Mark 8

1Ɔci te oŋŋa wannayɛ, polla tolan wyetkɛn ḍɔɔlɛ nona ɛkɛti moki, ɔci oomdin bawwin ɛkkɛnti. Ɔci Yaccu borcin maka laldɛ ɛkɛti agi bɛɛdɔ nona ɛkɛti, ɔci ɛkɛ gɔkcin ɛkkɛnti agi, 2“‘Ya baal poŋ jyek maka coŋin neeni, ɔci ‘ya yomu wiak te ɛkkɛn, acaan ɛkkɛn balgin iki ‘ya wɛnni nink aŋi ne ḍoogɔ doki. Ɔci waka amtan baaw ɛkkɛnti. 3Ɔci kan ‘ya ɛkkɛn cundi bonk ɛkkɛn ne ɛkkɛn amɛ koñ ɔɔnyɛ, ɛkkɛn dɛndi boki? Ɛkkɛn ḍɛɛmdi yomu te koñ dita. Ɔci ma gɛɛgyɛ, ɛkkɛn bɛɛn te bonka lonin.” 4Ɔci maka laldɛ Yaccu tooccin ɛkɛti agi, “Ikin ‘uaya neeni ‘wontin oomdin te aŋɛ ne nona neeni niin a wɔɔŋ budan ɔɔn?” 5Ɔci Yaccu tooccin ɛkkɛnti agi, “Byedg bala ɛkkɛti a ñiṭin?” Ɔci ɛkkɛn gɔkcin ɛkɛti agi, “Bala ne dɔɔyɔ wyetkɛn ne yyɛɛwɔ.” 6Ɔci Yaccu gɔkcin mati agi, “Dala ma cootti iñɔ.” Ɔci ɛkɛ byedga ne dɔɔyɔ wyetkɛn ne yyɛɛwɔ neeni luullɛ byeŋkɛti. Ɔci ne ɛkɛ gɔŋni a pwatcin Juaŋtiyɛ, ɛkɛ oŋ byedg wɛɛnnɛ jitin ɔci ‘wonnɛ maka laldɛ ɛkɛ, ɔci ɛkɛ gɔkcin ɛkkɛnti agi, “Byedg eedɛ eektɛ maka ciyi iñɔ neeni.” Ɔci ɛkkɛn byedg eyɛ ɛkkɛnti. 7Ɔci ɛkkɛn balki yak ṭɔlgɛnn a ‘yɛggin gɛɛg ne ḍiɛkan daŋkun, ɔci Yaccu gɔkcin a pwatcin te yak daŋkun, ɔci ɛkkɛn wɛɛnnɛ Yaccu jitin, ɔci eyɛ maka laldɛ ɛkɛ mati daŋkun. 8Ɔci ne ɛkkɛn korkɛn yoŋki dokiyɛ, ɔci oomdin tɛɛti neeni limiyɔ ma ɔdin kumgin ne dɔɔyɔ wyetkɛn ne yyɛɛwɔ. 9Ma bala a alpn ne ŋaanɔ (4,000). 10Ɔci maka neeni cuuññɛ Yaccu baanji. Ɔci ne pɛñan Yaccu taapcin murkaji iki maka laldɛ ɛkɛ, ɔci ɛkkɛn ati kuocɔ ban Dalmanuuta taaŋɛti. 11Ɔci ma Pɛriciin bɛɛn ɔci ɛkkɛn bala tyewɔ i Yaccu. Ɛkkɛn bala tooci ɛkɛti acaan ɛkkɛn buagɔn gɔrti naŋka bɛya te ñaalɔ Juaŋti naŋka ñyecki ma ɛkɛy. Ɔci ne ɛkkɛn balki toocki Yaccu a ɔɔnyɛ, ɛkkɛn bala yieci ɛkɛ a yiiñño. 12Ɔci Yaccu yomɛ wiak, ɔci ɛkɛ gɔkcin ɛkkɛnti agi, “Hay, ɛkkɛ maka neeni, ɛkkɛ lieṭɛ naŋka ñyecki ma waak ogo? ‘Ya gɔkka ɛkkɛti awarɛ, maka acca neeniyɛ, naŋka ñyecki ma waakyɛ, yuartan ɛkkɛn bɛɛ.” 13Ɔci ɛkɛ ɛkkɛn dalnɛ bala ooddi kuocɔ te murka moki. 14Ɔci maka laldɛ Yaccu bala murkaji daŋkun, ɔci ɛkkɛn wierɛ byedgo, ɔci ɛkkɛn balki gɛɛl ne cyɛɛlɔ budan murkaji. 15Ɔci Yaccu gɔkcin ɛkkɛnti agi, “Woŋgɔ tiittɛ hay! Ɔci dala ɛkkɛ woŋgɔ tiittɛ moki te ñamg ma Pɛriciin, ɔci te ñamg Hiruuduc Antipac.” 16Ɔci ɛkkɛn bala gɔwwɔ yɔtin pookɛn agi, “Ɛkɛ gɔki a ɔɔn acaan ikin balkin byedg gɛɛg bɛɛ.” 17Ɔci ne Yaccu gɔrni ɛkkɛn gɔɔki yɔtin pookɛn te jyek byedg a ɔɔnyɛ, ɔci ɛkɛ gɔkcin ɛkkɛnti agi, “Te gena yeti ɛkkɛ gɔwwɛ agi byedg baagiy? Ɛkkɛ, jiek kwoyɛ ɛkkɛ men? Ɛkkɛ jiek tieŋdɛ ne pwadan boki? Ɛkkɛ wyetkɔ baawɔ? 18Ɛkkɛ balkɛ woŋgɔ, ɔci ɛkkɛ yaakɛti gwali bɛɛ? Ɛkkɛ balkɛ jyetkɔ, ɔci ɛkkɛ yaakɛti tyeŋɛ jiek bɛɛ? 19Ɛkkɛ poŋdɛ te byedga ne dɔɔyɔ wɛɛni ‘ya jitin ɔci ‘woñgan ‘ya maka coŋin maka a alpn ne dɔɔyɔ (5,000) wanna bɛɛ? Ɔci ɔdin kumgin te waka tɛɛti neeni ɛkkɛn a ñiṭin katan?” Ɔci ɛkkɛn gɔki agi, “A inyaakkɛn wyetkɛn ne yyɛɛwɔ.” 20Ɔci Yaccu tooccin moki agi, “Byedga ne dɔɔyɔ wyetkɛn ne yyɛɛwɔ, byedga ‘woñgan ‘ya maka a alpn ne ŋaanɔ wannay, waka tɛɛti limmɛyɔ ɛkkɛ ɔdin kumgin a ñiṭin?” Ɔci ɛkkɛn gɔki agi, “A dɔɔyɔ wyetkɛn ne yyɛɛwɔ.” 21Ɔci ɛkɛ gɔkcin ɛkkɛnti agi, “Ɛkkɛ tieŋnɛ men bɛɛ?” 22Ɔci ɛkkɛn dɛñjin ban Bɛtceeyida. Ɔci mena ‘uan mena ulliyɛ, owwɛ ma Yaccuti, ɔci ɛkkɛn bala tooci ɛkɛti agi, “Dala i topca ɛkɛti.” 23Ɔci Yaccu ‘wana ñingɛ ulan neeni muŋŋɛ te bieŋɛ, ɔci ɛkɛ lwannɛ Yaccu baan taaŋɛti. Ɔci ne ɛkɛ ñaang ŋuulnɛ ɛkɛ ñingɛtiyɛ, ɔci ɛkɛ bieŋɛ tamnɛ men ñingɛti, ɔci Yaccu tooccin ɛkɛti agi, “I noon yuarca boki?” 24Ɔci ɛkɛ gɔki agi, “‘Ya ma yuarca, yeti ɛkkɛn bala ba jang ne atki a woon no.” 25Ɔci Yaccu topcin ɛkɛ ñingɛti moki, ɔci ɛkɛ gɔrcin noono, ɔci waak waakɛnda yuarnɛ ɛkɛ ne pwadan doki. 26Ɔci Yaccu mena neeni cuuññɛ baanɛnti ɔci gɔkcin ɛkɛti agi, “Naa i gora baan konɛti bɛɛ.” 27Ɔci Yaccu jɔŋŋin te aŋan i maka laldɛ ɛkɛ, ɔci ɛkkɛn bala ooddi bonka ḍyɛrin ban Cɛcariiya Pilibbi taaŋɛti. Ɔci ne ɛkkɛn balki yom menyɛ, Yaccu tooccin ɛkkɛnti agi, “Ma gɔki agi ‘ya agji menɛ?” 28Ɔci ɛkkɛn ṭwokcin ɛkɛti agi, “Ma gɛɛg gɔki agi i agji mena tolan gɛɛl bɛɛnɔ dɔɔŋnɔ te lienti. Ma gɔki agi i agji Yɔhanna Mena Buoṭi May. Ɔci maka pookɛn gɔki agi i agji Iliiya, ɔci maka pookɛn moki gɔki agi i agji bɔwa Jwaŋa Tolan gɛɛl.” 29Ɔci ɛkɛ tooccin ɛkkɛnti agi, “Oŋ ɛkkɛ da gɔkɛ ‘ya a menɛ?” Ɔci Butruc ṭwokcin agi, “I a Kiṭɔ Mena Muonɛ Jwaŋa Tolan Boray.” 30Ɔci Yaccu ɛkkɛn myennɛ agi, “Naa ɛkkɛ ma nɔɔttɛ te jyeka neeni bɛɛ.” 31Ɔci ɛkɛ poccin lorcin maka laldɛ ɛkɛ te jyek lyen ɛkɛ agi, “Taabn bɛya ‘ya Kaci Ma Baanti ne coŋɔn. Ne baaṭi maka ḍwaŋin, ɔci gaciicin ḍwaŋin Ma Yahuud, ɔci maka loṭi worga Juaŋyɛ, ɛkkɛn yooktan te ‘ya. Ɔci ‘ya nokta ma, ɔci ne nink ne ḍoogɔ bɛɛti borayɛ, ‘ya oŋ jɔŋŋa ñaalɔ moki.” 32Ɛkɛ ma myennɛ ne pwadan te jyeka neeni. Ɔci Butruc Yaccu eññɛ nona parɛ, ɔci gɔkcin ɛkɛti ne pɛñan te jyeka guaŋŋɛ ɛkɛ te lyen ɛkɛ neeni. 33Yeti Yaccu warɛ yallɛ, ɔci ñorcin maka laldɛ ɛkɛti, ɔci ɛkɛ gɔkcin Butructi ne pɛñan agi, “Hay, ootta ɔntɔ te ‘yati wɛnni, i gɔk jyek Jwaŋa Yaayan, acaan i buagi naŋki Juaŋ bɛɛ! I buagi naŋki ma baan budan!” 34Ɔci Yaccu borcin maka coŋinti neeni agi bɛɛdɔ nona ɛkɛti, ɔci maka laldɛ ɛkɛ bornɛ ɛkɛ daŋkun. Ɔci ɛkɛ gɔkcin ɛkkɛnti agi, “Kan men gɛɛl buagɔn bootti ‘yatiyɛ, dala ɛkɛ mwondi te caŋti ñingɛ te war ɛkɛ parɛ, ɔci dala ɛkɛ kakan ɛkɛ luldɛ, ɔci ɛkɛ bɛya bootti ‘yati ne lien bɛɛdɛ ɛkɛti ɔɔn. 35Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin bala ñaalɔ pɔliji neeni bɛɛ. Yeti kan men gɛɛl boottin ‘yati, ɔci noŋdi ba jyek ‘ya, ɔci jyek ‘ya tiidiyɔ, oŋ kan te ɛkɛ noktan ma ɔɔnyɛ, mena neeni ɛkɛ aŋka yɔɔrdi tɛɛtin bala ñaalɔ pɔliji neeni. 36Kan men gɛɛl balki waka bala iñɔ baanji wɛnni waakɛndayɛ, ɔci kan tɛɛtin bala ñaalɔ baaw ɛkɛtiyɛ, oŋ waka bala ɛkɛti a waka budan neeni yɔmdi a ɔki? Yɔmjin bɛɛ. 37Tɛɛtin bala ñaalɔ ma wɛɛṭi boki? A’a. 38Kan men gɛɛl buayi ma ñingɛn te aŋŋa ɛkɛ agi men ‘yayɛ, ɔci te nɔɔtkin ma te lali ‘ya te yuonga cieki maka yeyin tobin pɔy Jwaŋa Tolan kuoki ŋotkɛn neeniyɛ, ɔci ne baaṭi ne ‘ya Kaci Ma Baan bɛɛdɔn iki malɛɛkanyɛ, Wey ɔɔn ‘ya naŋda galdi a gallo. Ɔci ‘ya poŋja naŋki mena neeni, ɔci kɛkca te ɛkɛ daŋkun.”

will be added

X\