Matta 15

1Ɔci oŋ gɛɛlti ma Pɛriciin ɔci maka loṭi worga Juaŋyɛ, ɛkkɛn ma gɛɛg bɛɛn te ban Urcaliimji, bɛɛn nona Yaccuti. Ɔci ɛkkɛn tooccin ɛkɛti agi, 2“Maka lala iyɛ, ɛkkɛn noŋi ba jyek yɔrg ikin bɛɛ ogo? Kan ɛkkɛn bala omiyɛ, ɛkkɛn byeŋkɛn luaktan ñamu bɛɛ.” 3Ɔci Yaccu ṭwokcin ɛkkɛnti agi, “Oŋ ɛkkɛ, ɛkkɛ jyek Juaŋ bɛɛññɛji ɔci ɛkkɛ tiecɛ gena jyek yɔrg ikin waakɛn budan ogo? 4Jwaŋa Tolan gɔki agi, ‘Dala ɛkkɛ tieŋdɛ jyek weyi ɛkkɛ ɔci jyek mɛyi ɛkkɛ ne pwadan.’ Ɔci agi, ‘Kan men gɛɛl gɔki ɔṭi weegɛn ɔci mɛɛgɛnyɛ, agi dala ɛkta tuudɔ.’ 5Yeti ɛkkɛ loṭɛ ma agi kan men gɛɛl ɛkkɛti balki genga aŋka ɛkɛ weegɛn ɔci mɛɛgɛn magdɛ, oŋ yeti kan ɛkɛ gɔkti agi, ‘Gena neeni a gen Jwaŋa Tolan dokiyɛ,’ 6ɛkɛ yaakinti weegɛn ɔci mɛɛgɛn magdɛ te gena neeni moki bɛɛ. Ɛkɛ ɛkkɛn daldɛ amaam budan ɔɔn. Ɔci acaan a ɔŋŋiyɛ, jyek Juaŋ aŋi ba jyeka budan ɛkkɛti doki te naŋki jyek yɔrg ɛkkɛ neeni. 7Ɛkkɛ agɛ laaban! Jyeka guaŋŋɛ Icaaya te baaṭi te naŋka bɛya ne ŋoyɔyɛ, yɔmjin te ɛkkɛ awarɛ! 8Icaaya gɔki agi, ‘Maka neeni gɔki jieyi ‘ya te tuggɛn budan, yeti ɛkkɛn yomgɛn lonɔ ɔntɔ te ‘yati. 9Ɛkkɛn moṭi ‘yati te labjo, ɔci ɛkkɛn loṭi ma te jyeka naŋi ma baan budan, ɔci ɛkkɛn gɔki agi jyeka neeni agi jyek Jwaŋa Tolan!’” 10Ɔci Yaccu maka coŋin bornɛ ɔci ɛkkɛn bɛɛn nona ɛkɛti. Ɔci ɛkɛ gɔkcin ɛkkɛnti agi, “Dala ɛkkɛ tieŋdɛ ne pwadan! 11Waka amtan ma a waka ooddi ma korkɛntiyɛ, ɛkkɛn ma cuultanyɔ bɛɛ. Gena jiek ɔci naŋka bɛya bora te ma yomgɛntiyɛ, gena ɛkkɛn aŋka ma cuultanyɔy.” 12Ɔci maka laldɛ Yaccu bɛɛn ɛkɛti ɔci gɔkcin ɛkɛti agi, “Çeej i boki ne ma Pɛriciin looñki te jwalla guaŋŋi i ɛkkɛnti wannayɛ?” 13Ɔci Yaccu ṭwokcin ɛkkɛnti agi, “Janga piinnɛ Wey ɔɔn bɛɛyɛ, ɛkkɛn dɔɔddɛ ɛkɛ bora aŋka baadi. 14Ma Pɛriciin neeni ɛkkɛn daltin ikin! Acaan ɛkkɛn bala ba maka ñingɛn ulan ne ɛkkɛn lɔtki yɔtin pookɛn atki amaam ɔci ḍɛɛmki koolji nona ne cyɛɛlɔy.” 15Ɔci Butruc gɔkcin Yaccuti agi, “Ɔɔn lwogdɔn te jwalla a caagɔn guaŋŋi i neeni.” 16Ɔci Yaccu gɔkcin ɛkɛti agi, “Ɛkkɛ tieŋnɛ jiek ne pwadan men bɛɛ? 17Kwoyɛ ɛkkɛ ne waka amtan ma ootti ma korkɛnti ɔci ootti te pɔy ɛkkɛnyɛ? 18Jyeka yeyin bɛya te yoma yaayanti. Ɔci jyeka yeyin neeniyɛ, mena gɔki ɛkkɛn neeni cuultanyɔ Jwaŋa Tolan ñamuti. 19Waka bɛya bora te ma yomgɛntiyɛ, gena paŋŋa yaayan, ɔci jyek nooŋi mako, ɔci jyek tomi moongo, ɔci jyek wɛljo, ɔci jyek kali waako, ɔci jyek jomi maka pookɛn waakɛn. 20Naŋka neeniyɛ, ma yiegdi te naŋki ɛkkɛn. Yeti kan men gɛɛl omdi genga ne ɛkɛ byeŋkɛ luaŋŋɛ men bɛɛyɛ, men yaaya te naŋka neeni bɛɛ.” 21Ɔci Yaccu jɔŋŋin te aŋan i maka laldɛ ɛkɛ ɔci ati nona balki bonka ne yyɛɛwɔy. Gena Tayir ɔci Ciḍɔɔn. Ɔci ɛkɛ bala ciyi bonka neeni toŋkɛnti yaakkɛn wɛnan. 22Ɔci ɛŋ maka ban Kɛnan gɛɛl bɛɛn ɔci bala yaadan boor Yaccu agi, “Ciɛggɔn, Kaci Daawud, dala i yomu pɔkka ‘yati! Kaci ‘ya, kacca ɛɛŋ muŋŋɛ jwaŋa yaayan. Ɔci jwaŋa yaayan neeni bala noŋi ne yaayan ɛkɛti.” 23Ɔci Yaccu ṭwokcin ɛkɛti bɛɛ. Ɔci maka laldɛ Yaccu gɔkcin ɛkɛti agi, “Dala i ɛŋa neeni cuuñjayɔ ɔga ooddi ɔntɔ te wɛnni. Ɛkɛ wiak poṭi ikin waakɔ.” 24Ɔci ɛkɛ ṭwokcin ɛɛŋti agi, “‘Ya, cuonna Juaŋ aŋka mok gena ma Icrayiil maka yien ba kulin neeni pookɛn.” 25Ɔci ɛŋa neeni orcinti ɛkɛti ɔci morcin ɛkɛti gɔki agi, “Ciɛggɔn, dala ‘ya magda i!” 26Ɔci Yaccu ṭwokcin ɛkɛti agi, “Kan oomdin kɛɛgin yɛɛptin gɔkiyɛ, a ɔɔn yɔmjin bɛɛ.” 27Ɔci ɛɛŋ ṭwokcin ɛkɛti agi, “A warɛ Ciɛggɔn, yeti gɔkiyɛ, ɛkkɛn omi oomdin ṭɔlgɛn ḍɛɛmdi iñɔ te weyyɛn byeŋkɛnti bɛɛ?” 28Ɔci Yaccu ṭwokcin ɛkɛti agi, “Ɛɛŋo, jyenna jyetti i ‘yati neeniyɛ, tolla tollo hay! Naŋka i buagi neeniyɛ, dala bala iti.” Ɔci kaci ɛkɛ warɛ pwani ne pɛñan doki. 29Ɔci Yaccu jɔŋŋin te aŋan ɔci ɛkɛ ati dɔɔki Galŋ Jaliil ati poom jitin, ɔci cooccin iñɔ ñaalɔ poom ṭɔɔlɛ gɛɛl wyeñɛti aŋan. 30Ɔci maka coŋin bɛɛn ɛkɛti eccin maka ŋɔr, ɔci maka miŋki maka lɛpɛn yaakinti jiek bɛɛy, ɔci maka pwotko. Maka neeni ḍuacci ma iñɔ Yaccu ñamɛti, ɔci ɛkkɛn ywaŋŋɛ ɛkɛ. 31Ɔci maka coŋin neeniyɛ, ne ɛkkɛn gɔrki maka miŋki maka lɛpɛn yaakinti jiek bɛɛ, ɔci maka byeŋkɛn puottin ɔci maka ciegɛn puottin waakɛn pwatki, ɔci maka ŋɔr atki, ɔci maka ullin balki gɔrki noon dokiyɛ, ɛkkɛn korkɛn buañi noon pwatcin bɛɛ. Ɔci ɛkkɛn bala jieyi Jwaŋa Tolan Jwaŋ ma Icrayiil. 32Ɔci Yaccu borcin maka laldɛ ɛkɛti agi bɛɛdɔ nona ɛkɛti, ɔci ɛkɛ gɔkcin ɛkkɛnti agi, “‘Ya yomu wiak te maka coŋin neeni acaan ɛkkɛn balgin iki ‘ya wɛnni nink aŋi ne ḍoogɔ doki, ɔci waka amtan ɛkkɛn baaw ɛkkɛnti. ‘Ya ɛkkɛn cundi bonk ɛkkɛn ne ɛkkɛn amɛ koñ a ɔɔn bɛɛ, ɛkkɛn ḍɛɛmdi yomu te koñ dita.” 33Ɔci maka laldɛ ɛkɛ ṭwokcin ɛkɛti agi, “Ikin maka coŋin neeni ‘wontin oomdin te aŋɛ ne nona neeni niin a wɔɔŋ budan ɔɔn?” 34Ɔci Yaccu tooccin ɛkkɛnti agi, “Byedg bala ɛkkɛti a ñiṭin?” Ɔci ɛkkɛn gɔkcin ɛkɛti agi, “Bala ne dɔɔyɔ wyetkɛn ne yyɛɛwɔ, ɔci yak ṭɔlgɛnn a ‘yɛggin gɛɛg bala ne ḍiɛkan daŋkun.” 35Ɔci ɛkɛ gɔkcin mati agi dala ma coottɔ iñɔ. 36Ɔci Yaccu byedga ne dɔɔyɔ wyetkɛn ne yyɛɛwɔ neeni luullɛ byeŋkɛti iki yak ṭɔlgɛn daŋkun. Ɔci ne ɛkɛ gɔŋni a pwatcin Juaŋtiyɛ, ɛkɛ oŋ byedg iki yak ṭɔlgɛnn a ‘yɛggin wɛɛnnɛ jitin oŋo. Ɔci ‘wonnɛ maka laldɛ ɛkɛ. Ɔci oomdin eekɛ ma maka ciyi iñɔ neeni. 37Ɔci ma omi waakɛnda ne ɛkkɛn korkɛn yoŋki ɔɔn. Ɔci oomdin tɛɛti neeniyɛ, limiyɔ ma ɔdin kumgin ne dɔɔyɔ wyetkɛn ne yyɛɛwɔ. 38Maka omi te oŋŋa wannatiyɛ, ɛkkɛn kɔɔna kɔɔnno. Maka ‘uay bala alpn ne ŋaanɔ (4,000). Ɔci moong bala daŋkun i kɛɛgin. 39Ɔci maka coŋin neeni cuuññɛ Yaccu baanji, ɔci ɛkɛ taapcin murkaji, ɔci ɛkɛ ati ban Magadɔn taaŋɛti.

will be added

X\