Mark 3

1Ɔci Yaccu kaaccin orɔ ona morki ma Juaŋ moki, ɔci mena ‘uan gɛɛl mɔŋnɛ ɛkɛ aŋan moki, ɛkɛ bieŋɛ aŋi aamma. 2Ɔci ma Pɛriciin bala gɔṭi booti Yaccu warɛ. Ɛkkɛn gɔki agi, “Kan Yaccu mena neeni ywaŋdɛ te Oŋ Cabityɛ, ɔɔn jiek eedɔn akuumati doki.” 3Ɔci Yaccu gɔkcin ‘wana bieŋɛ puottinti neeni agi, “Bɛɛd wɛnni. Yɔɔtca ma ñomgɛnti.” 4Ɔci Yaccu tooccin ma Pɛriciinti agi, “Jyek ganuun jyeka guaktan ma te Oŋ Cabit wanna jitkɛn bala a ɔki? A jyek maŋi ma walla jyek ywaŋi ma waakɛn, walla a jyek naŋka yaayan walla a jyek nooŋi mako? Ba jyeka pwadin ɛkkɛti neeni bɛ?” Yeti ɛkkɛn gɔkcin genga moki bɛɛ. 5Ɔci Yaccu bala gɔṭi ɛkkɛn, ɔci looñi ɛkkɛnti, ɛkɛ yomɛ yaayɛ acaan ɛkkɛn yomgɛn baaw mati. Ɔci ɛkɛ gɔkcin mena ‘uanti neeni agi, “Bieŋu miɛtca bora.” Ɔci ɛkɛ bieŋɛ miɛnnɛ bora, ɔci ɛkɛ bieŋɛ pwani doki. 6Ma Pɛriciin kaaccin bora te loñko, ɔci ɛkkɛn ati ne pɛñan ati ma Hiruuducti, ɔci ɛkkɛn jiek ñaagɛyɔ te jyek nooŋi Yaccu. 7Ɔci Yaccu ati ɔntɔ te nona mati. Ɛkɛ ati galŋji i maka laldɛ ɛkɛ. Ɔci poli ma polla tolan ɔɔccin bora te ban Jaliilji ne coŋɔn ati bootcin ɛkɛti. Maka ban Yahuudiya, 8ɔci maka ban Urcaliim, ɔci maka ban Idumiiya, ɔci maka ciyi kuocɔ Tol Urdun ŋoyɛti, ɔci maka ban Tayir, ɔci maka ban Ciḍɔɔn, ne ɛkkɛn tieŋki jyek naŋka naŋdɛ Yaccu ne coŋɔn neeniyɛ, ɛkkɛn bɛɛn nona ɛkɛti. 9Ɔci Yaccu gɔkcin maka laldɛ ɛkɛti agi, “Dala ‘ya eektata murka gɛɛl wɛnni. Dala murka yɔɔtti wɛnni nona ‘yati, aŋka ne ma kɛɛktiyɛ, ‘ya taapca ɛkɛti aŋka ‘ya tiittati ma bɛɛ.” 10Ɛkɛ gɔki a ɔɔn acaan maka coŋin ywaŋŋɛ ɛkɛ doki. Maka waakɛn yeyin bɛɛn orcinti ɛkɛti. Ɛkkɛn buagɔn topti ɛkɛti waakɛnda. 11Ɔci maka muogɛ jɔkin yeyinyɛ, ne jɔkin yeyin Yaccu yuarkitiyɛ, ɛkkɛn ḍɛɛmdin iñɔ ɛkɛ ñamɛti, ɔci yaajjin ne tolan te yoma yaayan agi, “I a Kaci Jwaŋa Tolan.” 12Ɔci Yaccu gɔkcin ɛkkɛnti ne pɛñan agi, “Naa ɛkkɛ mietɛ ma te ‘ya aŋka ‘ya ŋeetta ma a ɔɔn bɛɛ.” 13Ɔci te oŋŋa wannayɛ, Yaccu ati kaaccin ñaalɔ pomk jitin, ɔci ɛkɛ borcin maka ɛkɛ buagiti, ɔci ɛkkɛn ati ɛkɛti. 14Ɔci ma kɛnnɛ Yaccu bora a Inyaakkɛn Wyetkɛn Ne yyɛɛwɔ. Ɔci ɛkkɛn naŋŋɛ ɛkɛ a maka atki iki ɛkɛ oŋkanday. Ɔci ɛkkɛn naŋŋɛ ɛkɛ a maka ooddi loṭi may. 15Ɔci ɛkkɛn ‘wonnɛ Yaccu war tɛɛn byeŋkɛnti aŋka ɛkkɛn jɔkin yeyin kootan bora te mati. 16Maka A Inyaakkɛn Wyetkɛn Ne yyɛɛwɔ neeniyɛ, gena Butruc (ɛkɛ yenti Cimaan te tuk Ma Icrayiil), 17ɔci kɛɛgin Jɛbadi Yaakub ɔci Yɔhanna. (Yaakub i mod ɛkkɛn Yɔhanna, ɛkkɛn ooŋnɛ Yaccu yenga pookɛn agi “Kɛɛgin Ñaal Šɛɛntan.” Ɛkkɛn barŋɛ Yaccu a ɔɔn acaan ɛkkɛn a ywopko.) 18Ɔci Andarawuc, ɔci Pilibuc, ɔci Bartɔɔlamawuc, ɔci Matta, ɔci Tɔmac, ɔci Yaakub kaci Alpyac (ɔci nona parɛti ɛkɛ bartan ma a Mena Ḍiɛran), ɔci Tadawuc (ɔci nona parɛti ɛkɛ bartan ma a Yahuuja Kaci Yaakub), ɔci Cimaan (ɔci ɛkɛ bartan ma a “Mena Byeran”), 19ɔci Yahuuja Ickɛɛryuti mena Yaccu Kiṭɔ ‘wonnɛ ma byeŋkɛnti aŋka noktan may. 20Ne Yaccu maka neeni kɛnnɛ bora dokiyɛ, ɛkɛ oŋ ati baanji oŋo. Ɔci ne ɛkɛ atti baanjiyɛ, polla tolan bɛɛn ne coŋɔn, ɔci a ɔɔnyɛ, ɛkkɛn yɔṭi wɔɔka omki moki bɛɛ. 21Ɔci ne modg Yaccun tieŋki jyeka neeniyɛ, ɛkkɛn ati nona Yaccuti acaan ɛkkɛn buagɔn ɛkɛ eetan baanji, acaan ɛkkɛn gɔki agi, “Ɛkɛ wyeñɛ yaayɛ pwatcin bɛɛ.” 22Maka loṭi worga Juaŋ ɛkkɛn bɛɛn te ban Urcaliim, ɔci ɛkkɛn gɔki agi ɛkta muŋda jwaŋa yaayɔ katan. Ɔci agi te yenti ciɛggɔn jɔkin yeyin, Byɛljabul neeniyɛ, (gena yenti Jwaŋa Yaayan yenta parɛ) ɛkta jɔkin yeyin koodda bora te mati. 23Ɔci Yaccu ma bornɛ nona ɛkɛti. Ɔci bala loṭi ɛkkɛn te jyeka a caagin agi, “Jwaŋa Yaayan yaakinti warɛ koodɛ bora parɛ te mati boki? A’a. 24Kan ma ḍuaŋa ne cyɛɛlɔ gɛɛl jiekɛn ñoowɔ bɛɛyɛ, ban ḍuaŋa neeni yaakinti yɔɔda ne tɛyan bɛɛ. 25Kan ma ona ne cyɛɛlɔ ñoowɔ te jiek bɛɛyɛ, ɛkkɛn yaakinti ciyi nona ne cyɛɛlɔ bɛɛ. 26Ɛkkɛ gɔkɛ Jwaŋa Yaayan ‘ya ‘wonna war tɛɛn ɛkɛ? A’a. Kan Jwaŋa Yaayan ‘ya ‘wonda war tɛɛn ɛkɛyɛ, tɛɛn ɛkɛ nuottin jitin doki. 27“Gɔṭṭɛ ‘wota, kan ‘wana warɛ tɛyan bala orɔ on ɛkɛyɛ, menga yaakinti kaatti orɔ kordi genga on ɛkɛ boki? Kan ‘wana warɛ tɛyan neeni ḍɛktan ma ñamuyɛ, ma oŋ kaatti orɔ kordi waak on ɛkɛ oŋo. 28“Tieŋdɛ, Jwaŋa Tolan yaakinti ma bɔɔktɛ te naŋki waakɛnda. Kan a ŋɛɛgi, ɔci kan a jyeka pookɛn gɛɛgyɛ, ɛkɛ yaakinti ma bɔɔktɛ ɔɔn men. 29Yeti kan men gɛɛl wooki naŋki Boŋ Jwaŋa Tolanyɛ, ɛkɛ bɔɔktɛ Juaŋ bɛɛ. Nɔjja neeniyɛ, bala ɛkɛti oŋkanda ɔɔn. Baadi bɛɛ.” 30Yaccu gɔkcin mati a ɔɔn acaan ɛkkɛn bala ḍori Boŋ Jwaŋa Tolan ne ɛkkɛn gɔkki ɛkɛti agi ɛkta muŋda Jwaŋa Yaayany. 31Mɛy Yaccun ɔci modg Yaccun ɛkkɛn bɛɛni. Ɔci maka coŋin bala ciyi iki Yaccu. Ɔci ɛkkɛn bala yɔdi bora, ɔci men gɛɛl cuuñɛ ɛkkɛn orɔ acaan Yaccu bortɛ. 32Ɔci ne ɛkkɛn tieŋki jyek mena cuuñɛ ma Yaccuti neeniyɛ, ɛkkɛn gɔkcin Yaccuti agi, “Yaccu, mɛy ɛkkɛ ɔci modg ɛkkɛ, ɛkkɛn bala yɔdi bora tooci i.” 33Ɔci Yaccu ṭwokcin maka bala cieki iki ɛkɛti agi, “Ɛɛ, ɛkɛ a mɛy ɔɔn ɔci ɛkkɛn a modg ɔɔn. Yeti gɔṭṭɛ, mena neeniyɛ, ɛkɛ a mɛy ɔɔn, ɔci maka neeniyɛ, ɛkkɛn a modg ɔɔn daŋkun! 35A ɔɔn mena noŋi ba naŋka ṭagdɛ Juaŋyɛ, ɛkɛ a mɛy ɔɔn, ɔci a mod ɔɔn, ɔci a kow ɔɔn.”

will be added

X\