1 Ɔci ma Pɛriciin ɔci ma Cadyuciinyɛ, ɛkkɛn bɛɛn ɛkɛti, ɔci ɛkkɛn bala tooci yieci ɛkɛ a yiiñño. Ɛkkɛn buagɔn dala ɛkɛ ɛkkɛn lɛɛrtɛ naŋka ñyecki ma ɛkɛ naŋka tɛyan te ñaalɔ pɔliji. 2 Ɔci Yaccu ṭwokcin ɛkkɛnti agi, “Te oŋ unniyɛ, kan pɔli tid tidyɛ, ɛkkɛ gɔkɛ agi, ‘Ne liidɔyɛ, jwami bala bɛɛ.’ 3 Ɔci te liidɔyɛ, kan pɔli tid tid ɔci kan pɔli wyeñɛ balayɛ, ɛkkɛ gɔkɛ agi jwami bɛya te oŋi i ñaalo. Jyek waka bala pɔlitiyɛ, ŋeejɛ ɛkkɛ, yeti jyek naŋka bɛɛn mati acca neeni aŋka kwoyɛ ɛkkɛ! 4 Hay ɛkkɛ maka yeyin maka jyeni ɛkkɛn baaw Juaŋti nɛ! Ɛkkɛ buagɛ lɛɛrtin ‘ya naŋka tɛyan naŋka ñyecki ma ‘ya? A’a, ɛkkɛ yɔɔrdɛ bɛɛ. Acaan jyek Yunaan mena a bɔwa Jwaŋa Tolan bala doki, ɔci yɔmjin doki.” Ɔci ne Yaccu gɔŋni a ɔɔnyɛ, ɛkɛ maka neeni dalnɛ, ɔci ɛkɛ ati nona parɛ. 5 Ɔci ɛkkɛn ati kuocɔ iki maka laldɛ ɛkɛ. Ɔci maka laldɛ ɛkɛ wierɛ byedgo. 6 Ɔci ne ɛkkɛn balki te galŋji murkaji menyɛ, Yaccu gɔkcin ɛkkɛnti agi, “Dala ɛkkɛ woŋgɔ tiittɛ te ñamg ma Pɛriciin, ɔci moki te ñamg ma Cadyuciin daŋkun.” 7 Ɔci maka laldɛ Yaccu bala gɔwwɔ yɔtin pookɛn agi, “Ikin byedg oonin wɛnni bɛɛ.” 8 Ɔci ne Yaccu gɔrni ɛkkɛn gɔɔki yɔtin pookɛn te byedg a ɔɔnyɛ, ɔci ɛkɛ gɔkcin ɛkkɛnti agi, “Hay! Ɛkkɛ maka jyeni ɛkkɛn a ḍiɛran nɛ! Te gena yeti ɛkkɛ gɔwwɛ agi byedg baagɔy? 9 Ɛkkɛ naŋki ‘ya kwoyɛ men? Ɛkkɛ poŋdɛ te byedga ne dɔɔyɔ wɛɛni ‘ya jitin ɔci ‘woñgan ‘ya maka coŋin, maka a alpn ne dɔɔyɔ (5,000) wanna bɛɛ? Ɛkkɛ woŋgɔ yien te ɔdin coŋin ɔdin kumgin te waka ɛkkɛ tiɛtki wanna? 10 Ɔci moki ɛkkɛ poŋdɛ te byedga ne dɔɔyɔ wyetkɛn ne yyɛɛwɔ wɛɛni ‘ya jitin, ɔci ‘woñgan ‘ya maka a alpn ne ŋaanɔ wanna bɛɛ? Ɛkkɛ woŋgɔ yien te ɔdin coŋin ɔdin kumgin te waka ɛkkɛ tiɛtki wannayɛ? 11 Ne ‘ya gɔŋna ɛkkɛti te jyek ñamg ɛkkɛ poŋɛ gɔkɛ agi ‘ya gɔkcɔ te jyek byedg woodgɛn ogo? Gɔṭṭɛ, ‘ya ṭɛr ɛkkɛ waakɔ a ṭyɛli te ñamg ma Pɛriciin ɔci te ñamg ma Cadyuciin!” 12 Ɔci ɛkkɛn oŋ jwali jiñɛ yuarcɛ oŋo. Çeecɔn ɛkkɛn ɛkɛ gɔki ɛkkɛnti te ñamg byedg woodgɛn bɛɛ. Ɛkɛ buagɔn dala ɛkkɛn woŋgɛn tiittan te lali ma Pɛriciin ɔci ma Cadyuciin lalla a damgɔn neeni. 13 Ɔci Yaccu jɔŋŋin te aŋan, ɔci ne ɛkɛ dɛnni ban Cɛcariiya Pilibbi taaŋɛtiyɛ, ɛkɛ tooccin maka laldɛ ɛkɛti agi, “Ma gɔki agi ‘ya Kaci Ma Baan agji menɛ?” 14 Ɔci ɛkkɛn gɔkcin ɛkɛti agi, “Ma gɛɛg gɔki agi i agji Yɔhanna mena buoṭi ma, ɔci maka pookɛn gɛɛg gɔki agi i agji Iliiya, ɔci maka pookɛn gɛɛg gɔki agi i agji Jɛramaaya, ɔci ma gɛɛg gɔki agi i agji bɔwa Jwaŋa Tolan bɔwa pardan gɛɛl moki.” 15 Ɔci Yaccu tooccin ɛkkɛnti daŋkun agi, “Oŋ ɛkkɛ gɔkɛ ‘ya ag menɛ daŋkun?” 16 Ɔci Cimaan Butruc ṭwokcin ɛkɛti agi, “I a Kiṭɔ Kaci Jwaŋa Tolan, Jwaŋa tɛɛti neeni.” 17 Ɔci Yaccu gɔkcin ɛkɛti agi, “Cimaan kaci Yɔhanna, pwatcin ne tolan. I lɛɛrni men baan gɛɛl jwalla neeni bɛɛ. Gena Wey ɔɔn ñaalɔ pɔliji i lɛɛrni jwalla neeniy. 18 ’Ya gɔkka iti Butruc, ka i ag poomo. Ɔci poma neeni wyeñɛtiyɛ, ‘ya cɔtca kaniica ‘ya. Ɔci kaniica ‘ya neeni war tɛɛn lien bwandɛ. 19 ’Ya i ‘wondin mɔpta ban cyɛgji Jwaŋa Tolan. Jyeka ḍyɛga i iñɔ ṭɛɛrji wɛnni agi naa ma noŋdɔ bɛɛyɛ, Jwaŋa Tolan daŋkun ɛkkɛn ḍyɛgdɛ ñaalɔ pɔliji. Ɔci jyeka pɔkka i iñɔ ṭɛɛrji wɛnni agi dala ma noŋdɔyɛ, Jwaŋa Tolan daŋkun ɛkkɛn pɔktɛ ñaalɔ pɔliji.” 20 Ɔci ɛkɛ maka laldɛ ɛkɛ myennɛ agi, “Naa ɛkkɛ ma nɔɔttɛ a ‘ya a Kiṭɔ bɛɛ.” 21 Ɔci te oŋŋa wannayɛ, Yaccu jɔɔtcin te miti maka laldɛ ɛkɛ te naŋka bɛya ɛkɛti agi, “‘Ya ootta ban Urcaliim, ɔci maka ḍwaŋin aŋan ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn noŋdi ne yaayan ‘yati. Ɔci ‘ya nokta ɛkkɛn. Yeti gɔṭṭɛ! Ne nink akti ḍoogɔyɛ, ‘ya jɔŋŋa ñaalɔ te lienti moki.” 22 Ɔci Butruc Yaccu eññɛ nona parɛ ɔci gɔkcin ɛkɛti ne pɛñan agi, “Ciɛggɔn, a’a! Naa naŋka neeni bɛya iti oŋgati bɛɛ.” 23 Yeti Yaccu warɛ yallɛ ɔci gɔkcin Butructi agi, “Hay! Dala i ootta ɔntɔ te ‘yati wɛnni, i gɔk ba Jwaŋa Yaayan! I dɛy ‘ya a ɔɔn ogo? I buagi naŋki Juaŋ bɛɛ. I buagi naŋki ma baan budan!” 24 Ɔci Yaccu gɔkcin maka laldɛ ɛkɛti agi, “Kan men gɛɛl buagɔn bootti ‘yatiyɛ, dala ɛkɛ mwondi te caŋti ñingɛ te war ɛkɛ parɛ, ɔci dala ɛkɛ kakan ɛkɛ luldɛ, ɔci ɛkɛ bɛya bootti ‘yati ne lien bɛɛdi ɛkɛti ɔɔn. 25 Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin baadi bɛɛ neeni bɛɛ. Yeti kan men gɛɛl boottin ‘yati, ɔci noŋdi ba jyek ‘ya, ɔci jyek ‘ya tiidiyɔ, oŋ kan te ɛkɛ noktan ma ɔɔnyɛ, mena neeni aŋka yɔɔrdi tɛɛtin baadi bɛɛ neeni. 26 Kan men gɛɛl balki waka coŋin iñɔ baanji wɛnni ɔci ɛkɛ ḍakti ooddi bana a maañy, oŋ waka bala ɛkɛti neeni yɔmdi te gena? Tɛɛtin baadi bɛɛ neeni ma wɛɛṭi boki? 27 ’Ya Kaci Ma Baan bɛɛd balka war tɛɛn ba war tɛɛn bala Wey ɔɔntiy. Ɔci ‘ya bɛɛdin iki malɛɛkan ‘ya. Ɔci ‘ya ma ‘woñga waak ba naŋki ɛkkɛn, menga da ba naŋki ɛkɛ, ɔci menga da ba naŋki ɛkɛ. 28 Gɔṭṭɛ, ‘ya gɔkka ɛkkɛti awarɛ ka ma gɛɛg bala yɔdgi iki ɛkkɛ wɛnniyɛ, ɛkkɛn tuwa bɛɛ. Yeti te ñamu ɛkkɛn gɔrti oŋŋa ‘ya Kaci Ma Baan bɛɛda agda Ciɛggɔn Tolan.”
