Mark 6

1Ɔci Yaccu bana neeni dalnɛ, ɔci ɛkɛ ati ban ɛkkɛn ban Najarɛt moki, ɔci maka laldɛ ɛkɛ bootcin ɛkɛti. 2Ɔci te Oŋ Cabityɛ, ɛkɛ ati ɔci bala loṭi ma ona morki ma Juaŋy. Ɔci maka coŋin maka tieŋŋin jyek ɛkɛ neeniyɛ, ɛkkɛn korkɛn buañi noon ne tolan, ɔci ɛkkɛn gɔki agi, “Mena neeni jyeka neeni oonɛ te aŋɛ yeti? Ñing tɛɛn ɛkɛ neeni bala a ɔki a ɔɔn? Ɛkɛ yaakinti naŋka tɛyan te byeŋki ɛkɛ a ɔki? 3Mena neeni a mena gɔɔñgɔn bɛɛ? Mɛy ɛkkɛn a Moryam bɛɛ? Ɔci modg ɛkkɛn a Yaakub ɔci Yuocip ɔci Yahuuja ɔci Cimaan bɛɛ? Ɔci kowi ɛkkɛn bala ciyi baanji ikinti wɛnni bɛɛ?” Ɔci ma ɛkɛ ñyɛlɛ te jiek yookɔn te ḍɔŋ ɛkɛ ɛkkɛnti. 4Ɔci Yaccu gɔkcin ɛkkɛnti agi “Bonka pookɛnyɛ, ma ani bɔwa. Yeti ban ɛkkɛn waanɛtiyɛ, maka ban ɛkkɛn, ɔci ma ɛkkɛn, ɔci maka on ɛkkɛn ani ɛkɛ bɛɛ.” 5Ɔci Yaccu yaakinti noŋi naŋka tɛyan wɛnan moki bɛɛ. Maka waakɛn yeyin gɛɛg bala, ɔci ɛkkɛn aŋka ywaŋŋɛ ɛkɛ ne ḍiɛkan. 6Ɔci ɛkɛ konɛ buañi noon acaan ɛkkɛn jyeti ɛkɛti bɛɛ. Ɔci Yaccu bala ati booti bonk jitkɛn loṭi ma. 7Ɔci ɛkɛ Maka A Inyaakkɛn Wyetkɛn Ne Yyɛɛwɔ neeniyɛ, bornɛ nona ɛkɛti, ɔci ɛkɛ ɛkkɛn cuuññɛ ma da atin ne yyɛɛwɔ, ɔci ma da atin ne yyɛɛwɔ. Ɔci ɛkɛ ɛkkɛn ‘wonnɛ war tɛɛn byeŋkɛnti ɔci jwali ɛkɛ aŋka jɔkin yeyin kootan bora te mati. 8Ɔci ɛkɛ gɔkcin ɛkkɛnti agi, “Gɔṭṭɛ, naa ɛkkɛ eedɛ gɔlk bɛɛ, walla cowaaln bɛɛ, walla oomdin bɛɛ, walla bilk kucin korkɛnti bɛɛ. 9Ɔci dala ɛkkɛ ɛɛŋdɛ wɛyi ciegɔti, yeti naa ɛkkɛ ɛɛŋdɛ jibban ne yyɛɛwɔ bɛɛ.” 10Ɔci ɛkɛ gɔkcin ɛkkɛnti agi, “Kan ɛkkɛ ooddɛ ɔci dɛndɛ baanjiyɛ, naa ɛkkɛ ḍɔkɛ a ḍwaŋi oorga pookɛnti bɛɛ. Dala ɛkkɛ ciedɛ ona ne cyɛɛlɔ ɔɔn ne ɛkkɛ jɔŋdɛ ooddɛ bonka pookɛnti ɔɔn. 11Ɔci kan maka bana parɛ gɛɛg ñiebdi iki ɛkkɛ ne pwadan bɛɛyɛ, ɔci kan ɛkkɛn yookɔn te tieŋŋin jyek ɛkkɛyɛ, dala ɛkkɛ ciegɔ ṭyaŋdɛ te ṭɛra ban ɛkkɛn neeni aŋka ŋeettan ma ɛkkɛn kɛki te jyeka awarɛ neeni.” 12Ɔci ɛkkɛn atti. Ɔci ɛkkɛn bala loṭi ma agi dala ma waakcin yaldɛ te nɔji ɛkki. 13Ɔci ɛkkɛn jɔkin yeyin kooyɛ bora te mati kɔɔna kɔɔnno. Ɔci maka coŋin maka waakɛn yeyinyɛ, jwoyi ɛkkɛn te ñɔɔno, ɔci ma waakɛn pwadgin doki. 14Ɔci ḍuaŋa tolan yenti Hiruuduc Antipac, ɛkɛ tieŋŋin jyek naŋki Yaccu, acaan yenti Yaccu ati baan konɛti doki. Ɔci ɛkɛ gɔkcin agi, “Mena noŋi naŋka neeniyɛ, gena Yɔhanna Mena buoṭi Ma te ñamuy. Ɛkɛ jɔŋŋin ñaalɔ te lienti aŋka ɛkɛ balkiti naŋka tɛyan wanna.” 15Yeti maka pookɛn gɛɛg gɔki agi, “Gena Iliiya, dɔɔkkin tɛɛti moki ba jwalla guaŋŋɛ Jwaŋa Tolan agi ɛkta bɛɛdɔ dɔɔktɔ dɔkɔy.” Ɔci maka pookɛn gɛɛg moki gɔki agi, “Ɛkɛ a bɔwa Jwaŋa Tolan ba bɔwan te baaṭi.” 16Yeti ne Hiruuduc tieŋni jyek Yaccuyɛ, ɛkɛ gɔki agi, “Gena Yɔhanna mena wyeñɛ ŋutcan ‘ya ɔntɔ ɛkɛ jɔŋŋin ñaalɔ te koolji wanna.” 17Hiruuduc Antipac poŋi a ɔɔn acaan gena ɛkɛ gɔkcin mati agi Yɔhanna nogdi may. Naŋka neeni bɛɛn a ɔɔn acaan Hiruuducyɛ, mod ɛkkɛn gɛɛl bala yenti Pilibuc. Pilibuc neeni balki ɛɛŋ yenti Ɛrɔɔdya, yeti Ɛrɔɔdya Pilibuc dalnɛ, ɔci ɛkɛ ḍɛɛnɛ Hiruuduc mod Pilibucn. 18Oŋ gɛɛlti Yɔhanna Mena buoṭi Ma neeni ṭejjin Hiruuducti ne pɛñan agi, “I Hiruuduc, i ɛŋ mod ɛkkɛ ḍɛya ogo? Naŋki i neeni bala ba naŋki ganuun Juaŋ ba.” 19Ɛrɔɔdya looñjin Yɔhannati ne tolan te jyeka neeni, ɔci ɛkɛ buagɔn Yɔhanna nogdɛ. Yeti Hiruuduc buayi Yɔhanna. Çeejɛ ɛkɛ Yɔhanna neeni a men Juaŋ mena pwadan. Yeti Hiruuduc ma cuuññɛ Yɔhannati, ɔci Yɔhanna mugɛ ma. Yeti ɛkɛ Yɔhanna kɛɛññɛ ñin te Ɛrɔɔdya ɛŋa buagɔn noki ɛkɛ neeni. Ɔci a oŋki ne Hiruuduc baali gɔɔki i Yɔhannayɛ, ɛkɛ wyɛñɛ yɔɔda, ɔci gena naŋdɛ gɛɛl yuartɛ bɛɛ. Yeti ɛkɛ yomɛ ñɔɔcin buagɔn tieŋdi jyeka guadɛ Yɔhanna neeni men ɔɔn. 21Ɔci oŋ gɛɛltiyɛ, pɔya lildi Ɛrɔɔdya aŋka Yɔhanna nogdiyɛ, warɛ yuarŋɛ doki. Te oŋ iid oŋŋa Hiruuduc jietkiti mayɛ, ɛkɛ ma bornɛ agi ma bɛɛdɔ jumati. Gena cyekin akuuma ɔci ḍuaŋan ackan, ɔci maka ḍwaŋin baanji ban Jaliil. 22Ɔci ne ɛkkɛn balki nona ɛkkɛn ‘uommɛ Hiruuducyɛ, kaci Ɛrɔɔdya, kacca ṭɔɔl bɛɛn ɔci kaaccin orɔ nona mati, ɔci ɛkɛ ñiɛljin, ɔci wɛɛli ɛkɛ pwad pwad Hiruuducti, ɔci wɛlg ɛkɛti. Ɔci Hiruuduc gɔkcin ṭɔɔlti agi, “Kan i toocca ‘yati te genga gena i buagiyɛ, i ‘wondin.” 23Ɔci ɛkɛ ḍuaññɛ Hiruuduc te jwali a warɛ agi, “Kan i buagi genga ‘yatiyɛ, i ‘wondin. Kan i buagi taaŋi mal ‘yayɛ, i wɛttin.” 24Ɔci ṭɔɔl kaaccin bora ati mɛɛgɛnti, ɔci tooccin mɛɛgɛnti agi, “‘Ya toocca Hiruuducti te gena?” Ɔci mɛɛgɛn gɔkcin ɛkɛti agi, “Dala i toocca ɛkɛti te wyeñ Yɔhanna Mena buoṭi May.” (Ɛkɛ tooccin te wyeñ Yɔhanna a ɔɔn acaan ɛkɛ buagɔn aŋka ŋeeddɛ ɛkɛ ne pwadan a Yɔhanna tuun doki.) 25Ɔci ṭɔɔl bɛɛn kooyin orɔ moki nona ḍuaŋa tolanti ne pɛñan wowwin bɛɛ, ɔci gɔkcin ɛkɛti agi, “‘Ya buaga wyeñ Yɔhanna Mena buoṭi May. Dala ‘ya eekta wyeñ ɛkɛ te ḍwan acca ɔŋ.” 26Ɔci ḍuaŋa tolan yomɛ yaañi ne pɛñan, yeti acaan ɛkɛ jiek naŋɛ i ṭɔɔl doki, ɔci moki acaan maka on ɛkɛ a wɛlg tieŋŋin jyek ɛkɛyɛ, ɛkɛ buagɔn jiek agdiyɔ moki bɛɛ. 27Ɔci Hiruuduc gɔkcin ackan gɔṭi ɛkɛ neeni gɛɛlti agi, “Dala i ootta wyeñ Yɔhanna ŋwodda bora owwa.” Ɔci ackan neeni ati ciginji, ɔci Yɔhanna wyeñɛ ŋwonnɛ bora, 28ɔci wyeñ Yɔhanna oonɛ ɛkɛ te ḍwan ɔci ‘wonnɛ ṭɔɔl eññɛ ṭɔɔl mɛɛgɛnti, ɔci ‘wonnɛ ɛkɛ. 29Ɔci ne maka laldɛ Yɔhanna tieŋki jyek lyen ɛkɛyɛ, ɛkkɛn ati ciginji, ɔci war Yɔhanna eyɛ, ɔci jokci koolji. 30Cuudan Yaccuyɛ, ɛkkɛn dɔɔkkin nona ɛkɛti, ɔci Yaccu myetkɛ ɛkkɛn te jyeka ɛkkɛn atki bonk jitin neeni. Ɛkɛ myetkɛ te jyek naŋki ɛkkɛn, ɔci te jyek lali moki. 31Ɔci Yaccu gɔkcin ɛkkɛnti agi, “Dala ɛkkɛ bɛɛdɛ pookɔ, ikin oottin nona wɔɔgan wootin ne ḍiɛran ṭɔɔlɛ lakun.” Ɛkɛ gɔki a ɔɔn acaan ma ñɔɔlŋan a ñɔɔlŋin nona ɛkkɛnti. Ɔci nona wooti ɛkkɛn bala bɛɛ, ɔci nona omki ɛkkɛn bala bɛɛ. 32Ɔci ɛkkɛn ati te murka pookɛn, bala ooddi nona wɔɔgan. 33Ɔci maka coŋin neeniyɛ, ne ɛkkɛn gɔrki ma balki atki ootti nona ootti ɛkkɛn neeniyɛ, ɔci ɛkkɛn yiŋi te ciegɛn, acaan nona ootti ma ŋeecɔn ɛkkɛn. Ɔci maka ciyi yomu bonka ḍyɛrintiyɛ, ɛkkɛn ati daŋkun, ɔci ɛkkɛn dɛñjin ñamu aŋan. 34Ɔci ne Yaccu dɛnniyɛ, ɛkɛ ma mɔŋnɛ kɔɔna kɔɔnno. Ɔci Yaccu yomɛ wiak acaan ɛkkɛn bala ba kulin ḍɛɛnɔn ɛkkɛn baawo. Ɔci ɛkɛ bala loṭi ɛkkɛn te jyeka coŋin. 35Ɔci ne ɛkkɛn ɛɛni coodiyɛ, maka laldɛ Yaccu bɛɛn ɛkɛti, ɔci gɔkcin ɛkɛti agi, “Nona neeni a wɔɔŋ jiñɛ budan, ɔci ma ɛɛni coodi doki. 36Dala i ɛkkɛn cuña ooddi bonka ḍyɛrinti, ɔci bonka bora aŋka ɛkkɛn wɛrdi byedg amtan ɛkkɛn.” 37Ɔci Yaccu ṭwokcin ɛkkɛnti agi, “Ɛkkɛn ‘wondɛ ɛkkɛ waka amtan.” Ɔci ɛkkɛn gɔkcin ɛkɛti agi, “Byedga amtan maka neeni eedi bilk kanŋa mena ne cyɛɛlɔ ponk ne dɔɔyɔ wyetkɛn ne ḍoogɔ! I buagi ɔɔn ooddɔn bilka neeni ‘uattɔnyɔ te oomdin nɛ?” 38Ɔci Yaccu tooccin ɛkkɛnti agi, “Ɛkkɛ balkɛ byedg a ñiṭin? Ɔgdɛ ooddɛ gɔrtɛ.” Ɔci ne ma atki gɔrki byedg dokiyɛ, ɔci ɛkkɛn bɛɛn ɔci gɔkcin Yaccuti agi, “Byedg bala ne dɔɔyɔ budan, ɔci yaka ‘yɛggin bala ne yyɛɛwɔ.” 39Ɔci Yaccu gɔkcin maka laldɛ ɛkɛti agi, “Dala ɛkkɛ gɔktɛ ma cootti iñɔ lwoma ṭeyan neeni wyetkɛti, dala ɛkkɛn cootti iñɔ magga da te noonɛn, ɔci magga da te noonɛn.” 40Ɔci nona ne cyɛɛlɔyɛ, ma cooccin iñɔ a miyya (100), ɔci nona ne cyɛɛlɔyɛ, ma cooccin iñɔ a miyya (100), ɔci taaŋŋa parɛti moki, ma cooccin iñɔ a ma baan ne yyɛɛwɔ mena parɛ byeŋkɛ (50), ɔci nona parɛti moki, ma cooccin iñɔ a ma baan ne yyɛɛwɔ mena parɛ byeŋkɛ (50) a ɔɔn moki. 41Ɔci Yaccu byedga ne dɔɔyɔ neeni luullɛ byeŋkɛti iki yaka ‘yɛggin ne yyɛɛwɔ neeni daŋkun. Ɔci Yaccu ñorcin ñaalɔ pɔliji, ɔci gɔkcin a pwatcin Jwaŋa Tolanti, ɔci ɛkɛ byedg wɛɛnnɛ jitin, ɔci ‘wonnɛ maka laldɛ ɛkɛ, ɔci ‘woñgi maka ciyi iñɔ neeni. Ɔci ɛkɛ ma wɛɛnnɛ yaka ‘yɛggin daŋkun. 42Ɔci ɛkkɛn omjin waakɛnda ne ɛkkɛn yɔmki ɔɔn. 43Ɔci ɛkkɛn tiɛdɛ oomdin. Ɔci oomdin ɛkkɛn tiɛtki neeniyɛ, limiyɔ ma, ɔci ɔdin kumgin a inyaakkɛn wyetkɛn ne yyɛɛwɔ te byedga ne dɔɔyɔ ɔci yaka ‘yɛggin daŋkun neeni. 44Maka omi oomdin neeniyɛ, ɛkkɛn a ḍiɛkan bɛɛ. Ɛkkɛn kɔɔna kɔɔnno. Maka ‘uay pookɛn bala a alpn ne dɔɔyɔ (5,000). 45Ɔci ne pɛñan ne ɛkkɛn omki ḍookki dokiyɛ, Yaccu gɔkcin maka laldɛ ɛkɛti agi, “Ɛkkɛ ɔgdɛ ooddɛ ñamu ne pɛñan taaptɛ murkati, ooddɛ kuocɔ ban Bɛtceeyida.” Ɔci Yaccu maka coŋin neeni myennɛ agi, “Dala ɛkkɛ ɔgdɛ ooddɛ baanji.” 46Ɔci ne Yaccu gɔŋni mati a ɔɔnyɛ, ɛkɛ ma dalnɛ, ɔci ɛkɛ ati ñaalɔ poom wyeñɛti aŋka cɔkti Juaŋti. 47Ɔci ne oŋ waŋɛ unniyɛ, murka bala yeccu galŋ yiɛŋɛji. Ɔci Yaccu bala parɛ galŋ ḍwaŋɛti. 48Ɔci Yaccu ɛkkɛn yuartɛ ne ɛkkɛn gɔɔpki murka te taab te jwamiy. Ɔci ne tinnɔyɛ, Yaccu ati nona ɛkkɛnti. Ɛkɛ bala ati ñaalɔ pieg wyetkɛnti, ɔci ɛkɛ noŋi ba ne ɛkɛ ɛkkɛn gordiyɔ ɔɔn. 49Yeti ne ɛkkɛn ɛkɛ yuarkiti baali ati ñaalɔ pieg wyetkɛntiyɛ, ɛkkɛn poŋi gɔki agi, “Gena ‘yeeññan, hay!” Ɔci ɛkkɛn yaadan a yooko. 50Acaan ɛkɛ yuarcɛ ɛkkɛn waakɛnda, ɔci ɛkkɛn buayi ne tolan. Ɔci ne pɛñan Yaccu gɔkcin ɛkkɛnti agi, “Dala ɛkkɛ yomgɔ tɛya. Gena ‘ya. Naa ɛkkɛ buayɛ bɛɛ.” 51Ɔci ɛkɛ taapcin murkaji iki ɛkkɛn. Ɔci jwami yɔɔni ne pɛñan doki. Ɔci ɛkkɛn yomgɛn moottin ne pɛñan. Ɛkkɛn korkɛn buañi noon acaan naŋki Yaccu naŋka tɛyan neeni ŋeecɔn ɛkkɛn ne pwadan bɛɛ. 52Ɔci naŋka naŋŋɛ Yaccu te byedg neeniyɛ, ŋeecɔn ɛkkɛn ne pwadan daŋkun bɛɛ. Ɛkkɛn wyetkɛn tɛy tɛy men. 53Ɔci ɛkkɛn ati ne dɛñki kuocɔ ban Gɛnɛɛcarɛt ɔɔn. Ɔci ɛkkɛn murka wiɛnji iñɔ. 54Ɔci ne ɛkkɛn kooki bora te murkatiyɛ, ɛkkɛn ñiyɛ ma ne pɛñan. 55Ɔci ma yiŋi baan konɛ warda, ɔci ɛkkɛn maka waakɛn yeyin owwɛ ḍuorɛ te aŋgann, nona tieŋki ɛkkɛn agi Yaccu baaliy. 56Ɔci noon warda nona baali ɛkɛ, kan a bana ḍiɛran, walla kan a bana tolan, ɔci kan a nona cieki ma bora nona baan taaŋɛtiyɛ, maka waakɛn yeyin owwɛ ḍuacci ma nona cieki ma dukkan jitin. Ɔci ma tooccin Yaccuti agi, “Dala maka waakɛn yeyin neeniyɛ, dala ɛkkɛn daŋkun topti bworŋ i lɛkɛti.” Ɔci maka neeniyɛ, ɛkkɛn topcin bworŋ ɛkɛ lɛkɛti. Ɔci ɛkkɛn waakɛn pwadgin waakɛnda.

will be added

X\