Matta 25

1“Cyɛgji Jwaŋa Tolan ɛkɛ bala ba jyek maka ṭɔlg gɛɛg ne inyaakkɛn maka eci dyɛkan ati kookcin ‘war ñoonitiy. 2Ɛkkɛn gɛɛg ne dɔɔyɔ ñingɛn morŋ. Ɔci ɛkkin pookɛn ne dɔɔyɔ mokiyɛ, ɛkkɛn aŋka ñingɛn tɛy tɛyo. Šɔlga ne dɔɔyɔ ñingɛn morŋan neeniyɛ, eci ñɔdg dyɛkan ɛkkɛn jitkɛnti, ɔci yeti ɛkkɛn eci gɛɛg bora bɛɛ. 4Yeti ṭɔlga pookɛn ne dɔɔyɔ ṭɔlga ñingɛn tɛyan neeniyɛ, ɛkkɛn aŋka eci ñɔdg dyɛkan ɛkkɛn jitkɛnti ɔci eci gɛɛg bora moki. 5Ɔci ‘wana ḍɛyiyɛ, ɛkɛ kwaccin. Ɔci ṭɔlga kɛɛy ɛkɛ neeniyɛ, ɛkkɛn buanɛ nink ɔci ɛkkɛn wiccin. 6“Ɔci ne ween jiña tuodanyɛ, ma bala boorɔ agi, ‘‘War ñooni bɛɛni! Koodɛ bora ooddɛ kooktɛ ɛkɛti!’ 7“Ɔci maka ṭɔlg jɔŋŋin ñaalɔ, ɔci bala yɔŋi twalg dyɛkan ɛkkɛn waakɛn. 8Ɔci maka ñingɛn morŋan neeniyɛ, gɔkcin maka ñingɛn tɛyanti neeni agi, ‘Ɔɔn noŋdɔntɔ ñɔdg ɛkkɛ hay! Acaan dyɛkan ɔɔn ñɔdgɛn bawwin doki.’ 9“Ɔci maka ñingɛn tɛyan neeniyɛ, ɛkkɛn kɛkcin ɛkkɛnti agi, ‘A’a. Ɛkkɛn yɔmdi te ɔɔn ɔci ɛkkɛ bɛɛ. Dala ɛkkɛ ɔgdɛ ooddɛ dukkanji pookɔ ɔci wɛrdɛ ñɔdg ɛkkɛ pookɔ.’ 10“Ɔci ne ɛkkɛn balki atki ootti wɛɛrki ñɔdgyɛ, ‘war ñooni dɛññin bora ɔci maka bala kɛɛy ɛkɛ neeniyɛ, ɛkkɛn ati a cyɛɛlɔ iki ɛkɛ. Ɔci ɛkkɛn kaaccin orɔ ona noŋki ma juma, ɔci on weegɛn ‘yeŋi tukɛ cieŋnɛti. 11“Ɔci ne baaṭi ṭɔlga pookɛn bɛɛn daŋkun. Ɔci ɛkkɛn bala boor agi, ‘Ciɛggɔn, i Ciɛggɔn, ɔɔn pɔktɔn on tukɛ!’ 12“Ɔci ɛkɛ ṭwokcin ɛkkɛnti agi, ‘‘Ya gɔkka ɛkkɛti awarɛ, ‘ya ɛkkɛ ŋeejin bɛɛ.’ ” 13Ɔci Yaccu gɔkcin maka laldɛ ɛkɛti agi, “Dala ɛkkɛ daŋkun woŋgɔ tiittɛ, acaan oŋŋa ‘ya Kaci Ma Baan bɛɛdayɛ, ŋeeddɛ ɛkkɛ bɛɛ. 14“Ɛkkɛ maka laldin ‘yayɛ, dala ɛkkɛ kandɛ ne pwadan ne ‘ya oodda ɔntɔ te ɛkkɛti wɛnniy. Gɔṭṭɛ, jyeka neeniyɛ, bala ba jyek mena ‘uan gɛɛl! ‘Wana neeniyɛ, ɛkɛ buagɔn woon ooddi bana parɛ gɛɛlti, ɔci ɛkɛ borcin maka kanŋan ɛkɛti. Ɔci bilk ‘wonnɛ ɛkkɛn byeŋkɛnti aŋka dala ɛkkɛn noŋdi kanŋa ɔci bilk cɔttanyɔ ne pwadan. 15Ɛkɛ maka kanŋan ɛkɛti gɛɛl ‘wonnɛ ɛkɛ kiicin bilk ne dɔɔyɔ. Ɔci ɛka parɛ gɛɛl ‘wonnɛ ɛkɛ kiicin bilk ne yyɛɛwɔ. Ɔci ɛka parɛ ‘wonnɛ ɛkɛ kiic bilk ne cyɛɛlɔ. Ɛkɛ ma ‘wonnɛ bilka neeni ba ñing tɛɛn ɛkkɛn, menga da ba ñing tɛɛn ɛkɛ, ɔci menga da ba ñing tɛɛn ɛkɛ, ɔci ɛkɛ atti. 16Ɔci mena ‘wonnɛ kanŋa weegɛn kiicin bilk ne dɔɔyɔ neeniyɛ, ɛkɛ jɔŋŋin ne pɛñan, kwaccin bɛɛ. Ɔci ɛkɛ bilka neeni cɔnnɛyɔ ne bilka pookɛn bɛɛki kiicin ne dɔɔyɔ moki ɔɔn. 17Ɔci mena ‘wonnɛ weegɛn kiicin ne yyɛɛwɔyɛ, ɛkɛ daŋkun bala cɔti bilk ne bilka pookɛn bɛɛki kiicin ne yyɛɛwɔ ɔɔn. 18Yeti mena ‘wonnɛ men kiic bilk ne cyɛɛlɔ neeniyɛ, bilk ɛkɛ eññɛ, ɔci joŋnɛ iñɔ ṭɛɛrji. 19“Ɔci ne maka neeni weegɛn ɛɛni coodi bana atti ɛkɛ waayitiyɛ, ɛkɛ bɛɛn dɔɔkkin baanji, ɔci ɛkɛ bala yɔŋi jiek iki ɛkkɛn te jyek bilko. 20’Wana ‘wonnɛ weegɛn kiicin bilk ne dɔɔyɔ neeniyɛ, ɛkɛ bɛɛn nona weegɛnti eccin kiicin bilk ne dɔɔyɔ ba bilka ɛkɛ ‘wonnɛ weegɛn te ñamu wanna neeni. Ɔci ɛkɛ eccin kiicin bilk kiicin pookɛn ne dɔɔyɔ moki. Ɔci ɛkɛ gɔkcin weegɛnti agi, ‘‘Ya ‘wonna i kiicin bilk ne dɔɔyɔ, ɔci ɛkkɛn cɔniyɔ ‘ya, ɔci eccin bilka pookɛn kiicin ne dɔɔyɔ moki.’ 21“Ɔci weegɛn gɔkcin ɛkɛti agi, ‘Pwatcin. I noŋŋi ne pwadan. I ag kɛɛngɔn pwadan. Acaan i waŋu tiinni te gena ḍiɛran neeniyɛ, ɔci acca i ‘wondin ‘ya kanŋa tolan neeni. Dala i yomu ñɔya ba ‘ya ɔɔn!’ 22“Ɔci mena ‘wonnɛ weegɛn kiicin bilk ne yyɛɛwɔ neeniyɛ, ɛkɛ orcinti weegɛnti, ɔci gɔkcin ɛkɛti agi, ‘‘Ya ‘wonna i kiicin bilk ne yyɛɛwɔ, ɔci ɛkkɛn cɔniyɔ ‘ya! Ɔci bɛɛn kiicin pookɛn ne yyɛɛwɔ moki.’ 23Ɔci weegɛn gɔkcin ɛkɛti agi, ‘Pwatcin, i noŋŋi ne pwadan. I ag kɛɛngɔn pwadan! Acaan i waŋu tiinni te gena ḍiɛran neeniyɛ, ɔci acca i ‘wondin ‘ya kanŋa tolan neeni daŋkun. Dala i yomu ñɔya ba ‘ya ɔɔn!’ 24“Mena ‘wonnɛ weegɛn kiic bilk ne cyɛɛlɔyɛ, ɛkɛ bɛɛn ɔci ɛkɛ buagɔn warɛ bɛrtɛ te jwali gɛɛl weegɛnti. Ɔci gɔkcin weegɛnti agi, ‘Çeej ‘ya i a mena jiekɛ tɛyan oŋkanda. I dwok pok bɛɛ. Yeti ne pok ñingɛn bɛɛtiyɛ, ɛkkɛn aga pok i. Ɔci moki i kuay pok bɛɛ. Yeti ne ma pok kuatitiyɔyɛ, ɔci ɛkkɛn limayɔ i aga pok i. 25Ɔci ‘ya buañi ka ‘ya dita bilk i gɛɛg yiedo, ɔci ‘ya ati bora bilk i neeniyɛ, jokcan iñɔ. Anti bilk i!’ 26“Ɔci weegɛn ṭwokcin ɛkɛti agi, ‘I yaayi hay! I a kɛɛngɔn warɛ pɛñan hay! Kan ‘ya ŋeeja i ne ‘ya aga mena dwoki bɛɛy, yeti ne pok ñingɛn bɛɛti ɛkkɛn aga pok ‘ya, ɔci kan ŋeej i moki ne ‘ya kuaya pok bɛɛy, yeti ne ma pok kuatitiyɔyɛ, ɛkkɛn limdiyɔ ‘ya aga pok ‘ya. 27Oŋ ba i bilk ‘ya eññi twoñi bilkji aŋka ɛkkɛn mɔkcan ‘ya aŋan iki bilk wyetka jiettanti ma twoñi bilkji bɛ?’ 28“Ɔci mena neeni gɔkcin maka kanŋan ɛkɛti agi, ‘Kiic bilk luldɛ te ɛkɛti, ɔci ‘wondɛ mena balki kiicin bilk ne inyaakkɛny. 29Naŋka neeni pwatcin maka woŋgɛn a tiicin ne ɛkkɛn ‘wontɛti ma waka coŋin a ɔɔn bɛɛ? Gɔṭṭɛ, maka balki waakyɛ, ɛkkɛn ‘uottanti ma waak moki. Yeti maka balki waak oŋ woŋgɛn a tiicin bɛɛyɛ, ɛkkin bala ɛkkɛnti ne ḍiɛkan wanna lultan ma te ɛkkɛnti. 30Kɛɛngɔn yaayan neeniyɛ, yiɛptɛ weegɛn ciginji nona ulanti aŋan. Nona ulanti neeniyɛ, ma lɛkɛn tiittanti te yom yoño.’ 31“Ne ‘ya Kaci Ma Baan bɛɛdayɛ, bɛɛna bɛɛda ‘ya neeni pwanna a pwanno. ‘Ya bɛɛdɔn iki malɛɛkan waakɛnda ɔci ‘ya coocca kaakci ‘yati. Kaakci ‘ya neeni pwanna pwanno. 32Ɔci ma waakɛnda baan konɛ wardayɛ, ɛkkɛn waakɛn limtan ‘ya ñamuti. Ɔci ‘ya Kaci Ma Baanyɛ, ‘ya maka coŋin neeni kɛbdi jitin ba naŋki mena balki kulin ɔci ḍɛɛko. 33Ɔci gɔṭṭɛ daŋkun, maka pwadinyɛ, ɛkkɛn yɔɔtca ‘ya byeŋa byerɔn, yeti maka yeyinyɛ, ɛkkɛn yɔɔtca ‘ya byeŋa aamti. 34“Ɔci ‘ya gɔkca maka ciyi ‘ya byeŋa byerɔn neeniti agi, ‘Hay, ɛkkɛ maka maŋŋɛ Wey ɔɔn Jwaŋa Tolan nɛ, dala ɛkkɛ bɛɛdɛ cyɛgji Jwaŋa Tolan mugdɛ ɛkkɛ! Jyeka neeni naŋŋɛ Juaŋ noŋnɛ ɛkkɛ te baaṭi te oŋŋa ɛkɛ okki ṭɛɛry. 35Oŋkanda ne ‘ya amata koñyɛ, ɛkkɛ ‘woññɛ ‘ya te oomdin. Ɔci ne ‘ya amata yiɛn mokiyɛ, ɛkkɛ ‘woññɛ ‘ya te pyega maadi ‘ya. Ɔci ne ‘ya aga wɛliyɛ, ɛkkɛ ‘ya eññata oorg ɛkkɛ. 36Ɔci ne ‘ya balkata bworŋin bɛɛyɛ, ɔci ɛkkɛ ‘ya kɛnnata bworŋin. Ɔci ne ‘ya waru yaayɛyɛ, ɛkkɛ balgɛ bɛɛdɛ ḍieŋdɛ ‘yati. Ɔci ne ‘ya baala ciginjiyɛ, ɔci ɛkkɛ balgɛ bɛɛdɛ gɔrtɛ ‘yati.’ 37“Ɔci maka pwadin ṭwokti ‘yati agi, ‘Ciɛggɔn, i yuarki ɔɔn oŋgati ami koñ ɔci ‘woñki ɔɔn waka amtin gɛɛg te tua? Ɔci i ami yiɛn ɔci i ‘woñki ɔɔn pieg gɛɛg te tua? 38I yuarki ɔɔn oŋgati i a wɛli ɔci i ooki ɔɔn ban ɔɔn te tua? I yuarki ɔɔn ne bworŋin baaki iti ɔci i ‘woñki ɔɔn bworŋin te tua? 39I yuarki ɔɔn waru yaayɛ oŋgati ɔci ɔɔn bɛɛnɔn ḍieŋnɔn iti te tua? Ɔci walla ne i baali ciginji ɔci ɔɔn bɛɛnɔn ḍieŋnɔn iti te tua?’ 40“Ɔci ‘ya ṭwokca ɛkkɛnti agi, ‘Tieŋdɛ ɛkkɛ myettin ne pwadan. Kan ɛkkɛ menga te maka neeniti naŋŋɛ ne pwadan, kan ɛkɛ a mena ḍiɛran te modg ɔɔn neenitiyɛ, a ɔɔn bala ba gena ‘ya naŋŋata ɛkkɛ ne pwadan wanna!’ 41“Ɔci Ciɛggɔn Tolan gɔkti maka yɔɔd ɛkɛ byeŋa aamti neeni agi, ‘Ɛkkɛ maka yeyin nɛ, dala ɛkkɛ ɔgdɛ ooddɛ ɔntɔ te ‘yati wɛnni! Dala ɛkkɛ ooddɛ maccu, maña baadi bɛɛy! Maña neeni naŋŋɛ Juaŋ te Jwaŋa Yaayan ɔci te jɔkin ṭɔlgɛn moki, ɔci yɔmjin te ɛkkɛ daŋkun. 42Ne ‘ya amata koñyɛ, ɛkkɛ menga ‘ya ‘wonna genga aŋka amdi ‘ya bɛɛ. Ɔci ne ‘ya amata yiɛnyɛ, ɛkkɛ menga ‘ya ‘wonna pieg gɛɛg aŋka maani ‘ya bɛɛ. 43Ne ‘ya aga wɛliyɛ, ɛkkɛ ‘ya eññata orɔ oorg ɛkkɛ bɛɛ. Ne ‘ya balkata bworŋin bɛɛyɛ, ɛkkɛ ‘ya ‘wonnata bworŋ gɛɛl bɛɛ. Ne ‘ya waru yaayɛ, ɔci moki ne ‘ya baala jiju ciginjiyɛ, ɛkkɛ bɛɛnɛ ḍieŋnɛ ‘yati bɛɛ.’ 44“Ɔci maka neeni daŋkun ṭwokti ɛkɛti agi, ‘I Ciɛggɔn, i yuarki ɔɔn oŋgati ami koñ boki, ɔci walla i ami yiɛn boki, ɔci walla i ag wɛli boki, ɔci walla i at waru budan oŋgati boki, ɔci walla i waru yaayɛ oŋgati boki, ɔci walla i baal ciginji oŋgati boki ɔci i dalki ɔɔn budan te jyeka tɛyan neeni oŋgati boki?’ 45“Ɔci Ciɛggɔn Tolan ṭwokti ɛkkɛnti agi, ‘Tieŋdɛ ɛkkɛ myettin ne pwadan, oŋkanda ne ɛkkɛ maka neeni dalnɛ budan, kan a mena ḍiɛran te modg ɔɔnti gɛɛl dalnɛ ɛkkɛyɛ, a ɔɔn bala ba gena ‘ya waanu dalnata ɛkkɛ wanna.’ 46“Ɔci maka noŋi ne yaayan neeniyɛ, ɛkkɛn ooddi nona yaayanti te ywobji Juaŋ ɛkkɛnti. Ɔci ywobji Juaŋ baadi ɛkkɛnti bɛɛ. Ɔci maka pwadinyɛ, ɛkkɛn aŋka balki tɛɛtin baadi bɛɛ neeniy.”

will be added

X\