Luuk 8

1Ɔci ne naŋki juma neeni baani dokiyɛ, ɔci Yaccu ati bonk jitin. Ɔci ɛkɛ bala loṭi ma, ɔci bala mieti ma te jyeka wonkɛn jyeka pwadin, jyek cyɛgji Jwaŋa Tolan. Ɔci Maka A Inyaakkɛn Wyetkɛn Ne Yyɛɛwɔ neeniyɛ, ɛkkɛn ati iki ɛkɛ. 2Ɔci maka moong gɛɛg daŋkun bala. Gena moonga ywaŋŋɛ ɛkɛ te jɔkin yeyin ɔci te wajany. Ɔci Moryam, (mena bartan ma a Magdalin) ɛkɛ bala daŋkun. Ɛkɛ a mena jɔkin yeyin koonɛ Yaccu bora te ɛkɛti ne dɔɔyɔ wyetkɛn ne yyɛɛwɔy. 3Ɔci Yuwaana ɛŋ Kuja bala iki ɛkkɛn. Cuja ɛkɛ a ḍuaŋa ṭɔɔlɛ on Hiruuduc Antipac. Ɔci Cucaana bala daŋkun. Ɔci moonga pookɛn bala ne coŋɔn. Ɛkkɛn bala moki Yaccu ɔci ma ɛkɛ te waako. 4Ɔci ne polla tolan balki bɛɛti nona ne cyɛɛlɔ a ɔɔnyɛ, ɔci maka bonka coŋinti ɛkkɛn bɛɛn nona ɛkɛti daŋkun, ɔci ɛkɛ gɔkcin jwalla a caagɔn ɛkkɛnti agi, 5“Mena ‘wayi kookinyɛ, ɛkɛ ati bora ɔci bala ‘wayi kookin ɛkɛ. Ɔci ne ɛkɛ baali ‘wayi a ɔɔnyɛ, kookin gɛɛg ḍɛɛmdin pɔɔjɔ pɔy konɛti. Ɔci ɛkkɛn tiicci ma iñɔ te ciegɛn. Ɔci ḍiirg bɛɛn ɔci ɛkkɛn kookin amɛ doki acaan ɛkkɛn bala niin kuoti te bora. 6Ɔci kookin gɛɛg ḍɛɛmdin nona gwoyiti. Ɔci ɛkkɛn ywollin, ɔci acaan oŋ waŋɛ myɛl myɛl a ɔɔnyɛ, ɔci ɛkkɛn tuuni acaan nona gwoyiti tɛy tɛy ɔci ñwopi iñɔ bɛɛ, ɔci ɛkkɛn bɛɛkkɛn ati iñɔ bɛɛ. 7Ɔci kookin pookɛn gɛɛg ḍɛɛmdin nona guobgin, ɔci guobgin ḍwaŋgin ne pɛñan, ɔci kookin gworɛyɔ. 8Ɔci kookin pookɛn gɛɛg ḍɛɛmdin nona balki ṭɛra pwadan. Ɔci ɛkkɛn ywollin ne pwadan. Ɔci kookin neeniyɛ, kɛɛla tukɛ ne cyɛɛlɔ eccin kɛɛlan pookɛn tuggɛn kɔɔna kɔɔnno.” Ɔci ne Yaccu ma myennɛ te jwalla neeniyɛ, ɔci ɛkɛ gɔkcin te pwana tolan agi, “Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.” 9Ɔci ne maka laldɛ Yaccu neeni toocki ɛkɛti te jwalla a caagɔn neeni jiñɛyɛ, 10ɛkɛ gɔkcin ɛkkɛnti agi, “Ɛkkɛ ‘wonnin ‘ya ñing tɛɛn aŋka ɛkkɛ jyek cyɛgji Jwaŋa Tolan jitkɛn yuartɛ ne pwadan. Yeti maka pookɛnyɛ, ɛkkɛn tieŋdi gena jyeka guagdi ‘ya neeni budan. ‘Ya gɔk ɛkkɛnti cooy a caato. ‘Ya gɔk ɛkkɛnti a ɔɔn ‘aŋka dala ɛkkɛn gɔṭi a gwali budan, ɔci ɛkkɛn tieŋdi a tieŋŋin budan, aŋka naa ɛkkɛn waakɛn yaltan ɔci bɔɔktɛ Juaŋ bɛɛ.’” 11“Gena jwalla a caagɔn jiñɛ neeni. Kookinyɛ, gena jyek Jwaŋa Tolan ma baanti. 12Ɔci ba jyek kookin ḍɛɛmdin pɔɔjɔ neeniyɛ, bala ba maka tyeŋi jiek a tyeŋi budan. Ɔci Jwaŋa Yaayan bɛya, ɔci gɔ jiek kalɛ ɔntɔ te ɛkkɛn yomgɛnti ɔɔn. Ɔci a ɔɔnyɛ, ɛkkɛn jyeddi Juaŋti bɛɛ. Ɔci ɛkkɛn yɔɔdɛ ɛkɛ bɛɛ. 13Ɔci moki ba jyek kookin ḍɛɛmdin nona gwoyiti neeniyɛ, bala ba jyek maka tieŋŋin Jieko, ɔci te ñamu ɛkkɛn yomgɛn ñɔɔna ñɔɔno. Ɔci ɛkkɛn bala ba poka bɛɛkkɛn ati iñɔ bɛɛy. Ɛkkɛn bala yɔdi ne ḍiɛran ṭɔɔlɛ, yeti oŋŋa pɔɔd bɛɛdi ɛkkɛntiyɛ, ɛkkɛn ḍɛɛmdi iñɔ ne pɛñan jyek Juaŋ daltan. 14Ɔci moki ba jyek kookin ḍɛɛmdin nona guobginyɛ, bala ba maka tieŋŋin jyek ‘ya, yeti jyeka pookɛn bɛya ɛkkɛn yomgɛnti, ɔci jyek ‘ya gwortanyɔ jyeka pookɛn neeni. Jyeka pookɛn neeniyɛ, gena paŋi jieko, ɔci jyek bwakti maal waakɛnda, ɔci jyek bwakti waka ma yomgɛn ñɔɔkiy. Jyeka neeniyɛ, ɛkkɛn jyek ‘ya gwortanyɔ ma yomgɛnti. Ɔci ba kookin balki ñingɛn ne pwadan bɛɛyɛ, bala ba maka neeni balki naŋka pwadin daŋkun bɛɛ. 15Ɔci ba jyek kookin ḍɛɛmdin ṭɛra pwadanti neeniyɛ, bala ba maka tieŋŋin jyek ‘ya, ɔci Jiek mugɛ ne pwadan, ɔci jyek ‘ya neeniyɛ, noŋdi naŋka pwadin ɛkkɛn yomgɛnti. 16“Kan men gɛɛl dyɛka tondɛ maañyɛ, dyɛka neeni kwomdɛwi men piil bɛɛ. Ɔci ɛkɛ dyɛka oldɛ aŋgan pwanɛti bɛɛ. Ɛkɛ dyɛka ḍuattɛ ñaalɔ nona ḍɔcki ma dyɛka aŋka ɛkɛ dɛkti noono. 17Gen gɛɛl konɛ kuoltanji ma bɛɛ, yeti gena konɛ kuoltanji ma neeni ne baaṭi ɛkɛ dɔki bɛya bora. Ɔci moki gena a coggɔn bɛya bora mati dɔki. Ɔci jiek ŋeettan ma waakɛnda. 18Dala ɛkkɛ woŋgɔ tiittɛ te waka ɛkkɛ ‘wondɛ Jwaŋa Tolan, ɔci dala ɛkkɛn naŋdɛ. Kan ɛkkɛ noŋɛ waka ɛkkɛ ‘wondɛ Jwaŋa Tolanyɛ, ɛkɛ ɛkkɛ ‘uottɛti moki. Yeti kan ɛkkɛ waka neeni naŋdɛ bɛɛyɛ, Jwaŋa Tolan mañ ɛkɛ maña dɛki ɛkkɛti wanna oodɛ bora te ɛkkɛti, ɔci waka ɛkkɛ ‘wonnɛ ɛkɛ neeni aga waka budan.” 19Te oŋŋa wannayɛ, mɛy Yaccun ɔci modg Yaccun bɛɛn ɛkɛti. Ɔci ɛkkɛn yaakinti orcinti nona ɛkɛ warɛti bɛɛ, acaan ma bala a polla tolan. 20Ɔci Yaccu myetki ma agi, “Mɛy ɛkkɛ ɔci modg ɛkkɛ, ɛkkɛn bala yɔɔd bora buagɔn i.” 21Ɔci Yaccu ṭwokcin ɛkkɛnti agi, “A ɔɔn, mɛy ɔɔn ɔci modg ɔɔnyɛ, ɛkkɛn a maka tyeŋi jyek Juaŋ oŋkanda ɔci noŋi ba jyek ɛkɛy!” 22Oŋ gɛɛltiyɛ, Yaccu iki maka laldi ɛkɛyɛ, ɛkkɛn taapcin murkaji. Ɔci ɛkɛ gɔkcin ɛkkɛnti agi, “Dala ikin oottin kuocɔ galŋ taaŋŋa parɛti.” Ɔci ɛkkɛn luoṭṭi. 23Ɔci ne ɛkkɛn balki taapki eedɛ murkayɛ, ɔci Yaccu wiccin, ɔci jwami bɛɛn ne tolan galŋji. Ɔci murka noŋi kuma te piego. Ɔci murka noŋi eedɛ toolo. 24Ɔci ɛkkɛn ati Yaccuti, ɔci ɛkkɛn bala jieci ɛkɛ warɛ, ɔci ɛkkɛn gɔki agi, “Ciɛggɔn, Ciɛggɔn, ikin ḍaŋnin doki, hay!” Ɔci ɛkɛ ṭiewin, ɔci ɛkɛ gɔkcin jwamiti ne pɛñan, ɔci jwami yɔɔni, ɔci gɔkcin pɔɔgga ḍwaŋinti moki, ɔci pɔɔgi moki yɔɔnni, genga bala moki bɛɛ. 25Ɔci ɛkɛ gɔkcin ɛkkɛnti agi, “Ba jyenna ɛkkɛ jyetti ‘yati ne pwadan bɛ?” Ɔci ɛkkɛn korkɛn buañi, ɔci bala poŋi jieko, ɔci ɛkkɛn bala gɔwwɔ yɔtin pookɛn agi, “‘Wana neeni tolcin awarɛ hay! Acaan ne ɛkɛ gɔŋni jwamiti ɔci piegtiyɛ, ɛkkɛn tieŋŋin jyek ɛkɛ.” 26Ɔci ɛkkɛn bala mual meni eedɛ murka, ɔci ɛkkɛn dɛñjin galŋ kwoña parɛti. Gena ban Gadara. (Bana neeni ma boṭi ‘wota agi Gɛraca.) Ɔci ban Jaliil daŋkun bala te galŋ kwoña parɛ. 27Ɔci ne Yaccu tonni bora kuocɔ nona iwantiyɛ, ɛkɛ koogjin iki mena ‘uan gɛɛl bana tolanti neeni. Ɛkɛ mugɛ jɔkin yeyin. Ɔci ɛkɛ yookɔn warɛ te ‘yɛŋi bworŋin te baaṭi doki. Ɔci ɛkɛ bala ciyi baanji bɛɛ. Ɛkɛ ciyi gena non kolka jokki ma may. 28(‘Wana neeni mugɛ jɔkin yeyin ne coŋɔn. Ɔci acaan ma buagɔn ɛkɛ gwaltan ne pwadanyɛ, ɛkɛ ḍɛɛgɛ ɛkkɛn te jiŋgin i wyeng oŋki ne coŋɔn. Yeti ɛkɛ jiŋgin ɔci wyeng ɛɛrŋɛ jitin. Ɔci a oŋki ɛkɛ eetan jɔkin yeyin bora wɔɔŋji.) Ɔci ne ɛkɛ yɔɔrki i Yaccu oŋ gɛɛltiyɛ, Yaccu gɔkcin jɔkin yeyinti agi dala ɛkki koodɔ bora te men wardanti. Ɔci te wɛnni mena neeni yaajjin ne tolan, ɔci ḍwoñjin iñɔ Yaccu ñamɛti. Ɔci jɔkin yeyin gɔkcin te tuk mena neeni Yaccuti agi, “I Yaccu Kaci Jwaŋa Tolan Ñaalɔ, i buagi gena ‘yati yeti? Gɔṭṭi, ‘ya ḍɔnna iti, naa i noŋja ne yaayan ‘yati bɛɛ.” 30Ɔci Yaccu tooccin ɛkɛti agi, “I yenti ɔki?” Ɔci ɛkɛ ṭwokcin ɛkɛti agi, “‘Ya yenta ‘Ɔɔn Coŋgɔn.’ ” Ɛkɛ gɔki a ɔɔn acaan jɔkin yeyin bala menti kɔɔna kɔɔnno. 31Ɔci te oŋŋa wannayɛ, poli kwotin polla tolan bala yɔdi poom taaŋɛti omi luomo. Ɔci jɔkin yeyin neeni tooccin Yaccuti agi, “Naa i ɔɔn yiɛptɔn kola beyanti bɛɛ. Ɔɔn cundɔn i kwotinti te jyek i aŋka ɔɔn kaattɔn ɛkkɛnti!” Ɔci Yaccu gɔkcin ɛkkɛnti agi, “Ɔgdɛ ooddɛ kaattɛ.” 33Ɔci jɔkin yeyin neeniyɛ, kooyin bora te menti, ɔci ati kaaccin kwotinti. Ɔci poli kwotin neeni ɛkkɛn yoŋŋin te ñaalɔ poom wyeñɛti ḍɛɛmdin iñɔ galŋji, ɔci ḍakcin waakɛnda galŋji. 34Ɔci maka gɔṭi kwotin neeniyɛ, ne ɛkkɛn gɔrki naŋka neeniyɛ, ɛkkɛn yiŋi bonk jitin. Ɔci ɛkkɛn maka bora balk jitin myetkɛ te naŋka neeni. 35Ɔci maka neeni bɛɛn gɔrcin gena naŋŋɛ Yaccu neeni. Ɔci ɛkkɛn bɛɛn nona Yaccuti, ɔci mena luudɔn neeni mɔkci bala ciyi i Yaccu. Ɔci acca ɛkɛ bala ɛŋi bworŋin, ɔci ɛkɛ wyeñɛ bɛɛn moki. Ɔci ma buaññi. 36Ɔci maka naŋka naŋŋɛ Yaccu yuarɛ neeniyɛ, ɛkkɛn maka bɛɛn nona neeniti myetkɛ te jyek ‘wana mugɛ jɔkin yeyin neeni. 37Ɔci maka ciyi bora ban Gadara taaŋɛti neeniyɛ, ɛkkɛn waakɛnda gɔkcin Yaccuti agi dala ɛkta ɔgdɔ ooddɔ ɔntɔ te ban ɛkkɛnji wɛnni, agi dala ɛkta non ɛkkɛn dalda. Ɛkkɛn gɔki ɛkɛti a ɔɔn acaan ɛkkɛn buayi ɛkɛ ne tolan. A ɔŋŋiyɛ, Yaccu dɔɔkcin kaaccin jiju murkaji. 38Ɔci ne Yaccu noŋi taapti murkatiyɛ, ‘wana jɔkin yeyin koonɛ Yaccu bora neeniyɛ, tooccin Yaccuti agi ɛkɛ ooddinti iki Yaccu. Yeti Yaccu mena neeni cuunnɛyɔ. Ɔci ɛkɛ gɔkcin ɛkɛti agi, 39“A’a, gɔṭṭi, ‘ya buaga dala i ɔgdi ootta dɔwwa ban ɛkkɛ, ɔci ma myetka te naŋka naŋŋɛ Jwaŋa Tolan iti neeni.” Ɔci ‘wana pɔŋnɛ Yaccu neeni ati baanji, ɔci maka bana tolan neeni myennɛ ɛkɛ waakɛnda te naŋka naŋŋɛ Yaccu ɛkɛti neeni. 40Ɔci ne Yaccu yorki i maka laldɛ ɛkɛ te kuocɔyɛ, polla tolan neeni yomgɛn ñɔɔna ñɔɔn ɛkɛti, acaan ɛkkɛn bala kɛɛy ɛkɛ. 41Ɔci mena ‘uan gɛɛl bɛɛni. Ɛkɛ yenti Jayroc. Ɛkɛ a ḍuaŋa ona morki ma Juaŋo. Ɛkɛ ḍwoñjin iñɔ Yaccu ñamɛti, ɔci ɛkɛ tooccin agi dala Yaccu bɛɛdɔ on ɛkɛ. 42Ɛkɛ balki kacca ɛɛŋ neeni ne cyɛɛlɔ budan. Ɔci kacca neeniyɛ, yuong ɛkɛ a inyaakkɛn wyetkɛn ne yyɛɛwɔ. Ɛkɛ warɛ yaayɛ, noŋi tuwa. Ɔci ne Yaccu jɔŋni baali ati ooddi ban Jayrocnyɛ, gɔ ɛkɛ bwodinwi polla tolan moki ɔɔn. 43Ɔci mena ɛɛŋ gɛɛl bala daŋkun wɛnan, ɛkɛ warɛ yaayɛ yimg wɔyi a wɔɔno. Ɔci ɛkɛ warɛ yaayɛ yuong a inyaakkɛn wyetkɛn ne yyɛɛwɔ. Yeti kiimi gɛɛl yaakinti ɛkɛ ywaŋdɛyɔ bɛɛ. Mal ɛkɛ ḍakcin waakɛnda te kanŋa maka kimtan. 44Ɔci ɛkɛ bɛɛn pɔya Yaccu ŋoyɛti, ɔci topcin bworŋ Yaccu lɛkɛti, ɔci ne pɛñan yimga wɔyi neeniyɛ, yɔɔni doki. 45Ɔci Yaccu gɔki agi, “Hay! A menɛ ‘ya tamma ñin a ɔɔn nɛ? Men gɛɛl toppin ‘yati, acaan ŋeej ‘ya doki naŋka tɛyan neeni ati te ‘yati.” Ɔci ne maka coŋin balkɛ kɛkki a ɔɔnyɛ, ɔci Butruc gɔkcin ɛkɛti agi, “Ciɛggɔn, polla tolan bala yɔɔd i waruti ne cwakanti, ɔci i gɔk agi i tammiyɔ menɛ a ɔki?” 47Ɔci ɛŋa neeniyɛ, ne naŋka neeni ŋeenni ɛkɛ dokiyɛ, ɛkɛ yaakinti naŋka neeni cogdɛyɔ te Yaccuti moki bɛɛ, ɛkɛ bɛɛn Yaccuti ɔci ɛkɛ warɛ ḍiedan, ɔci ɛkɛ ḍwoñjin iñɔ Yaccu ñamɛti, ɔci jiek oonɛ bora ma ñomgɛnti waakɛnda agi gena ɛkɛ tomjɛ bworŋ Yaccutiy. Ɔci agi ne ɛkɛ tomjɛ ɛktatiyɛ, ɛkɛ warɛ pwannɔ doki ne pɛñan. 48Ɔci Yaccu gɔkcin ɛkɛti agi, “Kaci ‘ya, te jyenna jyetti i ‘yati neeniyɛ, i waru pwani doki. Dala i ɔgdi ootta baanji te pwanno.” 49Ɔci ne Yaccu baali gɔki jiek ɛŋa neeniti menyɛ, mena ‘uan gɛɛl bɛɛn te on Jayroc mena a ḍuaŋa ona morki ma Juaŋti. Ɔci ɛkɛ gɔkcin ḍuaŋati agi, “Kaci i kacca ɛɛŋ buannɛ warɛ doki. Naa i mena loṭi ma taabba owwa budan moki bɛɛ.” 50Yeti ne Yaccu tieŋni a ɔɔnyɛ, ɔci ɛkɛ gɔkcin ḍuaŋati agi, “Naa i buay bɛɛ. Dala jyenna i jyetti ‘yati neeni tiyayɔ, ɔci kaci i warɛ pwada.” 51Ɔci ne ɛkɛ bɛɛni baanji ɔci kaanni orɔyɛ, men gɛɛl ati iki ɛkɛ orɔ bɛɛ, gena Butruc ɔci Yaakub ɔci Yɔhanna, ɔci kaci weegɛn i mɛɛgɛn aŋka ati i ɛkɛ orɔ. 52Ɔci ma waakɛnda bala wiak te ɛkɛ. Ma gɛɛg bala wiak a joono, ɔci ma gɛɛg moki bala wiak yaadan a yooko. Ɔci Yaccu gɔkcin ɛkkɛnti agi, “Naa ɛkkɛ wiagɛ bɛɛ. Dala ɛkkɛ joon daldɛ acaan ɛkɛ tuun awarɛ bɛɛ. Ɛkɛ wiccin a wiccin.” 53Ɔci ɛkkɛn lɛɛṭi te jyek ɛkɛ neeni. Ɛkkɛn lɛɛṭi a ɔɔn acaan ŋeecɔn ɛkkɛn mena neeni tuun awarɛ doki. 54Yeti Yaccu ɛkɛ muŋŋɛ te bieŋɛ, ɔci borcin ɛkɛti agi, “Hay! I ṭɔɔl ṭɔɔlɛ, jɔŋŋa ñaalɔ.” 55Ɔci ɛkɛ jian dɔki. Ɔci ɛkɛ jɔŋŋin ñaalɔ ne pɛñan. Mɛy ɛkkɛn ɔci weegɛnyɛ, ɛkkɛn korkɛn buañi te naŋka neeni. Ɔci Yaccu gɔkcin ɛkkɛnti agi, “Naa ɛkkɛ magga myettɛ te naŋka neeni bɛɛ.” Ɔci Yaccu gɔkcin mɛɛgɛnti agi, “Dala i ɛkɛ ‘woñga gena amtin.”

will be added

X\