Matta 13

1Ɔci ne ḍiɛran ṭɔɔlɛ te oŋŋa wanna ɔɔnyɛ, Yaccu kaaccin bora te ona wannati, ɔci ɛkɛ ati cooccin iñɔ Galŋ Jaliil ḍwaŋɛti. 2Ɔci polla tolan bɛɛn wyetkɛn ḍɔɔlɛ nona ɛkɛti. Ɔci acaan a ɔŋŋiyɛ, ɛkɛ taapcin murkaji ɔci cooccin murkaji galŋji. Ɔci maka coŋin neeni bala ciyi galŋ ḍwaŋɛti. 3Ɔci ɛkɛ bala loṭi ɛkkɛn te jyeka a caagin gɛɛg ne coŋɔn. Ɛkɛ gɔkcin mati agi, “Mena dwoki kookinyɛ, ɛkɛ ati bora ɔci bala dwoki kookin. 4Ɔci ne ɛkɛ baali dwoki a ɔɔnyɛ, kookin ñingɛn gɛɛg ḍɛɛmdin pɔɔjɔ pɔy konɛti, ɔci ḍiirg bɛɛn ɔci ɛkkɛn amɛ doki. 5Ɔci kookin pookɛn gɛɛg ḍɛɛmdin nona gwoyiti, ɔci ɛkkɛn ywollin ne pɛñan acaan ṭɛɛr a ḍiɛran. 6Ɔci ne oŋ waŋɛ myɛlliyɛ, ɛkkɛn ammɛ oŋ te wɔɔka ḍuulan budan acaan ɛkkɛn bɛɛkkɛn ati iñɔ bɛɛ. Ɔci acaan a ɔŋŋiyɛ, aŋka ɛkkɛn tuuki ɔci iiki wanna. 7Ɔci kookin pookɛn gɛɛg ḍɛɛmdin nona guobgin. Ɔci guobgin ḍwaŋgin ne pɛñan, ɔci kookin gworɛyɔ. 8Ɔci kookin pookɛn gɛɛg ḍɛɛmdin nona balki ṭɛra pwadan, ɔci ɛkkɛn aŋka eccin ñingɛn ne pwadan. Ɔci kookin neeni gɛɛgyɛ, eccin ñingɛn ne coŋɔn te makɛn pookɛn waakɛnda. Ɔci kookin pookɛn gɛɛg bala daŋkun moki, ɔci ɛkkɛn eccin kookin pookɛn bala ñamu moki. Ɔci kookin pookɛn gɛɛg bala daŋkun moki. Ɔci ɛkkɛn eccin ñingɛn bala ñamu te kookin pookɛn ne ḍyɛṭ ṭɔɔlɛ. 9“Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan!” 10Ɔci maka laldɛ Yaccu bɛɛn nona ɛkɛti ɔci ɛkkɛn gɔkcin ɛkɛti agi, “I gɔk ɛkkɛnti te jyeka a caagin neeni ogo?” 11Ɔci ɛkɛ gɔkcin ɛkkɛnti agi, “Ɛkkɛ ‘wonnɛ Jwaŋa Tolan ñing tɛɛn aŋka ɛkkɛ jyek cyɛgji Jwaŋa Tolan jitkɛn yuartɛ ɛkkɛ ne pwadan. Yeti maka coŋin neeniyɛ, balki ñing tɛɛn neeni bɛɛ. 12Maka poŋi te ñing tɛɛn Juaŋyɛ, ɛkkɛn aŋka ‘uottɛti Juaŋ ñing tɛɛno. Yeti maka poŋi te ñing tɛɛn ɛkɛ bɛɛyɛ, ñing tɛɛna bala ɛkkɛnti accayɛ, baadi moki. 13Ɔci acaan a ɔŋŋiyɛ, aŋka ‘ya gɔŋna ɛkkɛnti te jyeka a caagin neeni wanna. Ɛkkɛn bala gɔṭi a gwali te woŋgɛn budan, yeti ɛkkɛn jiek jitkɛn yuartan bɛɛ. Ɔci ɛkkɛn bala tyeŋi a tyeŋi te jyetkɛn budan, yeti ɛkkɛn jiek jitkɛn tieŋtan walla yuartaji bɛɛ. 14A ɔɔnyɛ, bala ba jyeka guaŋŋɛ Icaaya ne ɛkɛ gɔki ma Icrayiilti te jyek Juaŋ agi, ‘Ɛkkɛ tieŋdɛ jiek a tieŋŋin oŋkanda ɔɔn, yeti ɛkkɛ yaakɛti tieŋdi ne pwadan bɛɛ. Ɔci moki, ɛkkɛ gɔrtɛ a gwali oŋkanda ɔɔn, yeti ɛkkɛ yaaktɛti jiek jitkɛn yuartɛ ne pwadan bɛɛ. 15Maka neeni ɛkkɛn yookɔn te jyeka ɛkkɛn lalla ‘ya ne ḍiɛran neeni. Ɔci acca ɛkkɛn jyetkɛn aŋi miŋko, ɛkkɛn yaakinti tieŋdi jiek moki bɛɛ. Ɔci ɛkkɛn woŋgɛn mitcɛti aŋka naa ɛkkɛn gɔrti waka ‘ya buaga ka lɛɛrka ɛkkɛn neeni bɛɛ. Hay! ‘Ya baal kɛɛy maka neeni ka da ɛkkɛn waakɛn yaltan bɛya ‘yati aŋka ɛkkɛn ywaŋdɛyɔ ‘ya.’ 16“Yeti pwatcin te woŋgi ɛkkɛ acaan ɛkkɛ waak yuartɛ, ɔci pwatcin te jyetk ɛkkɛ acaan ɛkkɛ jiek jitkɛn tieŋdɛ. 17’Ya ɛkkɛ myettin ne pwadan! Awarɛ, bɔwan Jwaŋa Tolan gɛɛg ne coŋɔn i maka pwadin maka coŋinyɛ, ɛkkɛn bala kɛɛy jyeka bɛɛn ɛkkɛti acca neeni. Ɛkkɛn buagɔn gɔrti naŋka gwaldɛ ɛkkɛ acca neeni, yeti naŋka neeni yuarɛ ɛkkɛn bɛɛ. Ɔci moki ɛkkɛn buagɔn tieŋdi jyeka tieŋdɛ ɛkkɛ acca daŋkun, yeti ɛkkɛn tieŋŋin jyeka neeni bɛɛ, acaan ɛkkɛn tuun te baaṭi doki ne ‘ya bɛɛna men bɛɛy. 18“Dala ɛkkɛ tieŋdɛ jyek mena ‘wayi kookin ne jiek jitkɛn balki a ɔkiy. 19Kan men gɛɛl tieŋdi jyek cyɛgji Jwaŋa Tolan oŋ jiek jitkɛn yuartɛji bɛɛyɛ, Mena Yaayan bɛya, ɔci jiek kaldɛ ɔntɔ te ɛkɛ yomɛti. A ɔɔnyɛ, bala ba jyek kookin ḍɛɛmdin pɔy taaŋɛti neeni. 20Ɔci ba jyek kookin ḍɛɛmdin nona gwoyiti neeniyɛ, bala ba jyek maka tieŋŋin jieko, ɔci te ñamu ɛkkɛn yomgɛn ñɔɔn ɔci jiek mugɛ te yom ñɔɔno. 21Yeti ɛkkɛn bala yɔdi ne ḍiɛran ṭɔɔlɛ, yeti oŋŋa pɔɔd bɛɛdi ɛkkɛnti te jyenna ɛkkɛn jyetki jyek Juaŋyɛ, ɛkkɛn ḍɛɛmdi iñɔ ne pɛñan doki waakɛnda. 22Ɔci ba jyek kookin ḍɛɛmdin nona guobginyɛ, bala ba maka tieŋŋin jieko. Yeti jyeka pookɛn bɛya ɛkkɛn yomgɛnti, ɔci jyek Juaŋ gwortanyɔ jyeka pookɛn neeni. Jyeka pookɛn neeniyɛ, gena paŋi jieko, ɔci jyek bwakti maal waakɛnda. Jyeka neeniyɛ, ɛkkɛn jyek ‘ya gwortanyɔ ma yomgɛnti, ɔci ba kookin balki ñingɛn ne pwadan bɛɛ neeniyɛ, maka neeni balki naŋka pwadan daŋkun bɛɛ. 23Ɔci ba jyek kookin ḍɛɛmdin ṭɛra pwadanti neeniyɛ, bala ba maka tieŋŋin jyek ‘ya, ɔci jiek mugɛ ne pwadan, ɔci jyek Juaŋ neeniyɛ, noŋdi naŋka pwadin ɛkkɛn yomgɛnti. Ma gɛɛgyɛ, naŋki ɛkkɛn naŋka pwadin bala ne ḍyɛṭ ṭɔɔlɛ, ɔci maka pookɛn gɛɛg naŋki ɛkkɛn naŋka pwadin bala ñamu moki ne ḍiɛran ṭɔɔlɛ, ɔci maka pookɛn gɛɛg moki naŋki ɛkkɛn naŋka pwadin bala ñamu te ma waakɛnda.” 24Ɔci Yaccu ɛkkɛn myennɛ jwalla parɛ jwalla a caagɔn gɛɛl moki agi, “Cyɛgji Jwaŋa Tolanyɛ, ɛkɛ bala ba mena ‘uan mena ati dwoki pok yel ɛkɛji. 25Ɔci ne ma balki wicki menyɛ, mena yooki ñin iki ɛkɛyɛ, ati biirk dɔŋnɛ yielji poka pwadin jitin. Ɔci ɛkɛ oŋ ati ɔntɔ te wɛnan oŋo. 26Ɔci ne pok woodgɛn ḍwaŋki ɔci leecki ɔci ñingɛn bɛɛkiyɛ, biirka ywollin pok jitin neeniyɛ, leejin daŋkun ɔci ñingɛn bɛɛni. 27Ɔci yiel weegɛnyɛ, maka kanŋan ɛkɛti bɛɛn nona ɛkɛti ɔci gɔkcin ɛkɛti agi, ‘Ciɛggɔn, i boki dwokki poka pwadin yielji boki? Oŋ biirka neeni bɛɛn te aŋɛ?’ 28Ɔci ɛkɛ gɔkcin ɛkkɛnti agi, ‘Daldɛ! Gena mena yoyyin ñin iki ‘ya noŋi naŋka neeniy.’ Ɔci ɛkkɛn gɔkcin ɛkɛti moki agi, ‘I buagi ɔɔn ooddɔn ɛkkɛn lɔɔddɔn bora?’ 29Yeti ɛkɛ kɛkcin ɛkkɛnti agi, ‘A’a, naa ɛkkɛn dɔɔddɛ ñaalɔ bɛɛ. Kan ɛkkɛ ɛkkɛn dɔɔddɛ ñaalɔyɛ, pok woodgɛn dita dɔɔddɛ ñaalɔ dita. 30Dala ɛkkɛn yɔɔda a cyɛɛlɔ acca ɔɔn. Ne oŋŋa ma ɛrki pok bɛɛdiyɛ, ‘ya ɛkkɛn myetka dala ɛkkɛn biirk limtanyɔ ñamu, ɔci tontan maaño. Ɔci pok oŋ limtanyɔ ma, ɔci oltan ma twoñji oŋo..’” 31Ɔci Yaccu ma myennɛ te jwalla a caagɔn gɛɛl moki agi, “Jyek cyɛgji Jwaŋa Tolanyɛ, bala ba kardala waŋɛ piinnɛ men gɛɛl bal ɛkɛy. 32Ñing kardala ḍyɛrgin a ḍyɛrgin ne pɛñan ba ñing kɔba. Ɛkɛ buanɛ ñing janga pookɛn waakɛnda. Yeti ne kardala neeni yuldi ɔci toldiyɛ, ɛkɛ janga pookɛn bwandɛ. Ɛkɛ aga jaan waanɛ, ɔci ḍiirg bɛya eyi kwork ɛkɛ kɛrkɛti ne coŋɔn. A ɔɔnyɛ, bala ba jyek cyɛgji Juaŋ daŋkun. Jyek cyɛgji Juaŋ ɛkɛ jɔɔtcin ne ḍiɛran te maka ne ḍiɛkan, ɔci ɛkɛ poni jitin ne ma coŋki a coŋgin ɔɔn.” 33Ɔci ɛkɛ ɛkkɛn myennɛ te jyeka a caagin gɛɛg moki agi, “Cyɛgji Jwaŋa Tolanyɛ, ɛkɛ bala ba jyek ɛŋa ñɔki ḍuobjiy. Ɛkɛ ñamg olnɛ ḍuojiti ne ḍiɛkan ɔci ñamg bala niin lieda ne ɛkkɛn atki ḍuobji ḍakkitiyɔ wari warda ɔɔn.” 34Yaccu bala gɔki mati oŋkanda te jyeka a caagin neeni. 35Jyeka neeniyɛ, gena jyeka guaŋŋɛ mena a bɔwa Jwaŋa Tolan agi, “‘Ya tuku pɔkka gɔkca mati te jyeka a caagin, ɔci jyeka bala iñɔ wɛnni jitkɛn a coggin te baaṭi wona ṭɛɛr baawiyɛ, ‘ya ɛkkɛn korkɛn owwa bora mati aŋka ɛkkɛn ŋeettan ma.” 36Ɔci Yaccu maka coŋin neeni cuuññɛ baanji, ɔci ɛkɛ kaaccin orɔ. Ɔci maka laldɛ ɛkɛ neeniyɛ, bɛɛn ɛkɛti ɔci gɔkcin ɛkɛti agi, “Dala i ɔɔn lwoktɔn jiek jitkɛn guaŋŋi i, te jyeka a caagin jyek biirk wanna.” 37Ɔci ɛkɛ ṭwokcin ɛkkɛnti agi, “Mena dwoki poka pwadinyɛ, gena ‘ya Kaci Ma Baano. 38Yielyɛ, ɛkɛ a ṭɛɛr konɛ warda baan konɛ warda. Ɔci poka pwadinyɛ, gena ɛkkɛ ma cyɛgji Jwaŋa Tolan. Ɔci biirkyɛ, ɛkkɛn bala ba maka yeyin maka ciyi budan te jyek Juaŋy. 39Mena dwoki biirk neeniyɛ, gena mena yoyyin ñin iki ‘yay, gena Jwaŋa Yaayan. Jyek waka ‘yɛrtan mayɛ, gena oŋa ‘ya jiek olda maka yeyin wyetkɛntiy. Ɔci maka ɛṭi waakyɛ, gena malɛɛkan. 40Ɔci ba biirka limtanyɔ ma ɔci tontan ma maañyɛ, bala ba jyek naŋka bɛya mati te oŋŋa ne ŋoyɔy. 41’Ya Kaci Ma Baanyɛ, malɛɛkan ‘ya cundi, ɔci ɛkkɛn ooddi cyɛgji ‘yati ɔci waka yeyin waakɛnda waka etti nɔji mati neeni limtanyɔ ɛkkɛn, ɔci maka yeyin moki limtanyɔ ɛkkɛn, 42ɔci ɛkkɛn yiɛptan malɛɛkan maccu bana maaño. Ɔci aŋanyɛ, ɛkkɛn wiak ɔci ɛkkɛn lɛkɛn tiittanti te yom yoño. 43Ɔci maka pwadinyɛ, ɛkkɛn dɛkti ba oŋ waŋɛ non cyɛgji Wey ɛkkɛn. Mena balki jyetkiyɛ, dala ɛkɛ tieŋdi jyeka guaŋi ‘ya neeni ne pwadan!” 44“Jyek cyɛgji Jwaŋa Tolanyɛ, bala ba bilka joŋnɛ men gɛɛl iñɔ yieljiy. Ɔci ne mena parɛ bɛɛniyɛ, ɔci ɛkɛ bilk yuarŋɛ, ɔci ɛkɛ ɛkkɛn coŋnɛ ñin dɔki. Ɔci ɛkɛ yomɛ ñɔɔna ñɔɔno. Ɔci ɛkɛ ati ɔci wak ɛkɛ wiɛlnɛyɔ waakɛnda aŋka ɛkɛ ooddi ɔci yela neeni wyɛldɛ i bilka yuarŋɛ ɛkɛ yielji wanna ɔɔn. Ɔci ɛkɛ ati ɔci yiel wiɛllɛ warda. 45“Ɔci moki, jyek cyɛgji Jwaŋa Tolanyɛ, ɛkɛ bala ba jyek mena wɛɛṭi waak mena bala lieṭi luulan pwadin aŋka wyɛldɛ ɛkɛy. 46Ɔci oŋ gɛɛltiyɛ, ɛkɛ yɔṭi luula wiɛlɛ tɛyan. Ɔci ɛkɛ ati ɔci wak ɛkɛ wiɛlnɛyɔ waakɛnda. Ɔci ɛkɛ oŋ ati luula neeni wiɛllɛ ɛkɛ oŋo. 47“Ɔci moki, ne oŋa cyɛgji Jwaŋa Tolan bɛɛdiyɛ, ɛkɛ bala ba malla tolan ne yiɛpkiti ma iñɔ pietin galŋji ɔci muoni yak jitkɛn ne coŋɔny. 48Ɔci ne mali kuummiyɛ, maka wyeci yak neeni yak wuayɛ ne waan taaŋɛti. Ɔci ɛkkɛn yaka pwadin lɔɔddɛ bora te maliji ḍuacci jiju ḍwañji. Ɔci yaka yeyin neeniyɛ, yiɛpcɛ ɔntɔ. 49Ɔci a ɔŋŋiyɛ, bala ba naŋka bɛya ne oŋŋa bɛya ookti ne ŋoyɔy. Ne oŋŋa bɛya ookti ne ŋoyɔ neeniyɛ, malɛɛkan bɛya, ɔci maka yeyin luattan bora te maka pwadinti, 50ɔci ɛkkɛn oltan malɛɛkan maccu bana maaño, ɔci aŋanyɛ, ma wiak a joono, ɔci ɛkkɛn lɛkɛn tiittanti te yom yoño.” 51Ɔci Yaccu tooccin maka laldɛ ɛkɛti agi, “Ɛkkɛ jyeka a caagin neeni jitkɛn yuarnɛ waakɛnda?” Ɔci ɛkkɛn ṭwokcin ɛkɛti agi, “Ɛɛ, ɔɔn ɛkkɛn yuarnɔn.” 52Ɔci ɛkɛ gɔkcin ɛkkɛnti agi, “Ɛkkɛ lallin ‘ya te jyek cyɛgji Jwaŋa Tolan ɔci ɛkkɛ jiek jitkɛn ŋeejɛ ne coŋɔn. A ɔŋŋiyɛ, ɛkkɛ yaakɛti loṭɛ ma te jyeka wonkɛn ɔci jyeka te baaṭi bala ba men ne etti bora waka wonkɛn ɔci waka te baaṭi te twoñi ɛkɛjiy.” 53Ɔci ne Yaccu ḍookki te jyeka a caagin neeniyɛ, ɔci ɛkɛ nona neeni dalnɛ. Ɛkɛ ati nona parɛ. 54Ɔci ɛkɛ ati ban ɛkkɛn ban Najarɛt, ɔci ɛkɛ bala loṭi ma te jyek Juaŋ ona morki ma Juaŋji. Ɔci ma korkɛn buañi, ɔci ɛkkɛn gɔki agi, “Mena neeni jyeka neeni oonɛ te aŋɛ yeti? Ñing tɛɛn ɛkɛ neeni bala a ɔki a ɔɔn? Ɛkɛ yaakinti naŋka tɛyan a ɔki? 55Mena neeni a kaci mena gɔɔñgɔn bɛɛ? Ɔci mɛy ɛkkɛn yenti Moryam bɛɛ? Ɔci Yaakub ɔci Yuocip ɔci Cimaan ɔci Yahuuja, maka neeni ɛkkɛn a modg ɛkkɛn bɛɛ? 56Ɔci kowi ɛkkɛn moki bala ciyi ban ikin wɛnni bɛɛ? Oŋ ‘wana neeni yaakinti naŋka coŋin neeni a ɔki?” 57Ɔci ma ɛkɛ ñyɛlɛ te jiek yookɔn te ḍɔŋ ɛkɛ ɛkkɛnti. Ɔci Yaccu gɔkcin ɛkkɛnti agi, “Bonka pookɛnyɛ, ma ani bɔwa Jwaŋa Tolan. Yeti ban ɛkkɛn waanɛtiyɛ, maka ban ɛkkɛn ɔci maka on ɛkkɛn ani ɛkɛ bɛɛ.” 58Ɔci Yaccu noŋi naŋka tɛyan ne coŋɔn ban ɛkkɛn bɛɛ acaan ma jyeti ɛkɛti bɛɛ.

will be added

X\