Luuk 9

1Ɔci Yaccu maka laldɛ ɛkɛ a Inyaakkɛn Wyetkɛn Ne Yyɛɛwɔ neeni bornɛ bɛɛn nona ɛkɛti. Ɔci ɛkkɛn ‘wonnɛ ɛkɛ war tɛɛn byeŋkɛnti ɔci jwali ɛkɛ aŋka dala ɛkkɛn jɔkin yeyin bwantan, ɔci aŋka dala ɛkkɛn yɔŋi ma te wajan. 2Ɔci ɛkkɛn cuuññɛ bonka pookɛnti aŋka loṭi ma te jyek cyɛgji Jwaŋa Tolan, ɔci aŋka yɔŋi maka waakɛn yeyin. 3Ne ɛkkɛn jɔŋki men bɛɛyɛ, Yaccu gɔkcin ɛkkɛnti agi, “Gɔṭṭɛ! Ne ɛkkɛ jɔŋdɛyɛ, naa ɛkkɛ eedɛ gɔlk bɛɛ, walla cowaaln bɛɛ, walla oomdin bɛɛ, walla bilk kucin korkɛnti bɛɛ, walla jibban ne yyɛɛwɔ bɛɛ. 4Ɔci ne ɛkkɛ kaattɛ on gɛɛltiyɛ, dala ɛkkɛ ciedɛ ona ne cyɛɛlɔ ɔɔn ne ɛkkɛ jɔŋdɛ ooddɛ bana parɛti ɔɔn. 5Ɔci kan maka bana neeniti yookɔn te ɛkkɛyɛ, ne ɛkkɛ jɔŋdɛyɛ, dala ɛkkɛ ciegɔ ṭyaŋdɛ te ṭɛra ban ɛkkɛn neeni aŋka ŋeettan ma ɛkkɛn yookɔn te jyeka awarɛ neeni.” 6Ɔci ɛkkɛn jɔŋŋin ɔci ati booti bonk korkɛn waakɛnda. Ɔci ɛkkɛn bala loṭi ma te jyeka wonkɛn jyeka pwadin neeni, ɔci ɛkkɛn bala yɔŋi maka waakɛn yeyin. 7Ɔci ne Hiruuduc Antipac mena a ḍuaŋa tolan neeni tieŋni jyek naŋka naŋŋɛ Yaccu coŋin neeniyɛ, ɛkɛ buañi ɔci bala poŋi jieko, acaan ma gɛɛg gɔki agi, “Gena Yɔhanna jɔŋŋin ñaalɔ te lienti ɔci bala noŋi naŋka neen neeni.” 8Ɔci maka pookɛn gɛɛg gɔki agi, “Gena Iliiya dɔɔkkin tɛɛti moki ba jwalla guaŋŋɛ Jwaŋa Tolan agi ɛkta bɛɛdɔ dɔɔktɔ dɔkɔy.” Ɔci maka pookɛn gɛɛg moki poŋi agi, “Gena bɔwan te baaṭi gɛɛl jɔŋŋin ñaalɔ te lienti.” 9Ɔci Hiruuduc Antipac gɔki agi, “Hay! Yɔhanna wyeñɛ ŋutcan ‘ya ɔntɔ. Ɛkɛ bawwin doki. Oŋ yeti a menɛ moki noŋi naŋka tɛyan neeniy? A ɛkɛ?” Ɔci Hiruuduc Antipac bala lieṭi pɔy aŋka ɛkɛ Yaccu yuardɛ ɛkɛ. 10Ne cuudan Yaccu dɔɔkki nona ɛkɛtiyɛ, ɛkkɛn Yaccu myetkɛ te naŋka naŋɛ ɛkkɛn waakɛnda. Ɔci ɛkkɛn waakɛn litcɛ bora eññɛ Yaccu bana parɛti bana yenti Bɛtceeyiday. 11Yeti ne poli ma polla tolan tieŋki agi Yaccu baalɔ ooddɔ ban Bɛtceeyidatiyɛ, ɛkkɛn ati bootcin ɛkɛti. Ɔci ɛkɛ yomɛ pɔŋnɛ ɛkkɛnti, ɔci gɔkcin ɛkkɛnti te jyek cyɛgji Jwaŋa Tolan, ɔci maka waakɛn yeyin gɛɛg ywaŋŋɛyɔ. 12Ɔci te oŋ unniyɛ, Maka A Inyaakkɛn Wyetkɛn Ne Yyɛɛwɔ bɛɛn Yaccuti, ɔci gɔkcin ɛkɛti agi, “Dala i polla tolan neeni cuña bonk jitin aŋka ɛkkɛn yɔɔrdi nonka ninkɛ, ɔci yɔɔrdi nona omki waako. Acaan nona neeni a wɔɔŋ jiñɛ budan.” 13Yeti Yaccu ṭwokcin ɛkkɛnti agi, “A’a, dala ɛkkɛ ɛkkɛn ‘wondɛ waak aŋka amtan ɛkkɛn te wɛnni.” Ɔci ɛkkɛn gɔkcin Yaccuti agi, “Ogo, ɔɔn balkɔn byedg ne dɔɔyɔ ɔci yaka ‘yɛggin ne yyɛɛwɔ budan. Ɛkkɛn yɔmdi bɛɛ, kan ɔɔn ooddɔn wɛrdɔn oomdin pookɛn moki kaapun aŋka yɔmdi te maka yɔɔd ne ḍɔɔlan neeni kaapun no.” 14Maka ‘uay pookɛn bala a alpn ne dɔɔyɔ (5,000). Ɔci Yaccu gɔkcin maka laldɛ ɛkɛti agi, “Gɔṭṭɛ, dala ɛkkɛ gɔktɛ mati ma cootti iñɔ magga da te noonɛn, ɔci magga da te noonɛn. Nona ne cyɛɛlɔyɛ, dala ma cootti iñɔ a ma baan ne yyɛɛwɔ mena parɛ byeŋkɛ (50).” 15Ɔci maka laldɛ Yaccu ati gɔkcin ɛkkɛnti ba jwali Yaccu, ɔci ɛkkɛn cooccin iñɔ a ɔɔn doki. 16Ɔci Yaccu byedg luullɛ byeŋkɛti, ɔci yaka ‘yɛggin moki luullɛ byeŋkɛti, ɔci ɛkɛ cɔkcin Juaŋti te waka neeni. Ɔci ɛkɛ waak wɛɛnnɛ jitin, ɔci ‘wonnɛ maka laldɛ ɛkɛ, ɔci ɛkkɛn waak ‘woñgi ma. 17Ɔci ɛkkɛn omjin waakɛnda, ɔci korkɛn yoŋgin, ɔci ɛkkɛn mwonnin. Ɔci ɛkkɛn tiɛdɛ oomdin, ɔci oomdin ɛkkɛn tiɛtki a oomdin a wɛɛdgin ḍyɛrin neeniyɛ, ɛkkɛn limiyɔ ma ɔdin kumgin a inyaakkɛn wyetkɛn ne yyɛɛwɔ. 18Ɔci oŋ gɛɛlti Yaccu bala cɔki parɛ iki maka laldɛ ɛkɛ, ɔci ɛkɛ tooccin ɛkkɛnti agi, “Ma gɔki agi ‘ya agji menɛ?” 19Ɔci ɛkkɛn ṭwokcin ɛkɛti agi, “Ma gɛɛg gɔki agi i agji mena tolan gɛɛl bɛɛnɔ dɔɔŋnɔ te lienti. Ɔci ma gɛɛg gɔki agi i agji Yɔhanna Mena Buoṭi May, ɔci maka pookɛn gɛɛg gɔki agi i agji Iliiya. Ɔci maka pookɛn moki gɔki agi i agji bɔwa te baaṭi gɛɛl jɔŋnɔ ñaalɔ te lienti.” 20Ɔci ɛkɛ tooccin ɛkkɛnti agi, “Oŋ ɛkkɛ da poŋɛ gɔkɛ ‘ya a menɛ daŋkun?” Ɔci Butruc ṭwokcin ɛkɛti agi, “Ɛɛ, ‘ya da gɔkka, i a Kiṭɔ Mena muonɛ Jwaŋa Tolan Boray.” 21Yeti Yaccu ɛkkɛn myennɛ agi naa ɛkkɛ ma nɔɔttɛ te jyeka neeni men bɛɛ. 22Ɔci ɛkɛ gɔki agi, “Taab bɛya ‘ya Kaci Ma Baanti ne tolan. Maka ḍwaŋin ɔci gaciicin ḍwaŋin ma Icrayiil, ɔci maka loṭi worga Juaŋyɛ, ɛkkɛn yooktan te ‘ya, ɔci ‘ya nokta ma, ɔci ne nink ne ḍoogɔ bɛɛti borayɛ, ‘ya oŋ jɔŋŋa ñaalɔ moki.” 23Ɔci ɛkɛ gɔkcin mati waakɛnda moki agi, “Kan men gɛɛl buagɔn bootti ‘yatiyɛ, dala ɛkɛ mwondi te caŋti ñingɛ te war ɛkɛ parɛ, ɔci dala ɛkɛ kakan ɛkɛ luldɛ oŋkanda, ɔci dala ɛkɛ bɛya bootti ‘yati ne lien bɛɛdi ɛkɛti ɔɔn. 24Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin bala ñaalɔ pɔliji neeni bɛɛ. Yeti kan men gɛɛl boottin ‘yati ɔci noŋdi ba jyek ‘ya, oŋ kan te ɛkɛ noktan ma ɔɔnyɛ, mena neeni ɛkɛ aŋka yɔɔrdi tɛɛtin bala ñaalɔ pɔliji neeni. 25Kan men gɛɛl balki waka bala iñɔ baanji wɛnni waakɛndayɛ, ɔci kan tɛɛtin bala ñaalɔ baaw ɛkɛtiyɛ, oŋ waka bala ɛkɛti a waka budan neeni yɔmdi a ɔki? Yɔmjin bɛɛ. 26Kan men gɛɛl buayi ma ñingɛn te aŋŋa ɛkɛ agi men ‘ya, ɔci te nɔɔtkin ma te lali ‘yayɛ, ɔci ne baaṭi ne ‘ya Kaci Ma Baan bɛɛdɔn iki malɛɛkanyɛ, Wey ɔɔn ‘ya naŋda galdi a gali te pwani ‘ya ɔci te pwani Wey ɔɔn, ɔci te pwani malɛɛkan ɛkɛ. Ɔci ‘ya poŋja te naŋki mena neeni daŋkun. 27Yeti ‘ya gɔkka ɛkkɛti awarɛ ka ma gɛɛg bala yɔdgi iki ɛkkɛ wɛnni, ɛkkɛn tuwa bɛɛ, yeti te ñamu ɛkkɛn gɔrti cyɛgji Jwaŋa Tolan.” 28Ɔci ne nink ne dɔɔyɔ wyetkɛn ne ḍoogɔ bɛɛki borayɛ, Butruc ɔci Yaakub ɔci Yɔhanna, ɛkkɛn eññɛ Yaccu poom jitin aŋka cɔkti Jwaŋa Tolanti. 29Ɔci ne Yaccu baali cɔki Juaŋtiyɛ, ɛkɛ aaŋŋɛyɔ Juaŋ warɛti, ɔci bworŋin ɛkɛ bɔɔna bɔɔn ne pɛñan, ɔci galla gallo. 30Ɔci gɔṭṭɛ, maka ‘uay gɛɛg waakɛn lɛɛllɛ bora bala yɔdi iki Yaccu. Ɛkkɛn bala gɔwwi iki Yaccu. Gena Muuca ɔci Iliiya. 31Ɛkkɛn waakɛn lɛɛllɛ bora, ɔci ɛkkɛn bala gɔwwɔ iki Yaccu te jyek lyena tuudi Yaccu ban Urcaliim ne cwakantiy. 32Butruc ɔci maka balki iki ɛkɛyɛ, ɛkkɛn bala wici ne tolan, ɔci ne ɛkkɛn ṭiekiyɛ, ɛkkɛn Yaccu yuarcɛ warɛ galla gallo, ɔci maka ne yyɛɛwɔ neeni yuarcɛ ɛkkɛn daŋkun bala yɔdi iki Yaccu. 33Ɔci ne ‘uaya neeni noŋki jɔŋti ootti te Yaccutiyɛ, Butruc gɔkcin Yaccuti agi, “Hay, i Ciɛggɔn, kan ikin cietin wɛnni oŋkanda a ɔɔn pwatcin hay! Dala ɔɔn noŋdɔn doŋki ne ḍoogɔ, ɛka ne cyɛɛlɔ te i, ɔci ɛka ne cyɛɛlɔ te Muuca, ɔci ɛka ne cyɛɛlɔ da te Iliiya.” Ne ɛkɛ gɔki a ɔɔn wanna gena guagdɛ ɛkɛ neeni gɔ yuartɛji ɛkɛ bɛɛ. 34Ɔci ne ɛkɛ gɔŋni a ɔɔnyɛ, pɔli bɛɛn ɔci ɛkkɛn kwommɛyɔ, ɔci ɛkkɛn buayi ne pɛñan. 35Ɔci pwan bɛɛn bora te pɔliti, ɔci gɔkcin ɛkkɛnti agi, “Mena neeni a Kaci ‘ya kacca mwowwan ‘ya boray. Dala ɛkkɛ tieŋdɛ jyek ɛkɛ!” 36Ɔci ne jyeka guaŋŋɛ pwan baaniyɛ, ɔci Yaccu bala yɔɔd parɛ aŋan i maka laldɛ ɛkɛy. Ɔci ɛkkɛn menga nɔɔtkɛ te naŋka yuarɛ ɛkkɛn neeni te oŋŋa wanna bɛɛ. Ɛkkɛn cien lieda jwali gworɛyɔ. 37Ɔci ne liidɔ ne ɛkkɛn kooki iñɔ te poom wyeñɛtiyɛ, ɛkkɛn koogjin iki polla tolan. 38Ɔci gɔṭṭɛ, mena ‘uan gɛɛl bala maka coŋinti neeni, ɔci ɛkɛ yaadan boor ɔci gɔkcin agi, “Mena loṭi may, gɔrca kaci ‘ya kacca ‘uan ṭɔɔlɛ neeni, kacca parɛ gɛɛl bala moki bɛɛ. 39A oŋki ɛkɛ mugdɛ jwaŋa yaayan, ɔci ɛkɛ bala yaadan ne pɛñan, ɔci ɛkɛ gwottan a gwotkin, ɔci ɛkɛ tukɛ coopi juotan, Ɔci warɛ niin a kɔɔgi te naŋki jwaŋa yaayan. Ɔci jwaŋa yaayan neeni bala ɛkɛ gwottɛ gɔ moki gwotkɛ ɔɔn. 40’Ya tooccan maka lala iti doki ka dala ɛkkɛn jwaŋa yaayan neeni ŋɔɔltan bora te ɛkɛti, yeti ɛkkɛn yaaŋnɛti bɛɛ.” 41Ɔci Yaccu ṭwokcin gɔkcin agi, “Hay, ɛkkɛ maka bala baan wyeñɛti acca maka jyeti Jwaŋa Tolanti ne ḍiɛran, maka wyetkɛn tɛyan nɛ, ɛkkɛ baltin iki ‘ya wɛnni yuong ne ñiṭin moki aŋka ɛkkɛ jyeddɛy? Kaci owwa ‘yati wɛnni!” 42Ɔci ne kaci baali bɛɛdi Yaccutiyɛ, ɛkɛ muŋŋɛ jwaŋa yaayan ɔci yiɛmnɛ ɛkɛ iñɔ. Ɔci Yaccu gɔkcin ne pɛñan jwaŋa yaayanti, ɔci jwaŋa yaayan kooyin bora te kaciti. Ɔci Yaccu kacca neeni ywaŋŋɛyɔ. Ɔci ɛkɛ kaci ‘wonnɛ weegɛn bieŋɛti moki. 43Ɔci ma yomgɛn buañi te naŋka tɛyan naŋki Jwaŋa Tolan neeni. Ɔci ne ma yomgɛn potki a ɔɔnyɛ, ɔci Yaccu gɔkcin maka laldɛ ɛkɛti agi, 44“Hay, ɛkkɛ! Dala ɛkkɛ tieŋdɛ jyek ‘ya ne pwadan. Ne oŋ gɛɛltiyɛ, ‘ya Kaci Ma Baan ‘wonta ma ma byeŋkɛnti.” 45Yeti ɛkkɛn tieŋŋin jyeka guaŋŋɛ Yaccu neeni ne pwadan bɛɛ, acaan ɛkkɛn wyetkɛn waakɛn jiljɛ ñaalɔ. Ɔci ɛkkɛn tooccin ɛkɛti te jiek jitkɛn bɛɛ, acaan ɛkkɛn buayi. 46Ɔci maka laldɛ Yaccu bala gɔwwɔ yɔtin pookɛn agi, “‘A mena aga mena tolan te ikintiy!” 47Ɔci ne Yaccu paŋi ɛkkɛn ŋeenniyɛ, ɛkɛ kacca ḍiɛran gɛɛl eññɛ, ɔci ḍuannɛ ɛkɛ taaŋɛti. 48Ɔci Yaccu gɔkcin mati agi, “Tieŋdɛ ɛkkɛ! Kan men gɛɛl kacca ḍiɛran neeni mugdɛ te yenti ‘yayɛ, a ɔɔn bala ba ‘ya da mugda ɛkɛ wanna. Ɔci mena noŋi ne pwadan ‘yatiyɛ, ɛkɛ noŋi ne pwadan ‘yati paru bɛɛ. Ɛkɛ noŋi ne pwadan Wey ɔɔn mena ‘ya cuonnati daŋkun. Mena ḍiɛran te ɛkkɛ gɛɛlyɛ, ɛkɛ aŋka tol tol te ɛkkɛ.” 49Ɔci Yɔhanna gɔkcin ɛkɛti agi, “Mena loṭi may, men gɛɛl yuarŋɔn ɔɔn ɛkɛ bala jɔkin yeyin koodɛ bora te yenti i. Ɔci ɔɔn kɛŋnɔn ɛkɛti acaan ɛkɛ a men ikin bɛɛ.” 50Yeti Yaccu gɔkcin ɛkɛti agi, “A’a, naa ɛkkɛ kɛktɛ ɛkɛti bɛɛ. Kan men gɛɛl yookɔn te ɛkkɛ bɛɛyɛ, a ɔɔn bala ba ɛkɛ a men ɛkkɛ.” 51Ɔci ne oŋŋa ɛkɛ eedi Jwaŋa Tolan ñaalɔ pɔliji cɔɔlniyɛ, ɛkɛ buaŋŋɛ woon ban Urcaliim. 52Ɔci ɛkɛ ma gɛɛg cuuññɛ ñamu. Ɔci maka neeni ɛɛrjin ban Camɛɛrya acaan ɛkkɛn buagɔn Yaccu yɔŋtan noon gɛɛl aŋan. 53Yeti ma Camɛɛrya yookɔn te ɛkɛ. Ɛkkɛn yookɔn acaan ŋeecɔn ɛkkɛn agi Yaccu baalɔ ooddɔ ban Urcaliim. (Ma Icrayiil ɛkkɛn yoyi ñin iki ma Camɛɛrya.) 54Yaakub ɔci Yɔhannayɛ, ne ɛkkɛn tieŋki jyeka neeniyɛ, ɛkkɛn tooccin Yaccuti agi, “Ciɛggɔn, ɔɔn cɔktɔn Juaŋti aŋka maañ bɛya te ñaalɔ pɔliji maka neeni amdɛ?” 55Yeti Yaccu warɛ yallɛ ɛkkɛnti, ɔci gɔkcin ne pɛñan ɛkkɛnti. Ɛkɛ bala ṭeyi ɛkkɛn. Ɛkɛ gɔkcin ɛkkɛnti agi, “Yomg ɛkkɛ bala a ɔki a ɔɔn? ‘Ya Kaci Ma Baan bɛɛn aŋka ma nogdi bɛɛ. ‘Ya bɛɛn aŋka ma yɔɔd ‘ya.” 56Ɔci ɛkkɛn jɔŋŋin, ɔci ati bana parɛ. 57Ɔci ne ɛkkɛn balki atki pɔɔjɔ menyɛ, mena ‘uan gɛɛl bɛɛn ɔci gɔkcin Yaccuti agi, “‘Ya buaga bootta iti oŋki waakɛnda nona i ooddiy.” 58Ɔci Yaccu gɔkcin ɛkɛti agi, “Wɛɛk balki kolka cieki ɛkkɛn, ɔci ḍiirga peyi ñaalɔ neeniyɛ, ɛkkɛn balki kwork aŋka ciekɛ ɛkkɛn. Yeti kan ne ɛkkɛ bootti ‘yatiyɛ, ɛkkɛ baltɛ nona ciyɛ ɛkkɛ daŋkun bɛɛ, acaan ‘ya Kaci Ma Baan balka non ‘ya waanɛ gɛɛl aŋka niina ‘ya bɛɛ.” 59Ɔci Yaccu gɔkcin mena parɛti agi, “Bootta ‘yati.” Ɔci ɛkɛ ṭwokcin gɔkcin agi, “‘Ya ootta lakun aŋka ne wey ɔɔn tuudiyɛ, ɛkɛ jokca koolji ñamu, oŋ ‘ya oŋ bɛɛda bootta iti oŋo.” 60Ɔci Yaccu gɔkcin ɛkɛti agi, “Dala ma ɛkkɛn maka baaw jyek Juaŋtiyɛ, dala ɛkkɛn ma gwaltan ne ɛkkɛn tuutɛ ɔɔn. Ɔci iyɛ, dala i aŋka ootta miet ma te jyek cyɛgji Jwaŋa Tolan.” 61Ɔci mena parɛ gɛɛl gɔkcin Yaccuti moki agi, “Ciɛggɔn, ‘ya buaga bootta iti. Yeti te ñamu ‘ya buaga ootta lakun ñiep ma ɔɔn.” 62Ɔci Yaccu gɔkcin ɛkɛti agi, “Gɔṭṭi, mena pey noonyɛ, kan ɛkɛ gɔrti ŋoyɔyɛ, ɛkɛ ooddi a tyɛlga bɛɛ. Ɛkɛ noon jyɛddɛji. Ɔci ba jyek mena pey noon neeniyɛ, bala ba mena buagɔn jyek Juaŋo, ɔci ne ɛkɛ gɔrti ŋoyɛti oŋkandayɛ, ɛkɛ yaakinti kaatti ban Jwaŋa Tolanti moki bɛɛ.”

will be added

X\