Matta 3

1Te oŋŋa wannayɛ, Yɔhanna Mena Buoṭi Ma neeniyɛ, ɛkɛ bala loṭi ma wɔɔŋji ban Yahuudiya. 2Ɔci ɛkɛ gɔki agi, “Dala ɛkkɛ wiaktɛ te nɔji ɛkkɛ ɔci waakɔ yaldɛ acaan cyɛgji Jwaŋa Tolan cɔɔllin doki.” 3Yɔhanna neeniyɛ, ɛkɛ a mena guaŋŋɛ Juaŋ te tuk Icaaya, mena a bɔwa Jwaŋa Tolan agi, “Pwan men gɛɛl yaaddi wɔɔŋji gɔki agi, ‘Dala ɛkkɛ waakɔ ywaŋdɛ te bɛɛna bɛɛdɛ ḍuaŋa neeni. Dala pɔɔk ywaŋdɛ te bɛɛn ɛkɛ nina ne pwadan.’ ” 4Bworŋin Yɔhanna naŋɛ ma te jyeyi kolŋan. Ɔci buarñan ɛkɛ bala ḍyɛgdɛ tɛyɛti. Ɔci ɛkɛ bala omi ṭooŋgi ɔci cyeñ daŋkun. 5Ma Urcaliim, ɔci Ma Yahuudiya, ɔci maka bala non Tol Urdunyɛ, ɛkkɛn ɔɔccin ɛkɛti waakɛnda. 6Ɛkkɛn bala lɛɛṭi nɔji ɛkkɛn bora. Ɔci ɛkkɛn buullɛ Yɔhanna Tol Urdun. 7Ɔci ne ɛkɛ baali buoṭi mayɛ, ma Pɛriciin ɔci ma Cadyuciin bɛɛn ne coŋɔn buagɔn buldɛ ɛkɛ daŋkun. Yeti ŋeejɛ ɛkɛ ɛkkɛn waakɛn yali awarɛ te nɔji ɛkkɛn bɛɛ. Te wɛnni ɛkɛ gɔkcin ɛkkɛnti agi, “Ɛkkɛ agɛ laaban ba koggo hay! A menɛ ɛkkɛ myennɛ agi ɛkkɛ yooŋjɛ ɔntɔ te ywobja bɛya neenitiy? 8Kan ɛkkɛ waakɔ yallɛ awarɛyɛ, dala naŋka naŋdɛ ɛkkɛ bala ba naŋki maka waakɛn yali awarɛ. 9Ɔci naa ɛkkɛ poŋdɛ yomgɔti gɔktɛ agi ɛkkɛ uddɛ acaan Abrahim a yɔr ɛkkɛ bɛɛ. Juaŋ yaakinti noŋdi gwoyi ṭɔlgɛn aga kɛɛgin Abrahim! 10Acca ma bala tɔɔyi janga ṭɔlgɛn baaw te bɛɛkkɛnti doki, ɔci ɛkkɛ maka bala ba janga jied ṭɔlgɛn ne pwadan bɛɛ neeniyɛ, ɛkkɛ tɔɔttɛ Jwaŋa Tolan ɔntɔ, ɔci yiɛptɛ ɛkɛ maccu. 11“Maka waakɛn yali dokiyɛ, ‘ya buor ɛkkɛn te pieg budan. Yeti men gɛɛl bala bɛya ‘ya ŋoyutiyɛ, ɛkɛ tolcin te ‘ya. ‘Ya baal ba wɛyi ɛkɛ lulda eeda ‘ya byeŋkuti bɛɛ. Maka bootti ɛkɛtiyɛ, ɛkkɛn buldɛ ɛkɛ te Boŋ Jwaŋa Tolan. Yeti maka yookɔn ɔci bootti ɛkɛti bɛɛyɛ, ɛkkɛn tondɛ ɛkɛ maaño. 12Ɔci ne ɛkɛ bɛɛdiyɛ, ɛkɛ etti lɔɔlla bieŋɛti. Ɔci ɛkɛ tiitk kiɛptɛ ɔntɔ, ɔci ɛkɛ pok woodgɛn oldɛ jiju twoñji, ɔci tiitk tondɛ maaño. Ɔci maña neeni baadi ywongati bɛɛ.” 13Ɔci ne naŋka neeni baaniyɛ, Yaccu jɔŋŋin te ban Jaliil, ɔci ɛkɛ ati non Tol Urdun nona baali Yɔhanna aŋka ɛkɛ buldɛ Yɔhanna. 14Ɔci Yɔhanna kɛkcin ɛkɛti agi, “I bɛɛni buagi buldin ‘ya ogo? Dala ‘ya aŋka bulda i!” 15Ɔci Yaccu ṭwokcin ɛkɛti agi, “Dala ‘ya bulda i acca aŋka ikin noŋtin ba naŋka ṭagdɛ Jwaŋa Tolan.” Ɔci Yaccu oŋ buullɛ ɛkɛ oŋo. 16Ne Yaccu buullɛ Yɔhanna dokiyɛ, ɛkɛ kooyin bora te pietin kwaccin bɛɛ, ɔci ɛkɛ gɔrcin pɔli warɛ pɔŋnɛ, ɔci Boŋ Jwaŋa Tolan bɛɛn peewin iñɔ ba boom ɔɔn ɔci cooccin ɛkɛti. 17Ɔci pwan Jwaŋa Tolan bɛɛn te ñaalɔ pɔliji gɔki agi, “Mena neeniyɛ, ɛkɛ a Kaci ‘ya Kacca ana ‘yay. ‘Ya yomu pwanna pwani te ɛkɛ.”

will be added

X\