋa toban doki kan ɛkɛ ḍɛɛtan ma mokiy. Ɔci kan ɛɛŋ dalnɛ ‘war ɛkɛ a ɔɔnyɛ, ɔci kan ‘wana parɛ ɛŋa neeni ḍɛɛdɛyɛ, ‘wana parɛ neeni noŋi tomi daŋkun. 33“Ɔci moki ɛkkɛ tieŋnɛ ne jiek gɔkki agi, ‘Naa ɛkkɛ jwali gɛɛl ḍuadɛ te yenti Juaŋ oŋ daldɛ te naŋki bɛɛ, yeti dala ɛkkɛ waka aalti ɛkkɛ Juaŋti naŋdɛ awarɛ.’ 34Yeti ‘ya gɔkka ɛkkɛti ka naa naŋka neeni bala ɛkkɛti bɛɛ. Naa ɛkkɛ aaltɛ te yenti pɔlla ñaalɔ bɛɛ, acaan pɔlla ñaalɔ neeniyɛ, gena nona ciyi Jwaŋa Tolan. 35Ɔci moki naa ɛkkɛ aaltɛ te yenti ṭɛra iñɔ wɛnni bɛɛ, acaan ṭɛra iñɔ neeniyɛ, gena nona ḍɔcci Juaŋ cieg ɛkɛ. Ɔci moki naa ɛkkɛ aaltɛ te yenti ban Urcaliim bɛɛ. Acaan Urcaliim neeniyɛ, ɛkɛ a ban ḍuaŋa tolan. 36Ɔci moki naa ɛkkɛ gɔktɛ genga awarɛ te wyetk ɛkkɛ bɛɛ. Acaan ɛkkɛ yaakɛti jieñan gɛɛl naŋdɛ aŋka bɔwa walla ula bɛɛ. 37Ne ɛkkɛ gɔktɛ jiekyɛ, dala ɛkkɛ gɔktɛ ne pwadan. Kan ‘Ɛɛ’, walla ‘A’a’. Jyeka pookɛnyɛ, ɛkkɛn bɛya te Jwaŋa Yaayanti. 38“Ɛkkɛ tieŋnɛ Jiek ne Jiek gɔkki agi, ‘Kan men gɛɛl waŋɛ yaañi te naŋki mena parɛyɛ, dala mena parɛ neeni yaatan ma waŋɛti daŋkun. Ɔci walla kan gena men lɛŋñɛ yaañi te naŋki mena parɛyɛ, dala mena parɛ neeni yaatan ma lɛŋñɛti daŋkun.’ 39Yeti ‘ya gɔkka ɛkkɛti kan men gɛɛl noŋi ne yaayan itiyɛ, naa i agdi mena yoyi ñin iki ɛkɛ bɛɛ. Kan men gɛɛl i jyɛbdi taaŋŋa byerɔntiyɛ, dala i taaŋŋa parɛ yalja daŋkun aŋka jyɛbdi ɛkɛ moki. 40Ɔci kan men gɛɛl i ‘yertiti te bworŋ iyɛ, dala ɛkɛ bworŋa parɛ bworŋ jwami eedɛ ɛkɛ daŋkun. 41Ɔci kan men gɛɛl ‘yeṭi i agi i ɛkɛ ‘yeetka pɔɔjɔ ba wɔɔka ne cyɛɛlɔyɛ, dala i ɛkɛ ‘yeetka wɔɔkan ne yyɛɛwɔ. 42Kan men gɛɛl buagɔn i ɛkɛ ‘woñga genga budanyɛ, dala i ɛkɛ ‘woñga ɔɔn. Ɔci kan men gɛɛl buagɔn i ɛkɛ ɔɔtka gengayɛ, naa i kɛkca ɛkɛti bɛɛ. 43“Ɛkkɛ tieŋnɛ ne jiek gɔkki agi, ‘Dala i anji maka ciejji iki i’ ɔci agi ‘i yojji ñin iki gena mena yojji ñin iki iy.’ 44Yeti ‘ya gɔkka ɛkkɛti, dala ɛkkɛ andɛ maka yoyyi ñin iki ɛkkɛy, ɔci dala ɛkkɛ cɔktɛ Juaŋti te maka noŋi ne yaayan ɛkkɛti neeni. 45Ɔci te naŋka pwadan neeniyɛ, pwani ɛkkɛ gorti bora ba Wey ɛkkɛ ñaalɔ pɔliji. Te naŋki ɛkɛyɛ, oŋ waŋɛ bala dɛki maka yeyinti ɔci maka pwadinti daŋkun. Ɔci ɛkɛ ñaal cuondɛ mati waakɛnda daŋkun, maka pwadinti ɔci maka yeyinti. 46Kan i an mena ani iyɛ, a ɔɔn a genga boki? I gena pwadan yuara te anna neeni boki? Maka a ɛyi lyemi tulba, (maka yooktan ñin ma neeni) ɛkkɛn yaakinti naŋka neeni daŋkun. 47Ɔci kan i ñiep a modg ɛkkɛ pookɛnyɛ, naŋki i neeni pwatcin te naŋki maka pookɛn boki? Maka kɛɛna pookɛn noŋi a ɔɔn bɛɛ? 48Gɔṭṭɛ, ɛkkɛyɛ, dala yomg ɛkkɛ kuma te ani ba yom Wey ɛkkɛ ñaalɔ pɔliji ɔɔn.

will be added

X\