Matta 20

1“Jyek cyɛgji Jwaŋa Tolanyɛ, ɛkkɛn bala ba jyek mena jɔŋŋin ati te liid ṭɔɔl ḍiɛran ati lieṭi maka noŋi kanŋa bal ɛkɛ bal luutkiny. 2Ɔci ma gɛɛg yuarŋɛ ɛkɛ. Ɔci ɛkɛ jiek naŋɛ iki ɛkkɛn agi te oŋ jiña ne cyɛɛlɔ agi ɛkɛ ɛkki ‘woñji ḍeyyan mɛɛgdan ne cyɛɛlɔ. Ɔci ne ɛkkɛn jiek ḍaakkitiyɛ, ɛkɛ oŋ ɛkkɛn cuuññɛ balji oŋo. 3Ɔci ne oŋ waŋɛ kuani ñaalɔyɛ, ɛkɛ ati lieṭi ma kanŋa moki. Ɔci ma gɛɛg mɔŋnɛ ɛkɛ bala yɔdi a yɔɔdi budan dukkan jitin. 4Ɔci ɛkɛ gɔkcin ɛkkɛnti agi, ‘Dala ɛkkɛ ooddɛ ‘ya noŋdata kanŋa bal ‘ya daŋkun. Ɔci ‘ya ɛkkɛ ‘wondin bilk ne pwadan.’ Ɔci ɛkkɛn atti. 5Ɔci ne oŋ waŋɛ yɔɔnni yeccu moki, ɛkɛ ati bora ɔci gɔkcin mati a ɔɔn, ɔci ɛkkɛn jyeti moki. Ɔci moki ne oŋ warɛ yiɛnnɛyɛ, ɛkɛ ati bora ɔci gɔkcin maka pookɛnti a ɔɔn moki ɔci ɛkkɛn jyeti daŋkun. 6Ɔci moki ne oŋ waŋɛ unniyɛ, ɛkɛ ati bora moki, ɔci maka pookɛn gɛɛg mɔŋnɛ ɛkɛ yɔdi a yɔɔdi budan moki. Ɔci ɛkɛ tooccin ɛkkɛnti agi, ‘Ɛkkɛ yɔdgɛ a yɔɔdi budan a ɔɔn ogo?’ 7Ɛkkɛn ṭwokcin ɛkɛti agi, ‘Men gɛɛl ɔɔn ‘wonnɔn kanŋa bɛɛ.’ Ɔci ɛkɛ gɔkcin ɛkkɛnti agi, ‘Dala ɛkki ɔgdɔ ooddɔ kandɔ bal ɛkɛti daŋkun.’ 8“Ɔci ne oŋ waŋɛ unniyɛ, bal weegɛn gɔkcin mena gɔṭi ma kanŋa neeniti agi, ‘Dala ma kanŋa ‘woñga bilk waakɛnda. Dala i jɔɔtca ‘woñja te maka bɛɛn ne ŋoyɔ, ne maka bɛɛn ñamuti ɔɔn.’ 9Maka bɛɛn kanŋati ne oŋ utcinyɛ, ɛkkɛn ‘wonnɛ ɛkɛ ḍeyyan mɛɛgɛn ne cyɛɛlɔ waakɛnda. 10Ɔci ne maka ñamu bɛɛkiyɛ, ɛkkɛn bala poŋi gɔki agi ɛkkɛn dita eedinti bilk ne coŋɔn, yeti ɛkkɛn waakɛndayɛ, menga da eci ḍeyyan mɛɛgɛn ne cyɛɛlɔ budan. 11Ɔci ɛkkɛn bilk eyɛ, ɔci ɛkkɛn bala wooki on weegɛn agi, 12‘Maka bɛɛn ŋoyɔ neeniyɛ, ɛkkɛn noŋi kanŋa ba oŋ waŋɛ ne cyɛɛlɔ budan. Ɔci ɔɔnyɛ, ɔɔn balgɔn kanŋɔn kanŋa tɛyan, ɔci oŋ waŋɛ moki myɛlla myɛli ɔɔnti. Oŋ i ɔɔn ‘wondɔn pordɔn a porti i ɛkkɛn ogo?’ 13Ɔci on weegɛn gɔkcin men gɛɛlti te maka neeniti agi, ‘Mug ɔɔn, ‘ya noŋi gena yaayan gɛɛl iti bɛɛ. Ikin jyek bilk naŋŋin a cyɛɛlɔ te ñamu te ḍeyyan mɛɛgɛn bɛɛ? 14Dala wak i lula ɔci i ɔgdi ootta, ‘ya buaga mena bɛɛn ŋoyɔ neeni ‘woñga ba ‘woñgin i ‘wonnin ‘ya neeni ɔɔn. 15’Ya yaakati noŋja ba yom ‘ya paru te wak ‘ya bɛɛ? Kan ‘ya yomu pɔkkan mena parɛ neenitiy, a jyek i?’” 16Ɔci Yaccu gɔkcin agi, “Ba naŋka neeniyɛ, dala ŋeeddɛ ɛkkɛ, ma gɛɛg a maka te bala ñamuyɛ, ɛkkɛn aŋka bala ŋoyɔ, ɔci ma gɛɛg a maka te bala ŋoyɔyɛ, ɛkkɛn aŋka bala ñamu.” 17Yaccu bala pɔɔjɔ ooddi ban Urcaliim. Ɔci ne ɛkɛ baali yomɔ menyɛ, ɛkɛ maka laldɛ ɛkɛ a inyaakkɛn wyetkɛn ne yyɛɛwɔ eññɛ nona parɛti pookɛn. Ɔci ɛkɛ gɔkcin ɛkkɛnti agi, 18“Gɔṭṭɛ, ikin oottin ne dɛntin ban Urcaliimyɛ, ‘ya Kaci Ma Baan ‘wonta ma gaciicin ḍwaŋin Ma Yahuud, ɔci maka loṭi worga Juaŋ byeŋkɛnti doki. Ɔci ɛkkɛn noŋdi godan ‘yati, ɔci te jyek godan neeniyɛ, ɛkkɛn gɔkti agi dala ‘ya tuudjɔ. 19Ɔci ‘ya ‘wonta ɛkkɛn ackan ma Ḍɔɔm byeŋkɛnti moki. Ɔci ɛkkɛn ñieddi te ‘ya ɔci ‘ya ḍuata ɛkkɛn. Ɔci ‘ya ŋaapta ɛkkɛn. Yeti ne nink ne ḍoogɔ bɛɛti borayɛ, ‘ya jɔlla ñaalɔ te koolji moki. Gena jyek ‘ya neeni.” 20Ɔci te oŋŋa wannayɛ, ɛŋ Jɛbadi bɛɛn Yaccuti iki kɛɛgin ɛkɛ kɛɛgin a ‘uayo. Ɔci ɛkɛ ḍwoñjin iñɔ Yaccu ñamɛti ɔci tooccin Yaccuti te jwali gɛɛl. 21Ɔci Yaccu gɔkcin ɛɛŋti agi, “I buagi gena?” Ɔci ɛkɛ gɔkcin ɛkɛti agi, “Oŋŋa i agdi Ciɛggɔn Tolanyɛ, dala i kɛɛgin ‘ya neeni naŋa a ma i waru, mena ne cyɛɛlɔ te byeŋa byerɔn, ɔci mena ne cyɛɛlɔ te byeŋa aamo.” 22Ɔci Yaccu gɔkcin ɛkkɛnti agi, “Hay, taata toocɛ ɛkkɛ neeni jiek jitkɛn ŋeejɛ ɛkkɛ ne pwadan bɛɛ. Ɛkkɛ yaakɛti mottɛ kubaaya taab kubaaya maadi ‘ya neeni boki?” Ɔci ɛkkɛn ṭwokcin ɛkɛti agi, “Ɛɛ, ɔɔn yaakɔnti.” 23Ɔci Yaccu gɔkcin ɛkkɛnti agi, “Ne baaṭi ɛkkɛ mottɛ kubaaya taab ‘ya awarɛ, yeti a ‘ya ɛkkɛ ‘wondin jyek coodda ɛkkɛ coottɛ ‘ya byeŋkuti bɛɛ. Maka buagɛ Wey ɔɔnyɛ, ɛkkɛn aŋka ‘wondɛ ɛkɛ nona neeni.” 24Ɔci ne maka laldɛ ɛkɛ maka a inyaakkɛn neeni tieŋki jyeka neeniyɛ, ɛkkɛn looñi modga neeniti. 25Ɔci Yaccu ma bornɛ agi dala ɛkki bɛɛdɔ nona ɛkɛti. Ɔci ɛkkɛn ati nona ɛkɛti. Ɔci ɛkɛ gɔkcin ɛkkɛnti agi, “Gɔṭṭɛ, paŋi ḍuaŋan ḍwaŋin ḍuaŋan keedin iñɔ ṭɛɛrji wɛnni ŋeejɛ ɛkkɛ boki? Ɛkkɛn poŋi gɔki agi ɛkkɛn aginti maka ḍwaŋin. Ɔci ɛkkɛn buagɔn dala ma waakɛnda noŋdi ba jyek ɛkkɛn. Ɔci maka ḍwaŋinyɛ, ɛkkɛn gɔki mati ne pɛñan te jyeka ɛkkɛn buagiti naŋtan may. 26Yeti naa ɛkkɛ noŋdɛ ba naŋka neeni a ɔɔn bɛɛ. Kan men gɛɛl ɛkkɛti buagɔn aga mena tolanyɛ, dala ɛkɛ noŋdi ba ne ɛkɛ agi mena kanŋan ɛkkɛti ɔɔn. 27Ɔci kan mena buagɔn aga mena bala ñamu ɛkkɛtiyɛ, dala ɛkɛ noŋdi ba mena kɛɛngɔn ma waakɛnda. 28Bala ba ‘ya Kaci Ma Baan ne bɛɛna iñɔyɛ, naŋki ‘ya bala a ɔɔn daŋkun. ‘Ya bɛɛn aŋka ma moki ‘ya bɛɛ. Yeti ‘ya bɛɛn aŋka ‘ya mok mako. ‘Ya bɛɛn won maka coŋin te yimg ‘ya.” 29Ɔci ne Yaccu kaanni bora te ban Jɛrikɔyɛ, ma bootcin ɛkɛti kɔɔna kɔɔnno. 30Ɔci maka ullin bala ciyi pɔy taaŋɛti ne yyɛɛwɔ. Ɔci ne ɛkkɛn tieŋki agi Yaccu bɛɛdɔ gordɔ te pɔya neeniyɛ, ɛkkɛn yaajjin ne tolan agi, “I, Ciɛggɔn, Kaci Daawud, dala i yomu pɔkka ɔɔnti ɔci ɔɔn pɔktɔn ñingɔti!” 31Ɔci polla tolan neeni bala dɛyi ɛkkɛn agi dala ɛkki ciedɔ lieda. Yeti ɛkkɛn cien lieda bɛɛ. Ɛkkɛn bala yaadan a yook ɔɔn agi, “I Ciɛggɔn, Kaci Daawud, dala i yomu pɔkka ɔɔnti!” 32Ɔci Yaccu yɔɔni, ɔci ɛkɛ maka ullin neeni bornɛ, ɔci ɛkkɛn bɛɛn ɛkɛti. Ɔci Yaccu tooccin ɛkkɛnti agi, “Ɛkkɛ buagɛ ‘ya noŋja a ɔki ɛkkɛti?” 33Ɔci ɛkkɛn ṭwokcin ɛkɛti agi, “Ciɛggɔn, dala i ɔɔn pɔktɔn woŋgɔti!” 34Ɔci Yaccu yomɛ wiak te ɛkkɛn, ɔci ɛkɛ topcin ɛkkɛn woŋgɛnti, ɔci ne pɛñan ɛkkɛn yaakinti gwali noon doki. Ɔci ɛkkɛn bootcin Yaccuti doki te pɔɔjɔ ɔɔn.

will be added

X\