1 Ɔci Yaccu bala loṭi ma moki bora Galŋ Jaliil ḍwaŋɛti. Ɔci ne ɛkɛ baali loṭi ma a ɔɔnyɛ, polla tolan bɛɛn wyetkɛn ḍɔɔlɛ nona ɛkɛti. Acaan a ɔŋŋiyɛ, ɛkɛ taapcin murkaji ɔci cooccin murkaji galŋji, ɔci maka coŋin neeni bala ciyi galŋ ḍwaŋɛti. 2 Ɔci ɛkɛ bala loṭi ɛkkɛn a lali men ɔɔn. Ɛkɛ bala loṭi ma te jyeka a caagin gɛɛg. Ɛkɛ gɔkcin mati agi, 3 “Tieŋdɛ, mena ‘wayi kookinyɛ, ɛkɛ ati bora aŋka ‘wayi kookin. 4 Ɔci ne ɛkɛ baali ‘wayi a ɔɔnyɛ, kookin ñingɛn gɛɛg ḍɛɛmdin pɔɔjɔ pɔy konɛti, ɔci ḍiirg bɛɛn ɔci ɛkkɛn amɛ doki. 5 Ɔci kookin pookɛn gɛɛg moki ḍɛɛmdin nona gwoyiti, ɔci ɛkkɛn ywollin ne pɛñan acaan ṭɛɛr a ḍiɛran. 6 Ɔci ne oŋ waŋɛ myɛlliyɛ, kookin neeni ammɛ oŋ te wɔɔka ḍuulan budan, acaan ɛkkɛn bɛɛkkɛn ati iñɔ bɛɛ. Acaan a ɔŋŋiyɛ, aŋka ɛkkɛn tuuki ɔci iiki wanna. 7 Ɔci kookin pookɛn gɛɛg ḍɛɛmdin nona guobgin. Ɔci guobgin ne ɛkkɛn ḍwaŋki dokiyɛ, ɛkkɛn kookin gworɛyɔ, ɔci kookin ñingɛn bɛɛn bɛɛ. 8 Ɔci kookin pookɛn gɛɛg ḍɛɛmdin nona balki ṭɛra pwadan, ɔci ɛkkɛn aŋka eccin ñingɛn acaan ɛkkɛn ywollin ne pwadan ɔci ḍwaŋgin ne pwadan. Ɔci eccin ñingɛn ne coŋɔn. Ɔci kookin pookɛn gɛɛg moki eccin ñingɛn bala ñamu ne ḍyɛṭ ṭɔɔlɛ moki. Ɔci kookin pookɛn gɛɛg moki eccin ñingɛn bala ñamu te kookin waakɛnda.” 9 Ɔci Yaccu gɔkcin mati agi, “Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.” 10 Ne maka coŋin neeni atki dokiyɛ, ma gɛɛg bala ne ḍiɛkan i maka a Inyaakkɛn Wyetkɛn Ne yyɛɛwɔ neeni men. Ɔci ɛkkɛn tooccin Yaccuti te jyeka a caagin neeni gɛɛg. 11 Ɔci ɛkɛ gɔkcin ɛkkɛnti agi, “Ɛkkɛ ‘wonnin ‘ya ñing tɛɛn aŋka jyek cyɛgji Juaŋ jitkɛn yuartɛ ɛkkɛ ne pwadan. Yeti ‘ya jyeka neeni jitkɛn owwa bora maka yookɔn te naŋki jyek cyɛgji Juaŋ neeniti bɛɛ. 12 ‘Naŋka neeni bala aŋka dala ɛkkɛn gɔṭi a gwali budan, ɔci dala ɛkkɛn tieŋdi a tieŋŋin budan moki, aŋka naa ɛkkɛn waakɛn yaltan ɔci bɔɔktɛ Juaŋ bɛɛ.’” 13 Ɔci Yaccu tooccin mati agi, “Jwalla a caagɔn guaŋi ‘ya acca neeni jiñɛ yuarnɛ ne pwadan bɛɛ? Kan a ɔɔnyɛ, jyeka a caagin pookɛn waakɛnda tieŋdɛ ɛkkɛ a ɔki? 14 Yɔɔddɛ ɛkkɛ myettin jwali konɛ ne pwadan. Mena ‘wayi kookinyɛ, ɛkɛ bala ba mena loṭi ma te jyeka Juaŋ buagiti aŋka naŋtan may. 15 Ɔci ba jyek kookin ḍɛɛmdin pɔy konɛti neeniyɛ, bala ba maka tieŋŋin jyek Jwaŋa Tolan, ɔci ne ɛkkɛn tieŋki dokiyɛ, Jwaŋa Yaayan bɛya ne pɛñan, ɔci jiek kaldɛ ɔntɔ te ɛkkɛn yomgɛnti. 16 Ɔci moki ba jyek kookin ḍɛɛmdin nona gwoyiti ɔci bɛɛkkɛn ati iñɔ bɛɛ neeniyɛ, bala ba jyek maka tieŋŋin jieko, ɔci te ñamu ɛkkɛn yomgɛn ñɔɔna ñɔɔno. Ɔci ɛkkɛn bala yɔdi ne ḍiɛran ṭɔɔlɛ, yeti oŋŋa pɔɔd bɛɛdi ɛkkɛnti te jyenna ɛkkɛn jyetki jyek Juaŋtiyɛ, ɛkkɛn ḍɛɛmdi iñɔ ne pɛñan doki waakɛnda. 18 Ɔci ba jyek kookin ḍɛɛmdin nona guobginyɛ, bala ba maka tieŋŋin jyek ‘ya, 19 yeti jyeka pookɛn bɛya ɛkkɛn yomgɛnti, ɔci jyek ‘ya gwortanyɔ jyeka pookɛn neeni. Jyeka pookɛn neeni gena jyek naŋka cooŋi ma ñingɛn. Kan ma poŋi jiek oŋkanda ne tolan acaan wak ɛkkɛn a ḍiɛkanyɛ, jyek ‘ya gwortanyɔ paŋŋa neeni. Ɔci moki, maka maalɛn tolanyɛ, kan paŋi ɛkkɛn a paŋi jyek maal budanyɛ, jyek ‘ya gwortanyɔ paŋŋa neeni moki. Ɔci moki, kan ma poŋi waka iñɔ baanji wɛnni budan, ɔci ma yomgɛn ani waka iñɔ baanji wɛnni ne tolanyɛ, jyek ‘ya gwortanyɔ paŋŋa neeni. Ɔci jyek ‘ya noŋdi gena pwadan gɛɛl ɛkkɛn yomgɛnti bɛɛ. 20 Ba jyek kookin ḍɛɛmdin ṭɛra pwadanti neeniyɛ, bala ba maka tieŋŋin jyek ‘ya ɔci jiek mugɛ ne pwadan, ɔci jyek ‘ya neeniyɛ, noŋdi naŋka pwadin ɛkkɛn yomgɛnti. Ma gɛɛgyɛ, naŋki ɛkkɛn naŋka pwadin bala ne ḍyɛṭ ṭɔɔlɛ, ɔci maka pookɛn gɛɛg naŋki ɛkkɛn naŋka pwadin bala ñamu moki, ɔci maka pookɛn gɛɛg moki naŋki ɛkkɛn naŋka pwadin bala ñamu te ma waakɛnda.” 21 Ɔci Yaccu gɔkcin ɛkkɛnti agi, “Gɔṭṭɛ, kan dyɛka gɛɛl tontan ma maañyɛ, dyɛka neeni kwomtanwi ma piil boki? Ɔci ɛkɛ oltan ma aŋgan pwanɛti boki? A'a, ɛkɛ ḍuattan ma ñaalɔ nona ḍɔcki ma ɛkɛy. 22 Gen gɛɛl konɛ kuoltanji ma bɛɛ. Gena konɛ kuoltanji mayɛ, ne baaṭi ɛkɛ bɛya bora dɔki. Ɔci moki gena a coggin neeni bɛya bora dɔki. 23 Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.” 24 Ɛkɛ gɔkcin ɛkkɛnti moki agi, “Dala ɛkkɛ woŋgɔ tiittɛ te jwalla tieŋdɛ ɛkkɛ neeni, ɔci kan ɛkkɛ jwalla neeni konɛ yuartɛ ne pwadan ɔci naŋdɛyɛ, Jwaŋa Tolan ɛkkɛ pɔktɛ ñingɔti aŋka ɛkkɛ nona bɔwan yuartɛ ne tolan. Ɔci ɛkkɛ laldɛ ɛkɛ te waka jitkɛn loonan waka ɛkɛ buagɔn aŋka ŋeeddɛ ɛkkɛy. 25 Dala ɛkkɛ woŋgɔ tiittɛ te waka ɛkkɛ ‘wondɛ Jwaŋa Tolan, ɔci dala ɛkkɛn naŋdɛ. Kan ɛkkɛ noŋɛ waka ɛkkɛ ‘wondɛ Jwaŋa Tolanyɛ, ɛkɛ ɛkkɛ ‘uottɛti moki. Yeti kan ɛkkɛ waka neeni naŋdɛ bɛɛyɛ, Jwaŋa Tolan mañ ɛkɛ maña dɛki ɛkkɛti, wanna oodɛ bora te ɛkkɛti, ɔci waka ɛkkɛ ‘wonnɛ ɛkɛ neeni aga waka budan.” 26 Ɔci ɛkɛ gɔkcin ɛkkɛnti agi, “Jyek cyɛgji Jwaŋa Tolan bala ba jyek mena ‘uan mena ati ‘wayi kookin. 27 Ne ɛkɛ pok ‘uanɛ dokiyɛ, ɛkɛ ati baanji, ɔci ɛkɛ noŋi genga kookɛnti moki bɛɛ. Ne ɛkɛ baali wicci ɔɔnyɛ, kookin ywoldi pookɛn ɔci ḍwaŋdi. Yeti yuli kookin neeniyɛ, ŋeejɛ mena neeni bɛɛ. 28 Šɛɛr aŋka kanŋan parɛ, ɔci te kanŋa ṭɛɛr neeniyɛ, kookin ṭɛṭṭi bora, ɔci ɛkkɛn ḍwaŋdi, ɔci leeddi doki, ɔci ñingɛn bɛya, yeti a gɔɔn men. 29 Ɔci ne ḍyɛṭ ṭɔɔlɛ ɛkkɛn ‘yɛgdi. Ɔci ne ɛkkɛn ‘yɛkti doki, ɔci kan wɔɔka ɛrki ma ɛkkɛn bɛɛn dokiyɛ, ‘uan ooddi ɛkkɛn ‘yɛrdɛ.” 30 Ɔci Yaccu tooccin ɛkkɛnti agi, “‘Ya jyek cyɛgji Jwaŋa Tolan poorcati i jwalla bɛ? ‘Ya gɔkca jwalla a caagɔn ɛka ɔki moki aŋka menin neeni konɛ gorti boray? 31 Cyɛgji Jwaŋa Tolanyɛ, ɛkɛ bala ba kardala waŋɛ. Ñing kardala neeniyɛ, ḍyɛrgin a ḍyɛrgin ba ñing kɔba. Ɔci ɛkkɛn ḍyɛrɔ te ñing janga pookɛn waakɛnda. Ɔci kan ɛkɛ piinnɛ men gɛɛl bal ɛkɛjiyɛ, 32 ɛkɛ ywoldi ɔci tola, ɔci janga pookɛn bwandɛ ɛkɛ. Ɔci ɛkɛ balki kɛrk ɛkɛ beccin a beccin. Ɔci ḍiirg yaakinti eyi kwork ṭiebji ɛkɛti. A ɔɔnyɛ, bala ba jyek cyɛgji Juaŋ daŋkun. Jyek cyɛgji Juaŋ ɛkkɛn jɔɔtcin ne ḍiɛran te maka ne ḍiɛkan, ɔci ɛkɛ poni jitin ne ma coŋki a coŋgin ɔɔn.” 33 Ɔci Yaccu bala loṭi ɛkkɛn te jyeka a caagin ɛkkin pookɛn gɛɛg men ɔɔn ba bolja ɛkkɛn yaakɛntijiek jitkɛn yuartany. 34 Ɔci Yaccu maka coŋin neeniyɛ, lallɛ te jyeka a caagin neeni, yeti ma ɛkɛ woodgɛn aŋka myennɛ ɛkɛ te jiek jitkɛn woodgɛn waakɛnda. 35 Oŋ gɛɛlti ne oŋ unniyɛ, Yaccu gɔkcin maka laldɛ ɛkɛti agi, “Dala ikin oottin kuocɔ galŋ taaŋŋa parɛti.” 36 Yaccu bala ciyi murkaji, ɔci maka laldɛ ɛkɛ kaaccin murkaji, ɔci ɛkɛ eyɛ ɛkkɛn te murka neeni i ɛkkɛn. Ɛkkɛn maka coŋin dalji ɔci ɛkkɛn atti. Ɔci murkan pookɛn gɛɛg ati i ɛkɛ. 37 Ɔci jwamma tolan bɛɛn ɔci pɔɔgi ati murka konɛti, ɔci murka noŋi kuma te piego. 38 Ɔci Yaccu bala murka ŋwayɛti. Ɛkɛ wyeñɛ tɛɛlnɛti kaakciti, ɔci ɛkɛ wiccin doki. Ɔci ma bala jieci ɛkɛ warɛ gɔki agi, “Mena loṭi may, i niin a ɔɔn ogo? Ikin tuutin acca!” 39 Ɔci ɛkɛ ṭiewin ɔci gɔkcin jwamiti ne pɛñan, ɔci jwami yɔɔni doki. Ɔci ɛkɛ gɔkcin pɔɔgga ḍwaŋinti moki, ɔci pɔɔgi yɔɔni moki. Genga bala moki bɛɛ. 40 Ɔci ne pieg waakɛn ḍiepkiti iñɔ dokiyɛ, ɛkɛ tooccin mati agi, “Ɛkkɛ buayɛ a ɔɔn ogo? Ɛkkɛ jyettɛ ‘yati bɛɛ?” 41 Ɔci ɛkkɛn korkɛn buañi ɔci bala gɔwwi yɔtin pookɛn agi, “Mena neeni tolcin awarɛ hay! Jwami ɔci pɔɔgi tieŋŋin jyek ɛkɛ.”
