Mark 9

1Ɔci ɛkɛ gɔkcin ɛkkɛnti agi, “Gɔṭṭɛ! ‘Ya gɔkka ɛkkɛti awarɛ, ma gɛɛg bala ɛkkɛti wɛnni, ɔci ɛkkɛn tuwa bɛɛ, yeti te ñamu ɛkkɛn gɔrti cyɛgji Jwaŋa Tolan ne ɛkɛ bɛɛdi ma baantiy. Ɔci naŋka tɛyan naŋki Juaŋ yuartan ɛkkɛn.” 2Ɔci ne nink ne dɔɔyɔ wilin ne cyɛɛlɔ bɛɛki borayɛ, Butruc ɔci Yaakub ɔci Yɔhanna eññɛ Yaccu poom wyeñɛti pookɛn. Poma neeniyɛ, wyeñɛ bey beyo. Ɔci ɛkɛ aaŋŋɛyɔ Jwaŋa Tolan warɛti ɛkkɛn ñomgɛnti. 3Ɔci bworŋin ɛkɛ galla gali, ɔci bɔɔna bɔɔn ne pɛñan. Bworŋin bɔwan iñɔ ṭɛɛrji wɛnniyɛ, buanɛ bworŋin ɛkɛ waakɛnda te bɔɔno. 4Ɔci Iliiya yaakkɛn i Muuca waakɛn lɛɛllɛ bora maka eññɛ Yaccu ne ḍoogɔ neeniti. Ɛkkɛn bala gɔwwɔ i Yaccu. 5Ɔci ne ḍyɛṭ ṭɔɔlɛ Butruc gɔkcin Yaccuti agi, “Ciɛggɔn, kan ikin cietin oŋkanda te wɛnni ɔɔnyɛ, pwatcin hay! Dala ɔɔn noŋdɔn doŋki ne ḍoogɔ, ɛka ne cyɛɛlɔ te i, ɔci ɛka ne cyɛɛlɔ te Muuca, ɔci ɛka ne cyɛɛlɔ te Iliiya.” 6Ɛkɛ gɔki amaam budan ɔɔn, acaan ɛkkɛn korkɛn buañi noon ne pɛñan. 7Ɔci pɔli bɛɛn ɔci ɛkkɛn kwommɛyɔ dɛki ne bɔwan, ɔci pwan gɔkkin te pɔliti agi, “Mena neeniyɛ, gena Kaci ‘ya Kacca ana ‘ya cuoññan ‘yay. Dala ɛkkɛ tieŋdɛ jyek ɛkɛ!” 8Ɔci ne pɛñan ne ɛkkɛn tieŋki pwana neeniyɛ, ɛkkɛn bala gɔṭi noon a gwallo, yeti menga yuarcɛ ɛkkɛn bɛɛ. Yaccu aŋka bala yɔɔd parɛ. 9Ɔci ne ɛkkɛn balki kooti iñɔ te poom wyeñɛti menyɛ, Yaccu gɔkcin ɛkkɛnti ne pɛñan agi, “Naa ɛkkɛ men gɛɛl myettɛ te naŋka yuarnɛ ɛkkɛ neeni bɛɛ. Yeti ne ‘ya Kaci Ma Baan jɔlda ñaalɔ te lientiyɛ, ɛkkɛ oŋ ma myettɛ oŋo.” 10Ɔci ɛkkɛn jyeka neeni cogiyɔ. Yeti ɛkkɛn bala toyɔ yɔtin pookɛn te jyeka guaŋŋɛ Yaccu agi ɛkɛ jɔŋji ñaalɔy. 11Ɔci ɛkkɛn tooccin Yaccuti agi, “Ne maka loṭi worga Juaŋ gɔkki agi Iliiya aŋka bɛɛdɔ ñamu wannay, jyek ɛkkɛn bala a ɔki a ɔɔn?” 12Ɔci ɛkɛ gɔkcin ɛkkɛnti agi, “Iliiya bɛya ñamu awarɛ, acaan ɛkɛ yɔŋi waak waakɛnda te ñamu ne pwadan. Jyeka kiigin, ne ɛkkɛn gɔkki te ‘ya Kaci Ma Baan agi ‘ya taabjɔ ne pɛñan, ɔci agi ma yooktɛ te ‘yayɛ, jyeka neeni jitkɛn bala a ɔki ɛkkɛti? 13Tieŋdɛ! Iliiyayɛ, ɛkɛ bɛɛn doki. Ɔci ma noŋi ɛkɛti ne yaayan ba yomg ɛkkɛn. Ɔci a ɔŋŋiyɛ, bala ba jyeka kiigin te baaṭi ne gɔkki te ɛkɛy.” 14Ɔci ne ɛkkɛn dɛñki nona maka laldɛ Yaccu ɛkkin pookɛntiyɛ, ɛkkɛn ma mɔkci wyetkɛn ḍɔɔlɛ nona ɛkkɛnti kɔɔna kɔɔnno. Ɔci maka loṭi worga Juaŋ bala tyewɔ iki ɛkkɛn. 15Ɔci ne Yaccu yuarkiti maka coŋin neeniyɛ, ɛkkɛn yomgɛn moottin ɔci ɛkkɛn yiŋi ɛkɛti, ɔci ɛkɛ ñiibɛ ɛkkɛn. 16Ɔci ɛkɛ tooccin ɛkkɛnti agi, “Ɛkkɛ balgɛ gɔwwɛ te jyek waaka?” 17Ɔci men gɛɛl bala nona maka coŋin neeniti ṭwokcin ɛkɛti agi, “Mena loṭi may, ‘ya baal ecca kaci ‘ya iti, acaan ɛkɛ muŋŋɛ jwaŋa yaayan ɔci ɛkɛ gɔki jiek bɛɛ. 18Ɔci kan ɛkɛ bala noongatiyɛ, ɔci kan ɛkɛ mugdɛ jwaŋa yaayanyɛ, ɛkɛ yiɛptɛ ɛkɛ iñɔ ṭɛɛrji, ɔci ɛkɛ tukɛ coopi juotan, ɔci ɛkɛ ŋɛyi lɛkɛ, ɔci oŋkanda ɛkɛ warɛ pɛɛdin ɔci warɛ tɛɛna tɛɛn ba jaan te naŋka neeni. Ɔci ‘ya tooccan maka lala iti, ka dala ɛkkɛn jwaŋa yaayan neeni ŋɔɔltan bora te kaciti, yeti ɛkkɛn yaaŋnɛti bɛɛ.” 19Ɔci Yaccu ṭwokcin gɔkcin mati agi, “Hay, ɛkkɛ maka jyeni ɛkkɛn baaw nɛ! Ɛkkɛ baltin iki ‘ya wɛnni yuong ne ñiṭin moki aŋka ɛkkɛ jyeddɛy? ‘Ya kɛɛjja ɛkkɛ yuong ne ñiṭin moki aŋka ɛkkɛ jyeddɛy? Kaci oodɛ ‘yati wɛnni!” 20Ɔci ɛkkɛn kaci eyɛ Yaccuti. Ɔci ne pɛñan ne Yaccu yuarnɛ ɛkɛyɛ, jwaŋa yaayan neeni kaci gwonnɛ ne pɛñan, ɔci kaci ḍɛmmin iñɔ, ɔci ɛkɛ bala ñiyi a ñiin te ṭɛɛrji, ɔci ɛkɛ tukɛ coopi juotan. 21Ɔci Yaccu tooccin weegɛnti agi, “Kaci noŋi a ɔɔn te tua doki?” Ɔci ɛkɛ gɔkcin ɛkɛti agi, “Woonɛ bɛɛ, ne wona ɛkɛ ḍiɛri men. 22Ɔci jwaŋa yaayan kaci yiɛptɛ maccu a ñaccu, ɔci yiɛptɛ pietin moki, acaan ɛkɛ buagɔn noki ɛkɛ. Yeti kan i yaakiti noŋja genga ɛkɛtiyɛ, dala i yomu pɔkka ɔɔnti, ɔci ɔɔn magdɔn!” 23Yaccu gɔkcin ɛkɛti agi, “Te gena yeti i gɔk agi ‘ya yaakati boki? Kan mena jyeddi Juaŋtiyɛ, ɛkɛ tɛɛkti genga bɛɛ.” 24Ɔci ne pɛñan kaci weegɛn yaadan gɔki agi. “‘Ya jyetto. Yeti jyeni ‘ya a ḍiɛran. ‘Ya magda dala ‘ya jyedda ne pwadan!” 25Ɔci ne Yaccu gɔrni maka coŋin bɛɛti tyentiti nona ɛkɛtiyɛ, ɛkɛ gɔkcin jwaŋa yaayanti ne pɛñan agi, “I jwaŋa yaayan, mena noŋi aŋka ma kookinti jiek ɔci aŋka ma akti miŋkiy, dala i kooya bora te kacca neeniti. Ɔci naa i ɛkɛ muga oŋgati moki bɛɛ!” 26Ɔci jwaŋa yaayan yaajjin ne tolan, ɔci kaci gwonnɛ ne pɛñan moki ba te ñamu ɔɔn, ɔci ɛkɛ oŋ kooyin bora te kaciti oŋo. Ɔci kaci warɛ bala ba mena tuuta. Ɔci ma gɛɛg ne coŋɔn gɔki agi ɛkta tuunɔ doki. 27Yeti Yaccu kaci muŋŋɛ te bieŋɛ ɔci kaci luolnɛ ñaalɔ, ɔci ɛkɛ jɔŋŋin ñaalɔ doki. 28Ɔci ne Yaccu kaanni orɔyɛ, maka laldɛ ɛkɛ tooccin ɛkɛti lieda agi, “Ɔɔn kookɔnti jwaŋa yaayan neeni koodɔn bora ogo?” 29Ɔci Yaccu gɔkcin ɛkkɛnti agi, “Jɔkin yeyin ba jwaŋa yaayan neeniyɛ, kootan ma bora budan bɛɛ, yeti te cɔŋi ɛkkɛ.” 30Ɔci Yaccu i maka laldɛ ɛkɛ jɔŋŋin te bana wannati, ɔci ɛkkɛn ati goṭi ban Jaliil konɛti. Ɔci Yaccu buagɔn naa nona ɛkɛ baali ŋeettan ma bɛɛ, 31acaan ninka waayiti ɛkɛ bala loṭi ɛkkɛn te jyek lyen ɛkɛ agi, “‘Ya Kaci Ma Baanyɛ, ‘ya ‘wonta ma ma byeŋkɛnti, ɔci ‘ya nokta ma, ɔci ne nink ne ḍoogɔ bɛɛti borayɛ, ‘ya oŋ jɔŋŋa ñaalɔ moki oŋo.” 32Yeti ɛkkɛn tieŋŋin jyeka guaŋŋɛ Yaccu neeni ne pwadan bɛɛ, ɔci ɛkkɛn buayi tootti ɛkɛti te jiek jitkɛn moki bɛɛ. 33Ɔci Yaccu i maka laldɛ ɛkɛ ne ɛkkɛn dɔɔkki ɔci dɛñki ban Kapɛrnyam, ɔci ne ɛkkɛn kaacki orɔyɛ, Yaccu tooccin maka laldɛ ɛkɛti agi, “Ɛkkɛ balgɛ gɔwwɛ te jyek gena yomɔ?” 34Yeti ɛkkɛn bala ciyi lieda, ɛkkɛn gɔkcin genga bɛɛ, acaan ne ɛkkɛn balki yomɔ menyɛ, ɛkkɛn bala gɔwwɔ yɔtin pookɛn agi, “‘Ya a mena tolan te ɛkkɛ!” 35Ɔci Yaccu cooccin iñɔ, ɔci Maka A Inyaakkɛn Wyetkɛn Ne yyɛɛwɔ neeni bornɛ agi dala ɛkki bɛɛdɔ nona ɛkɛti. Ɔci ɛkɛ gɔkcin ɛkkɛnti agi, “Kan men gɛɛl buagɔn aga mena bala ñamuyɛ, dala ɛkɛ aga mena bootti ne ŋoyɔ, ɔci dala ɛkɛ aga mena noŋi kanŋa mati waakɛnda.” 36Ɔci kaci gɛɛl yɔɔnnɛ Yaccu yeccu ma ñomgɛnti, ɔci ɛkɛ kaci luolnɛ ñaalɔ, ɔci ñiɛŋnɛ ɛkɛ warɛti, ɔci ɛkɛ gɔkcin mati agi, 37“Tieŋdɛ poca! Kan men gɛɛl kaci gɛɛl mugdɛ te yenti ‘yayɛ, a ɔɔn bala ba ‘ya da mugda ɛkɛ wanna. Ɔci mena noŋi ne pwadan ‘yatiyɛ, ɔci ɛkɛ da noŋi ne pwadan Wey ɔɔn mena ‘ya cuonnatiy.” 38Ɔci Yɔhanna gɔkcin ɛkɛti agi, “Mena loṭi may, mena ‘uan gɛɛl yuarŋɔn ɔɔn, ɔci ɛkɛ bala kootti jɔkin yeyin bora te yenti i. Ɔci ɔɔn kɛŋnɔn ɛkɛti, acaan ɛkɛ a men ikin bɛɛ.” 39Yeti Yaccu gɔkcin ɛkkɛnti agi, “Ɛkɛ daldɛ! Naa ɛkkɛ kɛkɛ ɛkɛti bɛɛ. Maka noŋi naŋka tɛyan naŋka ñyecki ma te yenti ‘yayɛ, men gɛɛl ɛkkɛnti yaakinti warɛ yaldɛ ne pɛñan ɔɔn, ɔci gɔkti ne yaayan ‘yati boki? Hayɛllɛ. 40Maka yookɔn te ikin bɛɛyɛ, ɛkkɛn a ma ikin. 41Tieŋdɛ ‘ya gɔkka ɛkkɛti awarɛ. Kan ɛkkɛ ‘wontɛ ma pyega maaddɛ ɛkkɛ acaan yenti ‘ya bala ɛkkɛtiyɛ, ɔci ne baaṭi maka neeni ‘wondɛ Juaŋ gena pwadan daŋkun.” 42Yaccu bala loṭi ma men agi, “Kɛɛgin jyeti ‘yatiyɛ, kan menga noŋdi gena yaayan ɛkkɛn gɛɛlti aŋka ɛkɛ noŋdi nɔjiyɛ, a ɔɔn pwatcin bɛɛ Yaayɛ. Jyeka bɛya mena noŋi ne yaayan neeni wyeñɛtiyɛ, pɛñcin ne yaajan te bolji mena ḍɛktan ma poma tolan pom jien ḍwaŋɛti, ɔci yiɛptan ma galŋa tolanjiy. 43“Dala te i bieŋu ŋunni ɔntɔ ñamu wona i noŋdi nɔji men bɛɛy! Kan nɔji bala iti te naŋki byeŋ iyɛ, dala i ɛkɛ ŋutca ɔntɔ! Kan war i warda ooddi maccu te gena naŋŋɛ byeŋ i neeniyɛ, a ɔɔn pwatcin bɛɛ. Maña neeni baadi oŋgati bɛɛ. Kan byeŋ i ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. [ 44‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ɛkkɛn ñoki jitkɛn yuonginda, ɔci taab ɛkkɛn yɔɔda bɛɛ.’] 45Ɔci kan nɔji bala iti te naŋki ciy iyɛ, dala i ɛkɛ ŋutca ɔntɔ! Kan war i warda ooddi maccu te gena naŋŋɛ ciy i neeniyɛ, a ɔɔn pwatcin bɛɛ. Kan i ciyu ŋunni ɔntɔ, ɔci i ootta ban Jwaŋa Tolanyɛ, a ɔɔn aŋka pwatcin. [ 46‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ma ñoki jitkɛn yuonginda, ɔci taab ɛkkɛn yɔɔda bɛɛ.’] 47Ɔci kan nɔji bala iti te naŋki waŋ iyɛ, dala i ɛkɛ dɔdda bora! Kan war i warda ooddi maccu te gena naŋŋɛ waŋ i neeniyɛ, a ɔɔn pwatcin bɛɛ. Kan waŋ i dɔnni bora, ɔci i ootta ban Jwaŋa Tolantiyɛ, a ɔɔn aŋka pwatcin. 48‘Bana maañyɛ, ywowwa omi ma ɛkkɛn tuwa ywongati bɛɛ. Ɔci maañ moki baadi ywongati bɛɛ. Ɛkkɛn ñoki jitkɛn yuonginda, ɔci taab ɛkkɛn yɔɔda bɛɛ.’ 49Ɛkkɛn waakɛnda amdɛ maaño, yɔɔda bɛɛ. 50“Toli killan pwatcin. Yeti kan tolla bala wɛɛlji poli dokiyɛ, ɔci ɛkɛ moki coda a ɔki? Dala ɛkkɛ balgɛ ba toli killan tolla pwadan maka pookɛnti. “Dala ɛkkɛ ciedɛ te pwani pookɔ oŋkanda ɔɔn.”

will be added

X\