Mark 15

1Ɔci te liidɔ gaciicin ḍwaŋin Ma Yahuud, ɔci cyekin, ɔci maka loṭi worga Juaŋ ɔci maka gɔṭi jiekyɛ, ɛkkɛn waakɛnda wyetkɛn ḍɔɔlɛ ne pɛñan moki bala gɔṭi jiek ɔci ɛkkɛn paŋi naŋi ɔci ɛkkɛn Yaccu ḍɛɛgɛ. Ɔci ɛkɛ eyɛ ɔntɔ ɔci ‘woñgi Bilaatuc men ma Ḍɔɔm ḍuaŋa ṭɔɔlɛ bieŋɛti aŋka nogda ɛkta. 2Ɔci ne ɛkɛ ookiti ma Bilaatuctiyɛ, Bilaatuc tooccin ɛkɛti agi, “I a Ciɛggɔn ma ɛkkɛ Ma Yahuud nɛ?” Ɔci Yaccu ṭwokcin ɛkɛti agi, “Ɛɛ, ‘ya baal a ɔɔn, ba jwalla guaga i wanna.” 3Ɔci gaciicin ḍwaŋin Ma Yahuud ɛkkɛn Yaccu jomgiyɔ agi Yaccu noŋŋɔ waka coŋgɔ. 4Ɔci ne Bilaatuc gɔrni Yaccu ṭwoŋni jwali gɛɛl aŋka yuoci warɛ te jyeka tɔɔmki Ma Yahuud ɛkɛ neeni bɛɛyɛ, ɛkɛ tooccin ɛkɛti moki agi, “I ṭwokka jwali gɛɛl ‘yati bɛɛ? I tieŋni jyeka guaktan ma te naŋki i naŋka coŋin neeni bɛɛ?” 5Yeti Yaccu bala ciyi lieda men ɔɔn. Ɔci Bilaatuc yomɛ buañi acaan Yaccu balki genga ḍwaŋɛti aŋka etti lien ɛkɛti bɛɛ. 6Yuonginda ne Iid Malɛɛka Lien Bɛɛn Goṭi A Gorŋ bɛɛdiyɛ, naŋki Bilaatuc bala a ɔɔn, maka bala ciginji men gɛɛl ne cyɛɛlɔ pɔktɛ ɛkɛ budan, wantan ma bɛɛ. Mena pɔktan ma neeniyɛ, gena mena Ma Yahuud buagitiy. 7Oŋ gɛɛltiyɛ, ma gɛɛg yookɔn te jyek akuuma, ɛkkɛn buagɔn dala jyek akuuma aga jyek ɛkkɛn pookɛn. Ɔci a ɔŋŋiyɛ, ɛkkɛn bala noowɔ. Ɔci maka ma nogɛ te oŋŋa ma nooki neeniyɛ, ɛkkɛn bala ciginji. Men gɛɛl bala ɛkkɛnti yenti Baraabac, ɛkɛ a ḍuaŋa maka nokkin ma neeni. 8Ɔci maka coŋin bɛɛn nona Bilaatucti. Ɔci ɛkkɛn bala tooci ɛkɛti te naŋki ɛkɛ, naŋka ɛkɛ mena ne cyɛɛlɔ pɔktɛ oŋkanda te oŋ iidy. 9Ɔci ɛkɛ ṭwokcin ɛkkɛnti agi, “Ɛkkɛ buagɛ ‘ya Yaccu Ciɛggɔn ɛkkɛ Ma Yahuud pɔkka?” 10Ɔci ɛkɛ tooccin gaciicin ḍwaŋin Ma Yahuudti a ɔɔn acaan ɛkɛ buagɔn jyek lyen Yaccu neeni cwamdɛ ɛkɛ pari bɛɛ. Acaan ŋeejɛ ɛkɛ Yaccu mugɛ Ma Yahuud, ɔci owwɛ ɛkɛti acaan ɛkkɛn korkɛn modɔ ɛkɛti. 11Yeti maka coŋin yookɔn te pɔkkin Yaccu, acaan gaciicin ḍwaŋin Ma Yahuud gɔkcin doki ɛkkɛnti agi dala ma toottɔ Bilaatucti te gena Baraabac. 12Ɔci Bilaatuc gɔkcin ɛkkɛnti moki, “‘Ya noŋja a ɔki te ‘wana bardɛ ɛkkɛ agi Ciɛggɔn Ma Yahuud neeni?” 13Ɔci ɛkkɛn bala yaadan agi, “Dala ɛkɛ ŋaaptɛ ñaalɔ!” 14Ɔci Bilaatuc gɔkcin ɛkkɛnti agi, “Gena naŋŋɛ ɛkɛ yaayan a gena?” Yeti ma ṭwokcin ɛkɛti ne pwadan bɛɛ. Yeti ɛkkɛn yaadan a yook ne tolan agi, “Dala ɛkɛ ŋaaptɛ ñaalɔ!” 15Ɔci Bilaatuc Baraabac pɔŋnɛ ɛkkɛnti, acaan ɛkɛ buagɔn dala ma yomgɛn pwaddi. Bilaatuc ackan ‘wonnɛ Yaccu byeŋkɛnti aŋka ḍuatan ɛkkɛn ɔci eetan ŋaaptan. 16Ɔci ne ackan Yaccu ḍuakitiyɛ, ɛkkɛn ɛkɛ eyɛ kaañji on ḍuaŋa ṭɔɔlɛ ona tolan, ɔci ɛkkɛn borcin ackan pookɛnti waakɛnda, ɔci ɛkkɛn bɛɛni. 17Ackan bala juoli Yaccu, ɔci ackan bworŋ cyɛgji bworŋa wiɛlɛ pɛñan bworŋa a buol ‘yɛɛŋji ɛkkɛn Yaccuti, ɔci kuwi paari ba til bala ba gena ‘yɛŋdɛ ḍuaŋa tolan ɔci ‘yɛɛŋji Yaccu wyeñɛti ɔci tañji iñɔ. 18Ɔci ɛkkɛn bala Yaccu yɔɔktan ciegɛn bala ba ackan ne noŋki ḍuaŋa ɛkkɛnti, ɔci ɛkkɛn bala juoli Yaccu ñiepi ɛkɛti agi, “Acc! I Ciɛggɔn Tolan Ma Yahuud, i baal ciyɛ!” 19Ɔci ɛkkɛn bala ḍwayi Yaccu wyetkɛ te pok waaŋgɛn, ɔci ɛkkɛn bala ŋuoṭi ñaang ɛkɛti, ɔci ɛkkɛn bala ḍwondi iñɔ ɛkɛ ñamɛti ba ḍwoñjin ma ḍwonti iñɔ cyekin ñomgɛnti ɔɔn. 20Ɔci ne ɛkkɛn juolki ɛkɛ ne ḍookkiyɛ, bworŋa wiɛlɛ pɛñan bworŋa a buol oŋ gwoddɛ ɛkkɛn bora oŋo. Ɔci ɛkɛ ɛɛŋgi bworŋin ɛkɛ dɔki. Ɔci ɛkkɛn bala ɛkɛ lwattan eetan nona ŋoopki ma ɛkɛy. 21Ɔci ɛkkɛn koogjin iki mena ‘uan gɛɛl yomɔ. Ɛkɛ bala bɛya te yielji bɛya baanji. (Mena neeni yenti Cimaan. Ɛkɛ a men maka ban Cayriin. Ɛkɛ a wey Alɛkcaandarn ɔci Ḍupacn.) Ɔci ackan neeni ɛkɛ iircɛ ɛkkɛn kɛṭi kakan Yaccu acaan Yaccu beelin ne tolan doki. 22Ɔci Yaccu eyɛ ma nona bartan ma agi “Gɔlgata.” (Te jyek Mabaan ma boṭi agi, “Oon men Baan Wyeñɛ.”) 23Ḍɔk jana cyɛyan ñaagɛyɔ ma i mooyo, ɔci ‘woñgi ma Yaccu, ɔci ɛkɛ motcin bɛɛ. Ɛkɛ kɛkcin. 24Ɔci Yaccu ŋaapci ma ñaalɔ, ɔci ackan bala oomi kɔla te jyek bworŋin ɛkɛ. Ɔci bworŋin Yaccu cieñɛ ɛkkɛn jitin. 25Yaccu ŋaapci ma ñaalɔ ne oŋ waŋɛ kuani ñaalɔy. 26Ɔci jyeka kiigin olji ma kakanti ŋaapci ma Yaccu wyeñɛti gɔki agi, “CIƐGGƆN TOLAN MA YAHUUD.” Acaan oŋkanda kan mena ŋaaptan ma ñaalɔyɛ, naŋki ɛkɛ kiittan ḍuattan ma kakan wyeñɛti. 27Yaccu ŋaapci ma ñaalɔ iki maka ɛyi ne yyɛɛwɔ, mena ne cyɛɛlɔ te ɛkɛ byeŋa aamo, ɔci mena ne cyɛɛlɔ te ɛkɛ byeŋa byerɔn. [28 Ba jyeka neeni jyeka kiigin, jyeka gɔki agi, “Ɛkɛ ñoowin i maka yeyin” aŋi jyeka awarɛ.] 29Ɔci maka bala goṭi pɔɔjɔyɛ, ɛkkɛn bala bɛṭi wyetkɛn, ɔci gɔki ne yaayan ɛkɛti agi, “Acc! I gɔk agi i yaakiti on Juaŋ ona tolan neeni laagayɔ, ɔci i gɔk agi i ejja ɛka woonɛ, ɔci i gɔk agi ɛkɛ ḍaga i nink ne ḍoogɔ! 30Dala i waru yɔya paru acca oŋo! Kooya iñɔ te kakanti!” 31Ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn bala juoli ɛkɛ daŋkun a ɔɔn. Ɛkkɛn bala gɔwwɔ yɔtin pookɛn agi, “Maka pookɛn yɔɔññɛ ɛkɛ, ɔci acca ɛkɛ kookinti te yɔɔd war ɛkɛ parɛ! 32Pari ɛkɛ a Kiṭɔ, Ciɛggɔn Ma Icrayiil bɛɛ? Dala ɛkɛ koodi iñɔ te kakanti, aŋka ikin gɔrtin ɔci jyettin ɛkɛti oŋo!” Ɔci maka ŋaapci ma ñaalɔ ne yyɛɛwɔ iki Yaccuyɛ, ɛkkɛn bala gɔki ne yaayan ɛkɛti daŋkun. 33Ɔci ne oŋ waŋɛ yɔɔnni yeccuyɛ, noon uli baan warda ɔɔn ne oŋ waŋɛ warɛ yiɛnnɛ ɔɔn. 34Ɔci ne oŋ waŋɛ warɛ yiɛnnɛyɛ, Yaccu yaajjin te pwana tolan agi, “Ɛlɔy, Ɛlɔy, lama cabaktani?” (Te jyek Mabaan agi, “Jwaŋ ‘ya, Jwaŋ ‘ya, i ‘ya dalna ogo?”) 35Ɔci maka yɔdi wɛnan gɛɛg tieŋŋin, ɔci ɛkkɛn gɔki agi, “Tieŋdɛ! Ɛkɛ boor Iliiya.” 36Ɔci men gɛɛl yiŋi, ɔci ɛkɛ liipa olnɛ mooyti, ɔci liipa neeniyɛ, umnɛ jaan tukɛti, ɔci laŋnɛ ñaalɔ Yaccuti aŋka ɛkɛ motti. Ɔci ‘wana neeni gɔki te yaalg agi, “Yɔɔddɛ lakun! Ikin gɔrtin ne Iliiya bɛɛdi, ɛkɛ oodɛ iñɔ te kakantiy!” 37Ɔci Yaccu yaajjin te pwana tolan, ɔci ɛkɛ tuuni. 38Ɔci bworŋa ŋaaptan ma ñaalɔ on Juaŋ ona tolanyɛ, ɛkɛ ḍañi jitin te ñaalɔ wyeñɛti ne iñɔ ɔɔn. 39Ḍuaŋa ackan gɛɛl bala yɔɔd Yaccu ñamɛti, ɔci ne ɛkɛ gɔrni Yaccu tuuni a ɔɔnyɛ, ɛkɛ gɔki agi, “‘wana neeniyɛ, ɛkɛ a Kaci Jwaŋa Tolan awarɛ, hay!” 40Ɔci moong gɛɛg daŋkun bala yɔdi gɔṭi te nona loonan. Gena Moryam Magdalin, ɔci Moryam mɛy Yaakub Ḍiɛran ɔci Yuocipn, ɔci Calɔɔmɛ bala daŋkun. 41Ɔci ne Yaccu baali ban Jaliilyɛ, moonga neeni bala booti ɛkɛti moki ɛkɛ. Ɔci moonga pookɛn moonga coŋin bala yɔdi gɔṭi daŋkun. Ɛkkɛn bɛɛn te ban Urcaliim iki Yaccu. 42Ne oŋ waŋɛ noŋi utti te Oŋŋa Yɔŋki Ma Waak Acaan Oŋ Cabityɛ, 43Yuocip men ma Ɛrimatiiya, ɛkɛ ati Bilaatucti, ɔci tooccin ɛkɛti te war Yaccu acaan ɛkɛ buagɔn Yaccu jogdɛ ne pɛñan wona men Oŋ Cabit bɛɛni bɛɛy. Yuocip neeniyɛ, ɛkɛ a men Maka Gɔṭi jiek iki maka ḍwaŋin daŋkun. Ɔci ma waakɛnda yomgɛn pwanna pwani ɛkɛti. Ɔci ɛkɛ bala kɛɛy bɛɛn cyɛgji Jwaŋa Tolan daŋkun. 44Ɔci Bilaatuc konɛ buañi ɔci gɔkcin agi, “Yaccu tuun doki lakun a ɔki?” Ɔci ɛkɛ gɔki agi dala ḍuaŋa ackan bɛɛdɔ ɛkɛti. Ɔci ḍuaŋa ackan ati ɛkɛti. Ɔci Bilaatuc tooccin ḍuaŋa ackanti te Yaccu agi, “Ɛkɛ tuun men boki?” 45Ɔci ne Bilaatuc tieŋni jyek ḍuaŋa ackan agi Yaccu tuunɔ dokiyɛ, ɛkɛ Yuocip ‘wonnɛ war Yaccu. 46Ɔci Yuocip wɛɛṭi bworŋa woonɛ bworŋa tɛyan, ɔci war Yaccu owwɛ ma iñɔ te kakanti, ɔci ɛkɛ paarŋɛ te bworŋa tɛyan neeni. Ɔci ɛkɛ war Yaccu joŋnɛ koolji. Gena kola wɔrŋɛ Yuocip poom konɛtiy. Ɛkɛ bala ba on ṭɔɔlɛ ɔɔn. Ɔci ɛkɛ poom gɛɛl olnɛ kool tukɛti. 47Moryam Magdalin ɔci Moryam a mɛy Yuocipn, ɛkkɛn bala gɔṭi, ɔci ɛkkɛn war Yaccu yuarcɛ nona niiñkiti may.

will be added

X\