Matta 12

1Oŋ gɛɛlti te Oŋ Cabityɛ, Yaccu ati goṭi yelk jitin i maka laldɛ ɛkɛ. Ɔci ne ɛkkɛn balki atki a woon a ɔɔnyɛ, maka laldɛ Yaccu bala wɔɔpi pok wyetkɛn. Ɔci ɛkkɛn bala ŋɛyi pok ne tanki ɔɔn acaan ɛkkɛn amɛ koño. 2Ɔci ma Pɛriciin gɛɛg bala ati iki ɛkkɛn, ɔci ne ɛkkɛn gɔrki naŋka neeniyɛ, ɛkkɛn gɔkcin Yaccuti agi, “Hay! Gɔrca, maka lala iyɛ, ɛkkɛn jyek ganuun, jyeka guagɛ ma te Oŋ Cabit neeni bɛɛyɛji ɛkkɛn ogo?” 3Ɔci Yaccu ṭwokcin ɛkkɛnti agi, “Ɛkkɛ pokkɛ jyeka kiiwɛ ma te naŋki Daawud te oŋŋa ɛkkɛn ammɛ koñ iki maka atki iki ɛkɛ boki? 4Daawud kaaccin on Jwaŋa Tolan i maka atki iki ɛkɛ ɔci ‘woñgi ma omi byedga ḍuatan ma on Juaŋy. Byedga neeniyɛ, gena byedga amtan gena maka a gaciicin pookɛn ba jyek ganuun, ɔci Jwaŋa Tolan gɔkcin genga te naŋka neeni bɛɛ. 5Ɔci moki ŋeejɛ ɛkkɛ ne jyek ganuun dɛɛki ma te kanŋa Oŋ Cabit bɛɛ? Yeti jiek gɔki agi gaciicin Ma Yahuud maka noŋi kanŋa ɛkkɛn orɔ on Jwaŋa Tolanyɛ, ɛkkɛn noŋi kanŋa te Oŋ Cabit, ɔci ɛkkɛn ḍɔɔggɛn wɔkɔ te jyek ganuun Oŋ Cabit neeni. 6Tieŋdɛ, mena jyek ɛkɛ bala ñamu te on Juaŋ ona tolanyɛ, ɛkɛ bala wɛnni. 7Te ɛkkɛ jyek Juaŋ jitkɛn ŋeejɛyɛ, te ɛkkɛ wookɛ maka tuggɛn luyan neeni bɛɛ. Jwaŋa Tolan gɔki worga ɛkɛji agi, ‘‘Ya buaga dala ɛkkɛ yomgɔ pɔktɛ gena mati. ‘Ya buaga waka ‘yɛrdɛ ɛkkɛ bɛɛ.’ 8Gɔṭṭɛ, ba jyeka neeniyɛ, ‘ya Kaci Ma Baanyɛ, ‘ya a Ciɛggɔn Oŋ Cabit acaan ɛkɛ bala ‘ya bieŋuti.” 9Ɔci Yaccu nona neeni dalnɛ, ɔci ɛkɛ ati kaaccin orɔ ona morki ma Juaŋy. 10Ɔci mena ‘uan gɛɛl mɔŋnɛ ɛkɛ aŋan moki. Ɛkɛ bieŋɛ puottin. Ɔci ma Pɛriciin maka orɔ wɛnan buagɔn gɔrti ne Yaccu domdi naŋki gɛɛl kɔŋji no. Ɛkkɛn tooccin Yaccuti agi, “Kan men gɛɛl ywaŋtanyɔ ma te Oŋ Cabity, a ɔɔn jyek ganuun bɛɛyɛji ma te naŋka neeni doki?” 11Ɔci Yaccu ṭwokcin ɛkkɛnti agi, “Kan men gɛɛl ɛkkɛti balki kalŋ ne cyɛɛlɔ budany, ɔci kan kalŋ ɛkɛ ḍɛmmin koolji te Oŋ Cabityɛ, oŋ ɛkɛ kalŋ ɛkɛ neeni oodɛ bora bɛɛ? 12Men baanyɛ, ɛkɛ pwatcin te kalŋ bɛɛ? Acaan a ɔŋŋiyɛ, kan ma noŋdi ne pwadan mati te Oŋ Cabityɛ, a ɔɔn bala ba jyek ganuun.” 13Ɔci ɛkɛ oŋ gɔkcin ‘wana bieŋɛ puottinti neeni oŋ agi, “Bieŋu miɛtca bora.” Ɔci ɛkɛ bieŋɛ miɛnnɛ bora, ɔci bieŋɛ pwani doki bala ba byeŋa parɛ moki. 14Yeti ma Pɛriciin kaaccin bora, ɔci ɛkkɛn bala gɔṭi jiek lieṭi pɔya ɛkkɛn Yaccu noktitiy. 15Ɔci naŋki ɛkkɛn ŋeejɛ Yaccu ne ɛkkɛn noŋki nokki ɛkɛy, ɔci ɛkɛ bana neeni dalnɛ, ɔci maka coŋin bootcin ɛkɛti. Ɔci maka waakɛn yeyinyɛ, ywaŋŋɛ ɛkɛ waakɛnda. 16Ɔci ɛkɛ gɔkcin ɛkkɛnti ne pɛñan agi, “Naa ɛkkɛ mietɛ ma te ‘ya aŋka ‘ya ŋeetta ma a ɔɔn bɛɛ.” 17Ɛkɛ gɔki a ɔɔn ɛkkɛnti aŋka dala jyeka guaŋŋɛ Icaaya mena a bɔwa Jwaŋa Tolan neeniyɛ, bɛya bora. Icaaya gɔki agi, 18“Gɔṭṭɛ, mena neeni ɛkɛ a kɛɛngɔn ‘ya, mena mwowwan ‘ya bora mena ana ‘yay. Ɔci ɛkɛ a mena ‘ya yomu pwanna pwaniy. ‘Ya ɛkɛ ‘woñga Boŋ ‘ya ɔci ɛkɛ Keedin Pookɛn nɔɔttɛ te jyek naŋka pwadin. 19Ɛkɛ loomgɛ koocin bɛɛ. Ɛkɛ tyewɔ iki maka pookɛn bɛɛ. Ɔci ɛkɛ yaadan te pwana tolan bɛɛ. Ɔci pwan ɛkɛ tieŋdɛ menga pɔɔk jitin bɛɛ. 20Kan bɛɛrɔn lɛŋi ne ḍiɛranyɛ, ɛkɛ lɛgdɛ ɛkɛ jitin warda bɛɛ. Kan dyɛka koldan ne ḍiɛran ṭɔɔlɛ budanyɛ, ɛkɛ dyɛka nogdɛ bɛɛ. Naŋki ɛkɛ pwanna pwani oŋkanda ne ɛkɛ naŋka yeyin bwandɛ waakɛnda ɔɔn. 21Ɔci te yenti ɛkɛyɛ, maka kɛɛna pookɛn waakɛnda bala kɛɛy te jyek ɛkɛ aŋka yɔɔdɛ ɛkɛ.” 22Ɔci ma bɛɛn eccin mena ‘uan Yaccuti. ‘Wana neeni muŋŋɛ jwaŋa yaayan, ɔci ɛkɛ a ulli ɔci yaakinti gɔki jiek bɛɛ. Ɔci jwaŋa yaayan koonɛ Yaccu bora te ‘wana neeniti, ɔci ‘uan oŋ gɔkcin jiek ɔci yaaŋnɛti gwali noon daŋkun oŋo. 23Ɔci maka coŋin neeniyɛ, ɛkkɛn korkɛn buañi ne pɛñan, ɔci ɛkkɛn gɔki agi, “Mena neeniyɛ, ɛkɛ a Kiṭɔ Kaci Daawud bɛɛ?” 24Ɔci ma Pɛriciinyɛ, ne ɛkkɛn tieŋki jyeka neeniyɛ, ɛkkɛn gɔki agi, “Mena neeniyɛ, jɔkin yeyin koodɛ ɛkɛ bora parɛ budan bɛɛ. Ɛkɛ jɔkin yeyin koodɛ bora te yenti Byɛljabul ciɛggɔn jɔkin yeyin.” 25Ɔci Yaccu paŋi ɛkkɛn ŋeejɛ, ɔci ɛkɛ gɔkcin ɛkkɛnti agi, “Gɔṭṭɛ! Bana tolanyɛ, kan ma kɛɛpti jitin te jiekyɛ, ɔci coodi pwada bɛɛ, ɔci moki kan ma ñoowɔ te jiek bɛɛyɛ, ɛkkɛn yaakinti ciyi bana ne cyɛɛlɔ walla ona ne cyɛɛlɔ bɛɛ. 26Ɔci kan Jwaŋa Yaayan jɔkin yeyin koodɛ bora yiɛptɛ ɔntɔyɛ, a ɔɔnyɛ, bala ba ɛkɛ yookɔn te war ɛkɛ parɛ. Ɔci kan a ɔɔnyɛ, ɛkɛ yɔɔda ne tɛyan boki? A’a. 27Kan jɔkin yeyin kooya ‘ya bora te yenti Byɛljabul ba jwalla guaŋŋɛ ɛkkɛ neeniyɛ, oŋ ma ɛkkɛ ɛkkɛn jɔkin yeyin kootan bora te yenti menɛ? Kan jyek ɛkkɛ bala a ɔɔnyɛ, ma ɛkkɛ loondi ɛkkɛti daŋkun bɛɛ? 28Yeti kan ‘ya jɔkin yeyin kooya bora te Boŋ Jwaŋa Tolanyɛ, dala ŋeeddɛ ɛkkɛ cyɛgji Jwaŋa Tolan bɛɛn awarɛ ɛkkɛti doki. 29“Gɔṭṭɛ ‘wota, kan mena warɛ tɛyan bala orɔ on ɛkɛyɛ, menga yaakinti kaatti orɔ kordi genga on ɛkɛ boki? Kan mena warɛ tɛyan neeni ḍɛktan ma ñamuyɛ, ma oŋ kaatti orɔ kordi wak on ɛkɛ oŋo. 30“Tieŋdɛ, naŋki ‘ya ŋeejɛ ɛkkɛ ɛkkɛn pwadɔ. Mena buagɔn ‘ya bɛɛyɛ, ɛkɛ yookɔn te ‘ya awarɛ. Ɔci mena lyemin iki ‘ya waak bɛɛyɛ, ɛkɛ waak cyɛddɛ jitin. 31Acaan a ɔŋŋiyɛ, ‘ya gɔkka ɛkkɛti ka Jwaŋa Tolan yaakinti ma bɔɔktɛ te naŋki waakɛnda, kan a jyeka yeyin ɔci moki kan a jyeka pookɛn gɛɛg mokiyɛ, ɛkɛ yaakinti ma bɔɔktɛ men ɔɔn. Yeti kan men gɛɛl wooki naŋki Boŋ Jwaŋa Tolanyɛ, ɛkɛ bɔɔktɛ Juaŋ bɛɛ. 32Ɔci moki kan ma wooki naŋki ‘ya Kaci Ma Baanyɛ, Juaŋ yaakinti ɛkkɛn bɔɔktɛ te nɔjja neeni. Yeti kan men gɛɛl wooki naŋki Boŋ Juaŋyɛ, ɛkɛ bɔɔktɛ Juaŋ iñɔ wɛnni ṭɛɛrji bɛɛ. Ɔci ne coodda ne baaṭi ɔɔnyɛ, ɛkɛ bɔɔktɛ Juaŋ moki bɛɛ. 33“Kan jaan a jana pwadanyɛ, ɛkɛ etti ṭɔlga pwadin, ɔci kan jaan a jana yaayanyɛ, ɛkɛ da etti ṭɔlga yeyin. Jang ŋeecɔn ma te ṭɔlg ɛkkɛn. 34Ɛkkɛ agɛ laaban ba koggo, hay! Ɛkkɛ maka yeyin nɛ, jwalla pwadan gɛɛl bɛya te ɛkkɛ yomgɔti oŋgati boki? Jyeka bala ma tuggɛntiyɛ, gena jyeka coŋin jyeka bala ɛkkɛn yomgɛnti te ñamuy. 35Jyek ma daŋkun bala ba jyek janga neeni. Mena pwadanyɛ, ɛkɛ balki paŋŋa pwadan yomɛti, ɔci naŋki ɛkɛ naŋka pwadan bɛya bora te ɛkɛ yomɛti. Ɔci mena yaayanyɛ, ɛkɛ balki paŋŋa yaayan yomɛti, ɔci naŋki ɛkɛ naŋka yeyin bɛya bora te ɛkɛ yomɛti daŋkun. 36“Ne oŋ godan Juaŋ bɛɛdiyɛ, Juaŋ jiek duaktɛ ma wyetkɛnti ba jyeka guagɛ ɛkkɛn budan a jyeka yeyin neeni waakɛnda. 37Te jyeka guagɛ ma iñɔ baanji wɛnniyɛ, ma gɛɛg pwaddi Juaŋti. Ɔci maka pookɛn gɛɛgyɛ, ḍɛɛmdi maccu.” 38Ɔci maka loṭi worga Juaŋ ɔci ma Pɛriciinyɛ, ɛkkɛn ma gɛɛg bɛɛn Yaccuti ɔci gɔkcin agi, “Mena loṭi may, i baal ba ne gɔki agi ɛkɛ bɛɛnjɛ te Juaŋti no, dala i ɔɔn lɛɛrtɔn naŋka ñyecki ma i naŋka tɛyan.” 39“Hay ɛkkɛ maka yeyin maka jyeni ɛkkɛn baaw Juaŋti nɛ! Ɛkkɛ buagɛ lɛɛrtin ‘ya naŋka tɛyan naŋka ñyecki ma ‘ya? A’a, ɛkkɛ yɔɔrdɛ bɛɛ. Yeti ɛkkɛ gɔrtɛ gena naŋka bala ba naŋka naŋŋɛ Juaŋ Yunaan mena a bɔwa Jwaŋa Tolan te baaṭi neeniti. 40Ɔci bala ba jyek Yunaan, ne ɛkɛ baali yeñi konɛti nink ne ḍoogɔyɛ, ɔci ‘ya Kaci Ma Baanyɛ, ‘ya da nindi koolji ṭɛɛr konɛti nink ne ḍoogɔ daŋkun. 41Gɔṭṭɛ, ne oŋ godan bɛɛdiyɛ, maka ban Ninawa jɔŋdi ñaalɔ i ɛkkɛ a cyɛɛlɔ te oŋŋa wanna, ɔci jiek dɔɔtan ɛkkɛn ɛkkɛ wyetkɔti. Acaan maka ciyi ban Ninawaji ne ɛkkɛn tieŋki jyek Yunaanyɛ, ɛkkɛn waakɛn yaljɛ ɔntɔ te naŋki ɛkkɛn. Ɔci accayɛ, ‘ya mena bala ñamu te Yunaan baal wɛnni ɔci ɛkkɛ yookɛ te ‘ya. 42Te oŋ godanyɛ, mena a ḍuaŋa tolan ḍuaŋa ma Ciba ḍuaŋa a ɛɛŋyɛ, ɛkɛ da jɔŋdi ñaalɔ. Ɔci te oŋŋa wannayɛ, ɛkɛ jiek dɔɔdɛ ɛkkɛ wyetkɔti. Acaan ḍuaŋa tolan neeni jɔŋŋin te ban ɛkkɛn bana loonan, ɔci ɛkɛ ati aŋka tieŋdi jyek Cɔlaman. Acaan Cɔlaman neeniyɛ, ɛkɛ ñingɛ tɛy tɛyo. Ɔci accayɛ, ‘ya mena ñing tɛɛn ɛkɛ bala ñamu te ñing tɛɛn Cɔlamanyɛ, ‘ya baal wɛnni, ɔci ɛkkɛ yookɛ te ‘ya!” 43“Ɔci ‘ya gɔkka ɛkkɛti te jwalla neeni moki. Kan men gɛɛl mugdɛ jwaŋa yaayan ɔci kan jwaŋa yaayan koodi bora te menti ooddi ḍɔki a ḍwaŋi nona wɔɔgan nona iwan lieṭi nona woodi ɛkɛ, ɔci yɔɔrdi nona pwadan nona ciyi ɛkɛ bɛɛyɛ, 44ɛkɛ gɔkti war ɛkɛti agi, ‘‘Ya ootta dɔwwa ona daljan ‘ya neeni.’ Ɔci ɛkɛ ooddi dɔɔdi menti, ɔci men mɔktɛ ɛkɛ pwanna pwanno, gena yaayan gɛɛl bala moki bɛɛ. 45Ɔci ɛkɛ oŋ ooddi etti jɔkin yeyin jɔkin pookɛn ne dɔɔyɔ wyetkɛn ne yyɛɛwɔ. Ɔci jɔkin neeniyɛ, jɔkin ñamu buankɔn te yoño. Ɔci ɛkkɛn kaatti jiju menti waakɛnda. Ɔci ‘wana neeniyɛ, coodi ɛkɛ coodda ne ŋoyɔyɛ, yaaya ne tolan nɔñji te coodda ñamu. Hay! Ɛkkɛ maka yookɔn te jyeni neeniyɛ, naŋki ɛkkɛ bala ba naŋki ‘wana neeni.” 46Ɔci ne Yaccu baali gɔki jyeka neeni mati menyɛ, mɛy ɛkkɛn ɔci modg ɛkkɛnyɛ, ɛkkɛn bala yɔdi bora tooci ɛkɛ. 47Ɔci men gɛɛl gɔkcin Yaccuti agi, “Mɛy ɛkkɛ ɔci modg ɛkkɛ, ɛkkɛn bala yɔdi bora buagɔn i.” 48Ɔci Yaccu ṭwokcin mena ɛkɛ myennɛ neeniti agi, “A menɛ, a mɛyi ɔɔn ɔci a makɛ a modg ɔɔny?” 49Te wɛnan ɛkɛ byeŋkɛ laŋnɛ bora ɔci ñuoccin maka laldɛ ɛkɛti, ɔci gɔkcin agi, “Gɔṭṭɛ! Maka neeniyɛ, a mɛyi ɔɔn ɔci a modg ɔɔn! 50Maka noŋi ba naŋka ṭagdɛ Wey ɔɔn ñaalɔ pɔlijiyɛ, ɛkkɛn a modg ɔɔn, ɔci a kowi ɔɔn ɔci a mɛyi ɔɔnɔ.”

will be added

X\