Mark 1

1Gena ‘ya Mark, ‘ya buaga ɛkkɛ myettin te jyek bɛɛn Ciɛggɔn ikin Yaccu Kiṭɔ, Kaci Jwaŋa Tolan te oŋŋa jyeka wonkɛn jyeka pwadin bɛɛki mati te ñamu. 2Juaŋ gɔki te tuk Icaaya mena a bɔwa Jwaŋa Tolan agi “Jwaŋa Tolan gɔkcin Kaci ɛkɛti agi ɛkɛ men gɛɛl cuoñjɛ ɛkta ñamdanti, aŋka ɛkta yɔŋda pɔyo.” 3“Ɔci cuuda neeni yaadan wɔɔŋji agi, ‘Dala ɛkkɛ waakɔ ywaŋdɛ te bɛɛna bɛɛdɛ Ciɛggɔn Kiṭɔy. Dala pɔɔk ywaŋdɛ nina ne pwadan.’” 4A ɔŋŋiyɛ, Yɔhanna bala buoṭi ma wɔɔŋji, ɔci ɛkɛ bala loṭi ma agi dala ma yomgin wiaktɔ te nɔji ɛkki ɔci waakcin yaldɛ te nɔji ɛkki. Ɔci dala ɛkki buldi ma acaan ɛkki bɔɔŋda Juaŋ doki. 5Maka ban Yahuudiya ɔci maka ban Urcaliimyɛ, ɛkkɛn ɔɔci nona ɛkɛti waakɛnda. Ɔci te oŋŋa wannayɛ, ma bala lɛɛṭi nɔji ɛkkɛn bora. Ɔci ɛkkɛn buullɛ ɛkɛ Tol Urdun. 6Yɔhanna bworŋ ɛkɛ naŋɛ ma te jyeyi kolŋan ba bɔwan Jwaŋa Tolan bɔwan pookɛn daŋkun, ɔci buarñan bala ɛkɛ tɛyɛti. Ɔci ɛkɛ bala omi ṭooŋgi ɔci ciek daŋkun. 7Ɔci ɛkɛ bala loṭi ma gɔki agi, “Men gɛɛl bala bɛya bootti ‘ya ŋoyuti. Ɛkɛ tolcin te ‘ya. ‘Ya baal ba ḍwonda iñɔ wɛyi ɛkɛ looda ‘ya bora bɛɛ. 8Ɛkkɛ buldin ‘ya te piego, yeti ɛkkɛ buldɛ ɛkɛ te Boŋ Jwaŋa Tolan.” 9Ɔci te oŋŋa wannayɛ, Yaccu bɛɛn te ban Najarɛt ban Jaliilji. Ɔci ɛkɛ buullɛ Yɔhanna Tol Urdun. 10Ɔci ne ɛkɛ koonɛ bora te pietinyɛ, ne pɛñan ɛkɛ gɔrcin pɔli warɛ pɔŋnɛ, ɔci Boŋ Jwaŋa Tolan bɛɛn cooccin ɛkɛti bala ba boom ɔɔn. 11Ɔci pwan Jwaŋa Tolan bɛɛn te ñaalɔ pɔliji gɔki agi, “I a Kaci ‘ya Kacca ana ‘yay. ‘Ya yomu pwanna pwani iti.” 12Ɔci ne pɛñan Yaccu wɛɛññɛ Boŋ Jwaŋa Tolan wɔɔŋji. 13Ɔci ɛkɛ bala ciyi aŋan i leyi wɔɔŋji nink a ma baan ne yyɛɛwɔ (40). Ɔci Jwaŋa Yaayan bala mooṭi ɛkɛ. Ɔci malɛɛkan gɛɛg bɛɛn ɔci Yaccu ‘woñgi am ɔci piego. 14Ɔci ne baaṭi ne Yɔhanna mukkiti ma olkiti ma jiju ciginjiyɛ, Yaccu bɛɛn ban Jaliil, ɔci ɛkɛ bala loṭi ma te jyek Juaŋ jyeka wonkɛn jyeka pwadin neeni oŋkanda. Gena jyek cyɛgji Juaŋo. 15Ɔci Yaccu gɔki agi, “Oŋ bɛɛn bora doki, gena oŋŋa Juaŋ buagɛ ɛkkɛ bɛɛdɛ non cyɛgji ɛkɛtiy. Dala ɛkkɛ yomgɔ wiakti ɔci waakɔ yaldɛ. Dala ɛkkɛ tieŋdɛ jyeka wonkɛn jyeka pwadin neeniti.” 16Ɔci oŋ gɛɛlti Yaccu bala ati goṭi Galŋ Jaliil ḍwaŋɛti, ɔci Butruc (ɛkɛ yenti Cimaan te tuk Ma Icrayiil) i mod ɛkkɛn Andarawuc, ɛkkɛn mɔŋnɛ ɛkɛ bala wiewi mali wyeci yako. Acaan kanŋa ɛkkɛn a kanŋa yako. 17Ɔci Yaccu gɔkcin ɛkkɛnti agi, “Bɛɛdɛ, boottɛ ‘yati, ɔci ‘ya ɛkkɛ naŋdin agdɛ maka etti ma ‘yati te jyek ‘ya.” 18Ɔci ɛkkɛn morin ɛkkɛn dalji doki. Ɔci ɛkkɛn ati bootcin ɛkɛti. 19Ɔci ne Yaccu ‘uonni ñamu ne ḍyɛṭ ṭɔɔlɛyɛ, ɛkɛ ma gɛɛg mɔŋnɛ. Gena Jɛbadi i kɛɛgin ɛkɛ Yaakub ɔci Yɔhanna. Ɛkkɛn mɔŋnɛ ɛkɛ bala yɔŋi morin murka konɛti. 20Ɔci Yaccu borcin ɛkkɛnti, ɔci ɛkkɛn wey ɛkkɛn Jɛbadi dalji te murkaji iki maka kanŋan ɛkɛti, ɔci ɛkkɛn bootcin Yaccuti aŋka etti ma Jwaŋa Tolanti te jyek ɛkɛ. 21Ɔci ɛkkɛn dɔɔki ban Kapɛrnyam. Ɔci ne Oŋ Cabit bɛɛniyɛ, Yaccu kaaccin ona morki ma Juaŋo. Ɔci ɛkɛ bala loṭi ɛkkɛn. 22Ɔci ma korkɛn buañi noon acaan ɛkɛ bala loṭi ma ba mena war tɛɛn bala ɛkɛ bieŋɛti. Lali ɛkɛ bala ba lali maka loṭi worga Juaŋ bɛɛ. 23Ɔci ne Yaccu baali loṭi mayɛ, ‘uan gɛɛl bala orɔ ona morki ma Juaŋo. Ɛkɛ muŋŋɛ Jwaŋa Yaayan. 24Ɔci ɛkɛ yaajjin ne pɛñan agi, “Hay i Yaccu men ma Najarɛt, i ŋeejin ‘ya i a men Jwaŋa Tolan mena pwadan. I buagi gena ɔɔnti yeti? I buagi ɔɔn nogdɔn?” 25Ɔci Yaccu gɔkcin ɛkɛti ne pɛñan agi, “Hay, cied lieda! Dala i kooya bora te menti.” 26Ɔci Jwaŋa Yaayan men wyeŋnɛ iñɔ, ɔci ɛkɛ tɛɛni, ɔci Jwaŋa Yaayan yaajjin, ɔci ɛkɛ oŋ kooyin bora te ɛkɛti oŋo. 27Ɔci ma yomgɛn buañi ne pɛñan waakɛnda. Ɔci ɛkkɛn bala toyi yɔtin pookɛn agi, “Yaccu neeni ɛkɛ a menɛ yeti? Jyeka loṭi ɛkɛ ma neeniyɛ, ɛkkɛn a jyeka wonkɛn bɛɛ? Acaan jyek ɛkɛ bala ba jyek mena war tɛɛn bala ɛkɛ bieŋɛti. Ɔci ma tieŋdi, ɔci jɔkin yeyin moki tieŋdi jyek ɛkɛ, ɔci ɛkkɛn noŋi ba jyek ɛkɛ.” 28Ɔci jyek naŋka naŋŋɛ Yaccu neeniyɛ, ati peen bonka ban Jaliilji korkɛn waakɛnda ne pɛñan. 29Ne ɛkɛ jɔkin yeyin koonɛ bora dokiyɛ, ɛkɛ kooyin bora te ona morki ma Juaŋo, ɔci ɛkɛ kaaccin orɔ on Butruc yaakkɛn i Andarawuc. Ɛkɛ kaaccin i Yaakub ɔci Yɔhanna. 30Ɔci mari Butruc bala niin iñɔ warɛ yaayɛ. Ɛkɛ warɛ myɛlla myɛllo. Ɔci Yaccu myetkɛ ma te ɛkɛ aŋka ɛkɛ pɔktɛ Yaccu te waja neeni. 31Ɔci Yaccu ati nona ɛkɛti, ɔci ɛkɛ muŋŋɛ te bieŋɛ, ɔci luolnɛ ñaalɔ. Ɔci ɛkɛ warɛ luun ne pɛñan, ɔci ɛkɛ jɔllin ñaalɔ, ɔci ɛkɛ ma ‘wonnɛ am doki. 32Ne tɛɛnɔ ne oŋ waŋɛ unni ɔci ne Oŋ Cabit baaniyɛ, maka luudgin daŋkun owwɛ ma Yaccuti waakɛnda. Ɔci ma eccin maka waakɛn yeyin Yaccuti. Maka ciyi bana wannatiyɛ, ɛkkɛn ɔɔccin waakɛnda wyetkɛn ḍɔɔlɛ on tukɛti. 34Ɔci ma ywaŋŋɛ Yaccu a ḍiɛkan bɛɛ, kɔɔna kɔɔnno, menga da te waja ɛkɛ, ɔci menga da te waja ɛkɛ. Ɔci jɔkin yeyin koonɛ ɛkɛ bora te mati. Ɔci ɛkɛ dɛyi ɛkkɛn agi naa ɛkki gɔktɔ jiek bɛɛ. Yaccu noŋi a ɔɔn acaan ɛkɛ ŋeecɔn jɔkin yeyin ne ɛkɛ agi Kaci Jwaŋa Tolany. 35Ɔci te tinnɔ ne noon men bɔɔni bɛɛyɛ, Yaccu jɔllin ñaalɔ ati nona wɔɔgan nona baaki may, ɔci ɛkɛ bala cɔki parɛ aŋan. 36Butruc ɔci maka balki iki ɛkɛyɛ, ɛkkɛn jɔŋŋin ati bootcin ɛkɛti. 37Ɔci ne ɛkkɛn Yaccu yuarkitiyɛ, ɛkkɛn gɔkcin ɛkɛti agi, “Ma waakɛnda bala lieṭi i aŋka i noŋja kanŋa ɛkkɛnti moki.” 38Ɔci ɛkɛ gɔkcin ɛkkɛnti agi, “Çeej ‘ya ɛkkɛn buagɔn ‘ya, yeti dala ɛkkɛ bɛɛdɛ ikin oottin bonka waayiti aŋka ‘ya lorca maka ciyi aŋan daŋkun, gena te naŋka neeni aŋka ‘ya bɛɛna iñɔ te pɔliji neeni.” 39Ɔci ɛkɛ ati booti ban Jaliil konɛti warda. Ɛkɛ bala loṭi ma oorga morki ma Juaŋy. Ɔci ɛkɛ jɔkin yeyin koonɛ bora te maka muogɛ jɔkin yeyinti. 40Ɔci mena naŋŋɛ cyɛcyɛ, bɛɛn nona Yaccuti ɔci ḍwonjin iñɔ ɛkɛ ñamɛti, ɔci gɔkcin ɛkɛti agi, “Kan i buagi war ‘ya pɔkka te waja neeniyɛ, i yaakiti.” 41Ɔci Yaccu yomɛ pɔŋnɛ ɛkɛti, ɔci ɛkɛ bieŋɛ laŋnɛ ɛkɛti, ɔci topcin ɛkɛti. Ɔci ɛkɛ gɔkcin ɛkɛti agi, “‘Ya buaga, i ywaŋdin.” 42Ɔci cyɛc bawwin te ɛkɛti ne pɛñan ɔci ɛkɛ warɛ pwani doki. 43Ɔci ɛkɛ cuuññɛ Yaccu baanji, ɔci Yaccu gɔkcin ɛkɛti ne pɛñan agi, 44“I ɔgdi ootta, yeti naa menga myetka te naŋka neeni bɛɛ. Dala i waru lɛɛrka gena gaciic Ma Yahuud. Ɔci dala i ɛkɛ ‘woñga gena guaŋŋɛ Muuca agi ‘wondi ma gaciic Ma Yahuudy. Ɔci a ɔŋŋiyɛ, ŋeettan ma waakɛnda ne pwadan i waru pwani te cyɛc awarɛ.” 45Yeti ‘wana neeni ati mati, ɔci bala mieti ma te jyeka neeni, ɔci jiek ati noon warda. Ɔci Yaccu yaakinti gorti kaatti baan konɛti moki bɛɛ. Ɛkɛ bala ciyi wɔɔŋji nonka baaki may, yeti ma bɛɛn ɛkɛti kɔɔna kɔɔni te noon warda.

will be added

X\