Matta 24

1Yaccu kooyin bora te on Juaŋ ona tolanti, ɔci ɛkɛ bala ati a woono. Ɔci maka laldɛ ɛkɛ bɛɛn ɛkɛti buagɔn ɛkɛ gɔrti oorga bala on Juaŋ ona tolan toŋkɛtiy. 2Ɔci Yaccu gɔkcin ɛkkɛnti agi, “Ɛkkɛ poŋɛ a oorga neeni ḍwaŋɔ pari bɛɛ? ‘Ya ɛkkɛ myettin gena neeni ne pwadan! Guonan ṭɔɔlɛ gɛɛl niindi ɛka parɛ gɛɛl wyeñɛti ne baaṭi bɛɛ. Ɛkkɛn yieptan ma iñɔ waakɛnda.” 3Ɔci ne Yaccu atti coonni iñɔ Pom Jɛtuun wyeñɛtiyɛ, maka laldɛ ɛkɛ bɛɛn nona ɛkɛti pookɛn. Ɔci ɛkkɛn tooccin Yaccuti agi, “Ɔɔn myettɔn ne pwadan, naŋka guaŋŋi i te on Juaŋ ona tolan neeni bɛya ne tua? Ɔci oŋŋa i bɛɛdi ŋiitan ma te gena? Ɔci oŋŋa wɔɔka ciyin acca neeni baadi bala ne tua?” 4Ɔci Yaccu gɔkcin ɛkkɛnti agi, “Dala ɛkkɛ woŋgɔ tiittɛ. Naa ɛkkɛ jyɛttɛ menga ɔntɔ bɛɛ. 5Maka coŋin gɛɛg bɛya ɔci ɛkkɛn gɔkti agi ɛkkɛn aginti ‘ya Kiṭɔ awarɛ. Ɔci a ɔŋŋiyɛ, ɛkkɛn maka coŋin jyɛttan ɔntɔ. 6Ne ɛkkɛ tieŋdɛ agi lañ baalɔyɛ, naa ɛkkɛ buayɛ bɛɛ. Ɔci ne ɛkkɛ tieŋdɛ jiek agi ma baalɔ ooddɔ lañtiyɛ, naa ɛkkɛ buayɛ bɛɛ. Jyeka neeni bɛya awarɛ, yeti jiek wyetkɛn bawwin men bɛɛ. 7Keedin wɛɛn warda noogdi yɔtin pookɛn. Bonka ḍyɛrin noogdi yɔtin pookɛn ɔci bonka ḍwaŋin da noogdi yɔtin pookɛn. Ɔci bonka coŋin gɛɛgtiyɛ, koñ bɛya mati, ɔci ṭɛɛr warɛ ḍieddi ne pɛñan. 8Yeti taab neeniyɛ, gena taab ñamu. 9“Ɛkkɛ mwoktɛ ma ɔci ‘wontɛ ma maka pookɛn byeŋkɛnti, ɔci ɛkkɛn noŋdi ne yaayan ɛkkɛti. Ɔci ɛkkɛ ma gɛɛg noktan mako. Keedin waakɛnda yooktan te ɛkkɛ acaan yenti ‘ya bala ɛkkɛti. 10Te wɔɔka wannayɛ, ma ne coŋin ḍɛɛmdi iñɔ ɔci ɛkkɛn yoddi ñin pookɛn, ɔci ɛkkɛn ma ɛkkɛn ‘wontan maka pookɛn byeŋkɛnti. 11Maka gɔki agi ɛkkɛn aginti bɔwan Jwaŋa Tolanyɛ, ɛkkɛn bɛya ne coŋɔn, yeti ɛkkɛn a bɔwan Juaŋ awarɛ bɛɛ. Ɔci ɛkkɛn ma jyɛttan ɔntɔ a ḍiɛkan bɛɛ. 12Nɔji tola gɔ moki toli ɔɔn, ɔci ma gɛɛg buayi nɔji moki bɛɛ, ɔci gɛɛg nɔñji yiegdi ne tolan. Ɔci acaan a ɔŋŋiyɛ, maka coŋin mwondi te anna ɛkkɛn anki Juaŋy. 13Yeti mena yɔɔda ne tɛyan ne oŋŋa bɛya ne ŋoyɔyɛ, ɛkɛ aŋka yɔɔdɛ Juaŋo. 14Jyek cyɛgji Jwaŋa Tolan eetan ma baan konɛ warda. Gena jyeka wonkɛn jyeka pwadin neeni. Ɔci kan ma tieŋŋin waakɛndayɛ, ɔci oŋŋa bɛya ne ŋoyɔ oŋ bɛya oŋo. 15“ ‘Ɛkkɛ maka poki worga nɛ, dala ɛkkɛ tieŋdɛ ne pwadan. Ne naŋka yaayan ne yaajan,’ naŋka guaŋŋɛ Danyal mena a bɔwa Jwaŋa Tolan agi bɛɛdɔ neeni yuartɛ ɛkkɛ bɛɛti on Juaŋti dokiyɛ, 16dala ɛkkɛ maka ciyi ban Yahuudiya yooŋdɛ poom jitin ne pɛñan. 17Kan men gɛɛl bala ñaalɔ on wyeñɛti te wɔɔka wannayɛ, naa ɛkɛ koodi iñɔ aŋka kaatti orɔ wak ɛkɛ gɛɛgti moki bɛɛ. Dala ɛkɛ aŋka yooŋdi ne pɛñan. 18Kan men gɛɛl bala yieljiyɛ, naa ɛkɛ yooŋdi nona bworŋ ɛkɛ ḍuannɛ ɛkɛ wanna moki bɛɛ. Dala ɛkɛ aŋka ɔga yooŋdi ne pɛñan doki. 19Maka laci ɔci maka balki kɛɛgin ḍyɛrinyɛ, oŋŋa wanna tɛy tɛy ɛkkɛnti ne pɛñan! 20Dala ɛkkɛ cɔktɛ Juaŋti, ɔci tootti ɛkɛti te jyeka neeni aŋka naa naŋka tɛyan neeni bɛya ɛkkɛti te ponk jwamma luyan bɛɛ, walla te Oŋ Cabit gɛɛl bɛɛ! Kan a ɔɔnyɛ, woon tɛy tɛy ne pɛñan. 21Te oŋŋa bɛya wannayɛ, taab pɛñ pɛño. Oŋŋa Juaŋ okki noon, ɔci ne acca ɔɔnyɛ, taab ba taab neeniyɛ, gɛɛl bɛɛn oŋgati men bɛɛ. Ɔci ne baaṭi taab bala ba taab neeniyɛ, gɛɛl bɛya moki bɛɛ. 22Kan te Juaŋ oŋŋa neeni naŋŋi ne ḍuulan bɛɛyɛ, te menga yaakinti uda bɛɛ. Juaŋ poŋi te jyek maka kɛnnɛ ɛkɛ bora, ɔci ɛkɛ gɔki agi dala nink taab neeni ḍuldɔ. 23“Ɔci te oŋŋa bɛya wannayɛ, kan men gɛɛl gɔkti ɛkkɛti agi, ‘Gɔṭṭɛ, Kiṭɔ bala wɛnni!’ Wwalla moki agi, ‘Gṭṭɛ, Kiṭɔ bala aŋanyɛ,’ naa ɛkkɛ jyeddɛ bɛɛ! 24Maka gɔki agi ɛkkɛn aginti Kiṭɔ ɔci maka gɔki moki agi ɛkkɛn aginti bɔwan Jwaŋa Tolanyɛ, ɛkkɛn bɛya, yeti ɛkkɛn men gɛɛl a Kiṭɔ waanɛ bɛɛ, ɔci ɛkkɛn a bɔwan Juaŋ awarɛ bɛɛ. Ɔci ɛkkɛn noŋdi naŋki ɛkkɛn, naŋka tɛyan naŋka ñyecki ma ɛkkɛn aŋka ma gɔrti ɛkkɛn ɔci bootti ɛkkɛnti amaam ɔɔn. Ɛkkɛn buagɔn dala maka kɛnnɛ Juaŋ bora neeniyɛ, waakɛn yaltan bootti ɛkkɛnti. 25’Ya ṭɛr ɛkkɛ waakɔ te jyeka neeni waakɛnda ne jyeka neeni men baakiy! 26“Kan ma gɔkti ɛkkɛti agi Kiṭɔ baalɔ wɔɔŋjiyɛ, naa ɛkkɛ ooddɛ liertɛ ɛkɛ bɛɛ! Ɔci kan ma gɔkti agi Kiṭɔ baalɔ orɔ on ṭɔla jijuyɛ, naa ɛkkɛ jyeddɛ bɛɛ! 27Bala ba ñaal ne wildiyɛ, ɛkɛ wildan noon dyɛgdɛ pɔli ŋwayɛ warda te pɔya tyɛrñanti ne pɔya koriiyati ɔɔn, ɔci a ɔɔnyɛ, bala ba bɛɛna bɛɛda ‘ya Kaci Ma Baano. ‘Ya yuarta ma noon warda. 28“Kan gena tuun bala niin noongatiyɛ, ɔci wɛjjin omi ɛkɛ bɛya nona ɛkɛti kɔɔna kɔɔnno. (Naa ɛkkɛ liertɛ nona baala ‘ya bɛɛ! Acaan ne ‘ya bɛɛdayɛ, ‘ya ɛkkɛ yuardin lakun bala ba wɛjjin ne yɔrki waka tuutan te nonka ninki ɛkkɛn noongatiy.) 29“Ɔci te oŋŋa wannayɛ, ne taab pɛñan neeni baadiyɛ, ‘Oŋ waŋɛ ula, ɔci paan moki dɛkti bɛɛ. Ɔci kɛltan ḍɛɛmdi te ñaalɔ gɔ ɛkan moki ḍɛmmi ɔɔn. Ɔci waka bala ñaalɔ waakɛn ḍieddi waakɛnda.’ 30“Ɔci te wɔɔka wannayɛ, ‘ya Kaci Ma Baan oŋ waru lɛɛlla bora mati oŋ te pɔliji oŋo. Ɔci keedin waakɛnda baan wardayɛ, ɛkkɛn wiakti. Ɛkkɛn ‘ya Kaci Ma Baan yuarta ne bɛɛda pɔɔldin wyetkɛnti ñaalɔ pɔliji te war tɛɛn ɔci pwanna pwaniy. 31Ɔci ṭuoŋ wiakti ɔci malɛɛkan ‘ya cuoñña baan warda ñaalɔ ɔci iñɔ pɔli ŋwayyɛti ne pɛñan. Ɔci maka kɛññan ‘ya borayɛ, ɛkkɛn limtanyɔ malɛɛkan ‘yati nona ne cyɛɛlɔ. 32“Jyek ŋuami bala a ɔki? Jyek ŋuami ne pwordiyɛ, ɛkɛ etti jyeyya wonkɛn, ɔci ŋeejɛ ɛkkɛ noon aŋi ḍuoŋ tukɛ doki. 33Ne ɛkkɛ gɔrtɛ naŋka neeni bɛɛti borayɛ, dala ŋeeddɛ ɛkkɛ oŋŋa ‘ya Kaci Ma Baan bɛɛdayɛ, cɔɔllin doki, looncin moki bɛɛ. 34’Ya gɔkka ɛkkɛ myettin ne pwadan! Maka accayɛ, ɛkkɛn tuwa bɛɛ, ɛkkɛn ciya ne jyeka neeni bɛɛti bora waakɛnda ɔɔn. 35Pɔli ɔci ṭɛɛryɛ, ɛkkɛn baadi. Yeti Jyek ‘yayɛ, ɛkkɛn baadi bɛɛ. 36“Oŋŋa ‘ya Kaci Ma Baan bɛɛdayɛ, ŋeejɛ menga bɛɛ. Ɔci kwoyɔn malɛɛkan ñaalɔ daŋkun. Ɔci moki kwoy ‘ya Kaci Jwaŋa Tolan daŋkun. Oŋŋa neeni ŋeejɛ gena Wey ɔɔn parɛ. 37Ɔci ba naŋka bɛɛn mati te oŋŋa Nɔwa baali menyɛ, ɔci ne oŋŋa ‘ya bɛɛdayɛ, ɛkɛ bala a ɔɔn daŋkun. 38Ne Nɔwa baaliyɛ, ma bala ñingɛn juadan te kanŋa waka amtan ɛkkɛn ɔci waka maattan ɛkkɛny. Ɔci ɛkkɛn bala ñingɛn juadan te jyek ḍɛɛwin moki. Ɛkkɛn bala poŋi te tol bɔrda bɛya ɛkkɛnti neeni bɛɛ. 39Ɔci ne Nɔwa kaanni murkaji dokiyɛ, tol bɔrda bɛɛn ɔci maka bala bora neeniyɛ, ɛkkɛn ḍakcin waakɛnda. Bɛɛna bɛɛda ‘yayɛ, bala a ɔɔn daŋkun. 40Kan maka ‘uay bala yielji te oŋŋa wanna ne yyɛɛwɔyɛ, men gɛɛl eetan malɛɛkan ne cyɛɛlɔ, ɔci ɛka parɛ ḍakti. 41Ɔci kan maka moong bala ooṭi pok ne yyɛɛwɔyɛ, ɛɛŋ gɛɛl ne cyɛɛlɔ eetan malɛɛkan, ɔci ɛŋa parɛ ḍakti. 42“Dala ɛkkɛ ciyɛ kɛɛyɛ a kɛɛn ɔɔn, acaan oŋŋa Ciɛggɔn ɛkkɛ bɛɛdiyɛ, gɔ ŋeeddɛ ɛkkɛ bɛɛ. 43Dala ɛkkɛ poŋdɛ te mena waakɛ kali may! Kan te oŋ waŋɛ bɛɛdi mena ɛɛn neeni ŋeejɛ ɛkɛyɛ, te ɛkɛ on kɛɛññɛyɔ ne pwadan ɔci mena ɛɛn neeni te yaaktanti kaatti orɔ bɛɛ. 44Ɔci acaan a ɔɔnyɛ, dala ɛkkɛ daŋkun kɛɛddɛ ɔci yomgɔ tiektɛ. Acaan ‘ya Kaci Ma Baan ŋeeddata ɛkkɛ oŋŋa ‘ya bɛɛda bɛɛ. 45“Gɔṭṭɛ ‘wota, mena gɔṭi on ne pwadan mena ñingɛ tɛyan a menɛ? Ɛkɛ a mena ‘wondɛ on weegɛn kanŋa ɔci naŋdɛ a ḍuaŋa makɛny. On weegɛn gɔkti ɛkɛti agi dala ɛkta ma kanŋa ‘wonda ɛkta oomdin oŋkanda ne pwadan. 46Men kanŋa mena nɔttɛ weegɛn jyek kanŋa neeni kan bala noŋi kanŋa ɛkɛ neeni ne pwadanyɛ, ɛkɛ yomɛ pwada pwanno. 47Awarɛ, ne baaṭi ɛkɛ naŋdɛ weegɛn aga mena tolan te ma kanŋa maka pookɛn, ɔci ɛkɛ gɔrti wak weegɛn waakɛnda. 48Yeti kan ɛkɛ a mena yaayanyɛ, ɛkɛ gɔkti yomɛti parɛ agi, ‘Wey ɔɔn kwaci a ɔɔn ogo? Ɛkɛ dita bɛya acca men bɛɛ?’ 49Ɔci ɛkɛ doki ḍwaddi ma kanŋa maka pookɛn neeni, ɔci ɛkɛ omdi ɔci motti iki maka yeyin maka nokkin mooy oŋkanday. 50Ɔci ne oŋ gɛɛlti ne ɛkɛ baali poŋi te weegɛn bɛɛyɛ, weegɛn bɛya ywortiti, 51ɔci mena yaayan neeni ḍuadɛ weegɛn ne pɛñan, ɔci yiɛptɛ ciginji nona maka noŋi ma ñingɛnti, ɔci ɛkɛ ñoodi i ɛkkɛn te naŋka bɛya ɛkkɛn wyetkɛntiy. Ɔci maka neeni wiakti a joono, ɔci ɛkkɛn lɛkɛn tiittanti te yom yoño.

will be added

X\