Mark 11

1Ne Yaccu ɔci maka laldɛ ɛkɛ noŋi cɔɔlti ban Urcaliimyɛ, ɛkkɛn dɛññin ban Bɛtpɛɛj ɔci ban Bɛtani bonka bala pom Jɛtuun taaŋɛti neeni. Ɔci ɛkɛ cuoñi maka laldɛ ɛkɛ gɛɛg ne yyɛɛwɔ ñamu. 2Ɔci ɛkɛ gɔkcin ɛkkɛnti agi, “Ɔgdɛ ooddɛ pɔya eetan ma ban Bɛtpɛɛjti, ɔci ne ɛkkɛ dɛndɛ bana neenitiyɛ, tɔɔrɔn ṭɔɔlɛ mɔktɛ ɛkkɛ, ɛkɛ bala wiɛntan ma aŋan. Menga taami te tɔɔrɔn neeni men bɛɛ. Ɛkɛ gwottɛ ɔci oodɛ. 3Ɔci kan men gɛɛl tootti ɛkkɛti agi ɛkkɛ noŋjɛ agi ɔɔn ogoyɛ, dala ɛkkɛ gɔktɛ ɛkɛti agi, ‘Ciɛggɔn buagɔn ɛkɛ, ɔci tɔɔrɔn dɔɔdɛ ɛkɛ ne pɛñan.’ ” 4Ɔci ɛkkɛn atti. Ɔci ɛkkɛn tɔɔrɔn ṭɔɔlɛ mɔkci wiɛntan ma pɔɔjɔ on tukɛti. Ɔci tɔɔrɔn ṭɔɔlɛ gwoddɛ ɔci owwɛ. 5Ɔci magga bala yɔɔd pɔɔjɔ, ɔci ɛkkɛn tooccin ɛkkɛnti agi, “Ɛkkɛ noŋɛ waaka ɔɔn? Ɛkkɛ tɔɔrɔn ṭɔɔlɛ guddɛ eedɛ aŋɛ?” 6Ɔci maka laldɛ ɛkɛ ne yyɛɛwɔ neeni ṭwokcin ɛkkɛnti ba jyeka ɛkkɛn myennɛ Yaccu, ɔci ɛkkɛn dalji ma atti. 7Ɔci ɛkkɛn tɔɔrɔn ṭɔɔlɛ owwɛ nona baali Yaccu, ɔci bworŋin ɛkkɛn ḍuacci tɔɔrɔn ŋoyɛti. Ɔci Yaccu taapcin ɛkɛti. 8Ɔci maka coŋin maka pookɛn bworŋin ɛkkɛn cyɛtci pɔɔjɔ pɔy konɛti, aŋka noŋdi ɛkɛti ba mena tolan. Ɔci maka pookɛn lɛɛwin aamk jang te bora, ɔci owwɛ cyɛtci ma pɔɔjɔ daŋkun. 9Ma gɛɛg wɛɛjjin ñamu, ɔci maka pookɛn bootcin ɛkɛ ŋoyɛti. Ɔci ɛkkɛn yaadan gɔki agi, “Dala ma jieyi Juaŋo! Mena bala ñaalɔyɛ, dala i yuoc ɔɔn acca! Mena bɛya te yenti Ciɛggɔn Tolan neeni, dala i cied ne pwadan!” 10“Cyɛgji wey ikin Daawud bɛya acca! Dala i pwadi a pwanno! Dala Juaŋ jiɛtan ma!” 11Ɔci Yaccu dɛñjin ban Urcaliim. Ɔci ɛkɛ kaaccin orɔ on Juaŋ ona tolan. Ɔci ɛkɛ bala booti gɔṭi on jiñɛ. Ne oŋ waŋɛ luunni iñɔ dokiyɛ, ɛkɛ ati ban Bɛtani i Maka A Inyaakkɛn Wyetkɛn Ne Yyɛɛwɔy. 12Ɔci ne liidɔ parɛ ne ɛkkɛn balki bɛɛti te ban Bɛtaniyɛ, Yaccu amɛ koño. 13Ɔci ne ɛkkɛn balki atki te pɔɔjɔyɛ, ɛkkɛn ŋuami yuarcɛ te nona loonan, ɛkɛ pwor pworo. Ɔci Yaccu ati orcinti ɛkɛti aŋka gɔrti ɛkɛ ne ɛkɛ ṭɔlgɛ balki boki no. Ɔci ne ɛkɛ orniti ɛkɛtiyɛ, ɛkɛ yɔṭi ŋuami ṭɔlgɛ gɛɛg bɛɛ. Ɛkɛ yɔṭi gena jyeyi budan, acaan wɔɔka jiedi ŋuami ṭɔlgɛyɛ, bɛɛn men bɛɛ. 14Ɔci Yaccu gɔkcin jaanti agi, “Naa menga omdi ṭɔlg i ywongati moki bɛɛ.” Ɔci maka laldɛ ɛkɛ tieŋŋin ne ɛkɛ gɔki a ɔɔny. 15Ɔci ɛkkɛn dɛñjin ban Urcaliim ɔci Yaccu ati kaaccin kaañji kañ on Juaŋ ona tolan neeniy. Ɔci ɛkɛ maka wɛɛṭi dok ɔci ḍɛɛk ɔci kulin kaañji neeniyɛ, ŋualnɛ bora. Ɔci ɛkɛ tarabɛɛcan ḍorki ma bilk neeniyɛ, jitkɛn baamnɛ iñɔ, ɔci waka ḍɔcki maka wɛɛṭi boobgyɛ, jitkɛn moki baamnɛ iñɔ. 16Ɔci Yaccu dɛyi ma agi naa ma ati goṭi kaañji kañ on Juaŋ ona tolan neeni, eci waak byeŋkɛnti budan ɔɔn bɛɛ. 17Ɔci ɛkɛ bala loṭi ma, ɔci ɛkɛ gɔkcin ɛkkɛnti agi, “Jwaŋa Tolan gɔki worgaji agi, ‘On ‘ya a ona cɔkki keedin waakɛnda.’ Yeti on ɛkɛ naŋŋɛ ɛkkɛ a ‘ona cieki maka ɛyyo.’” 18Gaciicin ḍwaŋin Ma Yahuud ɔci maka loṭi worga Juaŋyɛ, ne ɛkkɛn tieŋki jyeka guaŋŋɛ Yaccu neeniyɛ, ɛkkɛn bala lieṭi pɔya Yaccu noktitiy, acaan ɛkkɛn buayi ɛkɛ ma wyetkɛn eedɛ ɔntɔ te jyek ɛkkɛnti, acaan polla tolan waakɛnda korkɛn buañi te lali ɛkɛ neeni. 19Ɔci ne tɛɛnɔ ne oŋ unniyɛ, Yaccu ati i maka laldɛ ɛkɛ. Ɛkkɛn ati bora te bana tolan neeniti. 20Ɔci te liidɔyɛ, ne ɛkkɛn dɔɔkki gorki pɔɔjɔ mokiyɛ, ɛkkɛn ŋuami mɔkci iin ne bɛɛkkɛti ɔɔn. 21Ɔci Butruc ñingɛ ñieŋnɛ, ɔci gɔkcin Yaccuti agi, “Mena loṭi may, gɔṭṭi! Jana ‘walli iyɛ, ɛkɛ iin doki.” 22Ɔci Yaccu ṭwokcin ɛkkɛnti agi, “Dala ɛkkɛ jyeddɛ Juaŋti. 23Tieŋdɛ jyek ‘ya jyeka awarɛ neeni, kan menga gɔkti poma neeniti agi, ‘Dala i luoldi Juaŋ ñaalɔ, ɔci i yiɛpti ɛkɛ galŋji.’ Kan menga gɔki a ɔɔn, ɔci kan ɛkɛ tieki yomɛti bɛɛyɛ, kan ɛkɛ jyeddi ne pwadan, ɔci ŋeejɛ ɛkɛ yomɛti Jwaŋa Tolan noŋdi naŋka neeniyɛ, ɔci Juaŋ noŋdi awarɛ. 24A ɔŋŋiyɛ, aŋka ‘ya ɛkkɛ myettin neeni, kan ɛkkɛ cɔktɛ Juaŋti toottɛ ɛkɛti te gengayɛ, dala ɛkkɛ jyeddɛ yomgɔti Juaŋ jyettin doki, ɔci ɛkkɛ ‘wondɛ ɛkɛ gena neeni doki. 25Ɔci kan ɛkkɛ cɔktɛ Juaŋtiyɛ, ɔci kan ɛkkɛ yomgɔ yeyɔ maggatiyɛ, dala ɛkkɛ ɛkkɛn bɔɔktɛ. Ɔci a ɔŋŋiyɛ, ɛkkɛ da bɔɔktɛ Wey ɛkkɛ, Weya ñaalɔ pɔliji. Ɛkkɛ bɔɔktɛ ɛkɛ te naŋka naŋŋi ɛkkɛ ne yaayan neeni. [ 26Kan ɛkkɛ ma bɔɔktɛ bɛɛyɛ, ɔci ɛkkɛ da bɔɔktɛ Wey ikin Weya ñaalɔ neeni daŋkun bɛɛ.]” 27Ɔci ɛkkɛn dɛñjin ban Urcaliim moki. Ɔci ne Yaccu baali ati a woon kaañji kañ on Juaŋ ona tolan neeniyɛ, ma bɛɛn ɛkɛti. Gena gaciicin ḍwaŋin Ma Yahuud ɔci maka loṭi worga Juaŋ ɔci cyekin. 28Ɔci ɛkkɛn tooccin ɛkɛti agi, “Ɔɔn myettɔn i noŋ naŋka neeni te jyek menɛ? A menɛ i ‘wonni naŋka neeniy?” 29Ɔci Yaccu ṭwokcin ɛkkɛnti agi, “‘Ya da buaga toocca ɛkkɛti te jwali gɛɛl daŋkun. ‘Ya ṭwoktata ɛkkɛ ñamu parun, oŋ ɛkkɛ oŋ myettin ‘ya daŋkun oŋo. 30’Ya myettata, ne Yɔhanna baali buoṭi mayɛ, bulti ɛkɛ neeni bɛɛn te Jwaŋa Tolanti walla bɛɛn te ma baanti budan? Gɔktɛ.” 31Ɔci ɛkkɛn bala tyewɔ yɔtin pookɛn agi, “Kan ikin gɔktin agi bulti Yɔhanna neeni bɛɛnɔ te Jwaŋa Tolantiyɛ, ɔci Yaccu tootti ikinti dita agi, ‘Oŋ kan a ɔɔnyɛ, ba ɛkkɛ jyettɛ jyek ɛkɛti bɛ?’ 32Oŋ ikin yaakinti gɔktin agi, ‘Bulti Yɔhanna bɛɛn te ma baanti boki?’ ” Maka gɔwwɔ i Yaccu neeniyɛ, buayi ne ɛkkɛn gɔkti agi naŋki Yɔhanna bɛɛnɔ te ma baanti budany, acaan ma waakɛnda bala gɔki agi Yɔhanna agɔ bɔwa Jwaŋa Tolan a wardan. 33Ɔci ɛkkɛn ṭwokcin Yaccuti agi, “Kucin, bulti Yɔhanna neeni ŋeejɔn ɔɔn ne bɛɛni te aŋɛ bɛɛ.” Ɔci Yaccu gɔkcin ɛkkɛnti agi, “Ɔci ‘ya ɛkkɛ myettin te naŋka naŋdi ‘ya neeni daŋkun bɛɛ.”

will be added

X\