Matta 21

1Ɔci ne Yaccu i maka laldi ɛkɛ cɔɔlki ban Urcaliimyɛ, ɛkkɛn bɛɛn baan gɛɛl bala yomɔ pom Jɛtuun taaŋɛti yenti Bɛtpɛɛj. Ɔci maka laldɛ Yaccu gɛɛg cuuññɛ ɛkɛ ne yyɛɛwɔ. 2Ɔci ɛkɛ gɔkcin ɛkkɛnti agi, “Ɔgdɛ ooddɛ pɔya eetan ma bana neeniti, ɔci ne ɛkkɛ dɛndɛ bana neenitiyɛ, tɔɔrɔn mɔktɛ ɛkkɛ i ṭɔl ɛkɛ bala wiɛntan ma aŋan. Dala ɛkkɛ tɔɔrɔn neeni gwottɛ ɔci oodɛ ‘yati. 3Ɔci kan men gɛɛl tootti ɛkkɛti agi ɛkkɛ noŋjɛ agi ɔɔn ogoyɛ, dala ɛkkɛ gɔktɛ ɛkɛti agi, ‘Ciɛggɔn buagɔn ɛkkɛn,’ ɔci tɔɔrɔn dɔɔdɛ ɛkɛ ne pɛñan.” 4Jyek naŋka neeni bɛɛn bora ba jyeka guaŋŋɛ bɔwa Jwaŋa Tolany. Bɔwa Jwaŋa Tolan gɔki agi, 5“Dala ɛkkɛ ma Urcaliim myettɛ agi, ‘Gɔṭṭɛ, Ciɛggɔn Tolan ɛkkɛ bala bɛya ɛkkɛti. Ɛkɛ noŋi warɛ bɛɛ, ɛkɛ bala taap te tɔɔrɔn ṭɔɔlɛ.’” 6Ɔci maka laldɛ Yaccu atti. Ɔci ɛkkɛn bala noŋi ba jyeka guaŋŋɛ Yaccu ɛkkɛntiy. 7Ɛkkɛn tɔɔrɔn owwɛ i ṭɔl ɛkɛ ɔɔn. Ɔci bworŋin ɛkkɛn ḍuacci tɔɔrɔn ṭɔɔlɛ ŋoyɛti. Ɔci Yaccu taapcin ñaalɔ. 8Ɔci maka coŋin maka pookɛn bworŋin ɛkkɛn cyɛtci pɔy konɛti aŋka noŋdi ɛkɛti ba mena tolan. Ɔci maka pookɛn lɛɛwin aamk jang te bora, ɔci owwɛ cyɛtci ma pɔɔjɔ pɔy konɛti aŋka noŋdi ɛkɛti ba mena tolan. 9Ɔci ma gɛɛg bala wɛɛyi ñamu. Ɔci maka pookɛn bootcin ɛkɛ ŋoyɛti. Ɔci ɛkkɛn yaadan gɔki agi, “Mena bala ñaalɔy, dala i yuoc ɔɔn acca! Dala ma jieyi i! I a Kiṭɔ Kaci Daawud! Mena bɛya te yenti Jwaŋa Tolan neeniyɛ, dala i cied ne pwadan! Dala i yuoc ɔɔn acca! Dala Juaŋ jiɛtan ma!” 10Ɔci ne Yaccu dɛnni ban Urcaliimyɛ, maka ciyi aŋan bala gɔki te jyek Yaccu waakɛnda agi, “Mena neeni a menɛ?” 11Ɔci ma bala gɔki agi, “Mena neeniyɛ, ɛkɛ a bɔwa Jwaŋa Tolan. Gena Yaccu mena bɛɛn te ban Najarɛt ban Jaliiljiy.” 12Ɔci Yaccu kaaccin orɔ on Juaŋ ona tolan. Ɔci ɛkɛ maka wɛɛṭi waak neeniyɛ, ŋualnɛ bora. Ɔci ɛkɛ tarabɛɛcan ḍorki ma girin neeniyɛ, jitkɛn baamnɛ iñɔ. Ɔci wak maka wɛɛṭi boobgyɛ, jitkɛn moki baamnɛ iñɔ. 13Ɔci ɛkɛ gɔkcin ɛkkɛnti agi, “Jwaŋa Tolan gɔki worgaji agi, ‘On ‘ya a ona cɔkki may,’ yeti ‘On ɛkɛ naŋŋɛ ɛkkɛ a ona cieki maka ɛyyo!’” 14Maka ullin ɔci maka ŋɔr ɛkkɛn bɛɛn Yaccuti on Juaŋ ona tolan ɔci ɛkɛ ɛkkɛn ywaŋŋɛyɔ. 15Yeti ne gaciicin ḍwaŋin ɔci maka loṭi worga Jwaŋa Tolan gɔrki naŋka naŋŋɛ Yaccu pwadan, ɔci moki ne ɛkkɛn tieŋki kɛɛgin balki yaadki agi, “Hay i kaci Daawud! Dala ma jieddi i,” Ɛkkɛn looñi ne pɛñan te naŋka neeni. 16Ɔci ɛkkɛn gɔkcin Yaccuti agi, “I tieŋni jyeka guaktan kɛɛgin te i neeni bɛɛ?” Ɔci Yaccu ṭwokcin ɛkkɛnti agi, “Ɛɛ, ‘ya tieŋŋan. Ɛkkɛ pokkɛ jyeka kiigin jyeka gɔki te naŋka neeni bɛɛ? Jyeka kiigin gɔki agi, ‘Te naŋki Juaŋyɛ, kɛɛgin ḍyɛrin kɛɛgin niɛd mɛyyɛnti menyɛ, ɛkkɛn jieddi Juaŋ ne pwadan te tugi ɛkkɛn.’” 17Ɔci Yaccu maka neeni dalnɛ ɔci ɛkɛ ati kaaccin bora te bana tolan neeniti, ɔci ɛkɛ ati ban Bɛtani ɔci ɛkɛ niini wɛnan. 18Ɔci oŋŋa parɛ te liidɔyɛ, Yaccu bala pɔɔjɔ noŋi dɔɔkti bana tolanti moki, ɔci ɛkɛ amɛ koño. 19Ɔci ɛkɛ ŋuami gɛɛl yuarnɛ pɔy taaŋɛti, ɔci ɛkɛ ati orcinti ŋuamiti, ɔci bala gɔṭi ɛkɛ, ɔci ɛkɛ yɔṭi ŋuami ṭɔlgɛ gɛɛg bɛɛ. Ɛkɛ yɔṭi gena jyeyi budan. Ɔci Yaccu gɔkcin jaanti agi, “Naa i jiedi ṭɔlgi ywongati moki bɛɛ.” Ɔci ne pɛñan jaan iini. 20Ɔci maka laldɛ Yaccu ne ɛkkɛn gɔrki naŋka neeniyɛ, ɛkkɛn korkɛn buañi ɔci ɛkkɛn gɔki agi, “Jana neeni iin ne pɛñan a ɔɔn ogo?” 21Ɔci Yaccu ṭwokcin ɛkkɛnti agi, “‘Ya gɔkka ɛkkɛti awarɛ, kan ɛkkɛ jyeddɛ ne pwadan ɔci tiekɛ jiek yomgɔti bɛɛyɛ, ɛkkɛ yaaktɛti noŋdɛ ba naŋka naŋi ‘ya ŋuamiti neeni. Ɔci ɛkkɛ yaaktɛti naŋka neeni parɛ bɛɛ. Kan ɛkkɛ jyeddɛ ne pwadan ɔci gɔktɛ poma neeniti agi ɛkɛ dɔddɛ Jwaŋa Tolan ñaalɔ ɔci yiɛptɛ galŋjiyɛ, Jwaŋa Tolan noŋdi awarɛ. 22Ɔci kan ɛkkɛ cɔktɛ Juaŋti, ɔci toottɛ ɛkɛti te genga, ɔci kan ɛkkɛ jyeddɛ yomgɔti agi ɛkkɛ ‘wondɛ Juaŋ gena neeniyɛ, ɔci ɛkkɛ ‘wondɛ ɛkɛ gena neeni doki.” 23Ɔci ne Yaccu kaanni kaañji kañ on Juaŋ ona tolanyɛ, gaciicin ḍwaŋin Ma Yahuud ɔci cyekin bɛɛn ɛkɛti, ɔci ɛkkɛn tooccin ɛkɛti agi. “Ɔɔn myettɔn, i noŋ naŋka neeni te jyek menɛ? A menɛ i ‘wonni naŋka neeniy?” 24Ɔci Yaccu ṭwokcin ɛkkɛnti agi, “‘Ya da buaga toocca ɛkkɛti te jwali gɛɛl daŋkun. ‘Ya ṭwoktata ɛkkɛ ñamu parun oŋ ɛkkɛ oŋ myettin ‘ya daŋkun oŋo. 25Bulti Yɔhanna bɛɛn te aŋɛ? Ɛkɛ bɛɛn te Jwaŋa Tolantɛ? Walla bɛɛn te ma baanti budan?” Ɔci ɛkkɛn bala gɔwwɔ yɔtin pookɛn agi, “Kan ikin gɔktin agi bulti Yɔhanna neeni bɛɛn te Jwaŋa Tolantiyɛ, ɔci Yaccu tootti ikinti dita agi, ‘Oŋ kan a ɔɔny, ba ɛkkɛ jyettɛ jyek ɛkɛti bɛ?’ 26Yeti kan ikin gɔktin agi bulti Yɔhanna bɛɛn te ma baanti budanyɛ, ikin buayin maka coŋin acaan ɛkkɛn waakɛnda gɔki agi Yɔhanna agi bɔwa Jwaŋa Tolan.” 27Ɔci ɛkkɛn ṭwokcin Yaccuti agi ɛkkɛn bulti Yɔhanna neeni ŋeejinti ne bɛɛnda te aŋɛ bɛɛ. Ɔci Yaccu gɔkcin ɛkkɛnti agi, “‘Ya ɛkkɛ myettin te naŋka naŋdi ‘ya neeni daŋkun bɛɛ.” 28Yaccu gɔkcin maka yoyi ñin iki ɛkɛti moki agi, “Ɛkkɛ poŋɛ a ɔki? Gɔṭṭɛ jwalla a caagɔn neeni poca. Mena ‘uan gɛɛl balki kɛɛgin a ‘uay ne yyɛɛwɔ. Ɔci weegɛn ati kacca ñamuti ɔci gɔkcin ɛkɛti agi, ‘Kaci ‘ya, ‘ya buaga i ootta kanŋati te oŋi balji bal luutkin.’ 29Ɔci ɛkɛ ṭwokcin weegɛnti agi ɛkɛ ootci bɛɛ. Ɔci ne baaṭi ɛkɛ poŋjin yomɛti, ɔci ɛkɛ dɔki atti. 30Ɔci weegɛn ati kacca parɛti kacca akki yyɛɛwɔ, ɔci gɔkcin ɛkɛti ba jwalla guaŋnɛ ɛkɛ kacca ñamu neeniti ɔɔn. Ɔci kaci ṭwokcin ɛkɛti agi, ‘Ɛɛ.’ Yeti ɛkɛ ati bɛɛ. 31Te kɛɛgin ne yyɛɛwɔ neeniy, ba kacca noŋi ba jyek weegɛn neeni bɛ?” Ɔci ma ṭwokcin Yaccuti agi, “Gena kacca ñamu.” Ɔci Yaccu gɔkcin ɛkkɛnti agi, “A warɛ, ‘ya gɔkka ɛkkɛti, maka lyemi tulba ɔci moonga tobinyɛ, ɛkkɛn ooddi cyɛgji Jwaŋa Tolanti ñamu te ɛkkɛ. 32Acaan Yɔhanna Mena Buoṭi Ma bɛɛn ɛkkɛti doki, ɔci ɛkɛ bala mieti ɛkkɛ te jyek pɔya a tyɛlga neeni, ɔci ɛkkɛ jyettɛ jyek ɛkɛ bɛɛ. Yeti maka lyemi tulba ɔci moonga tobinyɛ, ɛkkɛn jyeti jyek ɛkɛ. Ɔci ne ɛkkɛ gɔrnɛ maka pookɛn neeni jyetki jyek Yɔhannayɛ, ɛkkɛ yookɛ men ɔɔn. Ɛkkɛ jyettɛ jyek ɛkɛ men bɛɛ.” 33Ɔci Yaccu gɔkcin agi, “Dala ɛkkɛ tieŋdɛ jwalla a caagɔn ɛka parɛ neeni. On weegɛn gɛɛl bala, ɔci ɛkɛ ati pieti luutkin, ɔci ɛkɛ noŋi kaañ bal warɛti. Ɔci ɛkɛ noŋi gena tooñki ma luutkin. Ɔci ɛkɛ noŋi ona beyan ona lɛɛlki ma noono. Ɔci ɛkɛ bala neeni ‘wonnɛ maka pookɛn byeŋkɛnti ɔci ɛkɛ ati bana parɛ. 34Ɔci ne pana pwonki ma luutkin ṭɔlgɛn bɛɛniyɛ, bal weegɛn maka kanŋan ɛkɛti gɛɛg cuuññɛ nona maka gɔṭi bal neeniti aŋka ɛkkɛn ɛkɛ wɛttan jang ṭɔlgɛn gɛɛg ootan baanji ɛkɛti. 35Ɔci maka gɔṭi bal neeniyɛ, ɛkkɛn maka cuuññɛ bal weegɛn neeni muogɛyɔ. Ɔci maka neeni gɛɛl jiebɛ ɛkkɛn, ɔci ɛka parɛ gɛɛl nogɛ ɛkkɛn, ɔci ɛka parɛ gɛɛl moki yepci ɛkkɛn te gwoyyo. 36Ɔci bal weegɛn maka kanŋan ɛkɛti gɛɛg cuuññɛ moki. Maka kanŋan ɛkɛti maka cuuññɛ ɛkɛ ŋoyɔ neeni a ḍiɛkan bɛɛ. Ɛkkɛn coŋɔ te maka ñamuy. Yeti ɛkkɛn naŋɛ ma ne yaayan ba maka ñamu wanna ɔɔn. 37Ɔci ne ŋoyɔ bal weegɛn kaci ɛkɛ cuuññɛ nona mati. Weegɛn poŋi gɔki agi ne kaci ɛkɛ oottayɛ, agi maka neeni tieŋdɔ jyek ɛkta. 38“Ɔci ne maka gɔṭi bal ɛkɛ yuarkitiyɛ, ɛkkɛn bala gɔwwɔ yɔtin pookɛn agi, ‘Mena neeniyɛ, gena mena bal weegɛn luldɛ ɛkɛ ne baaṭiy. Bɛɛdɛ ikin oottin ɛkɛ noktin, ɔci wak weegɛn waka te ooddi ɛkɛti neeniyɛ, aga wak ikin.’ 39Ɔci ɛkkɛn ɛkɛ mugɛ eyɛ bora te balji, ɔci ɛkɛ oŋ nogɛ ɛkkɛn bora oŋo. 40“Oŋ ne bal weegɛn dɔɔdi ban ɛkkɛny, ɛkkɛ poŋɛ ɛkɛ noŋdi a ɔki ɛkkɛnti?” 41Ɔci maka neeni ṭwokcin ɛkɛti agi, “Bal weegɛn ooddi ban ɛkkɛn dita, ɔci maka yeyin neeni nogdɛ ɛkɛ te yom yoñ ɛkɛ neeni, ɔci ɛkɛ bal ‘wondɛ maka pookɛn byeŋkɛnti. Ɔci ɛkkɛn bal weegɛn ‘wontan jang ṭɔlgɛn ɛkɛ daŋkun.” 42Ɔci Yaccu tooccin ɛkkɛnti agi, “Oŋ ɛkkɛ, ɛkkɛ pokkɛ jyeka kiigin neeni bɛɛ? Jiek gɔki agi, ‘Poma guaktan maka cɔti oorg agi ɛkta yaayɔ neeniyɛ, ɛkɛ aŋi poma pwadan on warɛti doki. Naŋka neeni naŋŋɛ Juaŋo, ɔci ɛkɛ pwanna pwani ikin ñinguti!’ 43“A ɔŋŋiyɛ, ‘ya gɔkka ɛkkɛti, Jwaŋa Tolan jyek cyɛgji ɛkɛ eedɛ ɔntɔ te ɛkkɛti ɔci ‘wondɛ maka pookɛn gɛɛg maka noŋi ba jyek ɛkɛ ba naŋki maka gɔṭi bal maka pwadin ne ɛkkɛn bal weegɛn ‘wontɛti jang ṭɔlgɛny. [ 44Kan men gɛɛl twordɛ poomyɛ, ɛkɛ nuudɛji poomo. Ɔci kan poom ḍɛmdi men gɛɛltiyɛ, ɛkɛ mena neeni ñoottɛ iñɔ.]” 45Gaciicin ḍwaŋin Ma Yahuud ɔci ma Pɛriciinyɛ, ne ɛkkɛn tieŋki jyeka a caagin guaŋŋɛ Yaccu ɛkkɛnti neeniyɛ, ŋeecɔn ɛkkɛn ne Yaccu baali gɔki jyeka neeni te ɛkkɛn acaan jyeka neeni a caagin te ɛkkɛn. 46Ɔci gaciicin ḍwaŋin Ma Yahuud ɔci maka loṭi worga Jwaŋa Tolanyɛ, ɛkkɛn buagɔn Yaccu muktan acaan ŋeecɔn ɛkkɛn Yaccu gɔkcin jwalla a caagɔn neeni ɛkkɛnti te naŋki ɛkkɛn, yeti ɛkkɛn buayi maka coŋin neeni, acaan maka coŋin neeni gɔki agi Yaccu agi bɔwa Jwaŋa Tolan.

will be added

X\