Mark 7

1Ma Pɛriciin ɔci maka loṭi worga Juaŋ maka bɛɛn te ban Urcaliimjiyɛ, ɛkkɛn wyetkɛn ḍɔɔlɛ nona Yaccuti. 2Ɔci maka laldɛ Yaccu gɛɛg yuarɛ ɛkkɛn omi byedg byeŋkɛn luagɛ ba jyek ganuun Ma Yahuud bɛɛ. 3Ma Pɛriciin ɔci Ma Yahuud ɛkkɛn waakɛndayɛ, ne ɛkkɛn omti waakyɛ, ɛkkɛn byeŋkɛn luaktan te ñamu, hayya ɛkkɛn oŋ omti waak oŋo. A ɔɔnyɛ, ɛkkɛn noŋi ba naŋki yɔrg ɛkkɛn te jyek ganuun. 4Ɔci ne ɛkkɛn bɛɛti te dukkanji, bɛɛti ootti baanjiyɛ, ɛkkɛn omdi men bɛɛ. Ɛkkɛn byeŋkɛn luaktan ñamu ba naŋki yɔrg ɛkkɛn, hayya ɛkkɛn oŋ omti oŋo. 5Ɔci ma Pɛriciin ɔci maka loṭi worga Juaŋyɛ, ɛkkɛn tooccin Yaccuti agi, “Maka lala iyɛ, ɛkkɛn noŋi ba naŋki yɔrg ikin Ma Yahuud bɛɛ. Ɔci ɛkkɛn omi byedg ne byeŋkɛn a giikin ogo? Ba ɛkkɛn lɔkki byeŋkɛn ba naŋki Ma Yahuud bɛ?” 6Ɔci Yaccu gɔkcin ɛkkɛnti agi, “Ɛkkɛ agɛ laaban! Jyeka guaŋŋɛ Icaaya te baaṭi te naŋka bɛya ne ŋoyɔyɛ, yɔmjin te ɛkkɛ. Icaaya gɔki agi, ‘Jwaŋa Tolan gɔki agi, maka neeni gɔki jieyi ‘ya te tuggɛn budan, yeti ɛkkɛn yomgɛn lonɔ ɔntɔ te ‘yati. 7Ɛkkɛn moṭi ‘yati te labjo, ɔci ɛkkɛn loṭi ma te jyeka naŋi ma baan budan, ɔci ɛkkɛn gɔki agi jyeka neeni agi jyek ‘ya Juaŋo.’” 8Ɔci Yaccu gɔkcin mati agi, “Oŋ ɛkkɛ daŋkun ɛkkɛ jyek Juaŋ dalnɛ budan, ɔci ɛkkɛ tiecɛ gena naŋki yɔrg ɛkkɛ oŋkanda.” 9Ɔci Yaccu gɔkcin mati moki agi, “Ne ɛkkɛ jyek Juaŋ daldɛ budan, ɔci jyek ma baan aŋka tiidiyɔ budan neeniyɛ, a ɔɔn pwatcin boki? 10Muuca gɔki agi, ‘Dala ɛkkɛ tieŋdɛ jyek weyi ɛkkɛ, ɔci jyek mɛyi ɛkkɛ ne pwadan.’ ‘Kan men gɛɛl gɔki ne yaayan weegɛntiyɛ, ɔci kan gɔki ne yaayan mɛɛgɛntiyɛ, dala ɛkɛ noktan ma.’ 11Yeti ɛkkɛ loṭɛ ma agi kan men gɛɛl ɛkkɛti balki genga aŋka te ɛkɛ weegɛn ɔci mɛɛgɛn magdɛ, oŋ yeti ɛkɛ gɔkti agi, ‘Gena neeni a Kɔrban.’ (Ɔci Kɔrban neeni kon ɛkɛ agi gena neeni a gen Jwaŋa Tolan doki.) 12Ɛkɛ yaakinti weegɛn ɔci mɛɛgɛn magdɛ moki bɛɛ. Ɛkɛ ɛkkɛn daldɛ amaam budan. 13A ɔŋŋiyɛ, jyek Juaŋ aŋi ba jyeka budan ɛkkɛti doki acaan jyek yɔrg ɛkkɛ aŋka aŋi ba jyeka ñamu ɛkkɛ yomgɔti. Ɔci ɛkkɛ loṭɛ kɛɛgin ɛkkɛ aŋka ɛkkɛn noŋdi a ɔɔn daŋkun ne baaṭi. Ɔci jyek Juaŋ aŋka daltan ɔntɔ. Ɔci naŋki ɛkkɛ naŋka coŋin naŋka pookɛn bala moki.” 14Ɔci Yaccu ma bornɛ moki, ɔci gɔkcin ɛkkɛnti agi, “Gɔṭṭɛ! Dala ɛkkɛ waakida tieŋdɛ jyek ‘ya ne pwadan. 15Waka amtan ma a waka ooddi ma korkɛntiyɛ, ɛkkɛn ma cuultanyɔ bɛɛ. Gena jiek ɔci naŋka bɛya bora te ma yomgɛnti aŋka ma cuultanyɔy. [ 16Kan maka balki jyetkɛnyɛ, dala ɛkkɛn tieŋdi ne pwadan.]” 17Ɔci Yaccu maka coŋin neeni dolnɛyɔ, ɔci ɛkɛ bɛɛn ɔci kaaccin orɔ. Ne ɛkɛ kaanni orɔ dokiyɛ, maka laldɛ ɛkɛ neeniyɛ, tooccin ɛkɛti te jwalla a caagɔn guaŋŋɛ ɛkɛ neeni. 18Ɔci ɛkɛ ṭwokcin ɛkkɛnti agi, “Ɛkkɛ daŋkun tieŋnɛ bɛɛ? Kwoyɛ ɛkkɛ ne waka amtan ma ootti ma korkɛnti ɔci ne ɛkkɛn etti nɔji baawyɛ? 19Acaan ɛkkɛn ooddi ma yomgɛnti bɛɛ, ooddi ma korkɛnti budan, ɔci ooddi te pɔy ɛkkɛn.” Ne Yaccu gɔŋni a ɔɔnyɛ, ɛkɛ gɔki agi waka amtan ma waakɛndayɛ, pwadɔ. 20Ɔci ɛkɛ gɔki moki agi, “Waka bɛya bora te ma baantiyɛ, ɛkkɛn aŋka ma cuultanyɔ. 21Waka bɛya bora te ma yomgɛntiyɛ, gena paŋŋa yaayan, paŋŋa ɛkkɛn noŋti waka yeyin. Ɔci waka neeniyɛ, gena tomi maka ṭɔlgti, ɔci ɛɛjjo, ɔci nooŋi ma, 22ɔci tomi moong maka pookɛn ɔci ‘uay maka pookɛn daŋkun, ɔci war ḍiŋŋo, ɔci naŋka yeyin jitkɛn waakɛnda bala ba naŋki ma ñingɛn, ɔci wyeñ yoño, ɔci kon moni, ɔci waaŋi ma, ɔci naŋki waakɔ, ɔci wyeñ boojo. 23Naŋka yeyin waakɛnda neeniyɛ, bɛya te ma yomgɛnti, ɔci ma cuultanyɔ ɛkkɛn Jwaŋa Tolan ñamuti.” 24Ɔci Yaccu jɔŋŋin te aŋan, ɔci ati nona ban Tayir taaŋɛtiy. Ɔci ɛkɛ bala ciyi wɛnan. Ɔci ɛkɛ kaaccin orɔ on gɛɛlti, ɔci ɛkɛ buagɔn naa ɛkɛ ŋeettan ma a ɛkɛ bala aŋan bɛɛ. Yeti ɛkɛ yaakinti warɛ cogdɛ te maka coŋin neeniti bɛɛ. 25Mena ɛɛŋ gɛɛl kaci ɛkɛ mugɛ jɔkin yeyin, ɔci ɛkɛ tieŋŋin agi Yaccu bɛɛnɔ, ɔci ɛkɛ bɛɛn nona Yaccuti, kwaccin bɛɛ. Ɔci ɛkɛ ḍwoñjin iñɔ Yaccu ñamɛti. 26Ɛŋa neeniyɛ, ɛkɛ a men maka Keedin Pookɛn. Ɛkɛ jiedi ma ban Kɛna. Ɔci ɛkɛ bala tooci a taat Yaccuti a ñaccu agi, “Jwaŋa Yaayan ŋualja bora te kaci ‘ya, kacca ɛɛŋti.” 27Ɔci Yaccu gɔkcin ɛkɛti agi, “Dala kɛɛgin ɔɔn Ma Yahuud omdi ñamu parun. Kan kɛɛgin omi ñamu men bɛɛyɛ, ɔci kan oomdin yieptan ma gɔkiyɛ, a ɔɔn yɔmjin bɛɛ.” 28Ɔci ɛɛŋ ṭwokcin ɛkɛti agi, “Ɛɛ, Ciɛggɔn, ŋeej ‘ya. Yeti kan gɔki bala nona omki may, ɛkkɛn ‘wontan kɛɛgin oomdin ṭɔlgɛn daŋkun bɛɛ?” 29Ɔci Yaccu gɔkcin ɛkɛti agi, “Te jwali ṭɔɔlɛ guaŋŋi i neeniyɛ, jwaŋa yaayan neeni bɛɛn bora te kaci i kacca ɛɛŋti doki. Dala i ɔgdi ootta.” 30Ɔci ɛkɛ ati baanji, ɔci kaci mɔŋnɛ ɛkɛ bala niin aŋgan wyeñɛti, ɔci jwaŋa yaayan ati ɔntɔ te ɛkɛti doki. 31Ɔci Yaccu dɔɔki te ban Tayir taaŋɛti, ɔci ɛkɛ ati goṭi yeccu ban Ciḍɔɔn konɛti, ɔci ɛkɛ ati goṭi Nona Balki Bonka Ne Inyaakkɛn, ɔci ɛkɛ ati ne Galŋ Jaliilti ɔɔn. 32Ɔci ɛkkɛn men gɛɛl owwɛ Yaccuti. Ɛkɛ a miiŋo. Ɔci ɛkɛ lɛmmɛ tɛy tɛyo, yaakinti gɔki jiek bɛɛ. Ɔci ɛkkɛn tooccin Yaccuti agi, “Dala i byeŋku tapca mena neeniti.” 33Ɔci Yaccu men eññɛ ɔntɔ parɛ te nona maka coŋin neeniti. Ɔci ɛkɛ byeŋkɛ ṭɔlgɛn olnɛ men jyetkɛti, ɔci ɛkɛ ñaang ŋuulnɛ bieŋɛti, ɔci ɛkɛ topcin men lɛmmɛti. 34Ɔci ɛkɛ ñorcin ñaalɔ pɔliji, ɔci ɛkɛ booŋ toonnɛ bora ɔci gɔkcin ɛkɛti agi, “Apta.” (Ɔci apta neeniyɛ, te jyek Mabaan agi, “Dala i jyetku waakɛn pɔktan.”) 35Ɔci ne pɛñan miiŋ jyetkɛ waakɛn pɔkkɛ, ɔci lɛmmɛ moki warɛ pɔŋnɛ, ɔci ɛkɛ yaakinti gɔki jieko. 36Ɔci Yaccu gɔkcin mati agi, “Naa ɛkkɛ men gɛɛl myettɛ bɛɛ.” Yeti ne Yaccu ma myettɛ a ɔɔn oŋkandayɛ, ɔci ma dɔki gɔ ma myetkin ne coŋɔn ɔɔn. 37Ɔci ɛkkɛn korkɛn buañi noon pwatcin bɛɛ, ɔci ɛkkɛn gɔki agi, “Naŋka naŋdɛ ɛkɛ waakɛnda neeniyɛ, pwadɔ. Ɛkɛyɛ, maka miŋki pɔktɛ jyetkɛnti, ɔci maka lɛpɛn tɛyan moki pɔktɛ lɛpɛnti moki.”

will be added

X\