Mark 14

1Iid gɔrki ma jyek Iid Malɛɛka Lien Bɛɛn Goṭi A Gorŋo, ɔci moki Iid Byedga Polan boottin menin neeni ŋoyɛti eci nink ne dɔɔyɔ wyetkɛn ne yyɛɛwɔ. Ɔci oŋŋa ma noŋti iidn neeni yaakkɛnyɛ, cɔɔllin doki, oŋki baaw nink ne yyɛɛwɔ men. Ɔci gaciicin ḍwaŋin Ma Yahuud ɔci maka loṭi worga Juaŋyɛ, ɛkkɛn bala lieṭi pɔya ɛkkɛn Yaccu muktiti, ɔci noktiti lieday. 2Ɛkkɛn gɔki agi, “Naa ɛkɛ muktin noktin te oŋ iid bɛɛ, acaan maka coŋin neeni nuula dita ikinti.” 3Yaccu ‘uobɛ ma amti ban Bɛtani on Cimaan mena naŋŋɛ cyɛco. Ɔci ne ɛkɛ baali omi amyɛ, mena ɛɛŋ gɛɛl bɛɛn eccin eelan wiɛlɛ tɛyan te luañgɔn ṭɔɔlɛ bɔwan. Eelan neeni a ñɔɔn jaan gɛɛl yenti nardiin. Ñɔɔna neeni labi ma i ñɔɔna parɛ gɛɛl bɛɛ. Gena nardiin parɛ. Ɔci luañgɔn ṭɔɔlɛ mwaññɛ ɛɛŋ tukɛti. (Ɔci eelan juonnɛ ɛkɛ Yaccu wyeñɛti acaan ɛŋa neeni bala poŋi te ḍɔŋ Yaccu ba mena wɛɛyi may.) 4Ma gɛɛg bala, ɔci ɛkkɛn looñi te naŋki ɛŋa neeni, ɔci ɛkkɛn gɔgjin yɔtin agi, “Eelan neeni ñiennɛ ɛkɛ ɔntɔ budan ogo yeti? 5Dala te eelan neeni wiɛlninŋɔ ikin te bilk ne coŋɔn, ɔci te ‘wonnin maka bɔwan oŋo!” Ɔci ɛkkɛn bala wooki ɛɛŋ men ɔɔn. 6Ɔci Yaccu gɔkcin ɛkkɛnti agi, “Ɛkkɛ ɛɛŋ daldɛ, hay! Ɛkkɛ wookɛ ɛkɛ a ɔɔn budan ogo? Ɛkɛ noŋi gena pwadan ‘yati. 7Maka bɔwan balgi iki ɛkkɛ yuonginda ɔɔn, ɔci oŋŋa ɛkkɛ buagɛ ɛkkɛn magdɛyɛ, ɛkkɛn bala doki, ɔci ɛkkɛ yaakɛti ɛkkɛn magdɛ ɔɔn. Yeti ‘ya balkin iki ɛkkɛ yuonginda bɛɛ. 8Ɛkɛ noŋi ba naŋka ŋeejɛ ɛkɛ waakɛnda. Ne ‘ya jokkata ma men bɛɛyɛ, war ‘ya naŋŋɛ ɛkɛ te eelan doki, bala ba naŋka naŋtan ma ne ma tuutiy. 9Gɔṭṭɛ, noon wardayɛ, nona maka loṭi ma te jyek ‘yayɛ, ɔci jyek ɛŋa neeni ooddi daŋkun, ɔci ma ñingɛn ñiektan te naŋki ɛkɛ.” 10Ɔci Yahuuja Ickɛɛryuti mena akki Ma A Inyaakkɛn Wyetkɛn Ne Yyɛɛwɔyɛ, ɛkɛ ati gaciicin ḍwaŋin Ma Yahuudti, ɔci gɔkcin ɛkkɛnti agi, “‘Ya bɛɛn acaan ‘ya buaga Yaccu ‘wondin ɛkkɛ byeŋkɔti.” 11Ɔci ne ɛkkɛn tieŋki jyek ɛkɛyɛ, ɛkkɛn yomgɛn ñɔɔna ñɔɔno, ɔci ɛkkɛn gɔkcin Yahuujati agi, “Kan i noŋja a ɔɔn i ‘wonti ɔɔn bilko.” Ɔci Yahuuja bala lieṭi pɔya ɛkɛ Yaccu ‘wondɛ ma byeŋkɛntiy. 12Ɔci oŋ iid bɛɛn doki. Gena ninna ma jɔɔtti omki byedga polan neeni. Te ninna neeni ma ŋooṭi kulin ṭɔlgɛn daŋkun te Iid Malɛɛka lien Bɛɛn Goṭi A Gorŋo. Ɔci te oŋŋa neeniyɛ, maka laldɛ Yaccu tooccin ɛkɛti agi, “I buagi ɔɔn ooddɔn wak iid ywaŋdɔnyɔ ɔɔn wɛnɛ te ikin?” 13Ɔci maka laldɛ Yaccu cuuññɛ ɛkɛ ne yyɛɛwɔ, ɔci ɛkɛ gɔkcin ɛkkɛnti agi, “Dala ɛkkɛ ɔgdɛ ooddɛ ban Urcaliimji, ɔci ɛkkɛ koogdɛ i mena ‘uan gɛɛl kɛṭi pieg te kuñŋan. Ɛkkɛ boottɛ ɛkɛ ŋoyɛti. 14Ɔci ona kaatti ɛkɛyɛ, dala ɛkkɛ gɔktɛ on weegɛnti agi mena loṭi ma bala tooci agi, ‘Ba ona cootta ‘ya a on wɛlg bɛ? Acaan ‘ya buaga noŋdɔn iid i maka laldi ‘yay.’ 15Ɔci ɛkɛ ɛkkɛ myettɛ te ona tolan ñaalɔ. Ona neeni ywaŋŋɛji ɛkɛ doki, ɔci dala ɛkkɛ wak iid ywaŋdɛyɔ te ikin aŋan.” 16Ɔci maka laldɛ Yaccu jɔŋŋin, ɔci ati ban Urcaliimji, ɔci ɛkkɛn yɔṭi on ba jwalla guaŋŋɛ Yaccuy. Ɔci ɛkkɛn wak iid ywaŋɛyɔ aŋan. 17Ɔci ne oŋ waŋɛ luunni iñɔyɛ, Yaccu bɛɛn nona noŋki ma iid i Maka A Inyaakkɛn Wyetkɛn Ne yyɛɛwɔy. 18Ɔci ne ɛkkɛn balki omkiyɛ, Yaccu gɔkcin ɛkkɛnti agi, “Gɔṭṭɛ, men gɛɛl bala ɛkkɛti wɛnni mena omin iki ‘ya a cyɛɛlɔy, ɔci ɛkɛ ‘ya ‘wonda maka yookɔn te ‘ya byeŋkɛnti.” 19Ɔci maka laldɛ ɛkɛ yomgɛn yeyɔ te jyeka neeni, ɔci ɛkkɛn bala tooci Yaccuti agi, “A ‘ya?” Gɔ menan moki toocci ɔɔn. 20Ɔci ɛkɛ gɔkcin ɛkkɛnti agi, “Gena men gɛɛl te ɛkkɛti Maka A Inyaakkɛn Wyetkɛn Ne Yyɛɛwɔ neeni, mena ‘uottin iki ‘ya am golŋa ne cyɛɛlɔy. 21’Ya Kaci Ma Baan tuud ba jyeka kiiwɛ ma te ‘ya, yeti mena ‘ya ‘wonda ma byeŋkɛnti neeniyɛ, taab bɛya ɛkɛtiyɛ, tol tolo! Dala naa te ɛkɛ jiennɛ mɛɛgɛn bɛɛ!” 22Ɔci ne ɛkkɛn balki omki menyɛ, Yaccu byentan gɛɛl luullɛ, ɔci ɛkɛ cɔkcin Juaŋti, ɔci byentan neeni wɛɛnnɛ jitin, ɔci ɛkɛ maka laldɛ ɛkɛ ‘wonnɛ byentan. Ɔci ɛkɛ gɔkcin ɛkkɛnti agi, “Antɛ omdɛ. Gena war ‘ya.” 23Ɔci ɛkɛ kubaaya pyeg luutkin luullɛ, ɔci ne ɛkɛ gɔŋni a pwatcin Juaŋtiyɛ, ɛkɛ ma ‘wonnɛ kubaaya, ɔci ɛkkɛn waakɛnda motcin waka bala kubaaya konɛti neeni. 24Ɔci Yaccu gɔkcin ɛkkɛnti agi, “Pyeg luutkin neeniyɛ, gena yimg ‘ya, yimga kɛɛdi iñɔ aŋka yuoci maka coŋin te nɔji ɛkkɛny. Ɔci te yimg ‘ya neeniyɛ, jyeka ḍuaññɛ Juaŋ te yɔɔt ma neeniyɛ, cɔmdi bora awarɛ. 25’Ya gɔkka ɛkkɛti awarɛ, ‘ya motca pyeg jang ṭɔlgɛn acca wɛnni moki bɛɛ, ‘ya cied budan ɔɔn ne ‘ya motta ɛkkɛn wonkɛn ɛkkɛn pookɛn ɛkkɛn pwadin ban Juaŋ ɔɔn.” 26Ɔci ne ɛkkɛn ‘ualki ɔɔli gɛɛlyɛ, ɛkkɛn kaaccin bora ɔci ati Pom Jɛtuunti. 27Ɔci Yaccu gɔkcin ɛkkɛnti agi, “Ɛkkɛ buadɛ waakida ɔci yooŋdɛ ɔntɔ. ‘Ya daldata ɛkkɛ paru bala ba jyeka kiigin agi, ‘Mena cieti kulin noktan ma ɔci kulin cyɛndi jitin.’ 28Yeti ne ‘ya jɔlda ñaalɔyɛ, ‘ya ootta ban Jaliil botca ñamu. Dala ɛkkɛ bɛɛdɛ aŋan.” 29Ɔci Butruc gɔkcin ɛkɛti agi, “Kan ɛkkɛn waakɛnda buayayɛ, ‘ya i daldin bɛɛ!” 30Ɔci Yaccu gɔkcin ɛkɛti agi, “‘Ya gɔkka iti awarɛ, te ween jiña neeni ne tuan wiakti oŋki ne yyɛɛwɔ men bɛɛyɛ, i doki kɛkka te ‘ya oŋki ne ḍoogɔ.” 31Ɔci Butruc gɔkcin ne pɛñan agi, “Hay, kan ma buagɔn noki ‘ya iki iyɛ, ‘ya kɛkka te i bɛɛ!” Ɔci maka laldɛ Yaccu waakɛndayɛ, ɛkkɛn bala gɔki a ɔɔn daŋkun. 32Ɔci ɛkkɛn ati nona bartan ma a Gɛtcɛɛmani Pom Jɛtuunti, ɔci ɛkɛ gɔkcin maka laldɛ ɛkɛti agi, “Ɛkkɛ coottɛ wɛnni. ‘Ya ootta ñamu cɔkca Juaŋti.” 33Butruc ɔci Yaakub ɔci Yɔhanna, ɛkkɛn eññɛ Yaccu, ɔci Yaccu yomɛ moottan ne pɛñan, ɛkɛ yomɛ yaayɛ ne tolan. 34Ɔci ɛkɛ gɔkcin ɛkkɛnti agi, “‘Ya yomu yaayɛ ne tolan, bala ba ‘ya tuuda tuun doki no. Dala ɛkkɛ yaddɛ te wɛnni, ɔci dala ɛkkɛ woŋgɔ tiittɛ.” 35Ɔci ɛkɛ ati ñamu ne ḍiɛran ṭɔɔlɛ ɔci ɛkɛ warɛ yiɛmnɛ iñɔ ṭɛɛrji, ɔci ɛkɛ cɔkcin Juaŋti agi kan Juaŋ buagdayɛ, dala te taab neeni eedda ɔntɔ te ɛkɛti. 36Ɛkɛ gɔkcin Juaŋti agi, “Wey ɔɔn, i tɛɛkki genga bɛɛ. Naa taab lien neeni bɛya ‘yati bɛɛ. Yeti ‘ya cɔkka iti ba yom ‘ya bɛɛ, ‘ya cɔkka iti ba yom i.” 37Ɔci ɛkɛ bɛɛn dɔɔkkin nona maka ne ḍoogɔ neeniti, ɔci ɛkɛ ɛkkɛn mɔŋnɛ wici. Ɔci ɛkɛ gɔkcin Butructi agi, “Butruc, i baal wiccɛ? I yaakiti waŋu tiicca te oŋ waŋɛ gɛɛl ne cyɛɛlɔ bɛɛ?” 38Ɔci ɛkɛ gɔkcin ɛkkɛnti agi, “Woŋgɔ tiittɛ, dala ɛkkɛ cɔktɛ Juaŋti aŋka naa ɛkkɛ buadɛ bɛɛ. Ɛkkɛ yomgɔ buagɔn jyek ‘ya, yeti ɛkkɛ waakɔ tɛɛcin pookɔ bɛɛ.” 39Ɔci Yaccu ati, ɔci ɛkɛ cɔkcin moki. Ɔci ɛkɛ gɔkcin ba jwalla guaŋŋɛ ɛkɛ te ñamu ɔɔn. 40Ɔci ne ɛkɛ bɛɛni mokiyɛ, ɛkɛ ma mɔŋnɛ wicɔ moki. Ɔci ɛkkɛn yaakinti ṭwokcin jwali gɛɛl ɛkɛti ne pwadan te nink ɛkkɛn neeni bɛɛ. 41Ɔci ɛkɛ bɛɛn oŋki aŋi ne ḍoogɔ, ɔci ɛkɛ gɔkcin ɛkkɛnti agi, “Ɛkkɛ ningɛ wiccɛ moki? Nink kapa ɔɔn. Gɔṭṭɛ! Naŋka guaŋi ‘ya bɛɛn doki. ‘Ya Kaci Ma Baan baal byeŋki maka yookɔn te ‘ya doki. 42Gɔṭṭɛ! Mena ‘ya ‘wonda ma byeŋkɛnti bɛɛn doki. Jɔŋdɛ ñaalɔ, oottin kooktinti!” 43Ɔci ne Yaccu baali gɔki a ɔɔn menyɛ, Yahuuja Ickɛɛryuti bɛɛn doki. Ɔci ma bɛɛn i ɛkɛ kɔɔna kɔɔnno. Ɛkkɛn bala eci byeŋgaaran byeŋkɛnti, ɔci eci gɔlk byeŋkɛnti. Maka neeniyɛ, bɛɛn te jyek gaciicin ḍwaŋin Ma Yahuud ɔci te jyek maka loṭi worga Juaŋo, ɔci te jyek cyekin. 44Mena Yaccu ‘wondɛ ma byeŋkɛntiyɛ, ɛkɛ jiek naŋɛ iki ma te ñamu agi, “Mena ñiibdi ‘ya te tuku ba naŋki ma ikinyɛ, gena ɛkɛ. Ɛkɛ mugdɛ, ɔci eedɛ ne pwadan.” 45Ɔci ne Yahuuja bɛɛniyɛ, ɛkɛ ati Yaccuti ne pɛñan. Ɔci ɛkɛ ñiimmɛ te tukɛ, ɔci gɔkcin ɛkɛti agi, “Mena loṭi may!” 46Ɔci ɛkɛ mugɛ ma doki ɔci tieki ne pɛñan. 47Ɔci men gɛɛl bala yɔɔd nona mati, ɔci ɛkɛ byeŋgaaran dɔnnɛ bora te kuorjɛji, ɔci ɛkɛ kɛɛngɔn gaciic tolan Ma Yahuud jyɛmmɛ jyeñɛti, ɔci ɛkɛ jyeñɛ palnɛ bora. 48Ɔci Yaccu gɔkcin ɛkkɛnti agi, “Ɛkkɛ bɛɛnɛ ennɛ byeŋgaaran ɔci gɔlk byeŋkɔti, aŋka ‘ya mugdata ɛkkɛ ba muŋi mena ɛɛn ogo? 49Oŋkanda, ‘ya baal on Juaŋ ona tolan neeni lor ɛkkɛ bɛɛ? Ba ɛkkɛ ‘ya muŋŋata bɛ? Yeti acca dala naŋka neeni bɛya bora ba jyeka kiigin.” 50Ɔci maka laldɛ Yaccuyɛ, Yaccu dalji ɛkkɛn ɔntɔ waakɛnda. Ɛkkɛn yiŋi ɔntɔ. 51Ɔci kaalgɔn ṭɔɔlɛ gɛɛl bala booti Yaccuti nona ecki ma Yaccuy. Ɛkɛ bala pooṭi bworŋa tɛyan warɛti. Ɔci ɛkɛ mugɛyɔ ma te bworŋo, 52ɔci ɛkɛ bworŋa neeni pɔŋnɛ, ɔci ɛkɛ yiŋi ɔntɔ warɛ budan. 53Ɔci Yaccu lwadɛ eyɛ ma nona ciyi gaciic tolan Ma Yahuud. Ɔci gaciicin ḍwaŋin Ma Yahuud mɔkci wyetkɛn ḍɔɔlɛ doki i cyekin i maka loṭi worga Juaŋ ɔɔn. 54Ɔci Butruc bala ati booti Yaccuti te ŋoyɔ parɛ. Ɛkɛ ati booti ɛkɛti ɔɔn ne kaañji ɔɔn. Gena kañ gaciic tolan Ma Yahuud. Ɛkɛ bala ciyi iki maka kanŋan i gaciic tolan Ma Yahuud, ɛkɛ bala ooyi maccu acaan ɛkɛ ñiyɛ ma meni ne ɛkɛ agi men Yaccu bɛɛ. 55Gaciicin ḍwaŋin Ma Yahuudyɛ, ɛkkɛn iki maka gɔṭi jiek waakɛndayɛ, ɛkkɛn bala lieṭi pɔya nokki ɛkkɛn Yaccuy, ɔci pɔya ɛkkɛn Yaccu nokkiti baawo. 56Maka coŋinyɛ, ɛkkɛn Yaccu jomgiyɔ, yeti jyeka guaktan ɛkkɛn neeniyɛ, a jyeka ne cyɛɛlɔ bɛɛ. 57Ɔci ma gɛɛg jɔŋŋin ñaalɔ jyek Yaccu aagɛyɔ ɛkkɛn te jyek on Juaŋ ona Tolan agi, 58“Ɔɔn tieŋnɔn jiek te tuk Yaccuti ne ɛkɛ gɔki te on Juaŋ ona Tolan, ona cɔdɛ ma te byeŋkɛn neeni, agi on laakci ɛkɛ bora, ɔci agi ɛkɛ cɔtci ona pardan, ɔci agi on ḍagji nink ne ḍoogɔ, ɔci agi ona neeni ma cɔti te byeŋkɛn bɛɛ.” 59Ɔci ne ɛkkɛn balki gɔkki a ɔɔnyɛ, ɛkkɛn ñoowin te jiek bɛɛ. Ɛkkɛn kɛɛptin jitin te jieko, menga da te jyek ɛkɛ, ɔci menga da te jyek ɛkɛ. 60Ɔci gaciic tolan Ma Yahuud jɔŋŋin ñaalɔ, ɔci yɔɔtcin ma ñomgɛnti waakɛnda, ɔci ɛkɛ tooccin yieci Yaccuti agi, “I ṭwokka jwali gɛɛl bɛɛ? Jyeka i tiakkitiyɔ ma neeni a jyeka awarɛ?” 61Ɔci Yaccu cien lieda, ɛkɛ gɔkcin genga bɛɛ. Ɔci gaciic tolan Ma Yahuud tooccin ɛkɛti moki agi, “I gɔk i a Kiṭɔ? I a Kaci Jwaŋa Tolanɛ?” 62Ɔci Yaccu ṭwokcin ɛkɛti agi, “Ɛɛ, gena ‘ya.” Ɔci ɛkɛ gɔkcin agi, “Ne baaṭi ‘ya Kaci Ma Baan yuartata ɛkkɛ ciy Mena Tolan taaŋɛti taaŋŋa byerɔn, ɔci ‘ya yuardata ɛkkɛ oŋŋa ‘ya bɛɛda te pɔlla dɛki ne bɔwany.” 63Ɔci gaciic tolan Ma Yahuud bworŋin ɛkɛ Jiɛññɛ jitin te loñko, ɔci ɛkɛ gɔkcin mati agi, “Ikin buagin ma bɛya tɛkti jiek ikinti moki ogo? 64Ɛkkɛ tieŋnɛ ne ɛkɛ Juaŋ ḍaarŋiyɔ bɛɛ? Oŋ acca yomg ɛkkɛ bala a ɔki, pari jyeka liltin ikin neeni bɛɛ?” Ɔci ɛkkɛn waakɛnda gɔki agi dala ɛkta tuudɔ te jyeka yeyin neeni. 65Ɔci ma gɛɛg bala ŋuoṭi ñaang ɛkɛti. Ɔci ɛkkɛn Yaccu kwomgɛ bworŋ ñingɛti, ɔci ɛkkɛn bala jiebi ɛkɛ, ɔci ɛkkɛn gɔkcin ɛkɛti agi, “Mena i jyɛmmi neeni ŋeejɛ? Gɔkca.” Ɔci ackanyɛ, ne ɛkkɛn balki gɔrki Yaccuyɛ, ɛkkɛn bala jiebi ɛkɛ te byeŋkɛn. 66On kona gɔrki ma jiek bala ñaalɔ, ɔci Butruc ɛkɛ bala iñɔ kaañji. Ɔci mena kanŋan i gaciic tolan Ma Yahuud mena ṭɔɔl gɛɛl bɛɛni. 67Ɔci ne ɛkɛ Butruc yuarnɛ baali ooyi maccuyɛ, ɛkɛ bala gɔṭi ḍɛɛṭi ɛkɛ, ɔci gɔkci ɛkɛti agi, “I daŋkun balgi iki Yaccu men ma Najarɛt, hay!” 68Yeti Butruc kɛkcin agi, “Mena guaga i neeni ŋeej ‘ya bɛɛ.” Ɔci Butruc yɔɔtcin kaañ tukɛti, ɔci te wɛnni tuan wiakcin doki. 69Ɔci ɛkɛ yuarnɛ ṭɔɔl kaañ tukɛti, ɔci ṭɔɔl gɔkcin maka yɔdi nona neeniti moki agi, “‘Wana neeniyɛ, ɛkɛ a men ɛkkɛn daŋkun.” 70Yeti Butruc kɛkcin moki. Ɔci ne ḍiɛran ṭɔɔlɛ moki maka yɔdi nona neeniti gɔkcin Butructi agi, “I a men ɛkkɛn hay! Acaan i daŋkun a men maka ban Jaliil ban Yaccun.” 71Ɔci Butruc bala gɔki ɔṭi warɛ te yenti Juaŋ agi, “‘Ya gɔk ɛkkɛti awarɛ. ‘Wana guagdɛ ɛkkɛ neeniyɛ, kwoy ‘ya. Kan ‘ya gɔk awarɛ bɛɛyɛ, dala Juaŋ Tolan noŋdi ne yaayan ‘yati.” 72Ɔci ne pɛñan tuan wiakcin oŋki aŋi ne yyɛɛwɔ doki. Ɔci Butruc ñingɛ ñieŋnɛ te jwalla guaŋŋɛ Yaccu agi, “Ne tuan wiakti oŋki ne yyɛɛwɔ men bɛɛyɛ, i doki kɛkka te ‘ya oŋki aga ne ḍoogɔ.” Ɔci Butruc yomɛ yaayɛ, ɔci bala wiak ne yaayan.

will be added

X\