Mark 10

1Ɔci Yaccu jɔŋŋin te nona neeniti, ɔci ɛkɛ ati booti bonk ṭɔlgɛn ban Yahuudiya jitin, ɔci ɛkɛ Tol Urdun jyɛnnɛji ati pɔya bɛɛdi ñal tyɛrñanti. Ɔci polla tolan wyetkɛn ḍɔɔlɛ nona ɛkɛti moki. Ɔci ba naŋki ɛkɛ oŋkandayɛ, ɛkɛ bala loṭi ɛkkɛn. 2Ɔci ma Pɛriciin gɛɛg bɛɛn Yaccuti, ɔci tooccin ɛkɛti te jwali ṭɔɔlɛ gɛɛl. Ne ɛkkɛn toocki ɛkɛti a ɔɔnyɛ, ɛkkɛn yieci ɛkɛ a yiiñño. Ɛkkɛn tooccin ɛkɛti agi, “Kan mena ‘uan ɛŋ ɛkɛ daldɛyɛ, a ɔɔn yɔmjin iti bɛɛ?” 3Ɔci ɛkɛ ṭwokcin ɛkkɛnti agi, “Ɛkkɛ myennɛ Muuca a ɔki worgaji te jyeka nɛ?” 4Ɔci ɛkkɛn gɔki agi, “Muuca gɔki agi kan mena ‘uan ɛɛŋ kieŋnɛ worga doortin dokiyɛ, ɛkɛ yaakinti ɛɛŋ daldɛ.” 5Ɔci Yaccu gɔkcin ɛkkɛnti agi, “Muuca jyeka neeni kiinɛ a ɔɔn, acaan ma wyetkɛn tɛy tɛy ba ɛkkɛ acca ɔɔn. 6Yeti te ñamu jyek doortin bala bɛɛ. Oŋŋa ma aŋŋɛ Juaŋyɛ, bala ba jyeka kiigin gɔki agi, ‘Mena ne cyɛɛlɔ aŋŋɛ Jwaŋa Tolan a ‘uano, ɔci mena parɛ aŋŋɛ ɛkɛ a ɛɛŋo.’ 7‘Ɔci ɛkkɛn menga da buagɔn menin parɛ aŋka coodi yɔmdi. A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ oŋkanda ɔɔn. 8Ɔci ɛkkɛn ñoowin yaakkɛn doki.’ A ɔŋŋiyɛ, ɛkkɛn aŋi ba mena ne cyɛɛlɔ doki, a yyɛɛwɔ moki bɛɛ. 9Gɔṭṭɛ, maka ñaaŋŋɛyɔ Jwaŋa Tolan te ḍɛɛwin a maka ne cyɛɛlɔyɛ, agi naa ɛkki kɛɛptɔ jitin iki ɛɛŋ moki bɛɛ.” 10Ɔci ne Yaccu baali orɔ i maka laldɛ ɛkɛyɛ, ɛkkɛn tooccin ɛkɛti moki te jyeka neeni. 11Ɔci ɛkɛ gɔkcin ɛkkɛnti agi, “Kan mena ‘uan ɛɛŋ daldɛ, ɔci kan ɛkɛ ḍɛɛdi ɛŋa parɛyɛ, a ɔɔnyɛ, naŋka neeni a tommo. 12Ɔci kan mena ɛɛŋ ‘war ɛkɛ daldɛ ɔci kan ɛkɛ ḍɛɛdɛ ‘wana parɛyɛ, bala ba ɛkkɛn noŋi tomi yaakkɛn ‘wana ñamuti.” 13Ɔci ma bala etti kɛɛgin ḍyɛrin Yaccuti. Ɛkkɛn buagɔn dala ɛkɛ ɛkkɛn ordiyɔ. Yeti maka laldɛ Yaccu ɛkkɛn kɛkcin maka neeniti. 14Ɔci ne Yaccu gɔrni ɛkkɛn kɛkki a ɔɔnyɛ, ɛkɛ looñi ɔci gɔkcin ɛkkɛnti agi, “Dala kɛɛgin bɛya ‘yati. Naa ɛkkɛ kɛkɛ ɛkkɛn a ɔɔn bɛɛ, acaan jyek cyɛgji Jwaŋa Tolan a jyek ɛkkɛn, ɔci gena jyek maka bala ba ɛkkɛn ɔɔn. Acaan kɛɛgin neeni yomgɛn bala Juaŋtiyɛ, ɛkɛ buagɔn dala ɛkkɛn bɛya ban ɛkɛ bala ba maka yomgɛn bala ɛkɛti ɔci jyeti ɛkɛti ba kɛɛgin neeniyɛ, ɛkɛ buagɔn ɛkkɛn bɛya ban ɛkɛ waakɛnda. 15Tieŋdɛ! Jyeka guagdi ‘ya ɛkkɛti neeni a jyeka awarɛ. Kan men gɛɛl jyek cyɛgji Jwaŋa Tolan mugdɛ ɛkɛ te yoma pwadan ba kacca ḍiɛran bɛɛyɛ, ɛkɛ yaakinti dɛndi ban Jwaŋa Tolanti bɛɛ.” 16Ɔci Yaccu kɛɛgin ñieŋnɛ warti, ɔci ne ɛkɛ baali oorɛ ɛkkɛn waakɛnyɛ, ɛkɛ bala gɔki ne pwadan ɛkkɛnti. 17Ɔci ne Yaccu noŋi ooddi bana parɛyɛ, mena ‘uan gɛɛl yoŋŋin ɛkɛti, ɔci ḍwoñjin iñɔ ɛkɛ ñamɛti, ɔci tooccin ɛkɛti agi, “Mena Loṭi Ma mena pwadany, ‘ya noŋja a ɔki aŋka tɛɛtin baadi bɛɛ neeni bɛɛdi ‘yatiy?” 18Ɔci Yaccu gɔkcin ɛkɛti agi, “I ‘ya barda a mena pwadan ogo? Mena pwadan gɛɛl bala bɛɛ, gena Jwaŋa Tolan parɛ aŋka pwatcin. 19’Ya poŋ jyek ganuun ŋeej i kaapun ne ɛkkɛn gɔkki agi, ‘Naa i menga noga bɛɛ, naa i noŋja tomi bɛɛ, naa i kor waak bɛɛ, naa i men gɛɛl jomgayɔ bɛɛ, naa menga naŋa ñin bɛɛ, dala i noŋja ne pwadan weegɔti ɔci mɛɛgɔti.’” 20Ɔci ‘wana ḍiɛran neeni gɔkcin Yaccuti agi, “Mena loṭi may, ‘ya baal tiec jyeka neeni ne ‘ya wona ḍiɛra men ɔɔn.” 21Ɔci Yaccu gɔrcin ɛkɛti ɔci ani ɛkɛ, ɔci gɔkcin ɛkɛti agi, “Naŋki i neeni yɔmjin men bɛɛ, bɔɔnjin men ne cyɛɛlɔ. Dala i bootta ‘yati. Ne i bootti ‘yatiyɛ, dala i mal i wiɛlja ñino, ɔci bilk ‘woñga maka bɔwan.” 22Ɔci te jwalla neeniyɛ, ‘wana neeni ñingɛ ookki. Ɔci ɛkɛ ati ɔntɔ te nona Yaccuti. Ɛkɛ bala yomɛ wiak poŋi jieko, acaan wak ɛkɛ coŋɔ. 23Ɔci Yaccu bala gɔṭi maka laldɛ ɛkɛ a gwallo, ɔci gɔkcin ɛkkɛnti agi, “Maka cyɛganyɛ, owwin ɛkkɛn waakɛn ootiti iñɔ bɛɛti Jwaŋa Tolan bieŋɛtiyɛ, tɛy tɛyo.” 24Ɔci maka laldɛ ɛkɛ korkɛn buañi te jwalla neeni, ɔci Yaccu gɔkcin ɛkkɛnti moki agi, “Kɛɛgin ‘ya, owwin ɛkkɛn waakɛn ootiti iñɔ bɛɛti Juaŋ bieŋɛtiyɛ, tɛy tɛyo, hay!” 25Ɔci Yaccu jwali dɔŋŋɛji moki agi, “Wɔtcin kolŋan wɔtti ibra waŋɛtiyɛ, koocin te owwin mena maalɛ tolan warɛ oodɛ ban cyɛgji Juaŋy.” 26Ɔci maka laldɛ Yaccu yomgɛn moottin ne pɛñan te jyeka neeni. Ɔci ɛkkɛn gɔgjin yɔtin pookɛn agi, “Kan owwin ma waakɛn ootiti iñɔ bɛɛti Jwaŋa Tolan bieŋɛti tɛy tɛy a ɔɔnyɛ, a menɛ uday?” 27Ɔci Yaccu gɔrcin ɛkkɛnti ɔci gɔkcin agi, “Ma baan yaakinti waakɛn ootan iñɔ bɛya ɛkɛ bieŋɛti pookɛn bɛɛ. Jwaŋa Tolan aŋka yaakinti ɛkkɛn magdɛ. Acaan Jwaŋa Tolanyɛ, ɛkɛ tɛɛkti genga bɛɛ.” 28Ɔci Butruc gɔkcin Yaccuti agi, “Gɔṭṭi ɔɔnyɛ, ɔɔn waak dalnɔn waakɛnda, ɔci ɔɔn boonnɔn iti doki.” 29Ɔci Yaccu gɔkcin ɛkkɛnti agi, “Tieŋdɛ, ‘ya gɔkka ɛkkɛti awarɛ. Mena ma on ɛkɛ daldɛ, ɔci modgɛn ɔci kowwɛn daldɛ, ɔci mɛɛgɛn ɔci weegɛn daldɛ, ɔci kɛɛgin ɛkɛ daldɛ, ɔci oorg ɔci yelk ɛkɛ daldɛ, mena waka neeni daldɛ te jyek ‘ya acaan wɔɔka bɛɛn aŋka ɛkɛ noŋdi a ɔɔn te jyeka wonkɛn jyeka pwadin neeniyɛ, 30ne ɛkɛ baali iñɔ ṭɛɛrji wɛnni menyɛ, ɛkɛ baltan waak ne coŋɔn ɔci oorg moki, ɔci modgɛn ɔci kowwɛn, ɔci weyyɛn ɔci mɛyyɛn, ɔci kɛɛgin, ɔci yelko, ɔci taab daŋkun acaan ma yooktan te ɛkkɛn. Ɔci wak ɛkɛ waka te ñamuyɛ, bwantan waka neeni. Ɔci coodi ɛkɛ coodda ɛkɛ ciedi ne baaṭi ban Jwaŋa Tolanyɛ, tɛɛtin baadi bɛɛyɛ, bala ɛkɛti yuonginda. 31Ɛkkɛ maka cooŋi ñingɛn te wak ṭɛɛr wyeñɛ, ɔci boottin ‘yati acca te yoma awarɛ bɛɛ neeniyɛ, ‘ya ɛkkɛ ‘wondin genga ñaalɔ pɔliji bɛɛ. Yeti ɛkkɛ maka waka iñɔ wɛnni kuoŋnɛ ŋotkɔ waakɛnda, ɔci boonnɛ ‘yati acca neeniyɛ, ɛkkɛ aŋka ‘wondin ‘ya waak ne coŋɔn ba yomg ɛkkɛ ‘yati.” 32Ɔci oŋ gɛɛlti Yaccu i maka laldɛ ɛkɛ bala pɔɔjɔ ooddi ban Urcaliim. Yaccu bala wɛɛyi ñamu ɛkkɛn ñomgɛnti. Ɔci maka laldɛ ɛkɛ yomgɛn moottin acaan ɛkɛ bala ooddi aŋan, ɔci maka coŋin maka boottin ɛkɛti neeniyɛ, ɛkkɛn buayi. Ɔci Yaccu Maka A Inyaakkɛn Wyetkɛn Ne Yyɛɛwɔ eññɛ bora te nona maka coŋinti, ɔci ɛkɛ bala ɛkkɛn myettɛ te jyek naŋka bɛya ɛkɛti agi, 33“Gɔṭṭɛ, ikin oottin ban Urcaliim, ɔci aŋanyɛ, ‘ya Kaci Ma Baan ‘wonta ma gaciicin ḍwaŋin Ma Yahuud byeŋkɛnti, ɔci maka loṭi worga Juaŋ byeŋkɛnti doki. Ɔci ɛkkɛn noŋdi godan ‘yati, ɔci te jyek godan neeniyɛ, ɛkkɛn gɔkti agi dala ‘ya tuudjɔ. Ɔci ‘ya ‘wonta ɛkkɛn ackan ma Ḍɔɔm byeŋkɛnti moki. Gena ma ikin Ma Yahuud bɛɛ, gena ackan ma Ḍɔɔm. 34Ɔci ɛkkɛn ñieddi te ‘ya. Ɔci ɛkkɛn ‘ya ŋuorta ñaango, ɔci ɛkkɛn ‘ya ḍuata, ɔci ɛkkɛn ‘ya nokta, yeti ne nink ne ḍoogɔ bɛɛti borayɛ, ‘ya jɔlla ñaalɔ te koolji moki. Gena jyek ‘ya neeni.” 35Ɔci te oŋŋa wannayɛ, Yaakub ɔci Yɔhanna kɛɛgin Jɛbadiyɛ, ɛkkɛn oŋ orcinti Yaccuti ɔci gɔkcin ɛkɛti agi, “Mena loṭi may, ɔɔn buagɔn dala i noŋja gena ɔɔn toottɔn iti accay.” 36Ɔci ɛkɛ gɔkcin ɛkkɛnti agi, “Ɛkkɛ buagɛ ‘ya noŋja gena ɛkkɛti?” 37Ɔci ɛkkɛn gɔki agi, “Oŋŋa i agdi Ciɛggɔn Tolan non cyɛgji iyɛ, dala i ɔɔn naŋdɔn a ma i waru, mena ne cyɛɛlɔ te byeŋa byerɔn, ɔci mena ne cyɛɛlɔ te byeŋa aamo.” 38Yeti Yaccu gɔkcin ɛkkɛnti agi, “Taata toocɛ ɛkkɛ neeni jiek jitkɛn ŋeejɛ ɛkkɛ ne pwadan bɛɛ. Ɛkkɛ yaakɛti mottɛ kubaaya taab maadi ‘ya neeni boki? Ɔci ɛkkɛ yaakɛti bultɛ ma te lien ba bulta ‘ya bultati ma neeni boki?” 39Ɔci ɛkkɛn jyettin agi, “Ɛɛ, ɔɔn yaakɔnti.” Ɔci Yaccu gɔkcin ɛkkɛnti agi, “Ne baaṭi ɛkkɛ mottɛ kubaaya taab ‘ya awarɛ, ɔci ɛkkɛ bultɛ ma ba bulti ‘ya. 40Yeti a ‘ya ɛkkɛ ‘wondin jyek coodda ɛkkɛ coottɛ ‘ya byeŋkuti agdɛ ma ‘ya waru bɛɛ. Maka Wey ɔɔn buagiyɛ, ɛkɛ ɛkkɛn ‘wondɛ nona neeni.” 41Ɔci maka laldɛ ɛkɛ a inyaakkɛn ne ɛkkɛn tieŋki jyek Yaakub ɔci Yɔhanna neeniyɛ, ɛkkɛn looñi ne tolan ɛkkɛnti. 42Ɔci Yaccu maka laldɛ ɛkɛ bornɛ agi dala ɛkki bɛɛdɔ nona ɛkɛti. Ɔci ɛkɛ gɔkcin ɛkkɛnti agi, “Gɔṭṭɛ, paŋi maka cyekin ŋeejɛ ɛkkɛ, ne ɛkkɛn poŋki agi ɛkkɛn aginti maka ḍwaŋin. Ɔci ɛkkɛn buagɔn dala ma waakɛnda noŋdi ba jyek ɛkkɛn, ɔci maka ḍwaŋinyɛ, ɛkkɛn gɔki mati ne pɛñan te jyeka ɛkkɛn buagiti naŋtan may. 43Yeti naa ɛkkɛ noŋdɛ ba naŋka neeni a ɔɔn bɛɛ. Kan men gɛɛl ɛkkɛti buagɔn ɛkɛ aga mena tolanyɛ, dala ɛkɛ noŋdi ba ne ɛkɛ agi mena kanŋan ɛkkɛti ɔɔn. 44Ɔci kan mena buagɔn ɛkɛ aga mena bala ñamu ɛkkɛtiyɛ, dala ɛkɛ noŋdi ba mena kɛɛngɔn ma waakɛnda. 45Bala ba ‘ya Kaci Ma Baan ne bɛɛna iñɔyɛ, naŋki ‘ya bala a ɔɔn daŋkun. ‘Ya bɛɛn aŋka ma moki ‘ya bɛɛ. Yeti ‘ya bɛɛn aŋka ‘ya mok mako. ‘Ya bɛɛn won maka coŋin te yomg ‘ya.” 46Ɔci ɛkkɛn bɛɛn ban Jɛrikɔ. Ɔci ne Yaccu ɔci maka laldɛ ɛkɛ, ɔci maka pookɛn maka coŋin, ne ɛkkɛn noŋki kaatti bora te ban Jɛrikɔyɛ, mena ñingɛ ulan, mena ñwoyi waak bala ciyi pɔɔjɔ pɔy taaŋɛti. Ɛkɛ yenti Bartimawuc, Ɛkɛ a kaci Timaawuc. 47Ne ɛkɛ tieŋni agi Yaccu men ma Najarɛt baali bɛɛdiyɛ, ɔci ɛkɛ borcin ɛkɛti, ɔci gɔkcin ɛkɛti agi, “I, Yaccu Kaci Daawud, i a Kiṭɔ mena pwadany. Dala i yomu pɔkka ‘yati ɔci ‘ya pɔkta ñinguti.” 48Ɔci maka coŋin dɛyi ɛkɛ agi dala ɛkta ciedɔ lieda. Yeti ɛkɛ cien lieda bɛɛ. Ɛkɛ bala yaadan a yook ɔɔn agi, “I, Yaccu Kaci Daawud, dala i yomu pɔkka ‘yati!” 49Ɔci Yaccu yɔɔni, ɔci ɛkɛ gɔkcin mati agi, “Ɛkɛ bortɛ.” Ɔci ɛkkɛn mena ñingɛ ulan borkɛ, ɔci gɔkcin ɛkɛti agi, “Yomu tieka! Jɔŋŋa ñaalɔ, Yaccu boor i.” 50Ɔci ɛkɛ jɔllin ñaalɔ ne pɛñan, ɔci ɛkɛ bworŋ jwami tooŋnɛ ɔntɔ, ɔci bɛɛn Yaccuti. 51Ɔci Yaccu gɔkcin ɛkɛti agi, “I buagi ‘ya noŋja a ɔki iti?” Ɔci mena ñingɛ ulan gɔkcin ɛkɛti agi, “Ciɛggɔn, dala ‘ya pɔkta ñinguti aŋka ‘ya noon yuarca moki.” 52Ɔci Yaccu gɔkcin ɛkɛti agi, “I ɔgdi ootta, i ñingu pɔkka moki. Ɔci dala i waru pwada te jyenna i jyetti ‘yati neeni.” Ɔci ne Yaccu gɔŋni a ɔɔnyɛ, ne pɛñan ‘uan ñingɛ pɔŋnɛ doki. Ɔci ɛkɛ bootcin Yaccuti te pɔɔjɔ ɔɔn.

will be added

X\