Luuk 7

1Ne Yaccu ḍookki te lali jyeka neeni matiyɛ, ɛkɛ oŋ ati dɔɔki ban Kapɛrnyam. 2Ɔci mena a ḍuaŋa ackan ma Ḍɔɔm gɛɛl bala aŋan ɛkɛ balki mena kanŋan ɛkɛti. Ɔci ḍuaŋa ani mena kanŋan ɛkɛti neeni ne tolan. Ɔci mena kanŋan ɛkɛti neeniyɛ, warɛ yaayɛ ne pɛñan. Ɔci ɛkɛ noŋi tuwa. 3Ɔci ne ḍuaŋa tieŋni jiek agi Yaccu bala nona wannatiyɛ, ɛkɛ cyekin ma Icrayiil gɛɛg cuoññɛ Yaccuti aŋka ɛkkɛn tootti Yaccuti aŋka ɛkɛ bɛya aŋka mena kanŋan ɛkɛti neeni ywaŋdɛyɔ. 4Ɔci ne ɛkkɛn dɛñki nona Yaccutiyɛ, ɛkkɛn gɔkcin ɛkɛti tuggɛn tiiccɛ ne pwadan. Ɛkkɛn gɔkcin ɛkɛti agi, “Iyɛ, kan i mena neeni ywaŋayɔyɛ, a ɔɔn pwad pwado, acaan mena neeni pwad pwado. 5Acaan ɛkɛ ani kɛɛn ikin, ɔci gena ɛkɛ ɔɔn noŋnɔn ona morki ma Juaŋ neeni te bilk byeŋ ɛkɛ parɛy.” 6Ɔci Yaccu ati iki ɛkkɛn, ɔci ne ɛkkɛn cɔɔlkiti baan tɛyɛtiyɛ, ɔci ḍuaŋa mung ɛkkɛn cuonnɛ aŋka gɔkti Yaccuti agi, “Ciɛggɔn ɔɔn, naa i waru taabba a ɔɔn bɛɛ. ‘Ya a mena ḍiɛran, ɔci i a mena tolan. A ɔŋŋiyɛ, naa i kaacca on ‘ya on mena ḍiɛran neeni bɛɛ. Ɔci acaan ‘ya a genga bɛɛyɛ, 7aŋka ‘ya waanu bɛɛna iti bɛɛ neeni. Acaan ŋeej ‘ya kan i gɔkca jwali te tuk iyɛ, mena kaŋaŋ ‘yati neeni warɛ pwada doki. 8’Yayɛ, ma gɛɛg bala ñamu te ‘ya. Ɛkkɛn gɔkti ‘yati, ɔci ‘ya noŋ ba jyek ɛkkɛn. Ɔci ‘ya da balka ackan. ‘Ya a ḍuaŋa ɛkkɛn. Kan ‘ya gɔkca ackan gɛɛlti ka ɛkɛ ooddi noongatiyɛ, ɛkɛ ooddi doki ba jwali ‘ya. Ɔci kan ‘ya gɔkca ackan parɛti ka ɛkɛ bɛya wɛnniyɛ, ɛkɛ bɛya doki ba jwali ‘ya. Ɔci mena kanŋan ‘yatiyɛ, kan ‘ya gɔkca ɛkɛti agi, ‘I noŋja a ɔɔnyɛ,’ ɛkɛ noŋdi doki ba jwali ‘ya.” 9Ne Yaccu tieŋni jyeka neeniyɛ, ɛkɛ yomɛ buañi ɔci ɛkɛ warɛ yallɛ, ɔci ɛkɛ gɔkcin polla tolanti neeni agi, “Tieŋdɛ, hay! Mena jyeti ‘yati ne pwadan ba ‘wana neeniyɛ, gɛɛl yuarŋ ‘ya oŋgati bɛɛ. Ɔci ma Icrayiilyɛ, men gɛɛl jyeti ‘yati ba ‘wana neeni ɔɔn bɛɛ.” 10Ɔci ne maka cuuñɛ ma neeni dɔɔkki baanji ḍuaŋatiyɛ, ɛkkɛn mena neeni mɔkci warɛ pwani doki. 11Ɔci ne naŋka neeni baaniyɛ, ɛkɛ ati ban Neyin. Ɛkɛ ati iki maka laldɛ ɛkɛ iki polla tolan. 12Ɔci ne ɛkɛ noŋi cɔɔlditi kaañ tukɛ bana neenitiyɛ, mena ‘uan gɛɛl bala ḍurtan ma eetan ma bora kolk wyetkɛnti aŋka ɛkɛ joktan. Ɔci mena neeniyɛ, ɛkɛ jiennɛ mɛɛgɛn a cyɛɛlɔ budan. Ɔci mena neeniyɛ, mɛy ɛkkɛn a ɛŋa cieño. Ɔci maka coŋin gɛɛg te bana neenitiyɛ, ɛkkɛn bala iki ɛŋa kaci ɛkɛ tuun neeni. 13Ɔci ne Ciɛggɔn gɔrni ɛɛŋtiyɛ, ɛkɛ yomɛ pɔŋnɛ ɛkɛti. Ɔci ɛkɛ gɔkcin ɛkɛti agi, “Kow ɔɔn, kapa baa, naa i wiak gon konu a ɔɔn bɛɛ.” 14Ɔci ɛkɛ ati ɔci topcin yyɛña ḍuorki ma mena tuun neeniti. Ɔci maka ḍuoṭi men neeniyɛ, ɛkkɛn yɔɔnni. Ɔci ɛkɛ gɔkcin mena tuun neeniti agi, “Hay, ‘uan ṭɔɔlɛ, ‘ya gɔkka iti, dala i jɔlla ñaalɔ.” 15Ɔci ‘wana tuun neeniyɛ, ɛkɛ jɔŋŋin ñaalɔ, ɔci cooccin te ŋwayɛ, ɔci ɛkɛ gɔkcin jieko. Ɔci Yaccu mena neeniyɛ, ‘wonnɛ mɛɛgɛn bieŋɛti. 16Ɔci maka neeniyɛ, ɛkkɛn korkɛn buañi waakɛnda. Ɔci ɛkkɛn bala jieyi Jwaŋa Tolan gɔki agi bɔwa tolɔ bɛɛnɔ ɛkkɛnti. Ɔci ɛkkɛn gɔki moki agi Juaŋ bɛɛnɔ ma ɛktati! 17Ɔci jyek naŋki ɛkɛ neeniyɛ, ati ban Yahuudiya konɛ warda, ɔci bonka pookɛn korkɛnti waakɛnda daŋkun. 18Maka laldɛ Yɔhannayɛ, ɛkkɛn tieŋŋin te naŋki Yaccu, ɔci ɛkkɛn ɛkɛ myetki te naŋka naŋŋɛ Yaccu neeni waakɛnda. 19Ɔci Yɔhanna maka laldɛ ɛkɛ gɛɛg bornɛ ne yyɛɛwɔ nona ɛkɛti, ɔci ɛkɛ ɛkkɛn cuuññɛ nona Yaccuti aŋka tootti ɛkɛti agi, “I a Kiṭɔ mena guagdɛ Yɔhanna bala bɛyayɛ? Walla i a ɛkɛ bɛɛ? Mena kɛɛdɔn ɔɔn da parɛ?” 20Ɔci ne maka neeni bɛɛki nona Yaccutiyɛ, ɛkkɛn gɔkcin ɛkɛti agi, “Ɔɔn cuonnɔn Yɔhanna Mena Buoṭi May. Ɔɔn cuonnɔn ɛkɛ iti ɛkɛ tukɛ a jwali ṭɔɔlɛ tooci iti.” Ɔci ɛkkɛn tooccin ɛkɛti agi, “Hay! I a Kiṭɔ mena guagdɛ Yɔhanna bɛyayɛ? Walla i a ɛkɛ bɛɛ? I a mena parɛ? Mena kɛɛdɔn ɔɔn da parɛ?” 21Ɔci te oŋŋa wannayɛ, ma ywaŋŋɛ Yaccu ne coŋɔn te wajan ɛkkɛn ɔci te jɔkin yeyin. Ɔci maka coŋin maka ullin ywaŋŋɛ ɛkɛ daŋkun. 22Ɔci Yaccu ṭwokcin maka bɛɛn te Yɔhannati neeni agi, “Ɔgdɛ ooddɛ. Ɔci dala ɛkkɛ Yɔhanna myettɛ te waka yuarnɛ ɛkkɛy, ɔci te jyeka tieŋnɛ ɛkkɛ acca neeni. Dala ɛkkɛ ɛkɛ myettɛ agi maka ullin gɔrcin noon doki, ɔci maka ŋɔr yaakinti woon moki, ɔci maka naŋŋɛ cyɛc waakɛn pwadgin doki, ɔci maka miŋki yaakinti tyeŋi jiek moki, ɔci maka tuun jɔŋŋin ñaalɔ te kolk jitin moki, ɔci maka bɔwanyɛ, ɛkkɛn lali ‘ya te jyeka wonkɛn jyeka pwadin neeni. 23Ɔci dala ɛkkɛ ɛkɛ myettɛ ne pwadan agi maka jyenna ɛkkɛn jyetki ‘yati daltan bɛɛyɛ, yomg ɛkkɛn pwanna pwanno.” 24Ɔci ne maka cuuññɛ Yɔhanna atki dɔɔkki dokiyɛ, Yaccu bala mieti ma te jyek Yɔhanna. Ɛkɛ tooccin ɛkkɛnti agi, “Ɛkkɛ attɛ bora wɔɔŋji gɔrtɛ gena? Ɛkkɛ attɛ gɔṭɛ Yɔhanna? Oŋ ɛkkɛ ɛkɛ woonnɛ bala ba lwoma jiɛyi ñin jwammɔ? A’a, Yɔhanna ɛkɛ a mena ooki jyek ɛkɛ waakɛn bɛɛ. 25Ɛkkɛ attɛ bora gɔrtɛ menɛ? Walla ɛkkɛ attɛ bora gɔrtɛ mena ɛŋi bworŋin koyan bworŋin pwadinɛ? A’a, bworŋin ɛkɛ pwadɔ bɛɛ. Maka ɛŋi bworŋin pwadin ɔci balki waka coŋinyɛ, ɛkkɛn ciyi bora wɔɔŋji bɛɛ. Ɛkkɛn ciyi oorg maka ḍuaŋanti. 26Ɛkkɛ attɛ bora gɔrtɛ menɛ? Ɛkkɛ attɛ bora gɔrtɛ mena a bɔwa gɛɛli? Awarɛ, ‘ya gɔkka ɛkkɛti, Yɔhanna neeni ɛkɛ bala ñamu te mena a bɔwa. 27Mena neeniyɛ, ɛkɛ a mena jiekɛ guagdɛ Juaŋ worgan a kiigin jitin agi, ‘Gɔṭṭɛ, cuuda ‘ya cundi ‘ya botti ñamu i ñamuti aŋka ɛkɛ pɔy ywaŋdɛ te i.’” 28Ɔci Yaccu ‘uoccin gɔkcin moki agi, “Tieŋdɛ, ma waakɛndayɛ, ɛkkɛn men gɛɛl bala tolcin te Yɔhanna bɛɛ, baawo. Yeti mena ḍiɛran cyɛgji Jwaŋa Tolantiyɛ, ɛkɛ aŋka bala ñamu te Yɔhanna.” 29(Maka tieŋjin jyek Yaccu neeniyɛ, bala jieyi Jwaŋa Tolan waakɛnda i maka nɔɔtk maka lyemi tulbay. Ɛkkɛn gɔki agi naŋka Jwaŋa Tolan buagɔn mati neeniyɛ, pwad pwad ɔci yɔmjin. Acaan ɛkkɛn waakɛnda buullɛ Yɔhanna. 30Yeti ma Pɛriciin ɔci maka loṭi worga Juaŋyɛ, ɛkkɛn yookɔn te bulti Yɔhanna.) 31Ɔci Yaccu gɔkcin agi, “Ɛkkɛ balgɛ ba kɛɛgin ñieyi guoñji ne yookiti waakɛn te ñiek nona ne cyɛɛlɔy. Kacca ne cyɛɛlɔ gɔkti agi, ‘Ikin ñiɛltin wɛɛli wɛɛd ñontan.’ Ɔci ɛka parɛ gɔkti agi, ‘A’a, ɔɔn buagɔn wɛɛlla wanna bɛɛ.’ Ɔci ɛka parɛ daŋkun gɔkti agi, ‘Dala ikin ‘ualtin ɔɔlg joon gɛɛl.’ Ɔci ɛkkin pookɛn gɔkti agi, ‘Ɔɔn buagɔn ɔɔlga wanna moki bɛɛ.’ A ɔɔn bala ba jyek ɛkkɛ maka ciyi acca neeni, ɛkkɛ yookɛ te waka loṭɔn ɔɔn ɛkkɛ waakɛnda. 33Yɔhanna bala gwoṭi koñ oŋkanda, ɔci moti mooy gɛɛg bɛɛ. Ɛkkɛ yookɛ te ɛkɛ. Ɛkkɛ balgɛ gɔkɛ agi, ‘Ɛkɛ a wiilɔn!’ 34’Ya Kaci Ma Baan baal om ɔci moto, yeti ɛkkɛ men yookɛ te naŋka neeni ɔɔn. Ɛkkɛ gɔkɛ agi, ‘Ɛkɛ ani oomdin ne tolan, ɔci ɛkɛ ani mooy moki, ɔci ɛkɛ balkɛ munga yeyin ne coŋɔn.’ Gɔṭṭɛ, maka ñingɛn tɛyanyɛ, naŋki ñing tɛɛn yuartanji ɛkkɛn. 35Yeti ŋeej ‘ya ne pwadan ɛkkɛ yaakɛti waakɔ bɛrtɛ bora oŋkanda te jyeka agdɛ ñin ɛkkɛ a ñaccu wanna.” 36Men ma Pɛriciin gɛɛl yenti Cimaan, ɛkɛ tooccin Yaccuti agi ɛkɛ buagɛti ɛkta bɛɛdɔ ɛkkɛn ominti am on ɛkɛ. Ɔci Yaccu ati on men ma Pɛriciinti neeni. Ɔci ɛkɛ kaaccin orɔ ɔci bala ciyi iki ɛkkɛn nona omki ma amy. 37Ɔci gɔṭṭɛ, mena ɛɛŋ gɛɛl bala bana neeniti, ɔci ɛkɛ a nɔɔdɔn. Ɔci ne ɛkɛ tieŋni agi Yaccu baalɔ on men ma Pɛriciintiyɛ, ɔci ɛkɛ eccin piinŋan wiɛlɛ tɛyan te luañgɔn ṭɔɔlɛ bɔwan. 38Ɔci ɛkɛ bala yɔɔd Yaccu taaŋɛti, ɔci ɛkɛ bala wiak te yom ñɔɔno, ɔci ɛkɛ Yaccu jaallɛ ciegɛti te pyeg woŋgɛ. Ɔci ɛkkɛn puuññɛ ɛkɛ te jyeyi ɛkɛ wyeñɛ, ɔci ɛkɛ Yaccu ñiimmɛ ciegɛti te tuk ɛkɛ. Ɔci ɛkɛ piinŋan pwoŋnɛ Yaccu ciegɛti. 39Ɔci ne men ma Pɛriciin mena Yaccu eññɛ neeni gɔrni a ɔɔnyɛ, ɔci ɛkɛ gɔki yomɛti agi “Kan ɛŋa topcin ɛkɛti neeni kwoyi ɛkɛ ne agi nɔɔdɔnyɛ, ɛkɛ a bɔwa awarɛ bɛɛ.” 40Ɔci Yaccu ṭwokcin ɛkɛti agi, “Gɔṭṭi, Cimaan, ‘ya balka jwali gɛɛl aŋka ‘ya gɔkka iti.” Ɔci ɛkɛ ṭwokcin Yaccuti agi, “Mena Loṭi Ma, gɔkca yɔŋ.” 41Ɔci Yaccu gɔkcin ɛkɛti agi, “Gɔṭṭi, men gɛɛl ma gɛɛg dɛɛnnɛ bilk ne yyɛɛwɔ. Mena ne cyɛɛlɔ dɛn ɛkɛ tol tolo. Ɔci ɛka parɛyɛ, dɛn ɛkɛ ḍiɛṭ ḍyɛr bilk ne ḍiɛkan budan. 42Ɔci acaan dɛɛn tol tol ɔci ‘uaya neeni yaakinti men ‘wontan bilka neeni bɛɛyɛ, mena neeni ma bɔɔŋnɛ yaakkɛn te dɛn ɛkkɛn neeni. Oŋ ba mena te andi ‘wana ɛkkɛn bɔɔŋnɛ neeni ne tolan bɛ?” 43Ɔci Cimaan ṭwokcin ɛkɛti agi, “Mena bɔɔŋnɛ ɛkɛ te dɛna tolan neeni kaapun no.” Ɔci Yaccu gɔkcin ɛkɛti agi, “I ṭwoŋni ne pwadan, jwalla waanɛ wanna.” 44Ɔci Yaccu ñamɛ yalnɛ ɛɛŋti ɔci gɔkcin Cimaanti agi, “I ɛŋa neeni yuarca? Ne ‘ya bɛɛna on iyɛ, i ‘ya ‘wonna pieg aŋka lɔka ‘ya cieg ‘ya bɛɛ. Yeti ɛŋa neeniyɛ, ɛkɛ ‘ya luaŋŋa cieguti te pyeg ɛkɛ woŋgɛ, ɔci ɛkkɛn puuññɛ ɛkɛ te jyeyi ɛkɛ wyeñɛ. 45’Ya ñiimma i ikin ḍɔɔggɔ kaaŋninti ba naŋki yɔrg ikin bɛɛ. Gena ɛkɛ aŋka ‘ya ñiimma te oŋŋa ‘ya bɛɛna ne acca ɔɔny. Ɛkɛ ‘ya ñiimma te tukɛ cieguti. 46I ‘ya juona wyeñuti te ñɔɔn bɛɛ. Gena ɛkɛ aŋka piinŋan pwoŋnɛ ‘ya ciegutiy. 47Tieŋŋa, ‘ya gɔkka iti, ɛŋa neeniyɛ, nɔji ɛkɛ tol tolo, hay! Ɔci ‘ya ɛkɛ bɔɔkan doki te nɔjja neeni, acaan ɛkɛ an ‘ya ne tolan. Kan men gɛɛl nɔji ɛkɛ ḍiɛrcinyɛ, ɔci kan ɛkɛ bɔɔŋnɛ Jwaŋa Tolanyɛ, mena neeni an Juaŋ ne ḍiɛran daŋkun.” 48Ɔci ɛkɛ gɔkcin ɛɛŋti agi, “I bɔɔŋnin doki te nɔji i.” 49Ɔci maka ‘uay maka ciyi omi oomdin neeniyɛ, ɛkkɛn bala gɔwwɔ yɔtin pookɛn agi, “Ɛkɛ a menɛ yeti aŋka ɛkɛ bɔɔci ma te nɔjiy?” 50Ɔci Yaccu gɔkcin ɛɛŋti agi, “Te jyenna i jyetti ‘yati neeniyɛ, i yɔɔññi Jwaŋa Tolan doki. Ɔgdi ootta te pwanno.”

will be added

X\