Mark 13

1Ɔci ne ɛkkɛn kooki bora te on Juaŋ ona tolanyɛ, mena laldɛ ɛkɛ gɛɛl gɔkcin ɛkɛti agi, “Mena loṭi may, gɔrca gwoyya nɛ. Hay! Hay! Ɛkkɛn ḍwaŋgin a ḍwaŋgin ɔci pwanna pwani bɛɛ? Ɔci oorga ḍwaŋin ɛkkɛn daŋkun pwanna pwanno!” 2Ɔci Yaccu gɔkcin ɛkɛti agi, “I poŋ a oorga neeni ḍwaŋɔ pari bɛɛ? Gɔṭṭi, ne oŋ gɛɛltiyɛ, ɛkkɛn laaktan ma ɔntɔ, ɔci guonan gɛɛl niindi menin parɛti bɛɛ. Ɛkkɛn yiɛptan ma iñɔ waakɛnda.” 3Ɔci ne ɛkkɛn ḍoñi jyɛtkɛtiji ɔci dɛñki Pom Jɛtuuntiyɛ, Yaccu cooccin iñɔ poom wyeñɛti tɛrin ñin i on Juaŋ ona tolan ban Urcaliim. Ɔci Butruc ɔci Yaakub, ɔci Yɔhanna ɔci Andarawuc tooccin ɛkɛti lieda agi, 4“Ɔɔn myettɔn jyeka guaŋŋi i te oorg neeni bɛya bora ne tua? Ne naŋka neeni noŋi bɛɛdi borayɛ, oŋ ñiitin ikin te gena?” 5Ɔci Yaccu gɔkcin ɛkkɛnti agi, “Gɔṭṭɛ! Dala ɛkkɛ woŋgɔ tiittɛ aŋka naa ɛkkɛ jyɛttɛ menga ɔntɔ bɛɛ. 6Acaan maka coŋin gɛɛg bɛya, ɔci ɛkkɛn gɔkti agi ɛkkɛn aginti ‘ya Kiṭɔ awarɛ. Ɔci a ɔŋŋiyɛ, ɛkkɛn maka coŋin jyɛttan ɔntɔ. 7Ɔci ne ɛkkɛ tieŋdɛ ma gɔkki agi lañ baalɔ ɔci agi ywobji baalɔyɛ, naa ɛkkɛ buayɛ ne tolan bɛɛ. Naŋka bala a ɔɔn wanna bɛya waakɛnda, yeti jiek wyetkɛn bawwin men bɛɛ. 8Keedin wɛɛn warda noogdi yɔtin oŋkanda. Ɔci bonka pookɛn gɛɛgtiyɛ, ṭɛɛr warɛ ḍieddi ne pɛñan, ɔci koñ moki bɛya mati. Taab neeniyɛ, gena taab ñamu, naŋka neeni bɛya ne cwakanti kwatti bɛɛ. 9“Dala ɛkkɛ woŋgɔ tiittɛ te yomg ɛkkɛ, ɔci yomgɔ tiektɛ, acaan ɛkkɛ ‘wontɛ ma maka gɔṭi jiek byeŋkɛnti, ɔci ɛkkɛ ḍuatɛ ma orɔ oorga morki ma Juaŋy. Ɔci ɛkkɛ yɔɔttɛ ma cyekin ṭɔlgɛn ñomgɛnti, ɔci cyekin ḍwaŋin ñomgɛnti moki, acaan ɛkkɛn lwogdɛ ɛkkɛ te jyek ‘ya. 10Yeti jyeka wonkɛn jyeka pwadin neeniyɛ, ɛkkɛn ooddi bonk jitkɛnti waakɛnda ñamu lakun. 11“Ɔci ne ɛkkɛ eetɛti ma noŋtɛti ma godanyɛ, naa ɛkkɛ poŋɛ jiek ñamu agi ɛkkɛ gɔktɛ a ɔki bɛɛ. Ne godan baali dokiyɛ, dala ɛkkɛ gɔktɛ jyeka ɛkkɛ ‘wondi Juaŋy, acaan gena ɛkkɛ gɔkɛ jyeka neeni bɛɛ, gena Boŋ Jwaŋa Tolan cuondɛ ɛkɛ, ɔci ɛkɛ aŋka gɔkti te tuk ɛkkɛy. 12“Ɔci ma waakɛnda yooktan te ɛkkɛ te jyek ‘ya. Ɔci ne oŋŋa wanna bɛɛdiyɛ, maka ‘uay gɛɛg yooktan te modg ɛkkɛn, ɔci tiaktanyɔ ɛkkɛn, ɔci noktan mako. Ɔci weyi gɛɛg moki yooktan te kɛɛgin ɛkkɛn. Ɔci kɛɛgin gɛɛg yooktan te weyyɛn ɔci te mɛyyɛn moki, ɔci ɛkkɛn noktan ma te jyek kɛɛgin ɛkkɛn. Yeti mena yɔɔda ne tɛyan ne oŋŋa bɛya ookti ne ŋoyɔyɛ, ɛkɛ aŋka yɔɔdɛ Juaŋo. 14“(Ɛkkɛ, maka poki worga nɛ, dala ɛkkɛ tieŋdɛ jyeka guaŋŋɛ Yaccu neeni ne pwadan.) “Ne ɛkkɛ gɔrtɛ ‘Naŋka yaayan ne yaajan’ yɔɔtti nona pwadanti, nona ɛkɛ naan te yɔɔtti wɛnan bɛɛyɛ, ɔci kan ɛkkɛ balgɛ ciyɛ ban Yahuudiyayɛ, dala ɛkkɛ yooŋdɛ pomk jitin ne pɛñan, naa ɛkkɛ kwattɛ bɛɛ. Naŋka neeni bɛya a yuurgɔn. 15Ɔci kan men gɛɛl bala bora ne naŋka neeni bɛɛdiyɛ, naa ɛkɛ kaatti orɔ, ɔci wak ɛkɛ gɛɛg eedɛ bɛɛ. Dala ɛkɛ aŋka ɔga yooŋdi ne pɛñan. 16Kan men gɛɛl bala yieljiyɛ, naa ɛkɛ yooŋdi nona bworŋin ɛkɛ ḍuannɛ wanna bɛɛ. Dala ɛkɛ yooŋdi ne pɛñan. 17Oŋka bɛya yeyin neeniyɛ, pɛñcin ne tolan moonga laciti ɔci moonga kɛɛggɛn ḍyɛrinti. 18Dala ɛkkɛ cɔktɛ Juaŋti aŋka naa taab neeni bɛya i ponk kuuda a cyɛɛlɔ bɛɛ. 19Te oŋŋa bɛya wannayɛ, taab pɛñña pɛñño. Oŋŋa Juaŋ okki noon ɔci ne acca ɔɔnyɛ, taab bala ba taab neeniyɛ, gɛɛl bɛɛn oŋgati men bɛɛ. Ɔci ne baaṭi taab neeni bɛya moki bɛɛ. 20Kan te Juaŋ oŋŋa neeni naŋŋi ne ḍuulan bɛɛyɛ, te menga yaakinti uda a ɔŋŋi bɛɛ. Acaan Jwaŋa Tolan poŋi te jyek ma ɛkɛ maka kɛnnɛ ɛkɛ boray, ɛkɛ gɔki agi dala nink taab neeni ḍuldɔ. 21“Ɔci te oŋŋa bɛya wannayɛ, kan men gɛɛl gɔkti ɛkkɛti agi ɛkkɛ gɔrcɛ Kiṭɔ baali wɛnniyɛ, walla moki agi ɛkkɛ gɔrcɛ Kiṭɔ baali aŋanyɛ, naa ɛkkɛ jyeddɛ jyek ɛkɛ bɛɛ, 22acaan maka gɔki agi ɛkkɛn aginti Kiṭɔ ba ‘ya mena cuonnɛ Jwaŋa Tolan neeniyɛ, ɔci maka gɔki agi ɛkkɛn aginti bɔwan Juaŋyɛ, ɛkkɛn bɛya, yeti ɛkkɛn men gɛɛl a Kiṭɔ waanɛ bɛɛ, ɔci ɛkkɛn a bɔwan Juaŋ woodgɛn bɛɛ. Ɔci ɛkkɛn noŋdi naŋka ñyecki ma ɛkkɛn, naŋka tɛyan, aŋka ma gɔrti ɔci bootti ɛkkɛnti amaam ɔɔn. Ɔci ɛkkɛn buagɔn ɛkkɛ ma ‘ya naŋtan ñin daŋkun kan ɛkkɛn ‘yektiy. 23Acaan a ɔŋŋiyɛ, dala ɛkkɛ woŋgɔ tiittɛ. ‘Ya ɛkkɛ myennin te jyeka neeni waakɛnda ne jyeka neeni men baakiy. 24“Tieŋdɛ te jyek war ‘ya daŋkun te oŋŋa bɛya wannayɛ, ne taab pɛñan neeni baadiyɛ, ‘Oŋ waŋɛ ula, ɔci paan moki dɛkti ne pwadan bɛɛ, 25ɔci kɛltan ḍɛɛmdi te ñaalɔ gɔ ɛkan moki ḍɛmmi ɔɔn. Ɔci waka bala ñaalɔ ɛkkɛn waakɛn ḍieddi waakɛnda.’ 26“Hayya, ‘ya Kaci Ma Baan oŋ yuarta ma baal bɛɛd te pɔllo. ‘Ya bɛɛd ba Ciɛggɔn Tolan, ɔci nona ñaalɔ dɛki pwanna pwanno. 27Ɔci ‘ya malɛɛkan ‘ya cuoñña baan warda, ñaalɔ ɔci iñɔ ne pɔli ŋwayɛti ɔɔn, ɔci ɛkkɛn maka kɛññan ‘ya borayɛ, limtanyɔ ‘yati nona ne cyɛɛlɔ. 28“Ɔci Yaccu gɔkcin moki agi, jyek ŋuami bala a ɔki? Jyek ŋuami ne ɛkɛ pwordiyɛ, ɛkɛ etti jyeyya wonkɛn, ɔci ŋeejɛ ɛkkɛ noon aŋi ḍuoŋ tukɛ doki. 29Ne ɛkkɛ gɔrtɛ naŋka neeni ne bɛɛti borayɛ, dala ŋeeddɛ ɛkkɛ acaan oŋŋa ‘ya Kaci Ma Baan bɛɛdayɛ, cɔɔllin doki, looncin moki bɛɛ. 30’Ya gɔkka ɛkkɛti awarɛ, naŋka neeni bɛya bora waakɛnda ne maka bala acca men balki ɔɔn. 31Pɔlla ñaalɔ ɔci ṭɛra iñɔ baadi. Yeti jyek ‘ya bɛya bora waakɛnda lakun. 32“Oŋŋa ‘ya Kaci Ma Baan bɛɛdayɛ, ŋeejɛ menga bɛɛ, ɔci kwoyɔn malɛɛkan ñaalɔ daŋkun, ɔci moki kwoy ‘ya Kaci Jwaŋa Tolan daŋkun. Oŋŋa neeni ŋeejɛ gena Wey ɛkkɛn parɛ.” 33Yaccu ma ṭyɛllɛyɔ moki agi, “Dala ɛkkɛ woŋgɔ tiittɛ oŋkanda ne pwadan acaan oŋŋa bɛya neeniyɛ, kwoyɛ ɛkkɛ. 34Jyeka neeni bala ba jyek ‘wana ooddi bana parɛ bana loonan. Ɔci ne ɛkɛ bwagdi woonyɛ, ɛkɛ gɔkti maka kanŋan ɛkɛti te ñamu te jyek kanŋa, men da ‘wondɛ ɛkɛ kanŋa, men da ‘wondɛ ɛkɛ kanŋa. Ɔci on weegɛn gɔkti mena kanŋan ɛkɛti, mena gɔṭi on tukɛti agi dala ɛkta waŋdan tiitta te oŋŋa ɛkɛ on weegɛn dɔɔkciy. 35Ɔci ba jyeka neeniyɛ, dala ɛkkɛ woŋgɔ tiittɛ daŋkun ba men kanŋa mena gɔṭi on tukɛ neeni! Acaan oŋŋa ‘ya bɛɛdayɛ, ŋeeddɛ ɛkkɛ bɛɛ, kan ‘ya bɛɛd ne tɛɛnɔ, walla ne weenji, ɔci walla ne tinnɔ, ɔci walla ne liidɔyɛ, kwoyɛ ɛkkɛ. 36Dala ɛkkɛ woŋgɔ tiittɛ, kan ‘ya bɛɛd ne pɛñanyɛ, naa ɛkkɛ mɔktin ‘ya mielɛ coodi bɛɛ. 37Jwalla guaŋi ‘ya ɛkkɛti neeniyɛ, guaŋi ‘ya te ma waakɛnda, ka dala ɛkkɛ woŋgɔ tiittɛ waakida.”

will be added

X\