1 Yaccu ɔci maka laldɛ ɛkɛ ati Galŋ Jaliil kwoña parɛti. Nona dɛñki ɛkkɛn neeniyɛ, gena ban Gadara. (Bana neeni ma boṭi ‘wota agi Gɛraca.) 2 Nona neenitiyɛ, mena ‘uan gɛɛl bala wɛnan, ɔci ɛkɛ mugɛ jɔkin yeyin. 3 Ɛkɛ bala ciyi bora pomk jitin nona jokki ma maka tuway. Ɛkɛ ḍɛɛgɛ ma oŋki kɔɔna kɔɔni te waka ḍɛɛki ma may, ɔci ɛkɛ waak buannɛ ɔci waak ɛɛrŋɛ jitin. Menga yaakinti ɛkɛ mugdɛ bɛɛ. Ɛkɛ warɛ tɛɛna tɛɛno. Menga yaakinti ḍɛɛwi ɛkɛ bɛɛ. Jiŋgin ɔci bilk buannɛ ɛkɛ. 5 Ɛkɛ bala ḍɔki pomk jitin ɔci nona jokki ma maka tuway, ɔci ɛkɛ yaadan a yook te oŋ jiñɛ ɔci te ween jiñɛ, ɔci ɛkɛ jieb war ɛkɛ parɛ te gwoyi, ɔci ɛɛri warɛ te tomŋin. 6 Ne Yaccu kooni bora te murkatiyɛ, ɛkɛ yuarnɛ ‘wana neeni. Ɔci ne ɛkɛ Yaccu yuarnɛ te nona loonanyɛ, ɛkɛ yiŋi ɛkɛti, ɔci ḍwoñjin iñɔ ɛkɛ ñamɛti ɔci morcin ɛkɛti. Ɔci Yaccu gɔkcin ɛkɛti agi, “I, Jwaŋa Yaayan, dala i kooya bora te menti.” Ɔci Jwaŋa Yaayan neeni yaajjin te pwana tolan, ɔci jɔkin yeyin gɔkcin te tuk mena neeni Yaccuti agi, “I Yaccu Kaci Jwaŋa Tolan ñaalɔ, i buagi gena ‘yati yeti? ‘Ya ḍɔnna iti te yenti Jwaŋa Tolan, naa i noŋja ne yaayan ‘yati bɛɛ.” 9 Ɔci Yaccu tooccin ɛkɛti agi, “I yenti ɔki?” Ɔci ɛkɛ ṭwokcin ɛkɛti agi, “‘Ya yenta ‘Ɔɔn Coŋgɔn’ acaan ɔɔn coŋgɔn.” 10 Ɔci te oŋŋa wannayɛ, poli kwotin polla tolan bala yɔdi poom taaŋɛti omi luomo. Ɔci jɔkin yeyin neeni tooccin Yaccuti agi, “Ɔɔn cundɔn i kwotinti te jyek i aŋka ɔɔn kaattɔn ɛkkɛnti.” 13 Ɔci Yaccu gɔkcin jɔkin yeyinti agi, “Ɔgdɛ ooddɛ kaattɛ.” Ɔci jɔkin yeyin neeniyɛ, kooyin bora te menti, ɔci ɛkkɛn ati kaaccin kwotinti. Ɔci kwotin a alpn ne yyɛɛwɔ (2,000) neeniyɛ, ɛkkɛn yoŋŋin te ñaalɔ poom wyeñɛti, ḍɛɛmdin iñɔ galŋji waakɛnda, ɔci ḍakcin waakɛnda galŋji. 14 Ɔci maka gɔṭi kwotin neeniyɛ, ɛkkɛn buañi ɔci ɛkkɛn maka bora balk jitin myetkɛ, ɔci ɛkkɛn yiŋi maka baanji moki myetkɛ te naŋka neeni. Ɔci ma bɛɛn ɔci gɔrcin naŋka neeni. 15 Ɛkkɛn bɛɛn nona Yaccuti, ɔci mena luudɔn neeniyɛ, mɔkci ɛkkɛn bala ciyi i Yaccu. Ɛkɛ bala ɛŋi bworŋin pwadin, ɔci ɛkɛ wyeñɛ pwani moki. Ɔci ma korkɛn buaññi. 16 Ɔci maka naŋka naŋŋɛ Yaccu neeni yuarɛ ɛkkɛnyɛ, ɛkkɛn ma myetkɛ te jyek mena mugɛ jɔkin yeyin, ɔci te jyek kwotin. 17 Ɔci maka te baanɛn neeni gɔkcin Yaccuti agi, “Dala i ɔgdi ootta te ban ɔɔn wɛnni.” (Ɛkkɛn gɔki a ɔɔn acaan ɛkkɛn buañi te naŋka neeni.) 18 A ɔŋŋiyɛ, Yaccu dɔɔkcin kaaccin jiju murkaji. Ɔci ne Yaccu noŋi taapti murkatiyɛ, mena mugɛ jɔkin yeyin te ñamu neeniyɛ, gɔkcin Yaccuti agi, “‘Ya buaga woon oottin iki ‘ya.” 19 Ɔci Yaccu yookɔn ɔci kɛkcin ɛkɛti agi, “A’a, i ɔgdi ootta ban ɛkkɛ, ɔci ma ɛkkɛ myetka te naŋka naŋŋɛ Ciɛggɔn iti neeni. Ɛkkɛn myetka Juaŋ yomɛ pɔŋnɛ iti a ɔki.” 20 Ɔci ɛkɛ ati bonk ma ɛkkɛn Bonka Ne Inyaakkɛnti. Ɔci ɛkɛ bala mieti maka bonka neeniti te naŋka naŋŋɛ Yaccu ɛkɛti neeni waakɛnda. Ɔci ma yomgɛn moottin waakɛnda. 21 Ɔci Yaccu ati dɔɔki kwoña parɛti moki te murka i maka laldɛ ɛkɛ. Ɔci polla tolan bɛɛn nona ɛkɛti. Ɛkɛ bala te tool ḍwaŋɛti men. 22 Ɔci men gɛɛl bɛɛn te maka a ḍuaŋan ona morki ma Juaŋ neeni. Ɛkɛ yenti Jayroc. Ɛkɛ bɛɛn Yaccuti, ɔci ne ɛkɛ Yaccu yuarŋiyɛ, ɛkɛ ḍwoñjin iñɔ ɛkɛ ñamɛti. 23 Ɔci ɛkɛ gɔkcin ɛkɛti agi, “Kaci ‘ya kacca ɛɛŋ ṭɔɔlɛ warɛ yaayɛ. Ɛkɛ amɛ lieno. I bɛɛd aŋka i byeŋku tapca ɛkɛti aŋka ɛkɛ warɛ pwada.” 24 Ɔci ɛkkɛn ati yaakkɛn. Ɔci ne polla tolan neeni gɔrki ɛkkɛn atki yaakkɛn a ɔɔnyɛ, ɔci ɛkkɛn bootcin daŋkun. Ɛkkɛn bala ati ñoowi a ñoowin ne cwakanti. 25 Ɔci mena ɛɛŋ gɛɛl bala daŋkun wɛnan, ɛkɛ warɛ yaayɛ yuong a inyaakkɛn wyetkɛn ne yyɛɛwɔ. Ɛkɛ warɛ yaayɛ yimg wɔyi a wɔɔno. 26 Ɛkɛ ati kimtan jitkɛn kɔɔna kɔɔnno, ɔci ɛkɛ taabbin te naŋki ɛkkɛn doki. Mal ɛkɛ ḍakcin waakɛnda te kanŋa maka kimtan. Yeti ɛkɛ warɛ pwani men bɛɛ. Ɛkɛ warɛ pɛɛdin a pɛɛdin nɔñji oŋo. 27 Ɛkɛ tieŋŋin jiek mati te naŋka naŋdɛ Yaccu ɔci ɛkɛ bɛɛni. Ne ɛkɛ bɛɛniyɛ, ma a ḍiɛkan bɛɛ, ɔci ɛkɛ ati te ma jitkɛn, ɔci ɛkɛ ati pɔya Yaccu ŋoyɛti ɔci topcin bworŋ ɛkɛti. 28 Ɛkɛ noŋi a ɔɔn acaan ɛkɛ poŋi gɔki agi ne ɛkɛ topci bworŋ Yaccutiyɛ, ɛkɛ warɛ pwaddɔ lakun doki. 29 Ɔci ne ɛkɛ tomni bworŋ ɛkɛti a ɔɔnyɛ, ɔci ne pɛñan yimga wɔyi neeni yɔɔni doki, ɔci ŋeejɛ ɛkɛ ɛkɛ warɛ pwani te naŋki Yaccu. 30 Ɔci ŋeejɛ Yaccu ɛkɛ men gɛɛl ywaŋŋɛ te war tɛɛn ɛkɛ, ɔci ɛkɛ warɛ yallɛ ne pɛñan, ɔci ɛkɛ gɔkcin agi, “Hay! A menɛ topcin bworŋ ‘yati nɛ?” 31 Ɔci maka laldɛ ɛkɛ gɔkcin ɛkɛti agi, “I tooc a ɔɔn ne ma bala kɔɔna kɔɔni nona iti ogo?” 32 Ɔci ɛkɛ bala gɔṭi lieṭi toŋkɛ acaan buagɔn gɔrti mena noŋi a ɔɔn nɛ. 33 Ɔci ɛɛŋyɛ, naŋka naŋŋɛ Yaccu ɛkɛ warɛtiyɛ, ŋeejɛ ɛkɛ. Ɔci ɛkɛ buayi warɛ ḍiedan, ɔci ɛkɛ bɛɛn Yaccuti ɔci ḍwoñjin iñɔ ɛkɛ ñamɛti, ɔci ɛkɛ Yaccu myennɛ te jiek waakɛnda. 34 Ɔci Yaccu gɔkcin ɛkɛti agi, “Kaci ‘ya, i waru pwani te jyenna i jyetti ‘yati neeni. I ɔgdi ootta te yoma pwadan, ɔci dala i cied waru ne pwadan oŋkanda ɔɔn.” 35 Ɔci ne Yaccu baali gɔki jyeka neeni ɛɛŋti menyɛ, ma gɛɛg bɛɛn te on Jayroc, man a ḍuaŋa ona morki ma Juaŋti, ɔci gɔkcin ḍuaŋati agi, “Kaci i kacca ɛɛŋyɛ, ɛkɛ buannɛ warɛ doki. Te gena yeti i mena loṭi ma taabba owwa budan mokiy?” 36 Ɔci ne Yaccu tieŋni jyeka neeniyɛ, ɛkɛ gɔkcin Jayrocti agi, “Naa i buay bɛɛ. Dala i jyedda ‘yati men ɔɔn.” 37 Ɔci Yaccu maka coŋin dɛɛnɛ, acaan ɛkɛ buagɔn naa ɛkkɛn bootti ɛkɛti waakɛnda bɛɛ. Ɔci maka atki iki ɛkɛyɛ, gena Butruc ɔci Yaakub ɔci Yɔhanna mod Yaakubn. Gena ɛkkɛn aŋka ati i ɛkɛy. 38 Ne ɛkkɛn dɛñki on Jayrocyɛ, ɛkkɛn ma mɔkci kɔɔna kɔɔnno. Ɔci ɛkkɛn bala wiak a joono. Ɔci ma gɛɛg bala wiak yaadan a yooko. 39 Ɔci ne Yaccu kaanni orɔyɛ, ɛkɛ gɔkcin mati agi, “Hay, te gena yeti aŋka ɛkkɛ wiagɛ yaadɛ a ɔɔny? Kaci tuun bɛɛ. Ɛkɛ wiccin a wiccin budan.” 40 Ɔci ɛkkɛn lɛɛṭi te jyek ɛkɛ. Ɔci ɛkɛ ɛkkɛn ŋualnɛ bora waakɛnda. Ɔci ɛkɛ kaci weegɛn ɔci kaci mɛɛgɛn, ɔci maka bɛɛki iki ɛkɛyɛ, ɛkkɛn aŋka eññɛ nona baali kaciy. 41 Ɔci Yaccu kaci muŋŋɛ te bieŋɛ, ɔci gɔkcin ɛkɛti agi, “Šɔɔl ṭɔɔlɛ, i jɔŋŋa ñaalɔ.” (Te tuk Ma Icrayiil Yaccu gɔkcin agi, “Talita, gumi.”) 42 Ɔci ne pɛñan ṭɔɔl ṭɔɔlɛ neeni jɔŋŋin ñaalɔ ɔci ati parɛ. Ɔci ma yomgɛn moottin ne pɛñan. Yuong ṭɔla neeni a inyaakkɛn wyetkɛn ne yyɛɛwɔ. 43 Ɔci Yaccu ma myennɛ agi naa ɛkki ma nɔɔtti te naŋka neeni bɛɛ. Ɔci ɛkɛ ɛkkɛn myennɛ moki agi dala kaci ‘wondi ma genga amda.
