Matta 22

1Ɔci Yaccu moki gɔkcin ɛkkɛnti te jyeka a caagin gɛɛg. 2Ɛkɛ gɔki agi, “Jyek cyɛgji Jwaŋa Tolanyɛ, bala ba jyek mena a ḍuaŋa tolan gɛɛl ne kaci ɛkɛ ḍɛññi ɛɛŋ ɔci noŋni ɛkɛ jumay. 3Ɔci ɛkɛ maka kanŋan ɛkɛti cuuññɛ aŋka ɛkkɛn ma myettan agi, ‘Juma cɔɔlin doki, dala ɛkkɛ bɛɛdɛ jumati.’ Yeti ma bɛɛn jumati bɛɛ, ɛkkɛn yookɔn. 4Ɔci ḍuaŋa tolanyɛ, maka kanŋan ɛkɛti ɛkkin pookɛn cuuññɛ moki gɔki agi, ‘Dala ɛkkɛ ooddɛ ma myettɛ ‘ya oomdin ḍaaŋi te naŋki doki. Yotk ɔci neek ṭɔlgɛn cagin ɛkkɛn ŋaarŋ ‘ya doki! ‘Ya waak ḍaaŋi waakɛnda doki. Dala ɛkkɛn bɛya jumati.’ 5Ɛkkɛn yookɔn ṭwokcin genga ɛkkɛnti bɛɛ. Ɔci ɛkkɛn ati nona ɛkkɛn yomgɛn buagitiy. Mena ne cyɛɛlɔ ati yel ɛkɛ, ɔci mena parɛ ɛkɛ ati non kanŋa ɛkɛ. 6Ɔci maka bornɛ ḍuaŋa jumati neeni ɛkkɛn maka kanŋan ḍuaŋa tolanti muogɛ ɛkkɛn, ɔci ɛkkɛn noŋjin ne yaayan maka neeniti acaan ɛkkɛn yookɔn te borti ḍuaŋa. Ɔci ɛkkɛn ɛkkɛn nogɛ. 7Ɔci ne ḍuaŋa tolan tieŋni jyek naŋka naŋɛ maka neeniyɛ, ɛkɛ looñi ne pɛñan. Ɔci ɛkɛ ackan ɛkɛ cuuññɛ ban maka nokkin maka neeniti ɔci ackan ma nogɛ ɔci ban ɛkkɛn toñgɛ maaño. 8“Ɔci ḍuaŋa tolan gɔkcin maka kanŋan ɛkɛti neeni agi, ‘‘Ya wak juma ḍaaŋi doki, yeti maka borkan ‘ya te ñamu neeniyɛ, ‘ya buaga ɛkkɛn bɛya ‘yati moki bɛɛ. Ɛkkɛn pwadɔ bɛɛ. 9Dala ɛkkɛ ɔgdɛ ooddɛ pɔɔk jitin, ɔci maka mɔktɛ ɛkkɛ pɔɔk jitinyɛ, dala ɛkkɛn oodɛ ɛkkɛ ona noŋki ma jumati waakɛnda.’ 10Ɔci maka kanŋan ɛkɛti neeni ati bora pɔɔk jitin, ɔci ɛkkɛn bala boori ma waakɛnda, maka pwadin iki maka yeyin ɔɔn. Ɔci maka neeni eyɛ ɛkkɛn jumati. Ɔci ona noŋki ma juma neeniyɛ, kuumi te maka wɛlgo. 11“Ɔci ne ḍuaŋa tolan bɛɛni orɔ aŋka gɔrti wɛlgyɛ, ɛkɛ mena ‘uan gɛɛl yuarnɛ bala ciyi ma jitin, ɛkɛ bala ɛŋi bworŋ juma warɛti bɛɛ. 12Ɔci ḍuaŋa gɔkcin ɛkɛti agi, ‘Muka maam, i kooni orɔ wɛnni ne bworŋa ‘yɛŋa i a bworŋ juma baaw ogo?’ Ɔci ɛkɛ ṭwokcin genga moki bɛɛ. 13Ɔci ḍuaŋa tolan gɔkcin ma kanŋati agi, ‘Ɛkɛ ḍɛgdɛ byeŋkɛti ɔci ciegɛti, ɔci ɛkɛ yiɛptɛ bora nona mielti.’ Ɔci ‘ya gɔkka ɛkkɛti, ka aŋanyɛ, ma wiak ɔci ŋɛyi lɛkɛn te yom yoño. 14“Acaan ma ne coŋɔn bornɛ Jwaŋa Tolan aŋka bɛya ɛkɛti, yeti ma gɛɛg ne ḍiakan aŋka aga ma ɛkɛ woodgɛn.” 15Ɔci ma Pɛriciinyɛ, ɛkkɛn Yaccu dalji ɔci ɛkkɛn atti. Ɔci ɛkkɛn bala gɔwwɔ yɔtin te jyek Yaccu. Ɛkkɛn bala lieṭi pɔya ɛkkɛn Yaccu muktitiy. Ɛkkɛn buagɔn jwalla guagdɛ Yaccu gɛɛl aktanyɔ ɛkkɛn te jwalla yaayan. 16Ɔci acaan a ɔŋŋiyɛ, ɛkkɛn maka laltan ɛkkɛn gɛɛg cuuñɛ nona Yaccuti, ɔci ma Hiruuduc gɛɛg cuuññɛ daŋkun. Ɔci maka neeni tooccin botcin Yaccuti agi, “Mena loṭi may, i ŋeecki ɔɔn i a mena gɔki awarɛ, ɔci i lor ma te jyek Juaŋ te yoma pwadan. Ɔci i buay ma ñingɛn bɛɛ. Ɔci i an menga ne cyɛɛlɔ bɛɛ. I an ma waakɛnda. 17Dala i ɔɔn myettɔn te jwali gɛɛl. Yaayɛ ne ikin Kɛɛcar ḍuaŋa tolan ma Ḍɔɔm ‘wontin bilk tulbayɛ?” 18Yeti yomg ɛkkɛn ŋeejɛ Yaccu ne ɛkkɛn balki gɔkki jyek labjiy, ɔci ɛkɛ gɔkcin ɛkkɛnti agi, “Hay ɛkkɛ maka noŋi ma ñingɛny, ɛkkɛ poccɛ ‘ya a poccin a ɔɔn ogo? 19Ḍeyyan tulba gɛɛl oodɛ wɛnni ‘ya gɔrca!” Ɔci ɛkkɛn ḍeyyan gɛɛl owwɛ Yaccuti. 20Ɔci Yaccu tooccin ɛkkɛnti agi, “Ḍeyyan neeni, ɛkɛ balki pɔɔyama menɛ? Ɔci a yenti menɛ bala ɛkɛti nɛ?” 21Ɔci ma ṭwokcin ɛkɛti agi, “Gena Kɛɛcar.” Ɔci Yaccu gɔkcin ɛkkɛnti agi, “Wak Kɛɛcaryɛ, ‘wondɛ ɛkɛ, ɔci wak Jwaŋa Tolanyɛ, ‘wondɛ ɛkɛ daŋkun.” 22Ɔci ne ɛkkɛn tieŋki jyeka neeniyɛ, ɛkkɛn korkɛn buañi ɔci ɛkkɛn Yaccu dalji ɔci ɛkkɛn atti. 23Ɔci te oŋŋa wannayɛ, ma Cadyuciin bɛɛn ɛkɛti. Maka neeni loṭi agi ne ma tuudiyɛ, ma jɔŋdɔ ñaalɔ moki bɛɛ. Ɛkkɛn bɛɛn ɔci tooccin Yaccuti te jwali ṭɔɔlɛ gɛɛl. Ɛkkɛn gɔkcin ɛkɛti agi, 24“Mena Loṭi Ma, Muuca gɔki agi, ‘Kan men gɛɛl ḍɛñi ɛɛŋ ɔci tuun ne ɛŋ ɛkɛ jieni kɛɛgin men bɛɛyɛ, agi dala ɛŋa neeni ḍɛɛdɛ mod ɛkkɛn aŋka ɛkɛ jieda kɛɛgin jyettɛ mena tuun neeni.’ 25Oŋ gɔṭṭi, maka ‘uay gɛɛg bala ban ɔɔn a dɔɔyɔ wyetkɛn ne yyɛɛwɔ. Ɛkkɛn a modin waakɛnda jiennɛ mɛya ne cyɛɛlɔ. Moda tolan ñamuyɛ, ḍɛñi ɛɛŋo. Ɔci ne ɛkɛ tuuniyɛ, kɛɛgin ɛkɛ baaw men. Ɔci moda bootcin moda tolan ŋoyɛti neeniyɛ, ɛkɛ ɛɛŋ ḍɛɛnɛ ɛkɛ moki. 26Ɔci ɛkɛ tuun moki. Ɔci moda akki ne ḍoogɔ ɛɛŋ ḍɛɛnɛ ɛkɛ moki. Ɔci ɛkɛ tuun moki. Ɔci moda akki ne ŋaanɔ ɛɛŋ ḍɛɛnɛ ɛkɛ moki. Ɔci moda akki ne dɔɔyɔ ɛɛŋ ḍɛɛnɛ moki. Ɔci ɛka akki ne dɔɔyɔ wilin ne cyɛɛlɔ ɛɛŋ ḍɛɛnɛ moki. Ɔci ne ŋoyɔ moda akki ne dɔɔyɔ wyetkɛn ne yyɛɛwɔ ɛɛŋ ḍɛɛnɛ moki. Yeti ɛkkɛn waakɛnda tuun ɔci jieni kɛɛgin gɛɛg men bɛɛ. 27Ɔci ne ɛkkɛn tuuki waakɛnda a ɔɔnyɛ, ɔci ɛɛŋ daŋkun tuuni. 28Oŋ ne oŋŋa ma jɔŋti ñaalɔ te lientiy, ɛŋa neeni aga ɛŋ moda ɔki ne ɛkɛ ḍɛyɛ ɛkkɛn waakɛnda ɔɔny?” 29Yaccu gɔkcin ɛkkɛnti agi, “Jiek dammɛ ɛkkɛ hay! Acaan jyeka kiigin kwoyɛ ɛkkɛ, ɔci moki war tɛɛn Juaŋ ŋeejɛ ɛkkɛ bɛɛ. 30Acaan ne ma jɔŋti ñaalɔ te lientiyɛ, ma ḍɛɛwɔ moki bɛɛ. Ɛkkɛn bala ba malɛɛkan ñaalɔ pɔliji. 31Jyeka kiigin jyeka guaŋŋɛ Juaŋ ɛkkɛti te jyek jɔŋŋin ma jɔŋti ñaalɔ te lienti neeni paŋŋɛ ɛkkɛ oŋgati boki? 32Juaŋ gɔki agi, ‘‘Ya a Jwaŋ Abrahim ɔci Icaak ɔci Yaakub.’ Jwaŋa Tolanyɛ, ɛkɛ a Jwaŋ maka tuutan boki? A’a. Ɛkɛ a Jwaŋ maka tɛɛtan.” 33Maka coŋinyɛ, ne ɛkkɛn tieŋki jyeka neeniyɛ, ɛkkɛn korkɛn buañi te lali ɛkɛ. 34Ma Pɛriciinyɛ, ne ɛkkɛn tieŋki agi ma Cadyuciin buanda Yaccu te jiekyɛ, ɛkkɛn wyetkɛn ḍɔɔlɛ bala gɔṭi jyeka yiecki Yaccuy. 35Ɔci men ma Pɛriciin gɛɛlyɛ, ɛkɛ ati tooccin Yaccuti te jwali gɛɛl. Mena neeni jyek ganuun ŋeejɛ ne tolan. Ɛkɛ bala poci Yaccu a poccin agi, 36“Mena loṭi may, ba jwalla bala ñamu te jyek ganuun Muuca jitka pookɛn neeni bɛ?” 37Ɔci Yaccu ṭwokcin ɛkɛti agi, “Jwalla bala ñamu te jyek ganuun jitka pookɛn neeniyɛ, gɔki agi, ‘Dala ɛkkɛ anɛ Jwaŋa Tolan Ciɛggɔn ɛkkɛ neeni ne tolan. Dala ɛkkɛ anɛ ɛkɛ te yomg ɛkkɛ waakɛnda, ɔci te coodi ɛkkɛ moki waakɛnda, ɔci te paŋi ɛkkɛ moki waakɛnda.’ 38Jwalla neeni tol tolo. Ɛkɛ bala ñamu te jyek ganuun jyeka pookɛn waakɛnda. 39Ɔci jwalla bootti jwalla neeni ŋoyɛtiyɛ, gɔki agi, ‘Dala anna i ani mena parɛyɛ, yoomdi i anna i ani war iy.’ 40Jyek ganuun ɔci jyek bɔwan Jwaŋa Tolanyɛ, gena kon ɛkkɛn jyeka ne yyɛɛwɔ neeniti.” 41Ne ma Pɛriciin wyetkɛn ḍɔɔlkiti nona ne cyɛɛlɔyɛ, Yaccu tooccin ɛkkɛnti agi, 42“Ɛkkɛ gɔkɛ Kiṭɔ a menɛ? Ɛkɛ a kaci menɛ?” Ɔci ɛkkɛn ṭwokcin ɛkɛti agi, “Ɛkɛ a kaci Daawud.” 43Ɔci Yaccu tooccin ɛkkɛnti agi, “Oŋ kan Kiṭɔ a kaci Daawud, oŋ ɛkɛ barŋɛ Daawud te baaṭi agi Kiṭɔ agi Ciɛggɔn ɛkɛ ogo? Acaan Daawud gɔki a ɔɔn te Boŋ Jwaŋa Tolan agi, 44‘‘Ya tieŋŋan Jwaŋa Tolan gɔkcin Kiṭɔ Ciɛggɔn ‘yati agi, “Dala i coocca ‘ya taaŋuti taaŋŋa byerɔn ne maka yookɔn te i bwanda ‘ya ɔɔn.”’ 45“Kan Kiṭɔ barŋi Daawud agi Ciɛggɔn ɛkɛy, oŋ ɛkɛ a kaci ɛkɛ moki a ɔki?” 46Ɔci maka yookɔn te Yaccu neeni menga yaakinti ṭwokti jwali gɛɛl moki bɛɛ. Ɔci te oŋŋa wanna ɔci oŋkanda ɔɔnyɛ, ma buayi. Ɔci ɛkkɛn tooccin ɛkɛti te jwali gɛɛl moki bɛɛ.

will be added

X\