Matta 18

1Te oŋŋa wannayɛ, maka laldɛ Yaccu bɛɛn ɛkɛti ɔci tooccin ɛkɛti agi, “A menɛ a mena tolan te ɔɔn ñaalɔ cyɛgji Jwaŋa Tolantiy?” 2Ɔci Yaccu kaci gɛɛl bornɛ ɔci yɔɔnnɛ ɛkɛ yeccu ma ñomgɛnti. Ɔci Yaccu gɔkcin mati agi, 3“‘Ya gɔkka ɛkkɛti awarɛ, kan ɛkkɛ waakɔ yaldɛ agdɛ ba kɛɛgin ḍyɛrin yomgɔti bɛɛyɛ, ɛkkɛ yaakɛti kaattɛ ñaalɔ non cyɛgji Jwaŋa Tolan bɛɛ! 4Kan men gɛɛl ḍiɛṭ ḍyɛr yomɛti ba kacca neeniyɛ, ɛkɛ a mena tolan ban cyɛgja ñaalɔ pɔliji. 5Kan men gɛɛl kaci gɛɛl mugdɛ ba kacca neeni te yenti ‘yayɛ, ɛkɛ da ‘ya mugda. 6“Kɛɛgin neeni jyeti ‘yati, ɔci kan men gɛɛl noŋdi gena yaayan gɛɛl ɛkkɛnti aŋka ɛkkɛn noŋdi nɔjiyɛ, a ɔɔn pwatcin bɛɛ yaayɛ. Jyeka bɛya mena neeni wyeñɛtiyɛ, pɛñcin ne yaajan te bolji mena ḍɛktan ma poma tolan pom jien ḍwaŋɛti ɔci yiɛptan ma galŋa tolanjiy. 7Hay ɛkkɛ maka bala ṭɛra neeni ŋoyɛti nɛ, ɛkkɛ waakɔ gootti te maali nɔjja neeni ne pɛñan. Ɛɛ! Maali nɔjja neeni bɛya awarɛ. Yeti mena etti jyek maalla neeniyɛ, ɛkɛ daŋkun konɛ ñakti ne tolan. 8“Kan nɔji bala iti te naŋki byeŋ i, walla te naŋki ciy iyɛ, dala i ɛkɛ ŋutca ɔntɔ. Kan war i warda ooddi maccu te gena naŋŋɛ byeŋ i walla ciy iyɛ, a ɔɔn pwatcin bɛɛ. Maña neeni baadi oŋgati bɛɛ. Kan byeŋ i ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. 9Kan nɔji bala iti te naŋki waŋ iyɛ, dala i ɛkɛ dɔdda bora yiɛpca ɔntɔ. Kan war i warda ooddi maccu te gena naŋŋɛ waŋ i neeniyɛ, a ɔɔn pwatcin bɛɛ. Kan waŋ i dɔnni bora ɔci i ootta ban Jwaŋa Tolanyɛ, a ɔɔn aŋka pwatcin oŋkanda. 10“Dala ɛkkɛ woŋgɔ tiittɛ. Naa ɛkkɛ poŋɛ gɔkɛ agi kɛɛgin ḍyɛrin ɛkkɛn a waka budan bɛɛ. ‘Ya gɔkka ɛkkɛti ka malɛɛkan ɛkkɛn bala ñaalɔ pɔliji ciyi Jwaŋa Tolan ñamɛti. [ 11Kaci Ma Baan bɛɛn aŋka ɛkɛ yuoci maka yieny.] 12“Ɛkkɛ poŋɛ a ɔki? Kan mena ‘uan gɛɛl balki kulin a miyya ne cyɛɛlɔ (100) ɔci kalŋ gɛɛl te makɛn neeniti jyetcin ɔntɔ yieny, ɛkɛ kulin a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeni daldɛ ɛkɛ te poom jitin, ɔci ɛkɛ ooddi lieṭi ɛka yien neeni bɛɛ? 13’Ya gɔkka ɛkkɛti awarɛ, ne ɛkɛ kalŋ yuardɛyɛ, ɛkɛ yomɛ ñɔya ñɔɔn ne tolan, yom ñɔɔna ɛkɛ yomɛ ñɔyi te kulin a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeniyɛ, bwandɛ yom ñɔɔna ɛkɛ kalŋa neeni yuardɛy. 14Mena neeni ani kulin ɛkɛ ne tolan hay! Ɔci ba jyeka neeniyɛ, bala ba jyek Wey ɔɔn ñaalɔ pɔliji. Ɛkɛ ani kɛɛgin ne tolan ɔci buagɔn naa kacca ḍiɛran gɛɛl ḍakti bɛɛ. 15“ ‘Ɔci moki kan mod ɛkkɛ men Juaŋ gɛɛl noŋi ne yaayan itiyɛ, dala i ootta ɛkɛti, ɔci ɛkkɛ coottɛ iki ɛkɛ ne ḍiɛran ṭɔɔlɛ. Ɔci i ɛkɛ nɔɔtka te naŋka naŋŋɛ ɛkɛ yaayan neeni.’ Kan ɛkɛ tieŋŋin jyek iyɛ, ɔci mena neeni aŋi ba mod ɛkkɛ doki. 16Yeti kan ɛkɛ tieŋdi jyek i bɛɛyɛ, ‘dala i men gɛɛl eya ne cyɛɛlɔ, walla ne yyɛɛwɔ. Ɔci a ɔɔnyɛ, ɛkkɛn tieŋdi jyeka guagdɛ ɛkkɛ waakɛnda. Ɔci jyek ɛkkɛ ŋeettan ma ne pwadan te naŋka wanna.’ 17Kan ɛkɛ tieŋdi jyek ɛkkɛn bɛɛyɛ, dala ɛkkɛ ma kaniica myettɛ. Ɔci kan ɛkɛ tieŋdi jyek ma kaniica bɛɛyɛ, dala ɛkɛ daldɛ ɛkkɛ aga ba mena ciyi budan mena jyek Juaŋ kwoyɛ walla maka yeyin a ɛyi maka lyemi tulbay. 18“‘Ya gɔkka ɛkkɛti awarɛ, jyeka ḍyɛgdɛ ɛkkɛ iñɔ wɛnni agi naa ma noŋdɔ bɛɛyɛ, Jwaŋa Tolan daŋkun ɛkkɛn ḍyɛgdɛ ñaalɔ pɔliji. Ɔci jyeka pɔktɛ ɛkkɛ iñɔ wɛnni agi dala ma noŋdɔyɛ, Juaŋ daŋkun ɛkkɛn pɔktɛ ñaalɔ pɔliji. 19“Gɔṭṭɛ, ‘ya gɔkka ɛkkɛti moki, kan magga te ɛkkɛti wɛnni ne yyɛɛwɔ buagi genga Juaŋti, ɔci kan ɛkkɛn tootti Juaŋti te yoma ne cyɛɛlɔyɛ, ɛkkɛn ‘wondɛ Juaŋo. 20Kan ma ne yyɛɛwɔ walla ne ḍoogɔ wyetkɛn ḍɔɔlɛ te yenti ‘yayɛ, ɔci ‘ya baal yeccu nona ɛkkɛnti doki.” 21Butruc bɛɛn ɔci gɔkcin ɛkɛti agi, “Ciɛggɔn, kan mod ɔɔn men Juaŋ gɛɛl noŋi ne yaayan ‘yatiy, ‘ya ɛkɛ bɔɔka oŋki ne ñiṭin? ‘Ya ɛkɛ bɔɔka oŋki ne coŋɔn ba oŋki ne dɔɔyɔ wyetkɛn ne yyɛɛwɔ?” 22Ɔci Yaccu gɔkcin ɛkɛti agi, “‘Ya gɔkka iti, naa i ɛkɛ bɔɔka oŋki ne dɔɔyɔ wyetkɛn ne yyɛɛwɔ budan bɛɛ. Dala i ɛkɛ bɔɔka oŋki a ma baan ne ḍoogɔ mena parɛ byeŋkɛ ɔci ne dɔɔyɔ wyetkɛn ne yyɛɛwɔ (77). 23“Jyek cyɛgji Jwaŋa Tolanyɛ, ɛkkɛn bala ba jyek mena a ḍuaŋa tolan gɛɛl ne ɛkɛ balki yɔŋki jyek dɛn bilk iki maka kanŋan ɛkɛtiy. 24Ne ma coocki iñɔ aŋka gɔrti jiekyɛ, mena balki dɛn bilk ne coŋɔn neeni owwi ma ḍuaŋa ñamɛti. 25Ɔci mena neeni yaakinti ḍuaŋa tolan ‘wondɛ bilka neeni bɛɛ. Ɔci a ɔŋŋiyɛ, ḍuaŋa tolan gɔkcin mati agi dala ‘wana neeni eetan wiɛltanyɔ ma iki ɛŋ ɛkɛ ɔci kɛɛgin ɛkɛ ɔci mal ɛkɛ waakɛnda aŋka dala ḍuaŋa tolan neeni bilk ɛkɛ dɔɔdɛ bora. 26“Ɔci ne mena kanŋan ɛkɛti neeni tieŋni jyeka neeniyɛ, ɛkɛ ḍwoñjin iñɔ ḍuaŋa tolan ñamɛti, ɔci ḍɔnjin ɛkɛti agi, ‘Ḍuaŋa tolan, dala i ‘ya ‘wonda wɔɔka ṭɔɔlɛ ne ḍiɛran lakun, acaan ‘ya lierca ɔci i ‘wondin wak i waakɛnda.’ 27Ɔci ḍuaŋa tolan yomɛ pɔŋnɛ ɛkɛti, ɔci ‘uan bɔɔŋnɛ ɛkɛ te dɛɛn waakɛnda. 28“Ɔci ‘wana neeniyɛ, ne ɛkɛ kaanni bora te on ḍuaŋa tolantiyɛ, ɛkɛ koogjin iki ‘wana noŋi i ɛkkɛn kanŋa ɛka parɛ. Ɔci ‘wana parɛ neeni balki dɛn bilk ne ḍiɛran ṭɔɔlɛ ɛkɛti budan. Ɔci ɛkɛ ‘wana neeni muŋŋɛ te pwanɛ ɔci gɔkcin ɛkɛti agi, ‘‘Ya ‘wonda bilk ‘ya!’ 29“Ɔci ‘wana parɛ neeni ḍwoñjin iñɔ ɛkɛ ñamɛti, ɔci ḍɔnjin ɛkɛti agi, ‘‘Ya ‘wonda wɔɔka ṭɔɔlɛ ne ḍiɛran lakun, ɔci i ‘wondin bilk i waakɛnda!’ 30“Ɔci ɛkɛ yookɔn. Ɔci ‘wana parɛ neeni olnɛ ɛkɛ ciginji ɔci buagɔn ɛkɛ ciya ciginji ne dɛɛn baadi ɔɔn. 31“Ɔci ‘uaya noŋi kanŋa ḍuaŋa tolan ɛkkin pookɛnyɛ, ne ɛkkɛn gɔrki naŋka neeniyɛ, ɛkkɛn yomgɛn yeyɔ ne tolan. Ɔci ɛkkɛn ati ḍuaŋa tolanti, ɔci mena neeni tiagiyɔ ɛkkɛn te jyeka neeni waakɛnda. 32“Ɔci ḍuaŋa tolan ‘wana neeni bornɛ nona ɛkɛti, ɔci gɔkcin ɛkɛti agi, ‘I ag ‘wana yaayan hay! I bɔɔŋnin ‘ya te dɛn i waakɛnda acaan i baal wiak ‘yati. 33Oŋ ba i yomu pɔŋni ɛkɛti daŋkun ba bɔɔkin i bɔɔŋnin ‘ya neeni bɛ?’ 34Ɔci ḍuaŋa tolan neeni looñi ne pɛñan te naŋki ‘wana neeni. Ɔci ɛkɛ olnɛ ḍuaŋa tolan jiju ciginji, ɔci gɔkcin maka gɔṭi ciginti agi, ‘Dala ɛkɛ ciya jiju ne ‘ya ‘wondata ɛkɛ bilk ‘ya waakɛnda ɔɔn.’ 35“Gɔṭṭɛ jwali konɛ waanɛti, kan ɛkkɛ modg ɛkkɛ bɔɔktɛ te yoma pwadan bɛɛyɛ, ɔci Wey ɔɔn noŋdi ɛkkɛti ba naŋki ḍuaŋa tolan neeni daŋkun.”

will be added

X\