Matta 17

1Ɔci ne nink ne dɔɔyɔ wilin ne cyɛɛlɔ bɛɛki borayɛ, Butruc ɔci Yaakub ɔci Yɔhanna mod Yaakubnyɛ, ɛkkɛn eññɛ Yaccu poom wyeñɛti pookɛn. Poma neeniyɛ, beñña beñño. 2Ɔci ɛkɛ aaŋŋɛyɔ Jwaŋa Tolan warɛti. Ɔci ɛkɛ ñingɛ galla gali ba oŋ waŋɛ ɔɔn. Ɔci bworŋin ɛkɛ bɔɔna bɔɔn ne pɛñan cier ma ñingɛn ba maaño. 3Ɔci Iliiya yaakkɛn i Muucayɛ, ɛkkɛn waakɛn lɛɛllɛ bora ɛkkɛnti. Ɔci ɛkkɛn bala gɔwwɔ iki Yaccu. 4Ɔci Butruc gɔkcin Yaccuti agi, “Ciɛggɔn, kan ikin cietin wɛnni oŋkanda a ɔɔn pwatcin hay! Kan pwatcin itiyɛ, dala ‘ya noŋja doŋki ne ḍoogɔ, ɛka ne cyɛɛlɔ te i, ɔci ɛka ne cyɛɛlɔ te Muuca, ɔci ɛka ne cyɛɛlɔ te Iliiya.” 5Ɔci ne ɛkɛ men baali gɔki jiekyɛ, pɔlla bɔwan gɛɛl bɛɛn ɔci ɛkkɛn kwommɛyɔ. Ɔci pwan gɔkkin te pɔliti agi, “Mena neeniyɛ, gena Kaci ‘ya Kacca ana ‘yay. ‘Ya yomu pwanna pwani te ɛkɛ. Dala ɛkkɛ tieŋdɛ jyek ɛkɛ!” 6Ɔci ne maka laldɛ Yaccu tieŋki jyeka neeniyɛ, ɛkkɛn ḍɛɛmdin korkɛn baamjɛ iñɔ ṭɛɛrji acaan ɛkkɛn buayi ne pɛñan. 7Ɔci Yaccu bɛɛn ɔci topcin ɛkkɛnti ɔci gɔkcin ɛkkɛnti agi, “Jɔŋdɛ ñaalɔ, naa ɛkkɛ buayɛ bɛɛ!” 8Ɔci ne ɛkkɛn ñorki ñaalɔyɛ, ɛkkɛn menga yuarcɛ bɛɛ. Yaccu aŋka bala yɔɔd parɛ. 9Ɔci ne ɛkkɛn balki kooti iñɔ te ñaalɔ poom wyeñɛti menyɛ, Yaccu gɔkcin ɛkkɛnti ne pɛñan agi, “Naa ɛkkɛ men gɛɛl myettɛ te naŋka yuarŋɛ ɛkkɛ neeni bɛɛ. Yeti ne ‘ya Kaci Ma Baan jɔlda ñaalɔ te lientiyɛ, ɛkkɛ oŋ ma myettɛ oŋo.” 10Ɔci maka laldɛ Yaccu tooccin ɛkɛti agi, “Ne maka loṭi worga Jwaŋa Tolan gɔkki agi Iliiya aŋka bɛɛdɔ ñamu wannay, jyek ɛkkɛn neeni bala a ɔki a ɔɔn?” 11Ɔci ɛkɛ ṭwokcin ɛkkɛnti agi, “Iliiya bɛya ñamu awarɛ. Ɛkɛ bɛya yɔŋi jiek waakɛnda. 12Ɔci ‘ya gɔkka ɛkkɛti ka Iliiya bɛɛn doki. Yeti ɛkɛ ñiyɛ ma bɛɛ. Ɔci ɛkkɛn noŋi ɛkɛti ba yomg ɛkkɛn buagɔn. Ɔci ‘ya Kaci Ma Baanyɛ, ‘ya da naŋta ma ne yaayan ba naŋka naŋɛ ma Iliiyati neeni.” 13Ɔci maka laldɛ Yaccu jyek ɛkɛ jitkɛn yuarcɛ. Ɔci ŋeecɔn ɛkkɛn Yaccu bala gɔki te jyek Yɔhanna mena buoṭi may. 14Ɔci ne ɛkkɛn dɛñki non polla tolantiyɛ, mena ‘uan gɛɛl bɛɛn Yaccuti ɔci ḍwoñjin iñɔ ɛkɛ ñamɛti ɔci gɔkcin Yaccuti agi, 15“Ciɛggɔn, dala i yomu pɔkka kaci ‘yati. Acaan ɛkɛ naŋi amji leyyo, ɔci ɛkɛ taabbin ne pɛñan. Acaan oŋkanda ɛkɛ warɛ yiɛptɛ maccu ɔci pietin moki. 16Ɔci ɛkɛ owwan ‘ya maka lala iti, ɔci ɛkkɛn yaakinti ɛkɛ ywaŋtan bɛɛ.” 17Ɔci Yaccu gɔkcin mati agi, “Hay, ɛkkɛ maka ati a damgin maka jyennɛn baaw nɛ, ɛkkɛ baltin iki ‘ya wɛnni yuong aga ne ñiṭin moki? ‘Ya kɛɛjja naŋki ɛkkɛ naŋka pwadin yuong aga ne ñiṭin moki? Kaci owwa ‘yati wɛnni poca!” 18Ɔci Yaccu gɔkcin jwaŋa yaayanti ne pɛñan agi, “Kooya bora te kaci yomɛti!” Ɔci jwaŋa yaayan kooyin bora te kaciti doki. Ɔci kaci warɛ pwani ne pɛñan doki. 19Ɔci ne jiek baakiyɛ, maka laldɛ Yaccu bɛɛn nona ɛkɛti lieda ɔci tooccin ɛkɛti agi, “Ɔɔn kookɔnti te kooyin jwaŋa yaayan bora ogo?” 20Ɔci Yaccu gɔkcin ɛkkɛnti agi, “Ɛkkɛ kookɛti acaan jyenna ɛkkɛ jyettɛ ‘yati neeni a ḍyɛṭ ṭɔɔlɛ budan. ‘Ya gɔkka ɛkkɛti awarɛ, kan jyenna ɛkkɛ jyettɛ ‘yati ḍiɛrcin bala ba kɔba waŋɛ ḍiɛran neeniyɛ, ɔci kan ɛkkɛ gɔktɛ poma neeniti agi dala ɛkɛ dɔtti ñaalɔ te wɛnni ooddi warɛ cɔɔttɛ iñɔ aŋanyɛ, ɛkɛ ooddi, genga ɛkkɛ bwandɛ bɛɛ! [ 21Jɔkin yeyin ba jɔkin neeniyɛ, kootan ma bora budan bɛɛ, ɛkkɛn kootan ma bora te cɔŋi ɔci gworŋ koño.]” 22Ɔci ne ɛkkɛn balki atki a cyɛɛlɔ ban Jaliilyɛ, Yaccu gɔkcin ɛkkɛnti agi, “‘Ya Kaci Ma Baanyɛ, ‘wonta ma ma byeŋkɛnti, 23ɔci ‘ya nokta ɛkkɛn, yeti ne nink ne ḍoogɔ baatiyɛ, ‘ya jɔŋŋa ñaalɔ te lienti moki.” Ɔci maka laldɛ Yaccu bala yomgɛn wiak ne pɛñan te jwalla neeni. 24Ɔci ne ɛkkɛn atki dɛñki ban Kapɛrnyamtiyɛ, maka lyemi bilka ḍuatan ma on Juaŋ ona tolan bɛɛn Butructi, ɔci tooccin ɛkɛti agi, “Mena loṭi ɛkkɛ neeni ɛkɛ ḍɔci tulba ḍuatan ma on Juaŋ ona tolan neeni boki?” 25Ɔci Butruc ṭwokcin ɛkkɛnti agi, “Ɛɛ.” Ɔci ne Butruc bɛɛni baanjiyɛ, Yaccu tooccin ɛkɛti ñamu agi, “Cimaan Butruc, i poŋ gɔk jiek bala a ɔki? Maka ḍwaŋin iñɔ baanji ṭɛɛrji wɛnniy, ɛkkɛn lyemi tulba te maka bɛti? Ɛkkɛn lyemi tulba te kɛɛgin ɛkkɛn woodgɛnti boki? Walla te maka pookɛnti?” 26Ɔci Butruc ṭwokcin ɛkɛti agi, “Ɛkkɛn lyemi tulba te maka pookɛnti.” Ɔci Yaccu gɔkcin ɛkɛti agi, “Kan a ɔɔnyɛ, ḍuaŋan ḍwaŋin woodgɛn ciyi budan te wanna neeni daŋkun. 27Yeti acaan ikin noŋtin aŋka naa ɛkkɛn wookti ikin bɛɛyɛ, dala i ootta galŋji ɔci jibaada yiɛpca pietin. Ɔci yeñña muga i ñamuyɛ, dala i ɛkɛ pɔkka tukɛti ɔci bilk yuara i ɛkɛ tukɛti. Ɛkkɛn eya ḍuacca te tulba ikin yaakkɔ.”

will be added

X\