Mark 2

1Oŋ gɛɛlti ne nink gɛɛg bɛɛki borayɛ, Yaccu dɔɔkkin ban Kapɛrnyam, ɔci jwali ati baan konɛ warda agi Yaccu bɛɛnɔ baanji. 2Ɔci maka coŋin bɛɛn ɔɔccin orɔ on ɛkɛ, ɔci on konɛ mitcɛ ñaalɔ warda. Ɔci maka pookɛn gɛɛg bala te bora men, ɔci nona bora on tukɛti kuumi te ma daŋkun. Ɔci Yaccu bala loṭi ma te jieko. 3Ɔci ma bɛɛn eccin mena warɛ yaayan mena a puono. Ɛkɛ ḍuorɛ maka ‘uay ne ŋaanɔ. 4Ɔci ne ɛkkɛn bɛɛki ne orkitiyɛ, nona kaatti ɛkkɛn orɔ Yaccuti gɛɛl bala bɛɛ. Ɔci ɛkkɛn kaaccin ñaalɔ on wyeñɛti, ɔci on wyeñɛ noonɛ gɛɛl laakci ɔntɔ, ɔci men ḍuurcɛ iñɔ te aŋgan niini ɛkɛ neeni. 5Ɔci ne Yaccu gɔrni maka neeni jyetki ɛkɛtiyɛ, ɛkɛ gɔkcin ‘wana warɛ yaayan neeniti agi, “Kaci ‘ya, i bɔɔŋnin ‘ya te nɔji i doki.” 6Ɔci maka loṭi worga Juaŋ gɛɛg bala ciyi wɛnan, ɔci ɛkkɛn bala poŋi jiek yomgɛnti agi, 7“Te gena yeti aŋka ‘wana neeni gɔki a ɔɔny? Jyek ɛkɛ neeni a ŋɛɛgi Juaŋti ne tolan. A menɛ yaakinti ma bɔɔktɛ te nɔjiy, a Juaŋ parɛ bɛɛ?” 8Ne ma balki poŋki a ɔɔnyɛ, paŋi ɛkkɛn ŋeejɛ Yaccu doki. Ɔci ɛkɛ gɔkcin ɛkkɛnti agi, “Te gena yeti aŋka ɛkkɛ poŋɛ jyeka neeni yomgɔti a ɔɔny? 9Kan ‘ya gɔkca ‘wana warɛ iin neeniti agi ɛkɛ bɔɔka ‘ya te nɔji ɛkɛ, ɔci moki kan ‘ya gɔkca ɛkɛti agi dala ɛkɛ jɔŋdi ñaalɔ potti woony, jwali gɛɛl koy koy te jyeka neeniti yaakkɛn boki? 10Dala ŋeeddɛ ɛkkɛ ‘ya Kaci Ma Baan yaakati maka ciyi ṭɛɛrji wɛnni bɔɔka te nɔji ɛkkɛn.” Ne Yaccu gɔŋni a ɔɔnyɛ, ɛkɛ warɛ yallɛ ‘wana warɛ yaayan neeniti ɔci gɔkcin ɛkɛti agi, 11“‘Ya gɔkka iti, jɔŋŋa ñaalɔ ɔci aaran lula ɔgdi ootta baanji.” 12Ɔci ɛkɛ jɔŋŋin ñaalɔ ɔci aaran luullɛ, ɔci kaaccin bora goṭi ma ñomgɛnti waakɛnda. Ɔci ma yomgɛn buañi waakɛnda, ɔci ɛkkɛn bala jieyi Jwaŋa Tolan gɔki agi, “Naŋka neeni gɛɛl yuarŋɔn ɔɔn oŋgati a ɔɔn bɛɛ.” 13Ɔci Yaccu ati tool ḍwaŋɛti moki, ɔci ma wyetkɛn ḍɔɔlɛ nona ɛkɛti, ɔci ɛkɛ bala loṭi ɛkkɛn. 14Ɔci ne ɛkɛ ḍookki te lali ɔci baali ati goṭi pɔɔjɔyɛ, ɛkɛ men gɛɛl mɔŋnɛ, ɛkɛ yenti Matta, (ɛkɛ yenti Laawi te tuk Ma Icrayiil) kaci Alpyac. Ɛkɛ bala ciyi ona ḍɔcki ma bilk tulba. Ɔci Yaccu gɔkcin ɛkɛti agi, “Bɛɛd bootta ‘yati.” Ɔci ɛkɛ jɔllin ñaalɔ bootcin ɛkɛti. 15Ne Yaccu baali ciyi omi am orɔ on Mattayɛ, maka lyemi tulba bala ciyi iki ɛkɛ kɔɔna kɔɔnno, ɔci maka yeyin bala ciyi daŋkun iki Yaccu i maka laldɛ ɛkɛy. Oŋŋa wannayɛ, ma bootcin Yaccuti kɔɔna kɔɔnno. 16Ɔci ne maka loṭi worga Juaŋ ma Pɛriciin gɛɛg gɔrki Yaccu baali omki i maka yeyin ɔci maka lyemi tulbayɛ, ɛkkɛn tooccin maka laldɛ Yaccuti agi, “Yaccu omi i maka lyemi tulba ɔci maka yeyin ogo?” 17Ɔci ne Yaccu tieŋni jyeka toocki ma neeniyɛ, ɛkɛ gɔkcin ɛkkɛnti agi, “Maka waakɛn pwadinyɛ, ɛkkɛn magdɛ kiimi bɛɛ, gena maka waakɛn yeyin aŋka magdɛ kiimiy. ‘Ya bɛɛn aŋka ‘ya boor maka pwadin bɛɛ, ‘ya bɛɛn aŋka ‘ya boor maka nɔɔtko.” 18Oŋ gɛɛltiyɛ, maka laldɛ Yɔhanna ɔci ma Pɛriciinyɛ, ɛkkɛn bala gwoṭi koño. Ɔci ma bɛɛn Yaccuti, ɔci gɔkcin ɛkɛti agi, “Maka laldɛ Yɔhannayɛ, ɛkkɛn gwoṭi koño, ɔci ma Pɛriciin, ɛkkɛn daŋkun gwoṭi koño. Oŋ maka lala i ba ɛkkɛn da gworki koñ bɛ?” 19Ɔci Yaccu gɔkcin ɛkkɛnti agi, “Kan ‘war ñooni bala menyɛ, maka bɛɛn jumati yaakinti gwoṭi koñ boki? A’a, kan ‘war ñooni bala menyɛ, maka bɛɛn jumati yaakinti gwoṭi koñ bɛɛ. 20’Ya baal ba ‘war ñoonno. Yeti oŋŋa bɛya a oŋŋa ‘war ñooni eetiti mayɛ, ɔci ma yaakinti gworti koñ oŋo. 21“Kan jibba aŋi daan ɔci jiettin jitinyɛ, ɛkɛ kiɛttanti ma bworŋa woonɛti bɛɛ. Kan kiɛttanti ma bworŋa woonɛtiyɛ, ɛkɛ jietti jitin ne tolan nɔñji. 22Mooya wonkɛn ma luayi te kucin a donk bɛɛ. Kan ɛkkɛn luattan ma kucin a donktiyɛ, ɛkkɛn caaba ɔci kucin ṭontan jitin, ɔci mooy pwoktɛ iñɔ, ɔci ḍakti budan. Acaan a ɔŋŋiyɛ, ma luayi mooya wonkɛn te kucin wonkɛn.” 23Oŋ gɛɛlti te Oŋ Cabityɛ, Yaccu ati goṭi yelk jitin i maka laldɛ ɛkɛ. Ɔci ne ɛkkɛn balki atki a woon a ɔɔnyɛ, maka laldɛ Yaccu bala wɔɔpi pok wyetkɛn. 24Ma Pɛriciin gɛɛg bala ati iki ɛkkɛn ɔci ɛkkɛn gɔkcin Yaccuti agi, “Hay, gɔrca! Maka lala iti, ɛkkɛn jyek ganuun jyeka guagɛ ma te Oŋ Cabit neeni, bɛɛyɛji ɛkkɛn ogo?” 25Ɔci Yaccu ṭwokcin ɛkkɛnti gɔki agi, “Ɛkkɛ pokkɛ jyeka kiiwɛ ma te jyek naŋki Daawud neeni boki? Gena jyek oŋŋa ɛkɛ ammɛ koñ i maka atki iki ɛkɛy? 26Ne Abaayatar baali agi gaciic tolan on Juaŋ menyɛ, Daawud kaaccin kañ on Juaŋti, ɔci ɛkɛ ‘wonnɛ Abaayatar byedga ḍuattan ma orɔ Juaŋti, ɔci ɛkɛ byedga neeni ammɛ. Byedga neeni mena parɛ gɛɛl omi bɛɛ. Gena gaciicin Ma Yahuud aŋka omi ɛkkɛn pookɛn ba jyek ganuuny. Ɔci Daawud maka atki i ɛkɛ kɛnnɛ byedg daŋkun. Ɔci Juaŋ gɔkcin genga te naŋka neeni bɛɛ.” 27Ɔci Yaccu gɔkcin ɛkkɛnti moki agi, “Juaŋ Oŋ Cabit oŋnɛ mako. Juaŋ ma aŋŋɛ oŋnɛ Oŋ Cabit bɛɛ. 28Gɔṭṭɛ, ba jyeka neeniyɛ, ‘ya Kaci Ma Baanyɛ, ‘ya a Ciɛggɔn Oŋ Cabit acaan ɛkɛ bala ‘ya bieŋuti.”

will be added

X\