Matta 4

1Ɔci Yaccu wɛɛññɛ Boŋ Jwaŋa Tolan bora wɔɔŋji aŋka ɛkɛ pɔɔdɛ Jwaŋa Yaayan. 2Ɔci ne Yaccu baali bora aŋan nink a ma baan ne yyɛɛwɔyɛ, (40) ɛkɛ ammɛ koñ acaan ɛkɛ ati budan te oomdin. 3Ɔci mena mooṭi ma bɛɛn ɛkɛti ɔci gɔkcin ɛkɛti agi, “Kan i a Kaci Jwaŋa Tolan awarɛyɛ, dala i gwoyi ṭɔlgɛn neeni agayɔ aga oomdin poca.” 4Ɔci Yaccu ṭwokcin ɛkɛti agi, “A’a, ‘ya noŋja a ɔɔn bɛɛ, acaan jyeka kiigin gɔki agi, ‘Ma ciyi tɛɛti te oomdin pookɛn budan bɛɛ. Ma ciyi tɛɛti te jyeka bɛya te Jwaŋa Tolanti waakɛnda.’” 5Ɔci Jwaŋa Yaayan neeniyɛ, ɛkɛ Yaccu eññɛ bana bartan ma a Urcaliim bana pwadan. Ɔci ɛkɛ Yaccu yɔɔnnɛ ñaalɔ nona buoran on Juaŋ ona tolan neeni wyeñɛti. 6Ɔci ɛkɛ gɔkcin agi, “Gɔṭṭi, ‘ya buaga gɔrca! Kan i a Kaci Jwaŋa Tolan awarɛyɛ, dala i waru yiebba iñɔ. Acaan jyeka kiigin gɔki agi, ‘Malɛɛkan ‘wondɛ Juaŋ kanŋa aŋka dala ɛkkɛn gɔṭi i. I makti malɛɛkan, ɔci i tworti pomk bɛɛ.’” 7Ɔci Yaccu gɔkcin ɛkɛti agi, “‘Ya gɔkka iti moki jyeka kiigin gɔki agi, ‘Naa i poci Ciɛggɔn i Jwaŋa Tolan bɛɛ.’” 8Ɔci Jwaŋa Yaayan moki Yaccu eññɛ ɔci yɔɔnnɛ ñaalɔ poma beyanti. Ɔci ɛkɛ Yaccu lɛɛrnɛ bonk waakɛnda baan konɛ warda ne ɛkkɛn pwatki a pwaniy. 9Ɔci ɛkɛ gɔkcin Yaccuti agi, “Kan i ḍwoñja iñɔ ɔci morca ‘yatiyɛ, i ‘wondin ‘ya waka neeni waakɛnda, ɔci i agdi ḍuaŋa ɛkkɛn waakɛnda.” 10Ɔci Yaccu gɔkcin ɛkɛti agi, “Hay Jwaŋa Yaayan, dala i ɔgdi ootta ɔntɔ te ‘yati wɛnni. Acaan jyeka kiigin gɔki agi, ‘Dala i morca gena Ciɛggɔn i Jwaŋa Tolanti parɛ. Dala i noŋja kanŋa ɛkɛ parɛ.’” 11Ɔci Jwaŋa Yaayan Yaccu dalnɛ, ɔci ɛkɛ ati, ɔci malɛɛkan gɛɛg bɛɛn ɔci Yaccu magɛ. 12Ɔci ne Yaccu tieŋni agi Yɔhanna muŋŋɛ mayɛ, ɛkɛ dɔɔki ban Jaliilji. 13Ɛkɛ ban Najarɛt dalnɛ, ɔci ɛkɛ ati cooccin Kapɛrnyamji Galŋ Jaliil ḍwaŋɛti. (Kapɛrnyam neeniyɛ, ɛkɛ cualcin ban Jɛbuluun ɔci ban Naptaliti.) 14Te coodi Yaccu aŋanyɛ, jyeka kiinɛ Icaaya mena a bɔwa Jwaŋa Tolan te bonka neeni bɛɛn bora. Ɛkɛ gɔki agi, 15“Bonk kɛɛn Jɛbuluun ɔci bonk kɛɛn Naptali bonka pɔya eetan ma Galŋ Jaliil ḍɔɔggɛti. Ɛkkɛn looncin ɔntɔ te Tol Urdunti. Ɛkkɛn bala nona tolan, nona yenti Jaliil. Bonk ɛkkɛnyɛ, a bonka cieki Keedin Pookɛn. 16Maka bala ciyi te nona mielti neeniyɛ, maña dɛki ne tolan yuarɛ ɛkkɛn dɛki ɛkkɛnti doki. Ɔci maka bala ciyi non lien nona ulanti neeniyɛ, noon bɔɔn ɛkkɛnti doki.” 17Ɔci te oŋŋa wannayɛ, Yaccu poccin lorcin ma agi, “Dala ɛkkɛ waakɔ yaldɛ acaan cyɛgji Jwaŋa Tolan cɔɔllin doki.” 18Ɔci oŋ gɛɛlti Yaccu bala ati goṭi Galŋ Jaliil ḍwaŋɛti. Ɔci ɛkɛ magga yuarŋɛ ɛkɛ ne yyɛɛwɔ a modin. Gena Cimaan mena bartan ma a Butruc, ɔci mod ɛkkɛn Andarawuc, ɛkkɛn mɔŋnɛ ɛkɛ bala wiewi morin galŋji, acaan ɛkkɛn a ma yako. 19Ɔci Yaccu gɔkcin ɛkkɛnti agi, “Bɛɛdɛ boottɛ ‘yati. Ɔci ‘ya ɛkkɛ naŋdin agdɛ maka etti ma ‘yati te jyek ‘ya.” 20Ɔci te oŋŋa wannayɛ, ɛkkɛn kanŋa ɛkkɛn dalji, ɔci ɛkkɛn ati bootcin Yaccuti. 21Ɔci ne Yaccu atti ñamu ne ḍyɛṭ ṭɔɔlɛyɛ, ɔci ɛkɛ ma gɛɛg mɔŋnɛ. Gena Jɛbadi i kɛɛgin ɛkɛ Yaakub ɔci Yɔhanna. Ɛkkɛn mɔŋnɛ ɛkɛ bala yɔŋi morin murka konɛti. Ɔci ɛkɛ ɛkkɛn bornɛ. Gena Yaakub kaci Jɛbadi, ɔci mod ɛkkɛn Yɔhanna. Ɛkkɛn bala murkaji i wey ɛkkɛn Jɛbadi. 22Ɔci te oŋŋa wannayɛ, ɛkkɛn murka ɛkkɛn dalji, ɔci wey ɛkkɛn moki dalji. Ɔci ɛkkɛn bootcin Yaccuti. 23Ɔci Yaccu ati bonka bala non Jaliil neeni boonnɛji waakɛnda. Ɔci ɛkɛ bala loṭi ma te jyeka wonkɛn jyeka pwadin oorga morki ma Juaŋo, ɔci loṭi ma te jyek cyɛgji Juaŋo. Ɔci ɛkɛ moki maka balki wajan ywaŋŋɛyɔ waakɛnda. 24Ɔci jyek ɛkɛ ati ban Cuurya konɛ warda. Ɔci maka waakɛn yeyin eyɛ ma nona Yaccuti. Maka eyɛ ma nona Yaccuti neeniyɛ, wajan jitkɛn a ḍiɛkan bɛɛ. Ma gɛɛg muogɛ jɔkin yeyin, ɔci gɛɛg naŋi amji leyi, ɔci gɛɛg bɔggɛn iin ɔci gɛɛg omgɛn iini. Ɔci maka neeni ywaŋŋɛ Yaccu waakɛnda. 25Ɔci aŋan ban Jaliilyɛ, ma bɛɛn boottin ɛkɛti a ḍiɛkan bɛɛ, kɔɔna kɔɔnno. Ma gɛɛg bɛɛn te ban Jaliil, ɔci gɛɛg bɛɛn te nona bartan ma a Bonka Ne Inyaakkɛn neeni, ɔci gɛɛg bɛɛn te ban Urcaliim, ɔci gɛɛg bɛɛn te bonka bala kuocɔ Tol Urdun pɔya bɛɛdi oŋ te liidɔy.

will be added

X\