Matta 28

1Ɔci te liidi parɛ te tinnɔ ne Oŋ Cabit noŋi bɛɛdi bora, ɔci ne Oŋ Juaŋ cɔɔlniyɛ, ma ati kool wyeñɛti. Gena Moryam Magdalin ɔci Moryam parɛ moki. Ɛkkɛn buagɔn gɔrti kol Yaccu. 2Te oŋŋa wannayɛ, ṭɛɛr warɛ ḍiedan ne tolan. Šɛɛr warɛ ḍiedan a ɔɔn acaan malɛɛka Jwaŋa Tolan gɛɛl bɛɛn kooyin iñɔ te pɔliji, ɔci ɛkɛ guonan olnɛ ɔntɔ te kool tukɛti. Ɔci ɛkɛ cooccin iñɔ guonan wyeñɛti. 3Ɛkɛ yuarɛ ma ɛkɛ galla gali ba ñaal ne wildi a wildin ɔɔn. Bworŋin ɛkɛ bɔɔna bɔɔn ba tomŋin. 4Ɔci maka ackan maka kɛɛy kool tukɛ ne ɛkkɛn malɛɛka neeni yuarkitiyɛ, ɛkkɛn buañi ne tolan. Ɛkkɛn waakɛn ḍiedan ne pɛñan. Ɔci ɛkkɛn ḍɛɛmdin iñɔ bala ba maka tuutan doki. 5Ɔci malɛɛka mɔkci moong kool tukɛti. Ɔci ɛkɛ gɔkcin ɛkkɛnti agi, “Naa ɛkkɛ buayɛ bɛɛ. Çeej ‘ya ɛkkɛ lieṭɛ Yaccu mena nogɛ ma kakantiy. 6Ɛkɛ bala wɛnni moki bɛɛ. Ɛkɛ jɔŋŋin ñaalɔ doki ba jyeka guaŋŋɛ ɛkɛ te ñamuy. Bɛɛdɛ gɔrtɛ nona niini ɛkɛy. 7Ɔci dala ɛkkɛ ooddɛ ne pɛñan maka laldɛ Yaccu myettɛ agi ɛkɛ jɔŋŋin ñaalɔ te koolji doki. Gɔṭṭɛ, Yaccu ati ban Jaliil ñamu, ɔci ɛkɛ mɔktɛ ɛkkɛ aŋan! Tieŋdɛ, acca ɛkkɛ myennin ‘ya doki.” 8Ɔci ɛkkɛn kool dalji, ɔci ɛkkɛn ati ne pɛñan acaan ɛkkɛn buayi ne tolan, ɔci ɛkkɛn yomgɛn ñɔɔna ñɔɔn ne tolan daŋkun. Ɛkkɛn yiŋi maka laldɛ Yaccuti acaan ɛkkɛn buagɔn ɛkkɛn myettan te jyeka neeni. 9Ɔci ne ɛkkɛn balki yom menyɛ, Yaccu koogjin iki ɛkkɛn, ɔci ñiepcin ɛkkɛnti agi, “Hay, ɛkkɛ!” Ɔci ɛkkɛn bɛɛn ɛkɛti. Ɔci ɛkɛ mugɛ ɛkkɛn ciegɛti. Ɔci ɛkkɛn bala moṭi ɛkɛti. 10Ɔci Yaccu gɔkcin ɛkkɛnti agi, “Naa ɛkkɛ buayɛ bɛɛ. Dala ɛkkɛ ooddɛ modg ɔɔn myettɛ dala ɛkkɛn ooddi ban Jaliil, ɔci ɔɔn yɔɔrdɔn iki ɛkkɛn aŋan.” 11Ɔci ne moonga neeni atki baanjiyɛ, ɔci maka gɔṭi kool neeni gɛɛg ati bana tolanti neeni daŋkun. Ɔci ɛkkɛn gaciicin ḍwaŋin Ma Yahuud myetkɛ te naŋka neeni waakɛnda. 12Ɔci ne ɛkkɛn wyetkɛn ḍɔɔlkiti iki maka ḍwaŋinyɛ, ɛkkɛn ackan ‘woñgi bilk gɛɛg ne coŋɔn. 13Ɔci ɛkkɛn gɔkcin ɛkkɛnti agi, “Dala ɛkkɛ ma myettɛ agi, ‘Ma ɛkɛ bɛɛn weenji ne ɔɔn balgɔn wiccɔn meny, ɔci war ɛkɛ kali ɛkkɛn ɔntɔ.’ 14Ɔci kan ḍuaŋa ṭɔɔlɛ tieŋdi jyeka naŋŋin ikin acca ka ɛkkɛ kalkɛ nink neeniyɛ, ɔɔn gɔktɔn ɛkɛti ne pwadan, ɔci jiek bɛya ɛkkɛ wyetkɔti bɛɛ.” 15Ɔci ɛkkɛn bilk luulɛ. Ɔci ɛkkɛn ati ɔci bala gɔki ba jyeka guagɛ gaciicin ḍwaŋin Ma Yahuud ɛkkɛnti neeni. Ɔci jwali ati bonk Ma Yahuud korkɛnti, agi war Yaccu kalɛ ma te ween jiñɛ. Ɔci jyeka neeni bala ɛkkɛn tuggɛnti men ɔɔn. 16Ɔci ne pɛñan maka laldɛ Yaccu Maka Inyaakkɛn Wilin Ne Cyɛɛlɔyɛ, ɛkkɛn ati ban Jaliil nona poma guaŋŋɛ Yaccu ɛkkɛntiy. 17Ɔci ne ɛkkɛn ɛkɛ yuarkitiyɛ, ɛkkɛn morcin ɛkɛti. Yeti ɛkkɛn maka pookɛn gɛɛg tieki. 18Ɔci Yaccu bɛɛn ɔci ɛkɛ gɔkcin ɛkkɛnti agi, “Naŋka tɛyan naŋka ñaalɔ, ɔci naŋka iñɔ wɛnni ṭɛɛrjiyɛ, ɛkkɛn waakɛnda ‘wonna Juaŋ ‘ya bieŋuti. 19Gɔṭṭɛ! Dala ɛkkɛ ɔgdɛ ooddɛ bonk jitin waakɛnda, ɔci kɛɛn waakɛnda laldɛ. Ɔci ne ma gɛɛg jyettiyɛ, dala ɛkkɛ ɛkkɛn buldɛ te yenti Weegɛn, ɔci te yenti Kaci ɛkɛ, ɔci te yenti Boŋ Juaŋo. 20Maka jyeddi ɔci buldɛ ɛkkɛyɛ, dala ɛkkɛn noŋdi ba jyeka muŋŋɛ ɛkkɛ te ‘yati waakɛnda, ɔci tiitanyɔ. Ɔci gɔṭṭɛ, ikin balkin iki ‘ya oŋkanda ɔɔn aŋka ɛkkɛ magdin ne oŋŋa ciyɛ ɛkkɛ iñɔ ṭɛɛrji wɛnni baadi ɔɔn.”

will be added

X\