Matta 27

1Ɔci te liidɔ gaciicin ḍwaŋin ɔci maka ḍwaŋin Ma Yahuud bala gɔṭi jyek Yaccu. Ɛkkɛn buagɔn ɛkɛ noktan. 2Ɔci ɛkkɛn Yaccu ḍɛɛgɛ, ɔci eyɛ nona Bilaatuc mena a ḍuaŋa ṭɔɔlɛti aŋka ɛkɛ gɔkti jwali ɛkɛ te lyen Yaccu neeni. 3Ɔci Yahuuja mena Yaccu ‘wonnɛ ma byeŋkɛnti neeniyɛ, ne ɛkɛ gɔrni jiek bɛɛki Yaccu wyeñɛtiyɛ, ɛkɛ paŋi aaŋŋɛyɔ, ɔci bil pɔddan men baan mena parɛ byeŋkɛ (30) neeniyɛ, dɔɔŋnɛ ɛkɛ gaciicin ḍwaŋin ɔci maka ḍwaŋin Ma Yahuud. 4Ɔci ɛkɛ gɔkcin ɛkkɛnti agi, “‘Ya noŋi amaamo hay! Mena noŋi ne yaayan bɛɛyɛ, ‘wonnin ɛkkɛ byeŋkɛti budan!” Ɔci ɛkkɛn ṭwokcin ɛkɛti agi, “Jyeka neeni a jyek ɔɔn moki bɛɛ, aŋa iti paru.” 5Ɔci ɛkɛ bil pɔddan yiɛmnɛ iñɔ orɔ on Juaŋ ona tolanti. Ɔci ɛkɛ ɛkkɛn dolnɛyɔ te aŋan, ɔci ɛkɛ ati bora, ɔci ɛkɛ warɛ ŋaammɛ te yom yoño. 6Ɔci gaciicin ḍwaŋin Ma Yahuud bil pɔddan luollɛ ñaalɔ, ɔci ɛkkɛn gɔki agi, “Acaan jyek ganuun jyeka bala ikintiyɛ, ikin yaakinti bilka neeni ñaaktinyɔ iki bilk on Juaŋ ona tolan bɛɛ, acaan bilka neeni a bilk yimgo.” 7Ɔci ɛkkɛn bala gɔṭi jieko. Ɔci ɛkkɛn noon gɛɛl wiɛlɛ te bilka neeni. Gena nona wɛtki ma lommo. Ɔci nona neeni aŋi nona jokki ma maka bɛya te ɔntɔ te bonka pookɛntiy. 8Acaan a ɔŋŋiyɛ, nona neeni agɛ ma agi, “Non Bilk Yimgo.” Ɔci ma boṭi ɛkɛ acca men ɔɔn. 9Te naŋka neeniyɛ, jyeka guaŋŋɛ bɔwa Jwaŋa Tolan bɔwa yenti Jɛramaaya neeniyɛ, bɛɛn bora. Jɛramaaya gɔki agi, “Bil Pɔddan a men baan mena parɛ byeŋkɛ (30) neeniyɛ, lultan mako. Bil Pɔddan neeniyɛ, gena bil pɔddan guagɛ ma Icrayiil agi ɛkki agi toomk men baany. 10Ɔci ɛkkɛn nona wɛtki ma lomi wiɛlɛ te bil pɔddan neeni. Naŋka neeniyɛ, naŋɛ ma ba jyeka ‘ya nɔɔnnata Juaŋy.” 11Ɔci Yaccu bala yɔɔd ḍuaŋa ṭɔɔlɛ ñamɛti. Ɔci ḍuaŋa ṭɔɔlɛ tooccin ɛkɛti agi, “I a Ciɛggɔn Tolan Ma Yahuud?” Ɔci Yaccu ṭwokcin ɛkɛti agi, “Ɛɛ, ‘ya baal a ɔɔn ba jwalla guaga i wanna.” 12Gaciicin ḍwaŋin ɔci maka ḍwaŋin Ma Yahuudyɛ, ɛkkɛn bala jomi Yaccu warɛ agi ɛkta yaayɔ. Yeti Yaccu bala gɔki genga bɛɛ. Ɛkɛ bala ciyi lieda. 13Ɔci Bilaatuc gɔkcin ɛkɛti agi, “I tieŋŋa jyeka tiaktan ma te naŋki i naŋka coŋin neeni bɛɛ?” 14Yeti Yaccu bala ciyi lieda men ɔɔn. Ɛkɛ ṭwokcin jwali gɛɛl ne cyɛɛlɔ bɛɛ. Ɔci ḍuaŋa ṭɔɔlɛ yomɛ buaññi. 15Yuonginda ne iid bɛɛdiyɛ, naŋki ḍuaŋa ṭɔɔlɛ bala. Men gɛɛl mena bala ciginjiyɛ, ɛkɛ pɔktɛ ḍuaŋa ṭɔɔlɛ budan, wantan ma bɛɛ. Mena pɔktɛ ɛkɛ neeniyɛ, gena mena Ma Yahuud buagitiy. 16Te wɔɔka wannayɛ, mena ‘uan gɛɛl bala jiju yenti Baraabac. Ɛkɛ ŋeecɔn ma waakɛnda te naŋka naŋŋɛ ɛkɛ yaayan neeni. 17Ɔci te oŋŋa wannayɛ, ne ma wyetkɛn ḍɔɔlkiti nona ne cyɛɛlɔyɛ, Bilaatuc tooccin ɛkkɛnti agi, “Ɛkkɛ buagɛ ‘ya Baraabac pɔkka? Walla Yaccu mena bartan ma a Kiṭɔ aŋka pɔkka?” 18Bilaatuc tooccin ɛkkɛnti a ɔɔn acaan ŋeejɛ ɛkɛ Yaccu mugɛ gaciicin ḍwaŋin Ma Yahuud, ɔci owwɛ ɛkkɛn ɛkɛti, acaan ɛkkɛn korkɛn modɔ ɛkɛti. 19Ɔci ne Bilaatuc baali ciyi nona gɔṭi ɛkɛ jyek Yaccu menyɛ, ɛŋ ɛkɛ jwali gɛɛl cuonnɛ nona ɛkɛti agi, “Naa i noŋja genga ‘wana pwadanti neeni bɛɛ. Acaan ‘ya lokkan te ɛkɛ ne pɛñan ɔci ‘ya taabban ne tolan te loggin neeni.” 20Gaciicin ḍwaŋin ɔci maka ḍwaŋin Ma Yahuudyɛ, ɛkkɛn gɔkcin maka coŋinti agi dala ɛkki toottɔ Bilaatucti te gena Baraabac, ɔci agi dala ɛkki gɔktɔ agi Kiṭɔ aŋka nogdi mako. 21Ɔci ḍuaŋa ṭɔɔlɛ tooccin mati agi, “A menɛ te maka ne yyɛɛwɔ neeniti pɔkka ‘yay?” Ɔci ɛkkɛn ṭwokcin ɛkɛti agi, “Baraabac aŋka pɔkka!” 22Ɔci Bilaatuc tooccin ɛkkɛnti moki agi, “Oŋ kan a ɔɔn ‘ya noŋja a ɔki te Yaccu mena bartan ma a Kiṭɔ neeniy?” Ɔci ma ṭwokcin waakɛnda agi, “Dala ɛkɛ ŋaaptan ma ñaalɔ!” 23Ɔci Bilaatuc ṭwokcin ɛkkɛnti agi, “Ogo? Ɛkɛ noŋi gena yaayan gɛɛl boki?” Ɔci ma bala yaadan a yook gɔki agi, “Dala ɛkɛ ŋaaptɛ ñaalɔ!” 24Ɔci ne Bilaatuc gɔrni ma yookiti ne pɛñan, ɔci ne ɛkɛ gɔrni ma nuulki ne tolanyɛ, ɛkɛ mwonnin te jyek godan Yaccu. Ɔci ɛkɛ pieg luullɛ, ɔci ɛkɛ byeŋkɛ luaŋŋɛ ma ñomgɛnti. Ɔci ɛkɛ gɔkcin mati agi, “Gɔṭṭɛ, jyek lyen ‘wana neeni bala ‘yati moki bɛɛ, aŋa ɛkkɛti doki!” 25Ɔci ma waakɛnda ṭwokcin ɛkɛti agi, “Dala yimg ɛkɛ bala ɔɔn ḍɔɔggɔti, ɔci kɛɛgin ɔɔn ḍɔɔggɛnti daŋkun!” 26Ɔci Bilaatuc Baraabac pɔŋnɛ te ciginji. Yeti Yaccu ḍwayɛ ma te jyek Bilaatuc, ɔci ɛkɛ ma ‘wonnɛ Yaccu byeŋkɛnti aŋka eetan ŋaaptan ma. 27Ɔci Yaccu lwadɛ eyɛ ackan ḍuaŋa ṭɔɔlɛ eyɛ ɛkkɛn on ḍuaŋa ṭɔɔlɛti. Ɔci ackan pookɛn wyetkɛn ḍɔɔlɛ aŋan waakɛnda. 28Ɔci ɛkkɛn bworŋin Yaccu gwoddɛ bora, ɔci bworŋ cyɛgji bworŋa wiɛlɛ pɛñan bworŋa a buol ‘yɛɛŋji ɛkkɛn ɛkɛti. 29Ɔci kuwi paari ɛkkɛn naŋɛ a til ṭɔɔlɛ, ɔci ‘yɛɛŋjɛ Yaccu wyeñɛti. Ɔci gɔɔl olji ɛkkɛn ɛkɛ bieŋɛti byeŋa byerɔn. Ma bala ooddi ɛkɛti ɔci ḍwondi iñɔ ɛkɛ ñamɛti, ɔci bala juoli ɛkɛ. Ɛkkɛn gɔki agi, “I Ciɛggɔn Tolan Ma Yahuud! Dala i cied yuonginda!” Gɔ ɛkkɛn maka pookɛn moki atin ḍwoncin iñɔ ɛkɛ ñamɛti moki ɔɔn! 30Ɔci ɛkkɛn bala ŋuoṭi ñaang ɛkɛ ñingɛti. Ɔci ɛkkɛn gɔɔl luulɛ te Yaccu bieŋɛti, ɔci bala jiebi ɛkɛ wyeñɛ. 31Ɔci ne ɛkkɛn juolki ɛkɛ ne ḍookkiyɛ, bworŋ cyɛgji oŋ gwoddɛ ɛkkɛn bora oŋo. Ɔci ɛkɛ ɛɛŋgi bworŋin ɛkɛ dɔki. Ɛkkɛn bala ɛkɛ lwattan eetan nona ɛkɛ ŋaaptiti may. 32Ɔci ne ɛkkɛn balki atki borayɛ, ɛkkɛn koogjin iki mena ‘uan gɛɛl yomɔ. Ɛkɛ yenti Cimaan. Ɛkɛ a men maka ban Cayriin. Ɔci ackan neeni ɛkɛ iirci kɛṭi kakan Yaccu. 33Ɔci Yaccu eyɛ ma nona bartan ma agi Gɔlgata. (Te jyek Mabaan ma boṭi agi “Oon Men Baan Wyeñɛ.”) 34Ak jana cyɛyan ñaagɛyɔ ma i pyeg luutkin, ɔci ‘woñgi ma Yaccu. Ɛkɛ dɛccin, yeti motcin bɛɛ. 35Ɔci Yaccu ŋaapci ackan neeni ñaalɔ. “Ɔci ɛkkɛn bala oomi kɔla ba naŋki ɛkkɛn te bworŋin Yaccu. Ɔci ɛkkɛn bworŋin luulɛ ɛkkɛn.” 36Ɔci ɛkkɛn cooccin iñɔ bala gɔṭi Yaccu. 37Kan men ŋaaptan ma ñaalɔyɛ, jyek naŋka naŋŋɛ ɛkɛ yaayan aŋka ɛkɛ noktiti ma neeni kiittan ma ñaalɔ. Ɔci kiikan gɛɛg ḍuaccɛ ma ñaalɔ Yaccu wyeñɛti. Kiikan neeni gɔki agi, “YACCU A CIƐGGƆN TOLAN MA YAHUUD.” 38Ɔci Yaccu ŋaapci ma ñaalɔ iki maka ɛyi ne yyɛɛwɔy. Mena ne cyɛɛlɔ te ɛkɛ byeŋa aamo, ɔci mena ne cyɛɛlɔ te ɛkɛ byeŋa byerɔn. 39Ɔci maka bala goṭi pɔɔjɔyɛ, ɛkkɛn bala bɛṭi wyetkɛn, ɔci gɔki ne yaayan ɛkɛti agi, 40“I gɔk agi i yaakiti on Juaŋ ona tolan laagayɔ, ɔci i gɔk agi i ejja ɛka woonɛ, ɔci i gɔk agi ɛkɛ ḍaga i nink ne ḍoogɔ! Kan i ag Kaci Jwaŋa Tolan awarɛyɛ, dala i waru yɔya ɔci kooya iñɔ te kakanti!” 41Gaciicin ḍwaŋin Ma Yahuud ɔci maka loṭi worga Juaŋ ɔci maka ḍwaŋinyɛ, ɛkkɛn bala juoli Yaccu daŋkun. Ɛkkɛn gɔki agi, 42“Maka pookɛn yɔɔññɛ ɛkɛ, ɔci acca ɛkɛ kookinti te yɔɔd war ɛkɛ parɛ ogo? Pari ɛkɛ a Ciɛggɔn Ma Yahuud bɛɛ? Dala ɛkɛ koodi iñɔ te kakanti, ɔci ikin oŋ jyettin ɛkɛti oŋo! 43Ɛkɛ jyeti Juaŋti. Oŋ acca kan Juaŋ ani ɛkɛ awarɛyɛ, dala ɛkɛ magdɛ acca! Acaan ɛkɛ gɔki agi ɛkɛ agji Kaci Jwaŋa Tolan.” 44Ɔci maka ɛyi maka ŋaapci ma ñaalɔ iki Yaccuyɛ, ɛkkɛn bala gɔki ne yaayan Yaccuti daŋkun. 45Ɔci ne oŋ yɔɔnni yeccuyɛ, noon uli baan warda ne oŋ waŋɛ warɛ yiɛnnɛ ɔɔn. 46Ɔci ne oŋ waŋɛ warɛ yiɛnnɛ iñɔyɛ, Yaccu yaajjin te pwana tolan agi, “Ɛlɔy! Ɛlɔy! Lama cabaktani?” (Te jyek Mabaan agi, “Jwaŋ ‘ya, Jwaŋ ‘ya, i ‘ya dalna ogo?)” 47Ɔci maka yɔdi wɛnan gɛɛg tieŋŋin, ɔci ɛkkɛn gɔki agi, “Tieŋdɛ, ɛkɛ boor Iliiya!” 48Ɔci men gɛɛl yiŋi ɔci ɛkɛ liipa olnɛ mooya cyɛyanti. Ɔci liipa neeni umnɛ jaan tukɛti, ɔci ɛkɛ liipa neeni laŋnɛ ñaalɔ Yaccuti ‘wonnɛ Yaccu aŋka ɛkɛ motti. 49Ɔci maka pookɛn gɛɛg gɔki agi, “Yaccu daltin lakun hay! Ikin gɔrtin lakun kan Iliiya bɛya moki ɛkɛ kaapun no!” 50Ɔci Yaccu yaajjin te pwana tolan, ɔci ɛkɛ tuun doki. 51Ɔci te wɛnni bworŋa orɔ on Juaŋ ona tolan ḍañi jitin te ñaalɔ wyeñɛti ne iñɔ ɔɔn. Ɛkɛ toŋkɛ aŋi ne yyɛɛwɔ. Ɔci ṭɛɛr ḍiedan ɔci pomk booktin jitin. 52Ɔci kolk daŋkun waakɛn pɔɔggɛ. Ma Juaŋ maka bala kolk jitinyɛ, ɛkkɛn jɔŋŋin ñaalɔ te kolk jitin a ḍiɛkan bɛɛ. 53Ɔci ne baaṭi ne Yaccu jɔŋni ñaalɔ te kooljiyɛ, ɛkkɛn ati ban Urcaliim bana bartan ma a bana pwadan, ɔci ɛkkɛn yuarcɛ maka coŋin. 54Ḍuaŋa ackan, ɔci maka ackan daŋkunyɛ, ɛkkɛn bala gɔṭi Yaccu ne Yaccu baali kakanti meny. Ɔci ne ɛkkɛn gɔrki ṭɛɛr warɛ ḍiedi ɔci noon aŋŋi mielyɛ, ɛkkɛn korkɛn buañi ne tolan, ɔci ɛkkɛn gɔki agi, “Mena neeniyɛ, ɛkɛ a Kaci Jwaŋa Tolan awarɛ hay!” 55Ɔci moong gɛɛg bala ne coŋɔn. Ɛkkɛn bala yɔdi gɔṭi te nona loonan. Moonga neeniyɛ, gena moonga boottin Yaccu te ban Jaliily. Ɛkkɛn bala moki Yaccu oŋkanda. 56Moryam Magdalin bala. Ɔci Moryam mɛy Yaakubn ɔci Yuocip, ɛkɛ bala daŋkun. Ɔci ɛŋ Jɛbadi bala. 57Ɔci ne oŋ waŋɛ luunni iñɔyɛ, mena cyɛgan men maka ban Ɛrimatiiyayɛ, bɛɛni. Ɛkɛ yenti Yuocip. Ɛkɛ a mena laldɛ Yaccu daŋkun. 58Ɔci ‘wana neeni ati yɔɔtcin Bilaatuc ñamɛti, ɔci tooccin ɛkɛti te war Yaccu. Ɔci Bilaatuc gɔkcin mati agi, “Dala war Yaccu eedda Yuocip.” 59Ɔci war Yaccu oonɛ Yuocip iñɔ te kakanti. Ɔci ɛkɛ paarŋɛyɔ te bworŋa pwadan tɛyan. 60Ɔci ɛkɛ war Yaccu joŋnɛ koolji. Gena kola wɔrŋɛ Yuocip poom konɛti te war ɛkɛ parɛ ne ɛkɛ tuudiy. Ɔci ɛkɛ guonan tolan gɛɛl ñienɛ olnɛ kool tukɛti ɔɔn, ɔci ɛkɛ atti. 61Moryam Magdalin ɛkkɛn iki Moryam parɛyɛ, ɛkkɛn bala ciyi iñɔ aŋan kool taaŋɛti. 62Ɔci ne liidɔ te Oŋ Cabityɛ, gaciicin ḍwaŋin Ma Yahuud i ma Pɛriciin ɛkkɛn wyetkɛn ḍɔɔlɛ, ɔci ati Bilaatucti waakɛnda. 63Ɔci ɛkkɛn gɔkcin ɛkɛti agi, “Ḍuaŋa, ɔɔn balgɔn poŋɔn te jyeka guaŋŋɛ Yaccu mena a laaban wanna ne ɛkɛ baali meny. Ɛkɛ gɔki agi ne nink ne ḍoogɔ bɛɛti borayɛ, ɛkɛ jɔŋji ñaalɔ te lienti. 64Acaan a ɔŋŋiyɛ, dala i ackan yɔɔtca kool wyeñɛti aŋka ɛkɛ gwaltan ne pwadan ne nink ne ḍoogɔ bɛɛti bora ɔɔn. Kan ackan baawyɛ, maka laldɛ Yaccu bɛya dita, ɔci war ɛkɛ kaltan ɛkkɛn. Ɔci ɛkkɛn gɔkti mati agi Yaccu jɔŋnɔ ñaalɔ te lienti. Kan ɛkkɛn noŋdi a ɔɔnyɛ, jiek pɛɛddi ne tolan. Naŋka ɛkkɛn ma naŋkɛti ñingɛn te jyek Yaccu te ñamuyɛ, bwandɛ naŋka ɛkkɛn ma naŋtɛti ñingɛn ŋoyɔ neeni.” 65Ɔci Bilaatuc gɔkcin ɛkkɛnti agi, “Hay! Dala ɛkkɛ ooddɛ iki ackan, ɔci dala ɛkkɛ jyek kool naŋdɛ ɛkkɛ ne pwadan.” 66Ɔci ɛkkɛn ati, ɔci guonan bala kool wyeñɛti neeniyɛ, naŋɛ ɛkkɛn lɛkɛti te kɛtim aŋka naa ɛkɛ oltan ma ɔntɔ bɛɛ. Ɔci ackan yɔɔtci ɛkkɛn kool wyeñɛti.

will be added

X\