Matta 14

1Ɔci te oŋŋa wannayɛ, Hiruuduc Antipac mena a ḍuaŋa tolanyɛ, ɛkɛ tieŋŋin jyeka guaktan ma te naŋki Yaccu. 2Ɔci ɛkɛ gɔkcin maka kanŋan ɛkɛti agi, “Mena noŋi naŋka neeniyɛ, gena Yɔhanna Mena Buoṭi Ma te ñamuy. Ɛkɛ jɔŋŋin ñaalɔ te lienti aŋka ɛkɛ balkiti naŋka tɛyan wanna.” 3Hiruuduc Antipac poŋi a ɔɔn acaan wɔɔka gɛɛlti ɛkɛ Yɔhanna muŋŋɛ ḍɛɛŋŋɛ ɔci olnɛ ciginji te jyek Ɛrɔɔdyac ɛŋ mod ɛkkɛn Pilibuc aŋka ɛɛŋ yomɛ pwada. 4Hiruuduc noŋi a ɔɔn acaan Yɔhanna bala gɔki ɛkɛti te ḍɛɛna ḍɛññi ɛkɛ ɛŋ mod ɛkkɛn Pilibuc neeni agi, “Hay, ḍɛɛna ḍɛññi i ɛŋ mod ɛkkɛ wannayɛ, bala ba jyek ganuun bɛɛ. Naŋki i neeni a pɔɔtta.” 5Ɔci te jyeka neeniyɛ, Hiruuduc buagɔn Yɔhanna nogdɛ, yeti ɛkɛ buayi jyek maka coŋin. Maka coŋin neeni bala gɔki agi Yɔhannayɛ, ɛkɛ a bɔwa Jwaŋa Tolan. 6Ɔci oŋŋa Hiruuduc Antipac jietkiti mayɛ, bɛɛni ɔci ɛkɛ noŋi juma. Ɔci kaci Ɛrɔɔdyac kacca ṭɔɔl bala ñiɛli ma ñomgɛnti ne pwadan. Ɔci wɛɛli ɛkɛ pwad pwad Hiruuducti. 7Ɔci Hiruuduc gɔkcin kaciti awarɛ agi, “Kan i buagi genga ‘yatiyɛ, ‘ya i ‘wondin!” 8Ɔci ṭɔɔl tooccin Hiruuducti te jyeka guaŋŋɛ mɛy ɛkkɛn ɛkɛti agi, “‘Ya buaga wyeñ Yɔhanna Mena Buoṭi May! Dala ‘ya eekta wyeñ ɛkɛ te ḍwan acca ɔŋ.” Ɛrɔɔdyac tooccin te wyeñ Yɔhanna a ɔɔn acaan ɛkɛ buagɔn aŋka ŋeeddɛ ɛkɛ ne pwadan a Yɔhanna tuun doki. 9Ɔci Hiruuduc yomɛ yaaññi. Yeti acaan ɛkɛ jiek naŋɛ i ṭɔɔl dokiyɛ, ɔci moki acaan maka wɛlg maka bala omi iki ɛkɛ tieŋŋin jyek ɛkɛyɛ, ɛkɛ gɔkcin mati agi, “Dala Yɔhanna nogdɛ ma.” 10Ɛkɛ men gɛɛl cuuññɛ ciginji Yɔhannati, ɔci Yɔhanna wyeñɛ ŋwonnɛ bora, 11ɔci oonɛ te ḍwan ɔci ‘wonnɛ ṭɔɔlo. Ɔci ṭɔɔl wyeñ Yɔhanna eññɛ mɛɛgɛnti, ɔci ‘wonnɛ ɛkɛ. 12Ɔci maka laldɛ Yɔhannayɛ, ɛkkɛn ati ciginji ɔci war Yɔhanna eyɛ, ɔci jokci iñɔ koolji. Ɔci ɛkkɛn ati Yaccu myetkɛ te jyeka neeni. 13Ɔci ne Yaccu tieŋni jyeka neeniyɛ, ɛkɛ bana neeni dalnɛ ɔci ɛkɛ taapcin murkaji ati kuocɔ nona wɔɔganti parɛ. Ne maka a polla tolan neeni tieŋki agi Yaccu attɔyɛ, ɛkkɛn yiŋi booti te ciegɛn, yiŋi nona atti Yaccu neeni. Ɔci maka ciyi yomɔ bonka ḍyɛrintiyɛ, ɛkkɛn ati daŋkun. 14Ɔci ne Yaccu tonni bora kwoña parɛtiyɛ, ɛkɛ ma mɔŋnɛ a ḍiɛkan bɛɛ. Ɔci ɛkɛ yomɛ wiak te ɛkkɛn. Ɔci maka coŋɔn neeniyɛ, gɛɛg waakɛn yeyɔ, ɔci ywaŋŋɛ ɛkɛ. 15Ɔci ne oŋ unniyɛ, maka laldɛ Yaccu bɛɛn ɛkɛti ɔci gɔkcin ɛkɛti agi, “Nona neeni a wɔɔŋ jiñɛ budan. Ɔci ma ɛɛnɛ coodi doki. Dala i ɛkkɛn cuña ooddi bonka ḍyɛrinti aŋka ɛkkɛn wɛrdi oomdin aŋka amtan ɛkkɛn.” 16Ɔci Yaccu gɔkcin ɛkkɛnti agi, “Ma ooddi ɔntɔ ogo? Dala ɛkkɛ ɛkkɛn ‘wondɛ waka amtan.” 17Ɔci ɛkkɛn gɔkcin Yaccuti agi, “Ikin balkin byedg ne dɔɔyɔ budan, ɔci yak ṭɔlgɛn a ‘yɛggin ne yyɛɛwɔ.” 18Ɔci Yaccu gɔkcin ɛkkɛnti agi, “Waka wanna oodɛ ‘yati wɛnni.” 19Ɔci Yaccu gɔkcin mati, ɔci ma cooccin iñɔ lwoma ṭeyan neeni wyeñɛti, ɔci Yaccu byedga ne dɔɔyɔ, ɔci yak ṭɔlgɛnn a ‘yɛggin ne yyɛɛwɔ neeniyɛ, luullɛ bieŋɛti. Ɔci ɛkɛ ñorcin ñaalɔ pɔliji ɔci cɔkcin Juaŋti. Ɔci ɛkɛ oŋ byedg wɛɛnnɛ jitin, ɔci ‘wonnɛ maka laldɛ ɛkɛ, ɔci ‘woñgi ɛkkɛn maka ciyi iñɔ coŋin neeni. 20Ɔci ma omjin waakɛnda ne ɛkkɛn yɔmki ɔɔn. Ɔci ɛkkɛn tiɛdɛ oomdin, ɔci oomdin ɛkkɛn tiɛtki neeniyɛ, limɛyɔ ma ɔdin kumgin a inyaakkɛn wyetkɛn ne yyɛɛwɔ te byedga ne dɔɔyɔ ɔci te yaka ne yyɛɛwɔ neeni. 21Maka omi oomdin neeniyɛ, ɛkkɛn a ḍiɛkan bɛɛ. Ɛkkɛn kɔɔna kɔɔnno. Maka ‘uay bala a alpn ne dɔɔyɔ (5,000), ɔci moong bala daŋkun, i kɛɛgin moki. 22Ɔci ne pɛñan Yaccu gɔkcin maka laldɛ ɛkɛti agi, “Ɛkkɛ ɔgdɛ ooddɛ ñamu taaptɛ murkati. Dala ɛkkɛ ooddɛ kuocɔ, ɔci ‘ya polla tolan neeni cuoñña baanji.” 23Ɔci ne Yaccu ma cuuññi baanji dokiyɛ, ɛkɛ ati ñaalɔ poom wyeñɛti parɛ aŋka cɔki Juaŋti. Ɔci ne oŋ waŋɛ unniyɛ, ɛkɛ bala nona neeniti parɛ. 24Ɔci murkayɛ, ɛkɛ bala yeccu galŋ yiɛŋɛji. Ɔci pɔɔgi pieg bala toñi murka ne pɛñan, acaan jwami tol tolo. 25Ɔci ne tinnɔyɛ, Yaccu bala ati ñaalɔ pieg wyetkɛnti ooddi nona ɛkkɛnti. 26Ɔci ne ɛkkɛn ɛkɛ yuarkiti baali ati ñaalɔ pieg wyetkɛntiyɛ, ɛkkɛn buayi ne tolan. Ɔci ɛkkɛn yaadan gɔki agi, “Gena ‘yeeññan!” 27Ɔci ne pɛñan Yaccu gɔkcin ɛkkɛnti agi, “Dala ɛkkɛ yomgɔ tɛya! Naa ɛkkɛ buayɛ bɛɛ. Gena ‘ya!” 28Ɔci Butruc ṭwokcin ɛkɛti agi, “Ciɛggɔn, kan gena i awarɛyɛ, dala i gɔkka ‘yati aŋka ‘ya bɛɛd iti ñaalɔ pieg wyetkɛnti.” 29Ɔci Yaccu gɔkcin ɛkɛti agi, “Bɛɛdi.” Ɔci Butruc kooyin bora te murkaji ɔci bala ati ñaalɔ pieg wyetkɛnti noŋi ooddi Yaccuti. 30Yeti ne ɛkɛ gɔrni jwami tolla toliyɛ, ɛkɛ buañi, ɔci ɛkɛ noŋi luutti iñɔ pietin. Ɔci ɛkɛ yaajjin agi, “Ciɛggɔn, ‘ya magda, hay!” 31Ɔci ne pɛñan Butruc muŋŋɛ Yaccu te bieŋɛ doki. Ɔci Yaccu gɔkcin ɛkɛti agi, “I jyetti ‘yati ne ḍiɛran budan, hay! I buay a ɔɔn ogo?” 32Ɔci ne ɛkkɛn taapki murkajiyɛ, jwami yɔɔni doki. 33Ɔci ɛkkɛn morcin Yaccuti, ɔci gɔki agi, “I a Kaci Jwaŋa Tolan awarɛ hay!” 34Ɔci ɛkkɛn ati ne dɛñki kwoña parɛti ɔɔn. Ɔci ɛkkɛn totcin bora ban Gɛnɛɛcarɛt. 35Ɔci maka bana neenitiyɛ, ne ɛkkɛn ma ñiikitiyɛ, ɛkkɛn ma gɛɛg cuuñɛ bonka bala ban ɛkkɛn toŋkɛtiy. Ɔci ɛkkɛn eccin maka waakɛn yeyin. 36Ɔci ɛkkɛn tooccin Yaccuti agi dala ma bɛya topti bworŋ iti. Ɔci ma bɛɛn ɔci ma topcin bworŋ ɛkɛti ɔci ɛkkɛn waakɛn pwadgin waakɛnda.

will be added

X\