Matta 26

1Ɔci ne Yaccu ḍookki te jyeka neeniyɛ, ɛkɛ gɔkcin maka laldɛ ɛkɛti agi, 2“Gɔṭṭɛ, ŋeejɛ ɛkkɛ ne nink ne yyɛɛwɔ bɛɛti borayɛ, ɔci Iid Malɛɛka Lien Bɛɛn Goṭi a Gorŋ bɛya. Ɔci ‘ya Kaci Ma Baan ‘wonta ma maka yookɔn te ‘ya byeŋkɛnti ɔci ‘ya ŋaapta ɛkkɛn ñaalɔ jana kakanti.” 3Te oŋŋa wannati ɔɔnyɛ, gaciicin ḍwaŋin Ma Yahuud ɔci maka ḍwaŋinyɛ, ɛkkɛn wyetkɛn ḍɔɔlɛ nona ne cyɛɛlɔ nona gaciic tolan Ma Yahuudti. Gena on mena bartan ma agi Kayapac. 4Ɛkkɛn bala lieṭi pɔya ɛkkɛn Yaccu muktiti lieda ɔci noktitiy. 5Ɔci ɛkkɛn gɔki agi, “Naa ɛkɛ muktin noktin te oŋ iid bɛɛ, acaan maka coŋin neeni nuula dita ikinti.” 6Yaccu bala ban Bɛtani ban Cimaann mena naŋŋɛ cyɛc te ñamuy. 7Ɔci ne ɛkkɛn balki cieki omki menyɛ, mena ɛɛŋ gɛɛl bɛɛn Yaccuti. Ɛŋa neeni eccin piinŋan wiɛlɛ tɛyan te luañgɔn ṭɔɔlɛ. Ɔci ɛkɛ piinŋan neeni pwoŋnɛ Yaccu wyeñɛti ne Yaccu baali omi men ɔɔn. 8Ɔci maka laldɛ Yaccu ne ɛkkɛn gɔrki naŋka neeniyɛ, ɛkkɛn looñjin. Ɔci ɛkkɛn gɔki agi, “Ɛkɛ piinŋan neeni ñiennɛ ɔntɔ budan ogo yeti? 9Dala te piinŋan neeni wiɛlji ma bora te bilk ne coŋɔn aŋka mokki ma maka bɔwan.” 10Paŋi ɛkkɛn neeni ŋeejɛ Yaccu. Ɔci ɛkɛ gɔkcin ɛkkɛnti agi, “Ɛkkɛ ɛɛŋ daldɛ hay! Ɛkkɛ wookɛ ɛkɛ budan a ɔɔn ogo? Ɛkɛ noŋi gena pwadan ‘yati. 11Maka bɔwan balgi iki ɛkkɛ yuonginda ɔɔn. Yeti ‘yayɛ, balkin iki ɛkkɛ yuonginda bɛɛ. 12Naŋka naŋŋɛ ɛkɛ ‘ya juonatayɔ te piinŋan neeniyɛ, bala ba naŋka naŋtan ma maka tuwatiy. 13Tieŋdɛ ɛkkɛ myettin ne pwadan! Noon warda nona maka loṭi ma te jyek ‘ya oottiyɛ, ɔci jyek ɛŋa neeni ooddi daŋkun. Ɔci ma ñingɛn ñiektan te naŋki ɛkɛ.” 14Ɔci Yahuuja Ickɛɛryuti mena akki Ma Ne Inyaakkɛn Wyetkɛn Ne Yyɛɛwɔyɛ, ɛkɛ ati gaciicin ḍwaŋin Ma Yahuudti. 15Ɔci ɛkɛ tooccin ɛkkɛnti agi, “Kan ɛkkɛ ‘wondin ‘ya Yaccu byeŋkɔtiy, oŋ ɛkkɛ ‘ya ‘wondata gena?” Ɔci ɛkkɛn gɔkcin ɛkɛti agi, “I ‘wonti ɔɔn bil pɔddan a men baan mena parɛ byeŋkɛ (30).” 16Ɔci te oŋŋa wanna ɔci oŋkanda ɔɔnyɛ, Yahuuja bala lieṭi pɔya ɛkɛ ma ‘wondɛ Yaccuy. 17Ɔci oŋ Iid Malɛɛka Lien Bɛɛn Goṭi a Gorŋ bɛɛni. Ɔci iid neeni gena Iid Ma Omki Byedga Polany. Ɔci maka laldɛ Yaccu gɔkcin ɛkɛti agi, “I buagi ɔɔn ooddɔn wak iid ywaŋdɔnyɔ wɛnɛ te ikin?” 18Ɔci Yaccu gɔkcin ɛkkɛnti agi, “Dala ɛkkɛ ooddɛ bana tolan Urcaliimji, ɔci ooddɛ on ‘uan gɛɛl bala wɛnan. Dala ɛkkɛ gɔktɛ ɛkɛti agi, ‘Mena Loṭi Ma gɔki agi oŋ ɛkɛ cɔɔlnɔ doki. Ɔci agi ɛkɛ buagiti noŋji iid ban ɛkkɛ iki ɔɔn maka lalji ɛkɛy.’ ” 19Ɔci maka laldɛ Yaccu jɔŋŋin, ɔci ati ba jyeka guaŋŋɛ Yaccu ɛkkɛnti. Ɔci ɛkkɛn wak iid ywaŋɛyɔ. 20Ɔci ne oŋ waŋɛ luunni iñɔyɛ, Yaccu cooccin iñɔ omi iki maka laldɛ ɛkɛ, maka ne inyaakkɛn wyetkɛn ne yyɛɛwɔ neeni. 21Ɔci ne ɛkkɛn balki omki menyɛ, Yaccu gɔkcin ɛkkɛnti agi, “‘Ya gɔkka ɛkkɛti awarɛ, men gɛɛl bala ɛkkɛti wɛnni ɛkɛ ‘ya ‘wonda maka yookɔn te ‘ya byeŋkɛnti.” 22Ɔci ɛkkɛn yomgɛn yiegin te jwalla guaŋŋɛ Yaccu neeni. Ɔci ɛkkɛn bala tooci Yaccuti waakɛnda agi, “I Ciɛggɔn, a ‘ya?” Gɔ menan moki toocci ɔɔn. 23Ɔci Yaccu gɔki agi, “Mena omin iki ‘ya ḍwana ne cyɛɛlɔyɛ, gena ɛkɛ ‘ya ‘wonda ma byeŋkɛntiy. 24’Ya Kaci Ma Baan tuud ba jyeka kiiwɛ ma te ‘ya. Yeti mena ‘ya ‘wonda ma byeŋkɛnti neeniyɛ, taab bɛya ɛkɛtiyɛ, tol tolo! Naa te ɛkɛ jiennɛ mɛɛgɛn bɛɛ!” 25Ɔci Yahuuja Ickɛɛryuti mena Yaccu ‘wonnɛ ma byeŋkɛnti neeniyɛ, tooccin Yaccuti agi, “Mena loṭi may, a ‘ya?” Ɔci Yaccu ṭwokcin ɛkɛti agi, “Ɛɛ, gena i.” 26Ɔci ne ɛkkɛn balki omki menyɛ, Yaccu byentan luullɛ, ɔci ɛkɛ cɔkcin Juaŋti. Ɔci ɛkɛ am wɛɛnnɛ jitin. Ɔci ɛkɛ maka laldɛ ɛkɛ ‘wonnɛ amo. Ɔci ɛkɛ gɔkcin ɛkkɛnti agi, “Antɛ omdɛ. Gena war ‘ya.” 27Ɔci ɛkɛ kubaaya pyeg luutkin luullɛ daŋkun. Ɔci ɛkɛ gɔkcin a pwatcin Juaŋti. Ɔci ɛkɛ ma ‘wonnɛ kubaaya, ɔci gɔkcin ɛkkɛnti agi, “Dala ɛkkɛ waakida mottɛ waka bala kubaaya konɛti neeni. 28Waka neeni bala ba yimg ‘ya ne kɛɛti iñɔ te ma waakɛnda aŋka dɛn nɔji ɛkkɛn baadi. Acaan Juaŋ gɔki agi te yimg ‘ya neeni ɛkɛ ma bɔɔkcɛ te nɔji ɛkki. 29’Ya gɔkka ɛkkɛti, ‘ya motca pyeg jang ṭɔlgɛn acca wɛnni moki bɛɛ. ‘Ya cied budan ɔɔn ne ‘ya motta ɛkkɛn wonkɛn iki ɛkkɛ a cyɛɛlɔ non cyɛgji Wey ɔɔnti.” 30Ɔci ne ɛkkɛn ‘ualki ɔɔli gɛɛlyɛ, ɛkkɛn kaaccin bora ɔci ati Pom Jɛtuunti. 31Ɔci Yaccu gɔkcin maka laldɛ ɛkɛti agi, “Acca te ween jiña neeniyɛ, ɛkkɛ buadɛ ma ɔci ḍɛɛmdɛ iñɔ waakida. ‘Ya daldata ɛkkɛ paru. A ɔɔnyɛ, bala ba jyeka kiigin ne gɔkki agi, ‘Mena cieti kulin ḍuadɛ Juaŋo, ɔci kulin cyɛndi jitin.’ 32Ɔci ne ‘ya jɔŋda ñaalɔ te lientiyɛ, ‘ya ootta ban Jaliil, ɔci ikin yɔɔrtin aŋan moki.” 33Ɔci Butruc gɔkcin Yaccuti agi, “Gɔṭṭi, kan ɛkkɛn ḍɛɛmdi iñɔ waakɛndayɛ, ‘ya i daldin bɛɛ!” 34Ɔci Yaccu gɔkcin ɛkɛti agi, “Tieŋŋa i myettin ‘ya ne pwadan! Te ween jiña neeni ne tuan wiakti men bɛɛyɛ, i kɛkka te ‘ya oŋki aga ne ḍoogɔ doki.” 35Ɔci Butruc gɔkcin ɛkɛti agi, “Kan ma buagɔn noki ‘ya iki iyɛ, ‘ya kɛkka te i bɛɛ!” Maka laldɛ Yaccu maka pookɛn neeniyɛ, ɛkkɛn bala gɔki a ɔɔn daŋkun. 36Ɔci Yaccu dɛnjin nona bartan ma a Gɛtcɛɛmani i maka laldɛ ɛkɛy. Ɔci Yaccu gɔkcin maka laldɛ ɛkɛti agi, “Ɛkkɛ coottɛ wɛnni ‘ya ootta ñamu cɔkca Jwaŋa Tolanti.” 37Butruc ɔci Yaakub ɔci Yɔhanna eññɛ ɛkɛ. Ɔci Yaccu yomɛ yaayɛ ne tolan. 38Ɔci Yaccu gɔkcin maka ne ḍoogɔ neeniti agi, “‘Ya yomu yaayɛ ne tolan bala ba ‘ya tuuda tuun doki no. Dala ɛkkɛ yaddɛ te wɛnni. Ɔci dala ikin woŋgɔ tiittin ne pwadan iki ‘ya a cyɛɛlɔ.” 39Ɔci Yaccu ati ñamu parɛ ne ḍiɛran ṭɔɔlɛ, ɔci ɛkɛ niinjin konɛ baaŋnɛ iñɔ ṭɛɛrji. Ɔci ɛkɛ cɔkcin Juaŋti agi, “Wey ɔɔn, kan pwatcin itiyɛ, naa taab neeni bɛya ‘yati bɛɛ! Yeti ‘ya cɔkka iti ba yom ‘ya bɛɛ. ‘Ya cɔkka iti ba yom i.” 40Ɔci Yaccu bɛɛn dɔɔkkin nona maka laldɛ ɛkɛti, ɔci ɛkkɛn mɔŋnɛ ɛkɛ wicɔ. Ɔci ɛkɛ gɔkcin Butructi agi, “Butruc, i yaakiti waŋu tiicca te wɔɔka gɛɛl ne cyɛɛlɔ iki ‘ya bɛɛ? 41Dala ɛkkɛ woŋgɔ tiittɛ aŋka naa ɛkkɛ ḍɛɛmdɛ iñɔ te maali Jwaŋa Yaayan bɛɛ. Ɛkkɛ yomgɔ buagɔn jyek ‘ya, yeti ɛkkɛ waakɔ koy koyo.” 42Ɔci Yaccu ɛkkɛn dalnɛ. Ɔci ɛkɛ ati ñamu moki, ɔci ɛkɛ cɔkcin Juaŋti moki agi, “Wey ɔɔn, kan i buagiyɛ, dala i noŋja naŋki i aŋka naa taab neeni bɛya ‘yati bɛɛ. Yeti ‘ya cɔkka iti ba yom ‘ya bɛɛ. ‘Ya cɔkka iti ba yom i.” 43Ɔci ne ɛkɛ bɛɛni mokiyɛ, ɛkɛ ma mɔŋnɛ wiccin moki. Ɛkkɛn yaakinti ṭiedi bɛɛ. 44Ɔci Yaccu ɛkkɛn dalnɛ, ɔci ɛkɛ ati cɔkcin Juaŋti moki oŋki aŋi ne ḍoogɔ doki. Ɔci ɛkɛ cɔkcin ba cɔŋŋa cɔŋni ɛkɛ te oŋŋa akki ne yyɛɛwɔ wanna moki ɔɔn. 45Ɔci ɛkɛ bɛɛn maka laldɛ ɛkɛti moki, ɔci gɔkcin ɛkkɛnti agi, “Ɛkkɛ balgɛ wiccɛ men? Ɛkkɛ wookkɛ doki bɛɛ? Gɔṭṭɛ, wɔɔka bɛɛn doki! ‘Ya Kaci Ma Baan baldi byeŋ maka nɔɔtkti doki. 46Jɔŋdɛ ñaalɔ oottin. Gɔṭṭɛ, mena ‘ya ‘wonda ma byeŋkɛnti bɛɛn doki!” 47Ɔci ne Yaccu baali gɔki a ɔɔn menyɛ, Yahuuja Ickɛɛryuti bɛɛn ɛkɛti doki. Ɔci ma bɛɛn i ɛkɛ kɔɔna kɔɔnno. Ɛkkɛn bala eci byeŋgaaran byeŋkɛnti ɔci eci gɔlk byeŋkɛnti. Maka neeni bɛɛn te jyek gaciicin ḍwaŋin ɔci maka ḍwaŋin Ma Yahuud. 48Mena Yaccu ‘wonnɛ ma byeŋkɛnti neeniyɛ, ɛkɛ jiek naŋɛ iki ma te ñamu agi, “Mena ñiibdi ‘ya te tuku ba naŋki ma ikinyɛ, gena ɛkɛ neeni. Ɔci dala ɛkɛ mugdɛ doki!” 49Ɔci ne Yahuuja bɛɛniyɛ, ɛkɛ ati Yaccuti ne pɛñan, ɔci gɔkcin ɛkɛti agi, “I Ciɛggɔn, i baal ciyɛ?” Ɔci ɛkɛ Yaccu ñiimmɛ te tukɛ. 50Ɔci Yaccu gɔkcin ɛkɛti agi, “Mug ɔɔn, gena i bɛɛni buagi aŋka naŋa iyɛ, dala naŋa!” Ɔci ma ati Yaccuti ɔci ɛkɛ mugɛ. 51Ɔci men gɛɛl mena bala Yaccutiyɛ, ɛkɛ byeŋgaaran dɔnnɛ bora te kuorjɛti, ɔci ɛkɛ mena kanŋan i gaciic tolan jyɛmmɛ jyeñɛ palnɛ bora. 52Ɔci Yaccu gɔkcin ɛkɛti agi, “Byeŋgaaran duakca non ɛkɛti. Maka noowɔ te byeŋgaaranyɛ, ɛkkɛn da tuwa te lañ byeŋgaaran. 53Çeej i boki, kan ‘ya buagayɛ, ‘ya yaakati toocca Wey ɔɔnti te malɛɛkan, ɔci ‘ya cuonda ɛkɛ malɛɛkan a alpn coŋgin a coŋgin aŋka ɛkkɛn ‘ya kɛɛtayɔ! 54Yeti kan ‘ya noŋja a ɔɔnyɛ, oŋ jyeka kiigin jyeka gɔki te naŋka neeni waakɛnda bɛya bora a ɔki?” 55Ɔci ne ɛkɛ baali eetiti ma a ɔɔnyɛ, ɛkɛ gɔkcin maka coŋinti agi, “Ɛkkɛ bɛɛnɛ ennɛ byeŋgaaran, ɔci gɔlk byeŋkɔti aŋka ‘ya mugdata ɛkkɛ ba muŋi mena ɛɛn ogo? Oŋkanda ‘ya baal ciy iñɔ on Juaŋ ona tolanti lor ma bɛɛ? Oŋ ba ɛkkɛ ‘ya muŋŋata aŋan bɛ? 56Yeti naŋka neeni bɛya bora waakɛnda ba jyeka kiiwɛ maka a bɔwan Jwaŋa Tolan te ñamu dokiy.” Ɔci maka laldɛ Yaccuyɛ, Yaccu dalji, ɔci ɛkkɛn yiŋi ɔntɔ waakɛnda. 57Maka loṭi worga Juaŋ ɔci maka ḍwaŋin Ma Yahuudyɛ, ɛkkɛn wyetkɛn ḍɔɔlɛ on Kayapac. Ɔci maka Yaccu mugɛ neeniyɛ, ɛkkɛn Yaccu lwadɛ eyɛ nona ciyi Kayapac mena gaciic tolan Ma Yahuud neeni. 58Ɔci Butruc ɛkɛ bala bɛya booti te ŋoyɔ nona loonan ne ɛkɛ dɛnni kaañji kañ gaciic tolan Ma Yahuudti neeni ɔɔn. Ɔci ɛkɛ kaaccin jiju kaañji ɔci cooccin iñɔ i maka kanŋan iki gaciicin Ma Yahuud. Ɛkɛ buagɔn gɔrti ne jiek naŋtiti ma a ɔkiy. 59Gaciicin ḍwaŋin Ma Yahuud ɛkkɛn iki Maka Gɔṭi Jiekyɛ, ɛkkɛn bala lieṭi jwalla pwadan, jwalla eetan ɛkkɛn ḍuaŋa ṭɔɔlɛti aŋka Yaccu noktiti ɛkkɛny. 60Maka coŋin Yaccu jomgiyɔ, yeti ɛkkɛn jwalla Yaccu jomkitiyɔ neeniyɛ, yɔmjin bɛɛ, bɔɔnjin. Ɔci ne baaṭi maka jomi jiek gɛɛg bɛɛn ne yyɛɛwɔ, ɔci ɛkkɛn gɔki agi, 61“‘Wana neeniyɛ, ɛkɛ gɔki agi ɛkɛ yaakinti on Juaŋ ona tolan laagjiyɔ, ɔci agi ɛkɛ cɔtci ona woondan. Ɔci agi ɛkɛ on Juaŋ ona tolan ona woondan neeni ḍagjɛ te cɔni te nink ne ḍoogɔ.” 62Ɔci gaciic tolan Ma Yahuud jɔŋŋin ñaalɔ ɔci gɔkcin Yaccuti agi, “I ṭwokka jwali gɛɛl bɛɛ? Jyeka i tiakkitiyɔ ma neeni a jyeka awarɛ?” 63Ɔci Yaccu cien lieda. Ɔci gaciic tolan Ma Yahuud gɔkcin ɛkɛti agi, “‘Ya gɔkka iti te yenti Jwaŋa Tolan, ɔɔn myettɔn ne pwadan. I a Kiṭɔ? I a Kaci Juaŋɔ?” 64Ɔci Yaccu ṭwokcin ɛkɛti agi, “Bala a ɔɔn ba jwalla guaŋŋi i wanna. Ɔci ‘ya gɔkka ɛkkɛti, ne baaṭiyɛ, ‘ya Kaci Ma Baan yuartata ɛkkɛ ciy Jwaŋa balki War Tɛɛn Waakɛnda neeni taaŋɛti taaŋŋa byerɔn. Ɔci ne oŋ gɛɛlti ‘ya yuartata ɛkkɛ ne bɛɛda te pɔliy!” 65Ɔci gaciic tolan Ma Yahuud bworŋ ɛkɛ jiɛññɛ jitin te yom yoñ te jwali Yaccu neeni. Ɔci ɛkɛ gɔkcin mati agi, “‘Wana neeni yaayɛ hay! Ɛkɛ gɔki agi ɛkɛ agji Kaci Jwaŋa Tolan ne ɛkɛ a Kaci Jwaŋa Tolan bɛɛ ogo? Ikin buagin ma bɛya tɛkti jiek moki ogo? 66Oŋ acca yomg ɛkkɛ bala a ɔki?” Ɔci ma ṭwokcin ɛkɛti agi, “Ɛkɛ yaayɛ. Dala ɛkɛ tuwa.” 67Ɔci ma gɛɛg bala ŋuoṭi ñaang ɛkɛ ñingɛti. Ɔci ɛkkɛn bala jiebi ɛkɛ te bunya, ɔci ma gɛɛg bala jiebi ɛkɛ te byeŋkɛn korkɛn, ɔci ɛkkɛn bala gɔki agi, 68“I Kiṭɔ, dala i noŋja ba naŋki maka a bɔwan Jwaŋa Tolan. Mena i jyɛmmi neeni ŋeejɛ? Gɔkka!” 69Butruc bala ciyi kaañji on taaŋɛti. Ɔci kɛɛngɔn a ṭɔɔl gɛɛl bɛɛn ɛkɛti, ɔci gɔkcin ɛkɛti agi, “I daŋkun balgi iki Yaccu men ma Jaliil.” 70Ɔci Butruc kɛkcin ma ñomgɛnti waakɛnda agi, “Mena guaga i neeni ŋeej ‘ya bɛɛ.” 71Ɔci Butruc ati yɔɔtcin kaañ tukɛti. Ɔci ɛkɛ yuarnɛ ṭɔla parɛ gɛɛl moki. Ɔci ṭɔla neeni gɔkcin mati agi, “‘Wana neeniyɛ, ɛkɛ bala iki Yaccu men ma Najarɛt.” 72Ɔci Butruc kɛkcin moki ne pɛñan. Ɛkɛ aaltin te yenti Juaŋ agi, “Dala Jwaŋa Tolan jiek oodɛ ‘ya wyeñuti kan ‘ya jom jieky. ‘Wana guagdɛ ɛkkɛ neeniyɛ, ŋeej ‘ya bɛɛ!” 73Ɔci ne ḍiɛran ṭɔɔlɛ moki, maka pookɛn maka yɔdi nona neenitiyɛ, ɛkkɛn gɔkcin ɛkɛti agi, “I a men ɛkkɛn hay! I ŋiiki ma te lɛmi i!” 74Ɔci Butruc bala kɛki ne pɛñan awarɛ te yenti Juaŋ agi, “‘Wana wanna ŋeej ‘ya bɛɛ!” Ɔci ne pɛñan tuan wiakcin doki. 75Ɔci Butruc ñingɛ ñieŋnɛ te jwalla guaŋŋɛ Yaccu agi, “Ne tuan wiakti men bɛɛyɛ, i kɛkka te ‘ya oŋki aga ne ḍoogɔ dokiy.” Ɔci ɛkɛ kaaccin bora ɔci ɛkɛ bala wiak a joon te naŋki ɛkɛ neeni.

will be added

X\