Matta 10

1Ɔci Yaccu borcin maka laldɛ ɛkɛ a inyaakkɛn wyetkɛn ne yyɛɛwɔ neeniti, ɔci ɛkkɛn bɛɛn nona ɛkɛti. Ɔci ɛkkɛn ‘wonnɛ ɛkɛ jiek aŋka ɛkkɛn jɔkin yeyin kootan bora te mati te jyek ɛkkɛn. Ɔci moki, ɛkkɛn ‘wonnɛ ɛkɛ jiek aŋka ɛkkɛn yɔŋi ma te wajan jitkɛn waakɛnda. 2Cuudan Yaccu Maka A Inyaakkɛn Wyetkɛn Ne Yyɛɛwɔ neeniyɛ, gena Cimaan mena bartan ma a Butruc, ɔci mod ɛkkɛn Andarawuc, ɔci kɛɛgin Jɛbadi Yaakub ɔci Yɔhanna, 3ɔci Pilibuc, ɔci Bartɔɔlamawuc, ɔci Tɔmac, ɔci Matta mena lyemi tulbay, ɔci Yaakub kaci Alpay, ɔci Tadawuc (mena bartan ma moki agi Yahuuja kaci Yaakub), 4ɔci Cimaan (mena bɛɛn te ban Kɛnantiy, bartan ma agi men maka Byeran), ɔci Yahuuja Kaci Ickɛɛryuti, (mena Yaccu ‘wonnɛ ma byeŋkɛntiy). 5Maka A Inyaakkɛn Wyetkɛn Ne Yyɛɛwɔ neeniyɛ, cuuññɛ Yaccu bonk jitin, ɔci ɛkɛ gɔkcin ɛkkɛnti agi, “Naa ɛkkɛ ooddɛ te pɔya eetan ma bonk Keedin Pookɛnti bɛɛ. Ɔci naa ɛkkɛ kaattɛ bonk ma Camɛɛryati bɛɛ. 6Dala ɛkkɛ ooddɛ gena bonk ma Icrayiilti pookɛn, acaan ɛkkɛn bala ba kulin yieny. 7Ɔci ne ɛkkɛ ooddiyɛ, ɛkkɛ lortɛ ma agi, ‘Jyek cyɛgji Jwaŋa Tolan cɔɔllin doki.’ 8Te war tɛɛn ‘wonnin ‘ya ɛkkɛ neeniyɛ, dala ɛkkɛ maka waakɛn yeyin ywaŋdɛ. Ɔci maka tuunyɛ, dala ɛkkɛn luoldɛ ñaalɔ te lienti. Dala ɛkkɛ maka naŋŋɛ cyɛc ywaŋdɛ. Dala ɛkkɛ jɔkin yeyin koodɛ bora te mati. Ɛkkɛ ‘wonnin ‘ya war tɛɛn te bilk bɛɛ. Ɔci dala ɛkkɛ da yɔŋdɛ ma budan. 9Ne ɛkkɛ jɔŋdɛ ooddɛyɛ, naa ɛkkɛ eedɛ dahab, walla pɔdda, walla bilka tidan kuñŋan ṭɔɔlɛ bilkji bɛɛ. 10Ɔci naa ɛkkɛ eedɛ kucin bɛɛ, walla bworŋin ne yyɛɛwɔ bɛɛ, ɔci walla wɛɛyi ne yyɛɛwɔ bɛɛ, ɔci walla gɔlk ne yyɛɛwɔ bɛɛ. Acaan mena noŋi kanŋayɛ, ɛkɛ yɔmjin aŋka omdi te kanŋa ɛkɛti. 11“Ɔci ne ɛkkɛ kaattɛ baan gɛɛlti a bana tolan walla a bana ḍiɛranyɛ, dala ɛkkɛ liertɛ mena pwadan gɛɛl ɔci dala ɛkkɛ coottɛ on ɛkɛ. Ɔci dala ɛkkɛ ciedɛ te wɛnan ɔɔn ne ɛkkɛ jɔŋdɛ bagdɛ bana parɛti ɔɔn. 12Ne ɛkkɛ kaattɛ orɔ ona neeniti aŋka ɛkkɛ coottɛ wɛnanyɛ, dala ɛkkɛ ma ñiibdɛ te jyeka pwadin. 13Ɔci kan ma pwadɔ awarɛyɛ, dala coodi pwani bɛya mati ba jyeka ñiemnɛ ɛkkɛ ɛkkɛnti neeni. Yeti kan maka neeni pwadɔ bɛɛyɛ, naa coodi pwani bɛya ɛkkɛnti daŋkun bɛɛ. 14Kan ma ñiepi ɛkkɛ ne pwadan bɛɛyɛ, ɔci kan ɛkkɛn tieŋdi jyek ɛkkɛ bɛɛyɛ, dala ɛkkɛ koodɛ bora te ona wannati, ɔci ne ɛkkɛ koodɛ borayɛ, dala ɛkkɛ ciegɔ ṭyɛŋdɛ te ṭɛr ban ɛkkɛn neeni. 15Tieŋdɛ, ɛkkɛ myettin ne pwadan, oŋŋa godan Juaŋ bɛɛdiyɛ, taab ma Caduum ɔci taab ma Gamɔɔra bwandɛ taab maka bana yooktan te ɛkkɛ neeni. 16“Gɔṭṭɛ, ɛkkɛ cundin ‘ya mati. Ɛkkɛ balgɛ ba kulin bowin jitin. Acaan a ɔŋŋiyɛ, dala ɛkkɛ ñingɔ tɛya ba koggo. Ɔci dala ɛkkɛ ywobji baadi ba boobgo. 17Ɔci gɔṭṭɛ moki, dala ɛkkɛ woŋgɔ tiittɛ te jyek maka neeni. Ɛkkɛ ‘wontɛ ɛkkɛn maka gɔṭi jiek byeŋkɛnti, ɔci ɛkkɛ ḍuatɛ ma orɔ oorga morki ma Juaŋy. 18“Ɔci ɛkkɛ yɔɔttɛ ḍuaŋan ḍyɛrin ɔci ḍuaŋan ḍwaŋin ñomgɛnti te jyek ‘ya. Ɔci ɛkkɛ ɛkkɛn lwogdɛ te jyeka wonkɛn jyeka pwadin. Ɔci Keedin Pookɛn lwogdɛ te jyek ‘ya daŋkun. 19Ɔci ne ɛkkɛ eetɛti ma noŋtɛti ma godanyɛ, naa ɛkkɛ buayɛ jyeka guagdɛ ɛkkɛ ɛkkɛnti bɛɛ. Te oŋŋa wannayɛ, ɛkkɛ ‘wondɛ Juaŋ jyeka guagdɛ ɛkkɛ neeni. 20Acaan gena ɛkkɛ gɔkɛ jyeka neeni bɛɛ. Gena Boŋ Wey ɛkkɛ Jwaŋa Tolan cuondɛ ɛkɛ, ɔci ɛkɛ aŋka gɔkti te tuk ɛkkɛy. 21“Ɔci ma waakɛnda yooktan te ɛkkɛ te jyek ‘ya. Ɔci ne oŋŋa wanna bɛɛdiyɛ, maka ‘uay gɛɛg yooktan te modg ɛkkɛn. Ɔci ɛkkɛn tiaktanyɔ ɛkkɛn pookɛn, ɔci noktan mako. Ɔci moki kɛɛgin weyyɛn gɛɛg yooktan te kɛɛgin ɛkkɛn. Ɔci kɛɛgin gɛɛg daŋkunyɛ, ɛkkɛn yooktan te weyyɛn ɔci te mɛyyɛn moki, ɔci ɛkkɛn noktan ma te jyek kɛɛgin ɛkkɛn. Ɔci kan mena yɔɔda ne tɛyan ne naŋka yeyin neeni baati ɔɔnyɛ, ɛkɛ aŋka yɔɔdɛ Juaŋo. 23Kan ma noŋdi ne yaayan ɛkkɛti baan gɛɛltiyɛ, dala ɛkkɛ yooŋdɛ bana parɛti. Tieŋdɛ, ɛkkɛ myettin ne pwadan, ne ɛkkɛ bonk ma Icrayiil ḍagdɛ te boti men bɛɛyɛ, ‘ya Kaci Ma Baan bɛɛd doki. 24“Kan men gɛɛl laltan mayɛ, ɛkɛ tolcin te mena loṭi ɛkɛ neeni bɛɛ. Ɔci mena noŋi kanŋayɛ, ɛkɛ tolcin te kanŋa weegɛn bɛɛ. 25Kan naŋki gɛɛl bɛɛn mena loṭi matiyɛ, ɔci naŋka neeni bɛya maka laldɛ ɛkɛti daŋkun. Ɔci kan naŋki gɛɛl bɛɛn kanŋa weegɛntiyɛ, naŋka neeni bɛya maka kanŋan ɛkɛti daŋkun. Oŋ kan ‘ya on weegɛn barka ma te yenti mena yaayan a Byɛljabuly, oŋ ɛkkɛ poŋɛ naŋka neeni bɛya ɛkkɛ maka bala yati neeni bɛɛ? Bɛya hay! 26“Yeti naa ɛkkɛ buayɛ ma baan bɛɛ. Gen gɛɛl coktanyɔ ma bɛɛ. Yeti gena coktanyɔ mayɛ, ne baaṭi ɛkɛ dɔki bɛya bora. Ɔci moki, ma yaakinti jiek coktanyɔ korkɛnti bɛɛ. Ne baaṭi jyeka neeni bɛya bora moki. 27Jyeka loṭa ‘ya ɛkkɛ pookɔ a jyeka pwadin neeniyɛ, ne baaṭiyɛ, dala ɛkkɛ jyeka neeni oodɛ bora mati waakɛnda. Ɔci jyeka tieŋnɛ ɛkkɛ jyeka a meegin neeniyɛ, dala ɛkkɛ ma nɔɔttɛ te jyeka neeni te pwana tolan te oorg wyetkɛnti. 28“Naa ɛkkɛ buayɛ maka noki ɛkkɛ waakɔ neeni bɛɛ. Ɛkkɛn yaakinti ṭyebin ɛkkɛ noktan bɛɛ. Dala ɛkkɛ buattɛ gena Jwaŋa Tolan mena yaakinti noki ma ɔci yaakinti ma yiɛptɛ maccu moki kan ma jyek ɛkɛ daltan te lyena ɛkkɛn buakɛ ma baany. 29Dala ɛkkɛ yomgɔ tiektɛ ɔci gɔrtɛ. Ḍiirga ḍyɛrin ne yyɛɛwɔ ma wɛɛṭi te giri ne cyɛɛlɔ bɛɛ? Ḍiirga ḍyɛrin neeniyɛ, ŋeejɛ Wey ɛkkɛ waakɛnda. Kan ḍina ḍiɛran gɛɛl ḍɛmdi iñɔyɛ, kwoyɛ ɛkɛ bɛɛ, ŋeejɛ ɛkɛ doki. 30Oŋ ɛkkɛ, Juaŋ gɔṭi ɛkkɛ ne tolan. 31Naa ɛkkɛ buayɛ bɛɛ. Juaŋ gɔṭi ɛkkɛ ne tolan te ḍiirga coŋin ḍiirga ḍyɛrin neeni. 32“Gɔṭṭɛ! Kan ma gɔkti maka pookɛnti agi ɛkkɛn aginti ma ‘yayɛ, ɔci ‘ya da gɔkca Wey ɔɔnti ñaalɔ pɔliji ka ɛkkɛn a ma ‘ya. 33Ɔci kan menga kɛkti te ‘ya ma ñomgɛnti agi ɛkɛ ‘ya ŋeejati bɛɛyɛ, ‘ya da kɛkca te ɛkɛ Wey ɔɔn ñamɛti ñaalɔ pɔliji, ka ɛkɛ da ŋeej ‘ya bɛɛ. 34“Naa ɛkkɛ poŋɛ gɔkɛ agi ‘ya bɛɛnjɔ iñɔ wɛnni ṭɛɛrji enjɔ coodda pwadan bɛɛ. Te bɛɛna bɛɛna ‘ya neeniyɛ, ma ciya ne pwadan bɛɛ, ma noogdi. 35Te bɛɛna bɛɛna ‘ya neeniyɛ, ma kɛɛpti jitin. Kacca ‘uanyɛ, ɛkɛ yooktan te wey ɛkkɛn acaan ɛkɛ a men ‘ya. Ɔci kacca ṭɔɔlyɛ, ɛkɛ yooktan te mɛy ɛkkɛn acaan ɛkɛ a men ‘ya. Ɔci mena ɛɛŋyɛ, ɛkɛ yooktan te ‘war ɛkɛ mɛɛgɛn acaan ɛkɛ a men ‘ya. 36‘Mena ‘uanyɛ, maka bala on ɛkɛyɛ, ɛkkɛn yooktan te ɛkɛ acaan ɛkɛ a men ‘ya.’ 37“Kan men gɛɛl ani wey ɛkkɛn walla mɛy ɛkkɛn ne tolan te anna ɛkɛ ani ‘yayɛ, ɛkɛ yɔmjin aŋka bartan ma a men ‘ya bɛɛ. Kan men gɛɛl ani kaci ɛkɛ kacca a ‘uan walla kacca a ɛɛŋ ne tolan te anna ɛkɛ ani ‘yayɛ, ɛkɛ yɔmjin aŋka bartan ma a men ‘ya bɛɛ. 38Ɔci kan men gɛɛl kakan ɛkɛ luldɛ ɔci bootti ‘yati bɛɛyɛ, ɛkɛ yɔmjin aŋka bartan ma a men ‘ya bɛɛ. 39Mena ani war ɛkɛ parɛyɛ, ɛkɛ ḍakti. Yeti mena tuwa te jyek ‘yayɛ, ɛkɛ aŋka yɔɔrdi tɛɛtin baadi bɛɛ neeni. 40“Mena ɛkkɛ mugdɛyɛ, ɛkɛ da ‘ya mugda. Ɔci mena ‘ya mugdayɛ, ɛkɛ da mena ‘ya cuonna mugdɛ. 41Kan menga mena cundɛ Juaŋ gɛɛl mugdɛ acaan mena neeni a mena cundɛ Juaŋyɛ, mena parɛ neeni ‘wondɛ Juaŋ waka pwadin ba waka ‘wondɛ Juaŋ mena cundɛ ɛkɛ neeni ɔɔn. Ɔci kan men gɛɛl mena pwadan gɛɛl muŋŋɛ acaan ɛkɛ a mena pwadanyɛ, mena neeni ‘wondɛ Juaŋ waak ba wak ɛkɛ ɔɔn daŋkun. 42’Ya gɔkka ɛkkɛti awarɛ. Men gɛɛl ne cyɛɛlɔ te maka ḍyɛrinti neeniyɛ, kan men gɛɛl ɛkɛ ‘wondɛ pyega luyan aŋka maaddɛ ɛkɛyɛ, ɔci kan mena neeni noŋdi a ɔɔn acaan ɛkɛ a men ‘yayɛ, Jwaŋa Tolan ñingɛ yeya te naŋka ḍiɛran neeni bɛɛ. Ɛkɛ da ‘wondɛ Juaŋ waka pwadin ne baaṭi te naŋka naŋŋɛ ɛkɛ neeni.”

will be added

X\