Matta 2

1Yaccu jiedi ma ban Bɛtlaham ban Yahuudiyaji te wɔɔka Hiruuduc mena a ḍuaŋa tolany. Ɔci te wɔɔka wannayɛ, maka ñingɛn tɛyan gɛɛg bɛɛn te nona loonan pɔya tyɛrñanti aŋan. Ɛkkɛn bɛɛn ban Urcaliim. Ɔci ɛkkɛn bala tooci agi, 2“Ba mena jiedi ma aga ḍuaŋa tolan Ma Yahuud neeni bɛ? Acaan ɔɔn kɛɛli ɛkɛ yuarnɔn te ban ɔɔn pɔya tyɛrñanti aŋan. Ɔci ɔɔn bɛɛnɔn aŋka mortɔn ɛkɛti.” 3Ne Hiruuduc tieŋni jyeka neeniyɛ, ɛkɛ yomɛ yaañi ne tolan acaan ɛkɛ poŋi agi kacca neeni non ɛkɛ mugda agdɔ mena tolan dita. Ɔci ma Urcaliim daŋkun waakɛndayɛ, ɛkkɛn yomgɛn yiegin iki ɛkɛ a cyɛɛlɔ. 4Ɔci ne ɛkɛ maka gaciicin ḍwaŋin Ma Yahuud ɔci maka loṭi worga Juaŋ ḍɔɔlliyɔyɛ, ɛkɛ oŋ tooccin ɛkkɛnti agi, “Worga Jwaŋa Tolan gɔki agi Kiṭɔ jieddɛ ma aŋɛ?” 5Ɔci ɛkkɛn ɛkɛ myetki agi, “Ɛkɛ jiettan ma ban Bɛtlaham ban Yahuudiyaji, acaan jyeka kiinɛ bɔwa Jwaŋa Tolan te baaṭi gɔki agi, 6‘Hay, i ban Bɛtlaham ban Yahuudiyajiy! I buanki bonka pookɛn bonka ḍwaŋin neeni bɛɛ. Ḍuaŋa tolan gɛɛl bɛya te ma iti. Ɔci ɛkɛ aga mena wɛɛyi ma ‘ya ma Icrayiil neeni.’” 7Ɔci Hiruuduc maka ñingɛn tɛyan neeni bornɛ lieda. Ɔci ɛkkɛn bɛɛn ɛkɛti ɔci ɛkɛ tooccin ɛkkɛnti te jyek oŋŋa ɛkkɛn kɛɛli yuarkiti, aŋka ŋeeddɛ ɛkɛ ne pwadan kacca neeni jiedi ma te tuwa. 8Ɔci ɛkɛ ɛkkɛn cuuññɛ ban Bɛtlaham, ɔci gɔkcin ɛkkɛnti te labji agi, “Ɔgdɛ ooddɛ. Dala ɛkkɛ liertɛ kacca neeni ne pwadan. Ɔci ne ɛkkɛ ɛkɛ yuardiyɛ, dala ɛkkɛ ‘ya eektata jiek aŋka ‘ya daŋkun ootta ɔci morca ɛkɛti.” 9Ɔci ne ɛkkɛn tieŋki jyek ḍuaŋa tolanyɛ, ɛkkɛn atti. Ɔci ɛkkɛn bala gɔṭi kɛɛlla yuarcɛ ɛkkɛn te ban ɛkkɛn pɔya tyɛrñanti aŋany. Ɛkɛ bala ati ɛkkɛn ñomgɛnti, ɔci ɛkɛ ati ne yɔɔnni nona baali kaci ɔɔn. 10Ɔci ne ɛkkɛn kɛɛli yuarkiti doki nona yɔɔnni ɛkɛyɛ, ɛkkɛn yomgɛn ñɔɔna ñɔɔn ne tolan. 11Ɔci ɛkkɛn ati kaaccin orɔ. Ɔci ɛkkɛn kaci yuarɛ iki mɛy ɛkkɛn Moryam. Ɔci ɛkkɛn ḍwoñjin iñɔ ɔci morcin kaciti. Ɔci ɛkkɛn kucin ecki ɛkkɛn waka pwadin pɔɔggɛ tuggɛnti. Ɔci waka pwadin waka wiɛlɛn pɛñan neeni ‘woñgi ɛkkɛn Yaccu a ‘woñgin budan. Gena dahab ɔci ḍɔŋi poom ɔci eelan cyɛyan. 12Ɔci ne weenji ɛkkɛn ṭeenɛ Juaŋ te loggin agi naa ɛkki dɔɔdɔ Hiruuducti moki bɛɛ. Ɔci ɛkkɛn ati ban ɛkkɛn te pɔya parɛ. Ati te pɔy ban Hiruuducn bɛɛ. 13Ɔci ne ɛkkɛn atki dokiyɛ, malɛɛka gɛɛl cuonnɛ Jwaŋa Tolan Yuocipti te loggin moki. Ɔci ɛkɛ gɔkcin Yuocipti agi, “Jɔŋŋa ñaalɔ ne pɛñan kaci eya i mɛɛgɛn ɛkkɛ yooŋdɛ ban Macor. Ɔci dala ɛkkɛ ciedɛ aŋan ne oŋŋa i myettin te woon ɔɔn. Acaan Hiruuduc bala lieṭi kaci aŋka kaci nogdɛ.” 14Ɔci Yuocip jɔŋŋin ñaalɔ, ɔci ɛkɛ kaci eññɛ i mɛɛgɛn te weenji ɔɔn. Ɛkkɛn ati ban Macor. 15Ɔci ɛkkɛn cien aŋan ɔɔn ne Hiruuduc tuuni ɔɔn. Naŋka neeni bala a ɔɔn aŋka jyeka guaŋŋɛ bɔwa Jwaŋa Tolan te bɛɛn Yaccu neeni bɛya bora. Bɔwa Jwaŋa Tolan gɔki agi, “Kaci ‘ya owwan ‘ya bora te ban Macor.” 16Ɔci ne wɔɔka beññiyɛ, Hiruuduc bala poŋi jiek gɔki agi, “Ma boki bɛya pɔya ‘yati wɛnnɛ? Hay! ‘Ya naŋka ma ñin, hay!” Ɔci ɛkɛ bala looñi ne tolan. Ɔci ɛkɛ ma cuuññɛ agi ma ɔgdɔ ooddɔ ban Bɛtlaham agi kɛɛgin ḍyɛrin nogdɛ ma waakcinda. Kan kɛɛgin yuongɛn a yyɛɛwɔyɛ, ɛkkɛn nogdɛ, ɔci kan kɛɛgin yuongɛn a yyɛɛwɔ men bɛɛyɛ, ɛkkɛn nogdɛ waakɛnda ɔɔn ban Bɛtlaham, ɔci bonka ban Bɛtlaham toŋkɛti daŋkun. Hiruuduc gɔki a ɔɔn acaan yuong bɛɛn bora ne yyɛɛwɔ doki te oŋŋa maka ñingɛn tɛyan neeni kɛɛli yuarkitiy. 17Ɔci naŋka neeni bala a ɔɔn aŋka jyeka guaŋŋɛ bɔwa Jwaŋa Tolan bɔwa yenti Jɛramaaya te ma Icrayiil neeni bɛya bora. Jɛramaaya gɔki agi, 18“Ɔci pwan tieŋji ma te ban Raama ne yaadi ne tolany. Rahiil bala wiak te kɛɛgin ɛkɛ, ɔci ɛkɛ bala wiak a joon ɔɔn, mwondi bɛɛ, acaan kɛɛgin baaw tuuni.” 19Ɔci ne Hiruuduc tuuniyɛ, malɛɛka Jwaŋa Tolan warɛ lɛɛlnɛ bora Yuocipti te loggin ban Macor ɔci gɔkcin ɛkɛti agi, 20“Jɔlla ñaalɔ waru ywaŋa ɔci kaci eya i mɛɛgɛn ɔci ooddɛ dɔɔdɛ ban ma Icrayiil. Maka bala lieṭi kaci aŋka buagɔn ɛkɛ noktanyɛ, ɛkkɛn tuun doki, yoñ gɛɛl bala moki bɛɛ.” 21Ɔci ɛkɛ jɔllin ñaalɔ ɔci ɛkɛ kaci eññɛ iki mɛɛgɛn ɔci ɛkkɛn ati ban ma Icrayiil. 22Ɔci ne Yuocip tieŋni agi Arkilawuc aŋŋɔ ḍuaŋa tolan ban Yahuudiya, ɔci coonnɔ non weegdan Hiruuducyɛ, ɛkɛ buayi woon ban Yahuudiya. Ɔci ɛkɛ myennɛ Juaŋ te loggin ɔci ɛkɛ ati bana parɛ, nona tolan nona yenti Jaliil. 23Ɔci ɛkɛ ati bala ciyi ban Najarɛt. Te naŋka neeniyɛ, jyeka guaŋŋɛ bɔwa Jwaŋa Tolan te Yaccu bɛɛn bora agi, “Ɛkɛ bartan ma a men maka ban Najarɛt.”

will be added

X\