Mark 16

1Ɔci ne Oŋ Cabit noŋi bɛɛdi borayɛ, ɔci ne Oŋ Juaŋ cɔɔlniyɛ, Moryam Magdalin ɔci Moryam mɛy Yaakubn ɔci Calɔɔmɛ, ɛkkɛn ati wɛɛṭi elin acaan juottan Yaccu warɛti. 2Ɔci te Oŋ Juaŋ te liidi ṭɔɔlɛ ḍiɛran, ne oŋ waŋɛ luonni bora men bɛɛyɛ, moonga neeni ati kool wyeñɛti. 3Ɔci ɛkkɛn bala gɔwwi yɔtin pookɛn agi, “Poma niin kool tukɛti neeni, ɛkɛ ñiiddɛ menɛ ɔntɔ yeti?” 4Ɔci ɛkkɛn ne gɔrki kooltiyɛ, ɛkkɛn kool yuarcɛ ne niini a pɔggɔny. Guonan ñiinnɛ menga ɔntɔ doki. Guonan neeniyɛ, ɛkɛ tolla a tollo. 5Ɔci ne ɛkkɛn kaacki jiju kooljiyɛ, malɛɛka bala ba ‘wana ḍiɛran gɛɛl yuarɛ ɛkkɛn bala ciyi kool taaŋɛti te taaŋŋa byerɔn. Ɛkɛ bala ɛŋi bworŋa galdan dɛki ne bɔwan, ɔci moong buayi ɛkɛ. 6Ɔci ɛkɛ gɔkcin ɛkkɛnti agi, “Naa ɛkkɛ yomgɔ buayi bɛɛ! Ɛkkɛ lieṭɛ Yaccu men ban Najarɛt, mena ŋaapci ma ñaalɔy. Ɛkɛ jɔŋŋin ñaalɔ doki. Ɛkɛ bala wɛnni moki bɛɛ! Gɔrtɛ nona ɛkɛ niinkiti may. 7Gɔṭṭɛ, ɔgdɛ ooddɛ, maka laldɛ Yaccu myettɛ, ɔci Butruc myettɛ daŋkun, Yaccu botcin ñamu ban Jaliil. Ɔci ɛkɛ mɔktɛ ɛkkɛ aŋan bala ba jyeka ɛkkɛ myennɛ ɛkɛ te ñamuy.” 8Ɔci moong kooyin bora te koolji, ɔci ɛkkɛn yiŋi ɔntɔ te kool wyeñɛti, acaan ɛkkɛn waakɛn ḍiedan. Ɛkkɛn yomgɛn buañi ne pɛñan. Ɔci ɛkkɛn men gɛɛl myetki yomu te naŋka neeni bɛɛ, acaan ɛkkɛn buayi. [ 9Ɔci te Oŋ Juaŋ te liid ṭɔɔl ḍiɛran, ne Yaccu jɔŋni ñaalɔ te koolji tɛɛti mokiyɛ, ɛkɛ warɛ lɛɛlnɛ bora ñamu Moryam Magdalinti. Moryam neeniyɛ, gena mena pɔŋnɛ Yaccu te jɔkin yeyin a dɔɔyɔ wyetkɛn ne yyɛɛwɔy. 10Ɔci maka bala i Yaccu te ñamuyɛ, ɛkkɛn yomgɛn yeyɔ, ɔci ɛkkɛn bala wiak men. Ɔci Moryam ati ɛkkɛn myennɛ. 11Yeti ne ɛkkɛn tieŋki jiek agi Yaccu baalɔ tɛɛtɔ, ɔci yuarnda ɛktayɛ, ɛkkɛn tieki jyeti jyek ɛkɛ bɛɛ. 12Ɔci ne baaṭi moki, ɛkɛ warɛ lɛɛlnɛ bora maka ne yyɛɛwɔti te wara parɛ ne ɛkkɛn balki atki bora pɔɔjɔy. 13Ɔci maka neeni dɔɔkkin ma ɛkkɛnti, ɔci Ma Kiṭɔ myetkɛ ɛkkɛn, yeti ɛkkɛn jyeti jyek ɛkkɛn bɛɛ. 14Ɔci ne baaṭi moki ɛkɛ warɛ lɛɛlnɛ bora Maka A Inyaakkɛn Wilin Ne Cyɛɛlɔti, ne ɛkkɛn balki omki, ɔci ɛkɛ gɔkcin ne pɛñan ɛkkɛnti te wyeñ tɛɛn ɛkkɛn, ɔci te jyeni booji ɛkkɛn te jɔŋŋin ɛkɛ jɔŋni ñaalɔ te koolji tɛɛti moki, ɔci te yuarŋa ɛkɛ yuarkiti may, acaan ɛkkɛn myetkɛ ma, yeti ɛkkɛn jyeti jyek ɛkkɛn bɛɛ. 15Ɔci ɛkɛ gɔkcin ɛkkɛnti agi, “Dala ɛkkɛ ɔgdɛ ooddɛ baan konɛti warda, ɔci dala ɛkkɛ lortɛ ma waakɛnda te jyeka wonkɛn jyeka pwadin neeni. 16Maka jyeddi jyeka neeni, ɔci ɛkkɛn bultan mayɛ, ɛkkɛn yɔɔdɛ Juaŋo. Maka jyeddi jyeka neeniti bɛɛyɛ, jiek bɛya ɛkkɛn wyetkɛnti, ɔci ɛkkɛn oltan ma maccu bana yaayan. 17Ɔci maka jyeddi ‘yatiyɛ, ɛkkɛn noŋdi naŋka ñyecki ma te yenti ‘ya, ɛkkɛn jɔkin yeyin kootan bora te ma yomgɛnti, ɔci ɛkkɛn gɔkti te tuk maka pookɛn. 18Ɔci ɛkkɛn kogi luoltan ñaalɔ te byeŋkɛn ɔci kan ɛkkɛn motti jan lien gɛɛlyɛ, jan lien noŋdi genga ɛkkɛnti bɛɛ. Ɔci ne ɛkkɛn byeŋkɛn topti maka waakɛn yeyintiyɛ, ɛkkɛn waakɛn pwaddi.” 19Ɔci ne Ciɛggɔn Yaccu gɔŋni ma ɛkɛti a ɔɔnyɛ, ɛkɛ oŋ eññɛ Juaŋ ñaalɔ pɔliji oŋo. Ɔci ɛkɛ cooccin Weegɛn taaŋɛti taaŋŋa byerɔn. 20Ɔci maka laldɛ Yaccu ati loṭi ma baan konɛ warda. Ɔci Ciɛggɔn bala moki ɛkkɛn te kanŋa, ɔci jyek ɛkkɛn ŋeecɔn ma a jyeka awarɛ te naŋka naŋtan ɛkkɛn a naŋka tɛyan.]

will be added

X\