Matta 19

1Ɔci ne Yaccu ḍookki te lali jyeka neeniyɛ, ɛkɛ ban Jaliil dalnɛ, ɔci ɛkɛ ati Tol Urdun jyɛnnɛji ati ṭɛr Ma Yahuudiya nona bala tool taaŋŋa waayitiy. 2Ɔci ma bootcin ɛkɛti kɔɔna kɔɔnno. Ɔci maka waakɛn yeyin ɛkkɛn ywaŋŋɛ ɛkɛ bana waayiti. 3Ɔci ma Pɛriciin bɛɛn ɛkɛti, ɔci bala tooci yieci ɛkɛ. Ɛkkɛn tooccin ɛkɛti agi, “Kan mena ‘uan ɛŋ ɛkɛ daldɛ te jwali gɛɛly, a ɔɔn bala ba jyek ganuun Muuca bɛɛ?” 4Ɔci Yaccu ṭwokcin ɛkkɛnti agi, “Ɛkkɛ pokkɛ jyeka kiigin boki? Jyeka neeni gɔki agi, ‘Oŋŋa ma aŋŋɛ Jwaŋa Tolanyɛ, mena ne cyɛɛlɔ aŋŋɛ ɛkɛ a ‘uan ɔci mena parɛ aŋŋɛ ɛkɛ a ɛɛŋo.’ 5Ɔci jyeka kiigin moki gɔki agi, ‘A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ a cyɛɛlɔ. 6Acaan, ɛkkɛn yaakkɛn aŋi ba mena ne cyɛɛlɔ doki, a yyɛɛwɔ moki bɛɛ. A ɔŋŋiyɛ, maka ñaaŋŋɛyɔ Jwaŋa Tolanyɛ, naa menga ɛkkɛn kɛbdɛ jitin moki bɛɛ.” 7Ɔci maka neeni tooccin Yaccuti agi, “Oŋ Muuca gɔki agi kan mena ‘uan ɛŋ ɛkɛ dalnɛyɛ, dala ɛkkɛn byeŋkɛn tantan ɔci ɛkɛ ɛɛŋ ‘wondɛ worga doortin ogo?” 8Ɔci Yaccu ṭwokcin ɛkkɛnti agi, “Muuca jyek doortin i moong neeni kiinɛ ɛkɛ acaan ɛkkɛ wyetkɔ tɛy tɛyo. Yeti te ñamu jyeka naŋŋɛ Juaŋ bala a ɔɔn bɛɛ. 9Ɔci ‘ya gɔkka ɛkkɛti, kan ɛɛŋ noŋi tomi bɛɛ, ɔci kan ɛkɛ daldɛ ‘war ɛkɛ te jwalla parɛ gɛɛl, ɔci ‘wana neeni ḍɛɛdi ɛŋa parɛyɛ, a ɔɔn ɛkɛ noŋi tommo. Ɔci kan ɛŋa dalnɛ ‘war ɛkɛ neeni ḍɛɛnɛ ‘wana parɛyɛ, ‘wana parɛ neeni noŋi tomi ɛŋa neeniti.” 10Ɔci ne Yaccu ḍookkiyɛ, maka laldɛ ɛkɛ gɔkcin ɛkɛti agi, “Oŋ kan jiek bala a ɔɔn te mena ‘uan ɔci ɛŋ ɛkɛy, coodda ma cieti budan te ḍɛɛn aŋka yɔmjin bɛɛ?” 11Yaccu ṭwokcin ɛkkɛnti agi, “Ma waakɛnda yaakinti jyeka neeni muktan bɛɛ. Gena maka ‘wonnɛ Jwaŋa Tolan jyeka neeni aŋka noŋdi ba jyeka neeniy. 12Maka ‘uayi gɛɛg ḍɛñi bɛɛ acaan naŋki jitkɛn bala coŋɔ. Ɛkkɛn gɛɛg ḍɛñi bɛɛ acaan ɛkkɛn jiedɛ ma a luoko, ɔci ɛkkɛn gɛɛg ḍɛñi bɛɛ acaan ɛkkɛn yuyɛ mako, ɔci ɛkkɛn gɛɛg ḍɛñi bɛɛ te jyek cyɛgji Jwaŋa Tolan acaan ɛkkɛn buagɔn noŋdi kanŋa ne pwadan. Mena lalla neeni mugdɛ yomɛtiyɛ, dala ɛkɛ noŋdi a ɔɔn.” 13Ɔci ma bala etti kɛɛgin ḍyɛrin Yaccuti. Ɛkkɛn buagɔn dala ɛkɛ ɛkkɛn ordɛyɔ. Yeti maka laldɛ Yaccu kɛkcin maka neeniti. 14Ɔci ne ɛkkɛn kɛkki a ɔɔnyɛ, ɛkɛ gɔkcin ɛkkɛnti ne pɛñan agi, “Dala kɛɛgin daldɛ bɛya ‘yati. Naa ɛkkɛ kɛkɛ ɛkkɛn a ɔɔn bɛɛ, acaan jyek cyɛgji Jwaŋa Tolanyɛ, gena jyek maka bala ba ɛkkɛn ɔɔn.” 15Ne Yaccu byeŋkɛ tannɛ kɛɛginti dokiyɛ, ɛkɛ oŋ ati bana parɛti oŋo. 16Ɔci ‘wana ḍiɛran gɛɛl bɛɛn Yaccuti ɔci tooccin ɛkɛti agi, “Mena loṭi may, ‘ya noŋja naŋka pwadan naŋka ɔki aŋka tɛɛtin baadi bɛɛ neeni bɛɛdi ‘yatiy?” 17Ɔci Yaccu ṭwokcin ɛkɛti agi, “I tooc ‘yati te jyek naŋka pwadan neeni ogo? Mena pwadan gɛɛl bala boki? Gena Jwaŋa Tolan parɛ aŋka pwadany. Kan i buagi tɛɛtin wannayɛ, dala i jyek ganuun jitkɛn tiyayɔ.” 18Ɔci ‘uan tooccin Yaccuti agi, “Ganuun jitka bɛ?” Ɔci Yaccu gɔkcin ɛkɛti agi, “ ‘Naa i menga noga bɛɛ, naa i noŋja tomi bɛɛ, naa i kor waak bɛɛ, naa i men gɛɛl jomgayɔ bɛɛ. 19Dala i noŋja ne pwadan weegɔti ɔci mɛɛgɔti.’ Ɔci ‘Dala anna i ani mena parɛyɛ, yoomdi i anna i ani war iy.’” 20Ɔci ‘wana ḍiɛran neeni gɔkcin Yaccuti agi, “‘Ya baal tiec jyeka neeni waakɛn ne ‘ya wona ḍiɛra men ɔɔn. Jiek tiiñiyɔ ‘ya waakɛnda, jwali gɛɛl daljan ‘ya ɔntɔ te tiit bɛɛ. Ɔci acca jwalla parɛ gɛɛl bala boki?” 21Ɔci Yaccu gɔkcin ɛkɛti agi, “Kan i buagi pwadi ne tolan Juaŋ ñamɛtiyɛ, dala i ootta wak i wiɛlja ñin waakɛnda ɔci bilk ḍierga maka bɔwan aŋka i balti maal ñaalɔ pɔliji, hayya i oŋ bɛɛd bootta ‘yati oŋo.” 22Yeti ne ɛkɛ tieŋni a ɔɔnyɛ, ɛkɛ yomɛ yaañi ɔci ɛkɛ Yaccu dalnɛ ɔci ɛkɛ atti. Ɛkɛ yomɛ yaayɛ acaan ɛkɛ balki waak ne coŋɔn, ɔci buagɔn ɛkkɛn wiɛldɛ ñin bɛɛ. 23Ɔci Yaccu gɔkcin maka laldɛ ɛkɛti agi, “Maka cyɛganyɛ, bolja ɛkkɛn Jwaŋa Tolan naŋtiti agdi Ciɛggɔn ɛkkɛnyɛ, tɛy tɛyo. 24’Ya gɔkka ɛkkɛti moki, ka wɔtcin kolŋan wɔtti ibra waŋɛtiyɛ, koocin te bolja mena maalɛ tolan Jwaŋa Tolan naŋdi agdi Ciɛggɔn ɛkɛy.” 25Ɔci maka laldɛ Yaccu ne ɛkkɛn tieŋki jyeka neeniyɛ, ɛkkɛn korkɛn buañi ne pɛñan, ɔci tooccin Yaccuti agi, “Oŋ kan a ɔɔny, a menɛ uday?” 26Ɔci Yaccu gɔrcin ɛkkɛnti ɔci gɔkcin agi, “Ma baan yaakinti waakɛn ootan iñɔ bɛya ɛkɛ bieŋɛti pookɛn bɛɛ. Jwaŋa Tolan aŋka yaakinti ɛkkɛn magdɛ. Acaan Jwaŋa Tolanyɛ, ɛkɛ tɛɛkti genga bɛɛ.” 27Ɔci Butruc gɔkcin Yaccuti agi, “Gɔṭṭi, ɔɔnyɛ, ɔɔn waak dalnɔn waakɛnda, ɔci ɔɔn boonnɔn iti doki. A gena a gena pwadan bɛya ɔɔnti te naŋka neeniy?” 28Ɔci Yaccu gɔkcin ɛkkɛnti agi, “Tieŋdɛ ‘ya gɔkka ɛkkɛti awarɛ, ne ṭɛɛr agdiyɔ Juaŋ agdi ṭɛra woonɛ, ɔci ne ‘ya Kaci Ma Baan cootta kaakci ‘ya kaakci cyɛgjiti ñaalɔyɛ, ɛkkɛ da coottɛ kokin ḍuaŋan ḍwaŋinti kokin a inyaakkɛn wyetkɛn ne yyɛɛwɔ neeniti. Ɔci ɛkkɛ gɔrtɛ jyek ma ikin ma Icrayiil maka kɛɛna a inyaakkɛn wyetkɛn ne yyɛɛwɔ neeniy. 29Ɔci maka oorg ɛkkɛn dalji ɔci modg ɛkkɛn dalji, ɔci kowi ɛkkɛn dalji, ɔci weyi ɛkkɛn dalji, ɔci mɛyi ɛkkɛn dalji, ɔci yelk ɛkkɛn daljɛ te jyek ‘yayɛ, ɛkkɛn ‘wondɛ Juaŋ waak ne coŋɔn. Ɔci tɛɛtin baadi bɛɛyɛ, bala ɛkkɛnti. 30Maka coŋin maka bala ñamu accayɛ, ne baaṭi ɛkkɛn gɛɛg bala ŋoyɔ. Ɔci maka bala ŋoyɔ accayɛ, ɛkkɛn aŋka gɛɛg bala ñamu.

will be added

X\