Matta 11

1Ɔci ne Yaccu ḍookki te lali Maka A Inyaakkɛn Wyetkɛn Ne Yyɛɛwɔ te jyeka neeniyɛ, ɛkɛ ookcin bora te wɛnan bala ati booti loṭi ma bonk jitin ban Jaliil konɛ warda. 2Ɔci Yɔhanna Mena Buoṭi Mayɛ, ɛkɛ bala ciginji. Ɔci ne ɛkɛ tieŋni jyek naŋka naŋdɛ Kiṭɔyɛ, ɛkɛ maka laldɛ ɛkɛ gɛɛg cuuññɛ nona Yaccuti. 3Ɔci ɛkkɛn tooccin ɛkɛti, “I a Kiṭɔ mena guagdɛ Yɔhanna bala bɛyayɛ? Walla i a ɛkɛ bɛɛ? Mena kɛɛdɔn ɔɔn da parɛ?” 4Ɔci Yaccu ṭwokcin ɛkkɛnti agi, “Ɔgdɛ ooddɛ ɔci Yɔhanna myettɛ te waka naŋdi ‘ya neeni. Dala ɛkkɛ Yɔhanna myettɛ te waka yuartɛ ɛkkɛy, ɔci te jyeka tieŋdɛ ɛkkɛy. 5Maka ullin noon yuarcɛ doki. Ɔci maka ŋɔr yaakinti woon moki. Ɔci maka naŋŋɛ cyɛc waakɛn pwadgin doki. Ɔci maka miŋki yaakinti tyeŋi jiek moki. Ɔci maka tuun jɔŋŋin ñaalɔ te kolk jitin moki. Ɔci maka a bɔwan Jwaŋa Tolanyɛ, ɛkkɛn bala laltan ma te jyeka wonkɛn jyeka pwadin neeni. 6Maka yomgɛn ŋoodan te ‘ya bɛɛyɛ, yomg ɛkkɛn pwanna pwanno.” 7Ɔci ne maka cuonnɛ Yɔhanna neeni atki dokiyɛ, Yaccu bala mieti ma te jyek Yɔhanna. Ɛkɛ tooccin ɛkkɛnti agi, “Ɛkkɛ poŋɛ Yɔhanna neeni ɛkɛ a menɛ yeti? Oŋ ɛkkɛ attɛ bora wɔɔŋji gɔrtɛ gena? Ɛkkɛ attɛ wɔɔŋji gɔrtɛ ɛkɛ ne ɛkɛ baali ba luom ne jiɛyi jwamiyɛ? 8Ɛkkɛ attɛ bora gɔrtɛ gena? Ɛkkɛ attɛ bora gɔrtɛ ne ɛkɛ agɛ mena ḍuaŋa mena ɛŋi bworŋa koyan bworŋa pwadan nɛ? Hayɛllɛ! Maka ɛŋi bworŋin koyan bworŋin pwadinyɛ, ɛkkɛn ciyi oorg cyekinti. 9Ɛkkɛ attɛ bora gɔrtɛ gena? Ɛkkɛ attɛ bora gɔrtɛ mena bɔwa Jwaŋa Tolan nɛ? Awarɛ, ‘ya gɔkka ɛkkɛti, Yɔhanna neeniyɛ, ɛkɛ a bɔwa Jwaŋa Tolan budan bɛɛ. Kanŋa ɛkɛ bala ñamu te kanŋa mena a bɔwa Jwaŋa Tolan. 10Yɔhanna neeniyɛ, ɛkɛ a mena jiekɛ guagɛ bɔwan Jwaŋa Tolan worgan a kiigin jitin agi, ‘Jwaŋa Tolan gɔkcin Kaci ɛkɛti agi ɛkɛ men gɛɛl cuoñjɛ ñamu aŋka ɛkta yɔŋda pɔyo.’ 11Tieŋdɛ, ɛkkɛ myettin ne pwadan. Ɛkkɛ men gɛɛl bala tolcin te Yɔhanna Mena Buoṭi Ma neeni bɛɛ. Yeti mena ḍiɛran non cyɛgji Jwaŋa Tolanyɛ, ɛkɛ bala ñamu te Yɔhanna. 12Te oŋŋa Yɔhanna Mena Buoṭi Ma neeni bɛɛni ne acca ɔɔnyɛ, ma buagɔn jyek cyɛgji Jwaŋa Tolan neeni ne pɛñan. Ɛkkɛn jiek mugɛ ne tɛyan acaan ɛkkɛn pwadɔ ɛkkɛnti ne tolan. 13Jyeka kiiwɛ bɔwan Jwaŋa Tolan ɔci jyek ganuun Muuca waakɛnda ne wɔɔka Yɔhanna bɛɛni ɔɔnyɛ, ɛkkɛn waakɛnda mieti ma te jyek cyɛgji Jwaŋa Tolan neeni. Ɔci Yɔhannayɛ, ɛkɛ a mena ma myennɛ ne ŋoyɔ te jyeka neeniy. 14Tieŋdɛ ɛkkɛ myettin, Yɔhanna neeniyɛ, gena ɛkɛ a mena guagɛ ma agi Iliiya baalɔ bɛɛdɔy. 15Dala ɛkkɛ jyetkɔ pɔktɛ aŋka ɛkkɛ tieŋdɛ jyeka guaŋi ‘ya neeni ne pwadan. 16“Ɛkkɛ maka ciyi acca nɛ, ‘ya gɔkca a ɔki te naŋki ɛkkɛ neeniy? Naŋki ɛkkɛ neeni bala ba naŋki kɛɛgin ḍyɛrin ne balki cieki ñieki nona dukkan tuggɛnti, ɔci balki boorki yɔtin pookɛn agi, 17‘Ɔɔn kuonnɔn ɔɔlga wɛɛki ma ñooni doki, ɔci ɛkkɛ ñiɛlnɛ bɛɛ. Ɔɔn ‘ualnɔn ɔɔlg joon doki, ɔci ɛkkɛ wiaŋnɛ bɛɛ.’ 18Gɔṭṭɛ, Yɔhannayɛ, ɛkɛ bala omi waka pwadin bɛɛ, ɔci moti mooy bɛɛ, yeti ma gɔki agi ɛkta balki jwaŋa yaayɔ yomdanti. 19Ne ‘ya Kaci Ma Baan bɛɛnayɛ, ‘ya baal omin iki mako, ɔci moki baal motin iki mako. Ɔci ma wooki ‘ya daŋkun agi, ‘Gɔrtɛ mena neeniti! Ɛkɛ ani oomdin ne tolan, ɔci ɛkɛ moki nokkin mooy oŋkanda, ɔci ɛkɛ a mug maka lyemi tulba a ɛyi ɔci maka a nɔɔtko.’ Yeti ba jyeka neeni waakɛndayɛ, naŋki jitkɛn yuartanji ma ne pwadan dɔki, kan ɛkkɛn a naŋka pwadin walla naŋka yeyin ne ɛkkɛn bɛɛti boray.” 20Ɔci Yaccu bala wooki maka ciyi bonka ḍwaŋin bonka noŋŋi ɛkɛ naŋka tɛyan jitkɛn ne coŋɔn te ñamu neeni. Ɛkɛ bala wooki ɛkkɛn acaan ne ɛkkɛn yookiti waakɛn te yali waakɛn te nɔji ɛkkɛny. 21Ɛkɛ gɔki agi, “Hay, ɛkkɛ maka ciyi ban Kɔrajin ɔci maka ciyi ban Bɛtceeyida, ɛkkɛ wyetkɔ tɛɛna tɛɛn ba ooŋkan a ɔɔn ogo? Maka ban Tayir ɔci maka ban Ciḍɔɔnyɛ, kan te ɛkkɛn gɔrki naŋka tɛyan naŋka naŋi ‘ya neeniyɛ, te ɛkkɛn ɛɛŋjin bworŋin cyeji, ɔci wyetkɛn tuoggi tooldin te yom yoñ te nɔji ɛkkɛn, ɔci te ɛkkɛn waakɛn yali ‘yati te baaṭi doki. 22’Ya gɔkka ɛkkɛti, te oŋ godanyɛ, taab maka ban Tayir ɔci taab maka ban Ciḍɔɔnyɛ, ɛkɛ bala ñamu te taab ɛkkɛ bɛɛ. Taab ɛkkɛ aŋka tolcin. 23“Ɔci ɛkkɛ maka ban Kapɛrnyam, ɛkkɛ poŋɛ gɔkɛ agi ɛkkɛ waakɔ koobdɛ ñaalɔ ooddɛ ne ñaalɔ pɔliji ɔci ḍwaŋdɛ ne baaṭi? A’a. Ɛkkɛ ḍwaŋdɛ bɛɛ. Ɛkkɛ ḍɛɛmdɛ iñɔ Jwaŋa Tolan ne pɛñan. Ɛkkɛ eetɛ ma bana yaayanti. Maka ban Caduumyɛ, kan te ɛkkɛn gɔrki naŋka tɛyan naŋka naŋi ‘ya ban ɛkkɛ neeniyɛ, ɛkkɛn te ḍakcin bɛɛ. Ɛkkɛn te balgin iki ikin men. 24’Ya gɔkka ɛkkɛti, te oŋ godanyɛ, taab ma Caduumyɛ, ɛkɛ bala ñamu te taab ɛkkɛ bɛɛ. Taab ɛkkɛ aŋka tolcin.” 25Ɔci te oŋŋa wannayɛ, Yaccu cɔkcin Juaŋti agi, “Hay! Wey ɔɔn, i a Ciɛggɔn ñaalɔ, ɔci i a Ciɛggɔn nona iñɔ wɛnni moki. Pwatcin doki acaan jyeka neeni coŋŋiyɔ i maka gɔki agi ɛkkɛn ñingɛn tɛyɔti, ɔci i jiek lɛɛlni bora aŋa maka waakɛn dɔwwɛ iñɔ buagɔn jiek jitkɛn yuartanti. 26Hay! Wey ɔɔn, ‘ya gɔkka iti a pwatcin moki acaan naŋka neeni pwatcin iti, hay!” 27Ɔci Yaccu gɔkcin mati agi, “‘Ya ‘wonna Wey ɔɔn waak bieŋuti waakɛnda. Menga yaakinti ‘ya Kaci Juaŋ neeni ŋeejɛ ɛkɛ a mena bɛɛ. Gena Weegɛn parɛ aŋka ɛkɛ ŋeejɛ ne pwadany. Ɔci menga Kaci Weegɛn ŋeejɛ bɛɛ. Gena Kaci parɛ aŋka ɛkɛ ŋeejɛy. Ɔci moki kan ‘ya Wey ɔɔn myetka mayɛ, maka neeni yaakinti Juaŋ ŋeettan ne pwadan.” 28“Bɛɛdɛ ‘yati waakida ɛkkɛ maka bala kanŋany, ɔci ɛkkɛ maka kɛṭi waka cyɛgany, ɔci ɛkkɛ woodɛ te taab neeni. 29Dala yomg ɛkkɛ bala ba yom ‘ya. Dala ɛkkɛ lordɛ te ‘yati, acaan yom ‘ya pwad pwad mati, ɔci ‘ya tol yomuti bɛɛ. Ɔci kan ɛkkɛ loṭɛ te ‘yayɛ, ɛkkɛ yomgɔ mwondi te joono. 30Acaan koŋña kaakca ‘ya ɛkkɛ ḍɔɔggɔti neeni, ɛkɛ eññɛ yaayɛ bɛɛ, ɔci waka ‘wondin ‘ya ɛkkɛ aŋka cyɛrdɛ neeniyɛ, ɛkkɛn cyɛkcin bɛɛ.”

will be added

X\