Mark 12

1Ɔci Yaccu bala loṭi ma te jyeka a caagin gɛɛg agi, “Mena ‘uan gɛɛl ati pieti luutkin, ɔci ɛkɛ noŋi kaañ bal luutkin warɛti, ɔci ɛkɛ noŋi gena ñocki ma luutkin, ɔci ɛkɛ noŋi ona beyan. Ɔci ɛkɛ bal ‘wonnɛ maka pookɛn byeŋkɛnti, ɔci ɛkɛ ati bana parɛ. 2Ɔci ne pana pwonki ma luutkin ṭɔlgɛn bɛɛniyɛ, bal weegɛn mena kanŋan ɛkɛti gɛɛl cuuññɛ nona maka gɔṭi luutkinti aŋka ɛkɛ wɛttan ma jang ṭɔlgɛn gɛɛg oodɛ baanji ɛkɛti. 3Ɔci maka gɔṭi balyɛ, mena cuuññɛ bal weegɛn neeni mugɛ, ɔci ɛkɛ jiebɛ, ɔci ɛkɛ cuuñɛ duakciyɔ byeŋkɛ budan. 4Ɔci bal weegɛn mena kanŋan ɛkɛti gɛɛl cuuññɛ moki, ɔci ɛkkɛn ɛkɛ jyɛbɛ wyeñɛti ɔci yacci, ɔci ɛkkɛn noŋjin ne yaayan ɛkɛti. 5Ɔci ɛkɛ moki cuoñi mena parɛ gɛɛl ɛkkɛnti. Ɔci mena neeniyɛ, nogɛ ɛkkɛn. Ɔci bal weegɛn maka kanŋa ɛkɛti gɛɛk cuuññɛ ɛkkɛnti moki, ɔci maka neeni gɛɛg jiebɛ ɛkkɛn, ɔci gɛɛg nogɛ. 6Ɔci men gɛɛl bala dalji i bal weegɛn ne cyɛɛlɔ, gena kaci ɛkɛ. Ɛkɛ ani kacca neeni ne tolan. Ɔci ɛkɛ cuuññɛ weegɛn ne ŋoyɔ. Ɛkɛ poŋi gɔki agi, ‘Ɛkkɛn yooktan te jyek kaci ‘ya bɛɛ.’ 7Yeti maka gɔṭi bal neeniyɛ, ɛkkɛn bala gɔwwɔ yɔtin pookɛn agi, ‘Mena neeniyɛ, gena mena wak weegɛn eedɛ ɛkɛ waakɛnda ne baaṭiy. Bɛɛdɛ, dala ikin ɛkɛ noktin, ɔci waka neeni aga wak ikin!’ 8Ɔci ɛkkɛn ɛkɛ mugɛ ɔci nogɛ ɛkkɛn, ɔci war ɛkɛ yiɛpcɛ ɛkkɛn ɔntɔ te balji.” 9Ɔci Yaccu oŋ tooccin ɛkkɛnti agi, “Oŋ jiniina weegɛn noŋdi a ɔki acca ɛkkɛnti? Ɛkɛ bɛya maka neeniti ɔci maka gɔṭi jiniina nogdɛ ɛkɛ. Ɔci ɛkɛ jiniina ‘wondɛ maka pookɛn byeŋkɛnti. 10Ɛkkɛ pokkɛ jyeka kiigin bɛɛ? Ne jiek gɔkki agi, ‘Poma guaktan maka cɔti oorg agi ɛkta yaayɔ neeniyɛ, ɛkɛ aŋi poma pwadan on warɛti doki. 11Ɔci agi naŋka neeni naŋŋɛ Juaŋo, ɔci ɛkɛ pwanna pwani ikin ñinguti.’” 12Gaciicin ḍwaŋin Ma Yahuud ɔci maka loṭi worga Jwaŋa Tolan, ɛkkɛn buagɔn Yaccu muktan acaan ŋeecɔn ɛkkɛn Yaccu gɔkcin jwalla a caagɔn neeni ɛkkɛnti te naŋki ɛkkɛn, yeti ɛkkɛn buayi maka coŋin. Ɔci ɛkkɛn Yaccu dalji, ɔci ɛkkɛn atti. 13Ɔci maka ḍwaŋin neeni ma gɛɛg cuuñɛ Yaccuti. Gena ma Pɛriciin gɛɛg ɔci ma Hiruuduc gɛɛg daŋkun. Ɛkkɛn cuuñɛ ma Yaccuti acaan ɛkkɛn buagɔn dala ɛkkɛn gɔgdi i Yaccu aŋka kan Yaccu jwali gɛɛl damdɛyɛ, ɔci ɛkɛ muktan ɛkkɛn. 14Ɔci ɛkkɛn botcin ɛkɛti agi, “Mena loṭi may, i ŋeecki ɔɔn i a mena gɔki awarɛ, ɔci i an menga ne cyɛɛlɔ bɛɛ. I an ma waakɛnda. Ɔci i lor ma te jyek Jwaŋa Tolan ne pwadan. Ɔɔn myettɔn, kan Kɛɛcar ‘wontin ikin tulbayɛ, a ɔɔn bala ba jyek ganuun ikin Ma Yahuud boki? Ɔɔn ɛkɛ ‘wondɔn, walla ‘wondɔn bɛɛ?” 15Yeti yomg ɛkkɛn ŋeejɛ Yaccu ne ɛkkɛn balki gɔkki jyek labji neeniy. Ɔci ɛkɛ ṭwokcin ɛkkɛnti agi, “Ɛkkɛ poccɛ ‘ya a poccin a ɔɔn ogo? Giric gɛɛl oodɛ wɛnni, ikin gɔrtin a cyɛɛlɔ.” 16Ɔci ɛkkɛn ḍeyyan gɛɛl owwɛ Yaccuti, ɔci ɛkɛ tooccin ɛkkɛnti agi, “Ḍeyyan neeni balkɔn pɔɔya ma menɛ? Ɔci a yenti menɛ bala ɛkɛtiy?” Ɔci ɛkkɛn ṭwokcin ɛkɛti agi, “Ɛkɛ balkɔn pɔɔya ma Kɛɛcar ɔci yenti Kɛɛcar.” 17Ɔci Yaccu gɔkcin ɛkkɛnti agi, “Ɛɛ, yɔɔddɛ ɛkkɛ myettin, wak Kɛɛcaryɛ, ‘wondɛ ɛkɛ, ɔci wak Jwaŋa Tolanyɛ, dala ‘wondɛ Juaŋ daŋkun.” Ɔci ma korkɛn buañi noon te jyek Yaccu neeni. 18Ɔci te oŋŋa wannayɛ, ma Cadyuciin bɛɛn Yaccuti. Maka neeni loṭi agi ne ma tuudiyɛ, ma jɔŋdɔ ñaalɔ moki bɛɛ. Ɔci ɛkkɛn gɔkcin Yaccuti agi, 19“Mena loṭi may, Muuca ikin kieŋnin jiek agi, ‘Kan mena mod ɛkkɛn tuwayɛ, ɔci kan ɛkɛ balki ɛɛŋyɛ, ɔci kan ɛɛŋ kɛɛgin ɛkɛ men baawyɛ, dala ɛŋ ɛkɛ ḍɛɛdɛ mod ɛkkɛn aŋka ɛkɛ jieda kɛɛgin jyettɛ mena tuun neeni.’ 20Oŋ acca gɔṭṭi! Maka ‘uay gɛɛg bala a dɔɔyɔ wyetkɛn ne yyɛɛwɔ, ɛkkɛn a modin waakɛnda jiennɛ mɛya ne cyɛɛlɔ. Moda tolan ñamuyɛ, ḍɛñi ɛɛŋo. Ɔci ne ɛkɛ tuuniyɛ, kɛɛgin ɛkɛ baaw men. 21Ɔci moda bootcin ɛkɛ ŋoyɛti neeniyɛ, ɛŋa neeni ḍɛɛnɛ ɛkɛ moki. Ɔci moda neeni tuun moki, kɛɛgin ɛkɛ baaw men. Ɔci moda akki ne ḍoogɔ moki ɛŋa neeni ḍɛɛnɛ ɛkɛ moki, ɔci ɛkɛ tuun moki, kɛɛgin ɛkɛ baaw men. 22Ɔci ɛkkɛn waakɛnda ne dɔɔyɔ wyetkɛn ne yyɛɛwɔ neeniyɛ, ɛɛŋ ḍɛyɛ, yeti ɛkkɛn balki kɛɛgin gɛɛg bɛɛ. Kɛɛgin baaw ɛkkɛnti ne ɛkkɛn tuuki ɔɔn. Ɔci ne ɛkkɛn tuuki waakɛnda a ɔɔnyɛ, ɔci ɛŋa neeni tuun daŋkun. 23Ɛɛ, oŋ ne oŋŋa ma jɔŋti ñaalɔ te lientiy, oŋ ɛŋa neeni aga ɛŋ moda ɔkiy? Acaan ɛkɛ ḍɛyi ‘uay ne dɔɔyɔ wyetkɛn ne yyɛɛwɔ, ɔci ‘uay tuun kɛɛgin baaw waakɛnda.” 24Ɔci Yaccu gɔkcin ɛkkɛnti agi, “Tieŋdɛ! Jiek dammɛ ɛkkɛ acaan jyeka kiigin i war tɛɛn Jwaŋa Tolan tuoññɛji ɛkkɛ. 25Acaan ne ma jɔŋti te kolk jitinyɛ, ma ḍɛɛwɔ moki bɛɛ. Ɛkkɛn bala ba malɛɛkan ñaalɔ ban Jwaŋa Tolan. 26Ɔci moki, jyek jɔŋŋin ma jɔŋti ñaalɔ te kolk jitinyɛ, bala daŋkun. Jyek Muuca oŋŋa ɛkɛ gɔrni jana ammi maañ wanna, ɛkɛ kwoyɛ ɛkkɛ boki? Te oŋŋa wanna Juaŋ gɔkcin Muucati agi, ‘‘Ya a Jwaŋ Abrahim ɔci Icaak ɔci Yaakub. ‘Ya baal gɔr yɔrg ɛkkɛ.’ 27Ma ciya a tuutan yuonginda a ɔɔn awarɛ bɛɛ, hay!” 28Ɔci oŋ gɛɛlti mena loṭi worga Juaŋ gɛɛl bɛɛn ɛkkɛnti, ɔci ɛkɛ tieŋŋin ne ma balki tiekiy. Ne ɛkɛ gɔrni Yaccu ma buanniyɛ, ɛkɛ tooccin Yaccuti agi, “Ba jwalla bala ñamu te jyek ganuun a inyaakkɛn neeni bɛ?” 29Ɔci Yaccu ṭwokcin ɛkɛti agi, “Jwalla bala ñamuyɛ, gɔki agi, ‘Ma Icrayiil, tieŋdɛ, Ciɛggɔn ikin Jwaŋa Tolan ɛkɛ parɛ a Ciɛggɔn. 30Dala ɛkkɛ anɛ Ciɛggɔn ɛkkɛ Jwaŋa Tolan ne tolan. Dala ɛkkɛ anɛ ɛkɛ te yomg ɛkkɛ waakɛnda, ɔci te coodi ɛkkɛ moki waakɛnda, ɔci te paŋi ɛkkɛ moki waakɛnda, ɔci kandɛ ɛkɛti te war tɛɛn ɛkkɛ moki waakɛnda.’ 31Ɔci ganuun bootti menin neeni ŋoyɛti gɔki agi, ‘Dala anna ɛkkɛ anɛ ma ɛkkɛyɛ, yoomdi i anna ɛkkɛ anɛ waak ɛkkɛy.’ Jyek ganuun ne yyɛɛwɔ neeniyɛ, bwandɛ jwalla parɛ gɛɛl bɛɛ.” 32Ɔci mena loṭi worga Juaŋ gɔkcin ɛkɛti agi, “Mena loṭi may, i gɔŋni jwalla neeni awarɛ. Jwaŋa Tolanyɛ, ɛkɛ bala parɛ, jwaŋa parɛ gɛɛl bala bɛɛ. 33Ɔci kan ikin anin ɛkɛ ne tolan te yomg ikin, ɔci te paŋi ikin, ɔci kantin ɛkɛti te war tɛɛn ikin mokiyɛ, ɔci kan ikin anin maka pookɛn ne tolan ba anna ikin anin waak ikin pookɔyɛ, Jwaŋa Tolan yomɛ pwanna pwani ikinti te naŋka neeni. Ɛkɛ yomɛ pwanna pwani maka ani maka pookɛnti ne tolan. Yeti maka etti waak ḍuattan ɛkɛti oŋ ani maka pookɛn bɛɛyɛ, ɛkɛ yomɛ pwatcin ɛkkɛnti bɛɛ.” 34Ɔci ne Yaccu tieŋni mena neeni ṭwoŋni ne pwadanyɛ, ɔci ɛkɛ gɔkcin ɛkɛti agi, “I loon ɔntɔ te cyɛgji Juaŋti bɛɛ.” Ɔci maka ḍwaŋin neeni buañi lɔɔno, ɔci menga yaakinti tootti Yaccuti te genga moki bɛɛ. 35Ɔci Yaccu bala loṭi ma on Juaŋ ona tolan neeni, ɔci ɛkɛ gɔkcin mati agi, “Maka loṭi worga Juaŋyɛ, ɛkkɛn gɔki agi Kiṭɔ Mena Muonɛ Juaŋ Bora a Kaci Daawud ogo? 36Ɛkkɛ pokkɛ jyek Daawud bɛɛ? Daawud waanɛ gɔki te Boŋ Jwaŋa Tolan agi, ‘‘Ya tieŋŋan Jwaŋa Tolan gɔkcin Kiṭɔ Ciɛggɔn ‘yati agi, dala i coocca ‘ya taaŋuti taaŋŋa byerɔn ne maka yookɔn te i bwandaji ‘ya ɔɔn.’ 37Kan Kiṭɔ barŋi Daawud agi Ciɛggɔn ɛkɛ ba Jwaŋa Tolany, oŋ Kiṭɔ a kaci Daawud moki a ɔki?” Maka coŋin bala tyeŋi jyek Yaccu te yoma ñɔyan. 38Yaccu bala loṭi ɛkkɛn men, ɔci ɛkɛ gɔkcin ɛkkɛnti agi, “Dala ɛkkɛ woŋgɔ tiittɛ te naŋki maka loṭi worga Jwaŋa Tolan naa ɛkkɛ noŋdɛ ba ɛkkɛn ɔɔn bɛɛ. Ɛkkɛn ani woon ma ñomgɛnti ɛŋi jibban becin jibban wiɛlɛn pɛñan, ɔci ɛkkɛn buagɔn dala ma ɛkkɛn naŋtan ba maka ḍwaŋin ma ñomgɛnti dukkanji oŋkanda, 39ɔci ɛkkɛn buagɔn ciyi kokin pwadinti oorga morki ma Juaŋo. Ɔci kan juman bala, ɛkkɛn buagɔn ciyi nona pwadan oŋkanda ɔɔn. 40Ɔci ɛkkɛn mal moonga ciek ɔci oorg ɛkkɛnyɛ, amtan ɛkkɛn, ɔci ɛkkɛn cɔki cɔŋŋa beyan aŋka naŋki ɛkkɛn coktanyɔ ɛkkɛn te naŋki ɛkkɛn neeni. Te dienna ɛkkɛn dyetki ma ñingɛn neeniyɛ, Jwaŋa Tolan jiek oldɛ ɛkkɛn wyetkɛnti ne tolan.” 41Ɔci Yaccu cooccin iñɔ on Juaŋ ona tolan tɛrin ñin i nona canduuk ḍɔcki ma bilka ‘wontan ma Juaŋo. Ɔci ɛkɛ bala gɔṭi ma ne ɛkkɛn balki ḍɔcki bilky. Ɔci maka coŋin maka cyɛgan neeniyɛ, ɛkkɛn bala ḍɔci bilk ne coŋɔn. 42Ɔci ɛŋa cieñ gɛɛl bɛɛni, ɔci ɛkɛ balki bilk bɛɛ. Ɛkɛ bɔw bɔwo. Ɛkɛ ḍɔccin girin ne yyɛɛwɔ budan. 43Ɔci Yaccu borcin maka laldɛ ɛkɛti agi dala ɛkki bɛɛdɔ nona ɛkɛti, ɔci Yaccu gɔkcin ɛkkɛnti agi, “‘Ya gɔkka ɛkkɛti awarɛ, bilka ḍuannɛ ɛŋa bɔwan, ɛŋa cieñ neeni a ḍiɛkan, yeti Jwaŋa Tolan yomɛ pwanna pwani acaan ɛkɛ ḍɔccin te yoma awarɛ. 44Acaan maka neeni ɛkkɛn kɛñi te bilk ɛkkɛn wyetka kɛci bora te bilka coŋin neeniti, ɔci ḍuacci ɛkkɛn Juaŋti. Yeti ɛŋa neeniyɛ, ɛkɛ bɔw bɔwo, yeti ɛkɛ ḍɔccin bilka bala ɛkɛti waakɛnda.”

will be added

X\