Matta 23

1Ɔci Yaccu gɔkcin maka coŋinti ɔci maka laldɛ ɛkɛti agi, 2“Maka loṭi worga Juaŋ ɔci ma Pɛriciinyɛ, ɛkkɛn jyek ganuun Muuca jitkɛn ootan bora mati. 3Ɔci a ɔŋŋiyɛ, dala ɛkkɛ tieŋdɛ ɔci noŋdɛ ba jyek ɛkkɛn oŋkanda. Yeti naa ɛkkɛ noŋdɛ ba naŋka naŋtan ɛkkɛn neeni bɛɛ. Ɛkkɛn loṭi ma te tuggɛn budan. Ɛkkɛn tieci jiek waakɛn bɛɛ. 4Ɛkkɛn ganuun jitka tɛyan umtan ma ḍɔɔggɛnti aŋka naŋtan ma, yeti ɛkkɛn woodgɛn daŋkun noŋi ba jyeka ‘womki ɛkkɛn ma wanna bɛɛ. 5“Gɔṭṭɛ, ‘ya gɔkka ɛkkɛti ‘wota te maka neeni. Naŋka naŋtan ɛkkɛn oŋkandayɛ, ɛkkɛn noŋi ma ñingɛnti budan. Worgan ‘yɛŋtan ɛkkɛnyɛ, ḍwaŋgin a ḍwaŋgin, ɔci jibban ‘yɛŋtan ɛkkɛn becinyɛ, cɔɔrtan waka becin lɛkɛnti. 6Kan juman bala ɛkkɛn buagɔn ciyi nonka pwadinti oŋkanda ɔɔn. Ɔci moki ɛkkɛn ani coodi nonka pwadin oorga morki ma Juaŋti. 7Ɔci ɛkkɛn ani ñiebbin nonk dukkan. Ɔci moki ɛkkɛn buagɔn dala ɛkkɛn bartan ma agi, ‘Mena loṭi may.’ 8“Naa ɛkkɛ bartɛ ma a ‘Maka loṭi ma’ bɛɛ. Acaan ɛkkɛ balkɛ mena loṭi ma ne cyɛɛlɔ budan. Ɔci ɛkkɛ waakidayɛ, ɛkkɛ agi modin. 9Naa men baan gɛɛl bardɛ ɛkkɛ iñɔ baanji wɛnni agi wey ɛkkɛ bɛɛ, acaan ɛkkɛ balkɛ Wey ɛkkɛ ne cyɛɛlɔ budan. Gena Weya ñaalɔ pɔliji. 10Naa ɛkkɛ bartɛ ma a ḍuaŋan bɛɛ. Ɛkkɛ balki Ciɛggɔn ne cyɛɛlɔ budan. Gena Kiṭɔ. 11Mena tolan te ɛkkɛyɛ, dala ɛkɛ aga ba mena kanŋan ɛkkɛti. 12Kan mena kooŋi war ɛkɛ parɛyɛ, ɛkɛ aga mena ḍiɛran budan. Kan men gɛɛl tolcin yom ɛkɛti bɛɛyɛ, ɛkɛ aŋka aga ba mena tolan. 13“Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Maka pookɛn buagɔn ka bɛya cyɛgji Jwaŋa Tolanti, yeti pɔy uullɛ ɛkkɛ. Ɛkkɛ woodgɔyɛ, ɛkkɛ bɛɛdɛ pɔya neeniti bɛɛ. Ɔci maka buagɔn bɛya pɔya neenitiyɛ, ɛkkɛn kaagɛ ɛkkɛ! [ 14“Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ, mal moonga ‘uayɛn tuun ɔci oorg ɛkkɛnyɛ, amɛ ɛkkɛ, ɔci ɛkkɛ cɔkɛ cɔŋŋa beyan aŋka naŋki ɛkkɛ cogdɛyɔ ɛkkɛ te naŋka neeni. Jyeka bɛya ɛkkɛ wyetkɔti te naŋki ɛkkɛyɛ, bwantan jyeka pookɛn gɛɛg bɛɛ.] 15“Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Ɛkkɛ atɛ bootɛ baan konɛ warda, ɔci jieddɛ galŋin jitkɛn oŋkanda buagɛ loṭi ma, ɔci kan men gɛɛl tieŋdi jyek ɛkkɛ ɔci mali ɛkɛ daldɛ ɔci jyek ɛkkɛ aŋka mugdɛyɛ, a ɔɔn pwatcin ɛkkɛti. Ɔci kan ɛkɛ aŋi men ɛkkɛ dokiyɛ, ɛkkɛ bwandɛ ɛkɛ ne tolan te naŋka yeyin, ɔci ɛkkɛ waakida ooddɛ bana maañti neeni i ɛkɛ, acaan ɛkkɛ agɛ maka noŋi ma ñingɛn. 16“Hay! Ɛkkɛ maka bala ba maka wɛɛyi maka a ullin nɛ! Ɛkkɛ gɔkɛ agi kan men gɛɛl gɔkti awarɛ te yenti on Juaŋ ona tolan te genga, ɔci kan ɛkɛ dɔki jyeka neeni tiiññɛyɔ bɛɛyɛ, ɛkkɛ gɔkɛ agi genga baalɔ bɛɛ, baatɔ. Yeti agi kan men gɛɛl gɔkti genga awarɛ te yenti dahab bala orɔ on Juaŋ ona tolanyɛ, ɛkkɛ gɔkɛ agi naa mena neeni jwali gɛɛl agdɛyɔ bɛɛ. Dala ɛkɛ noŋdi ba jyeka wanna. 17Ɛkkɛ maka amgin maka ñingɛn ulan nɛ! Pari dahab aŋi gena pwadan ne ɛkɛ olkiti ma orɔ on Juaŋ ona tolan bɛ? Oŋ ba gena pwadan ne tolan bɛ? Dahab, walla on Juaŋ ona tolan? 18Ɔci ɛkkɛ moki gɔkɛ agi, kan men gɛɛl gɔkti genga awarɛ te yenti gena ɛrki ma waak ɔci ɛkɛ dɔki jyeka wanna tiiññɛyɔy bɛɛyɛ, ɛkkɛ gɔkɛ agi genga baalɔ bɛɛ, baatɔ. Yeti agi kan men gɛɛl gɔkti genga awarɛ te yenti gena ‘yɛri ma wannayɛ, ɛkkɛ gɔkɛ agi naa mena neeni jwali gɛɛl agdɛyɔ bɛɛ. Dala ɛkɛ noŋdi ba jyeka wanna. 19Ɛkkɛ ‘uaya ñingɛn ulan nɛ! Pari gena ‘yɛri ma neeni pwani ne ɛkɛ olkiti ma gena ɛrki ma waak neeni wyeñɛti bɛɛ? Oŋ ba gena pwadan ne tolan bɛ? Gena ‘yɛri ma? Walla gena ɛrki ma waaky? 20Kan men gɛɛl gɔkti genga awarɛ te yenti gena ɛrki ma waak neeniyɛ, ɛkɛ gɔkti te yenti gena neeni iki waka bala ɛkɛ wyeñɛti waakɛnda. 21Ɔci kan men gɛɛl gɔkti genga awarɛ te yenti on Juaŋ ona tolanyɛ, a ɔɔn bala ba ɛkɛ gɔki awarɛ te yenti on Juaŋ ona tolan ɔci te yenti Jwaŋa Tolan mena ciyi orɔ on Juaŋ ona tolanti neeni. 22Ɔci kan men gɛɛl gɔkti genga awarɛ te pɔlla ñaalɔyɛ, a ɔɔn bala ba ɛkɛ gɔki awarɛ te yenti kaakci Juaŋ, ɔci te yenti Jwaŋa Tolan mena ciyi kaakci ɛkɛti neeni. 23“Hay, ɛkkɛ maka loṭi worga Juaŋ ɔci Ma Pɛriciin maka noŋi ma ñingɛn nɛ! Ɛkkɛ ‘woññɛ Juaŋ te wak ɛkkɛ waka ḍyɛrin oŋkanda. Gena naanna ɔci lɛlŋ ɔci kamuun. Kan janga neeni bala a inyaakkɛnyɛ, ɔci ɛkkɛ daŋkun gɔ Juaŋ ‘woñgi oŋkanda ne cyɛɛlɔ ɔɔn. Yeti naŋka ḍwaŋin naŋki ganuunyɛ, aŋka dalnɛ ɛkkɛ. Gena naŋka awarɛ naŋka a tyɛlga, ɔci yom pɔkkin maka aninti, ɔci tiit jyek Juaŋ waakɛn ne pwadan. Ɔci moki ɛkkɛ tiecɛ jyek Juaŋ awarɛ ne pwadan bɛɛ. Dala te ɛkkɛ noŋdɛ waka neeni waakɛnda. Naa te gɛɛl daldɛ bora bɛɛ. 24Ɛkkɛ maka ñingɛn ulan nɛ! Ɛkkɛ balgɛ ba mena wyeñɛ baaw moti waak oŋ miyyan ḍɛɛmdinti waka maaddɛ ɛkɛti, ɔci ɛkɛ ɛkkɛn toomdɛ bora, ɔci gena tolan ba kolŋan ɔɔnyɛ, aŋka lannɛ ɛkɛ a cyɛɛlɔ i waka maaddɛ ɛkɛ neeni! 25“Hay, ɛkkɛ maka loṭi worga Juaŋ ɔci ma Pɛriciin maka noŋi ma ñingɛn nɛ! Ɛkkɛ yɔŋɛ ḍwayi waakɛn te bora budan. Yeti ḍwayi ɛkkɛ korkɛntiyɛ, ɛkkɛn kuumi te waka yeyin ba ɛkkɛ yomgɔ ne kuumki te naŋka yeyin ɔɔn. Ɛkkɛ anɛ eñi wak maka pookɛn ɔci yomgɔ ḍwaŋɔ waakti. 26Ɛkkɛ ma Pɛriciin maka ñingɛn ulan nɛ! Te ñamu dala ɛkkɛ yomgɔ luagdɛ te waka yeyin parun. A ɔɔnyɛ, coodi ɛkkɛ oŋ pwada Jwaŋa Tolanti oŋo! 27“Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ! Ɛkkɛ balgɛ ba oorga jokki ma maka a tuutan ne naŋkiti ma te tolla bɔwan waakɛntiy. Oorg waakɛnti borayɛ, ɛkkɛn pwanna pwanno. Yeti jiju korkɛntiyɛ, ɛkkɛn kuumi te owi ma baan ɔci te waka yeyin waakɛnda. 28Ɔci ɛkkɛ daŋkun balgɛ a ɔɔn. Ma gɔrti ɛkkɛ, ɔci ɛkkɛn gɔkti agi ɛkkɛ pwadjɛ. Yeti ɛkkɛ yomgɔti jijuyɛ, ɛkkɛn kuumi te naŋka noŋɛ ɛkkɛ ma ñingɛn neeni, ɔci ɛkkɛn kuumi te naŋka yeyin naŋka pookɛn daŋkun. 29“Hay ɛkkɛ maka loṭi worga Juaŋ, ɔci ma Pɛriciin maka noŋi ma ñingɛn nɛ! Ɛkkɛ cɔti oorga jokki ma maka a bɔwan Jwaŋa Tolan, ɔci ɛkkɛ yɔŋɛ waka cɔttan ma waka ma ñingɛn ñiektiti te maka pwadiny. Waka neeni ywaŋdɛ ɛkkɛ ne pwadan oŋkanda. 30Ɛkkɛ gɔkɛ agi kan te gena ɛkkɛ aŋka balgɛ te baaṭi ba yɔrg ɛkkɛ wannayɛ, te ɛkkɛ bɔwan Jwaŋa Tolan noŋŋɛ bɛɛ. 31Ɔci a ɔŋŋiyɛ, ɛkkɛ waakɔ yiɛptɛ maccu pookɔ agi ɛkkɛ agji kɛɛgin maka nokkin maka a bɔwan Jwaŋa Tolany. 32Kanŋa naŋɛ yɔrg ɛkkɛ neeniyɛ, dala cwamdɛ ɛkkɛ acca ‘yati! 33“Hay ɛkkɛ! Ɛkkɛ korkɔ kuumi te jyek nooŋi ma ba koggo. Pɔya yooŋdɛ ɛkkɛ ɔntɔ te bana maañti bala boki? 34Acaan a ɔŋŋiyɛ, gɔṭṭɛ, ‘ya ɛkkɛ cuondin maka a bɔwan ‘ya ɔci maka ñingɛn tɛyan, ɔci maka loṭi worga Jwaŋa Tolan. Ɔci maka neeniyɛ, ɛkkɛn gɛɛg nogdɛ ɛkkɛ. Ɔci moki gɛɛg ŋaaptɛ ɛkkɛ ñaalɔ. Ɔci maka a bɔwan Jwaŋa Tolan gɛɛg ḍuadɛ ɛkkɛ te woong orɔ oorga morki ma Juaŋtiy. Ɔci ɛkkɛ atɛ boottɛ bonk korkɛnti lieṭɛ ma aŋka noŋdɛ ne yaayan ɛkkɛnti. 35Ɔci a ɔŋŋiyɛ, jyek lyen maka pwadin waakɛnda, maka nogɛ ma te ñamu ne acca ɔɔnyɛ, bɛya ɛkkɛ wyetkɔti. Maka nogɛ ma neeniyɛ, gena Habiil ɔci maka pookɛn, ɔci ne Jakariyati ɔɔn. (Jakariya neeniyɛ, ɛkɛ a kaci Bɛrakaaya.) Jakariya bala yɔɔd yiika on Juaŋ ona tolan i gena ɛrki ma waaky. Ɔci ne ɛkɛ baali wɛnanyɛ, ɛkɛ nogɛ ma. 36’Ya gɔkka ɛkkɛti awarɛ, jyeka neeni waakɛndayɛ, ɛkkɛn bɛya maka yookɔn te ‘ya maka ciyi acca neeni wyetkɛnti. 37“Hay! Ma Urcaliim, ma Urcaliim! Maka noki bɔwan Jwaŋa Tolan maka yebi maka cuonnɛ Jwaŋ ɛkkɛnti nɛ! Bala ba aakṭi mɛɛgɛn ne boori ṭɔlg ɛkɛ ɔci ṭɔlg ɛkɛ wɔtti ɛkɛ bɔggɛtiyɛ, yom ‘ya buagɔn ɛkkɛ bɛɛdɛ ‘yati a ɔɔn daŋkun. Yeti ɛkkɛ yookɛ te ‘ya! 38Gɔṭṭɛ, on ɛkkɛ on Juaŋ ona tolan dalnɛ Jwaŋa Tolan doki. 39Tieŋdɛ ‘ya gɔkka ɛkkɛ, ‘ya yuardata ɛkkɛ oŋgati moki bɛɛ. Yeti ne oŋ gɛɛlti ne ‘ya bɛɛdayɛ, ɛkkɛ oŋ gɔktɛ agi, ‘Mena neeni bɛɛn te yenti Jwaŋa Tolan. Ɛkɛ pwad pwado. Dala ɛkɛ magdɛ Juaŋo!’”

will be added

X\