Luuk 6

1Oŋ gɛɛlti te Oŋ Cabityɛ, Yaccu ati goṭi yelk jitin iki maka laldɛ ɛkɛ. Ɔci ne ɛkkɛn balki atki a woon a ɔɔnyɛ, maka laldɛ Yaccu bala wɔɔpi pok wyetkɛn. Ɔci ɛkkɛn bala wɛɛyi pok ɔci ŋɛyi pok ne tanki ɔɔn. 2Ɔci ma Pɛriciin gɛɛg gɔkcin ɛkkɛnti agi, “Ɛkkɛ jyek ganuun jyek naŋka naŋtan ma te Oŋ Cabit neeni bɛɛdɛji ogo? Gɔṭṭɛ, a jyek ganuun yɔrg ikin wanna bɛɛ.” 3Ɔci Yaccu ṭwokcin ɛkkɛnti agi, “Gɔṭṭɛ, ɛkkɛ pokkɛ jyek naŋki Daawud boki? Daawud te oŋŋa ɛkkɛn ammɛ koñ iki maka atki iki ɛkɛyɛ, 4Daawud kaaccin kañ on Juaŋti ɔci ‘wonnɛ gaciic tolan ma Icrayiil byedga ḍuattan ma Juaŋtiy. Byedga neeniyɛ, gena byedga amtan maka a gaciicin ma Icrayiil pookɛny. Gaciic tolan byedga neeni oonɛ bora ɔci ‘wonnɛ amɛ Daawud iki ackan ɛkɛ. Ɔci Juaŋ gɔkcin genga te naŋka neeni bɛɛ!” 5Ɔci Yaccu gɔkcin ɛkkɛnti ‘wota agi, “Tieŋdɛ! ‘Ya Kaci Ma Baanyɛ, ‘ya a Ciɛggɔn Oŋ Cabit acaan Oŋ Cabit bala ‘ya bieŋuti.” 6Ɔci te Oŋ Cabit parɛ ne ɛkɛ kaanni orɔ ona morki ma Juaŋyɛ, ɛkɛ poccin lorcin ma doki. Ɔci oŋŋa wannatiyɛ, mena ‘uan gɛɛl bala, ɔci ɛkɛ byeŋa byerɔn yaaññi. 7Ɔci maka loṭi worga Juaŋ ɔci ma Pɛriciin gɛɛg bala daŋkun. Ɔci ɛkkɛn bala gɔṭi Yaccu ne Yaccu mena neeni ywaŋdi te Oŋ Cabit boki no. Ɛkkɛn bala gɔṭi ɛkɛ a ɔɔn aŋka kan ɛkɛ men ywaŋdɛ a ɔɔnyɛ, ɔci ɛkkɛn buagɔn ɛkɛ tɔmtan te jwali gɛɛl. 8Yeti ɛkɛ paŋi ɛkkɛn ŋeejɛ doki. Ɔci ɛkɛ gɔkcin mena bieŋɛ puottinti neeni agi, “Hay, i bɛɛdi! Dala i yɔɔtca wɛnni.” Ɔci ɛkɛ jɔllin ñaalɔ ɔci yɔɔtcin aŋan. 9Ɔci Yaccu gɔkcin ma Pɛriciinti agi, “‘Ya buaga toocca ɛkkɛti te jwali ṭɔɔlɛ gɛɛl. Jyek ganuun jyeka guaktan ma te Oŋ Cabit wanna jitkɛn bala a ɔki? A jyek maŋi makɔ walla a jyek ywaŋi ma waakɛn? Walla a jyek naŋka yaayan walla a jyek nooŋi mako? Ba jyeka pwadin ɛkkɛti neeni bɛ?” 10Ɔci Yaccu bala gɔṭi toŋkɛ gɔṭi mati waakɛnda, ɔci ɛkɛ oŋ gɔkcin mena bieŋɛ puottinti neeni oŋ agi, “Bieŋu miɛtca bora.” Ɔci mena bieŋɛ puottin neeniyɛ, ɛkɛ bieŋɛ miɛnnɛ bora, ɔci ɛkɛ bieŋɛ pwani doki. 11Ɔci ne ma gɔrki naŋka neeni a ɔɔnyɛ, ɔci ɛkkɛn looñi ne pɛñan, ɔci ɛkkɛn bala gɔwwɔ yɔtin pookɛn agi, “Ikin Yaccu naŋtin a ɔki yeti?” 12Ɔci oŋ gɛɛlti te wɔɔka wannayɛ, Yaccu ati bora pomk jitin aŋka cɔki Jwaŋa Tolanti. Ɔci ɛkɛ bala cɔki Juaŋti ween konɛ warda. 13Ɔci ne noon bɔɔniyɛ, Yaccu borcin maka laldɛ ɛkɛti ɔci ɛkɛ Maka A Inyaakkɛn Wyetkɛn Ne Yyɛɛwɔ muonɛ bora te maka laldɛ ɛkɛti, ɔci ɛkkɛn barŋɛ ɛkɛ a Cuudan ɛkɛ. 14Maka neeniyɛ, gena Butruc mena bartan ma a Cimaan te tuk ma Icrayiil, ɔci mod ɛkkɛn Andarawuc, ɔci Yaakub, ɔci Yɔhanna, ɔci Pilibuc, ɔci Bartɔɔlamawuc, 15ɔci Matta, ɔci Tɔmac, ɔci Yaakub kaci Alpyac, ɔci Cimaan (mena bartan ma agi men Maka Byerin), 16ɔci Tadawuc (mena bartan ma moki agi Yahuuja kaci Yaakub), ɔci Yahuuja Ickɛɛryuti (mena Yaccu ‘wonnɛ ma byeŋkɛntiy). 17Ɔci ɛkɛ kooyin iñɔ te poom wyeñɛti iki Cuudan ɛkɛ. Ɔci ɛkɛ yɔɔtcin nona wɔɔgan i maka laldɛ ɛkɛ, ɔci ɛkkɛn kɔɔna kɔɔnno. Ɔci maka pookɛn bala daŋkun. Polla tolan bɛɛn te ban Yahuudiya konɛ warda, ɔci te ban Urcaliim. Ɔci maka pookɛn gɛɛg bɛɛn te ban Tayir toŋkɛti, ɔci te ban Ciḍɔɔn toŋkɛti. Bonka neeniyɛ, ɛkkɛn bala Galŋa Tolan ḍwaŋɛti. 18Maka coŋin bɛɛn Yaccuti aŋka tieŋdi jyek ɛkɛ, ɔci aŋka ywaŋdɛ ɛkɛ moki. Ɔci maka taabbin te naŋki jɔkin yeyin neeniyɛ, ɛkkɛn bɛɛn ɔci ywaŋŋɛ ɛkɛ. 19Yaccuyɛ, kan mena warɛ yaayan topti ɛkɛtiyɛ, naŋka tɛyan bɛya te Yaccu warɛti, ɔci men warɛ pwada doki. Acaan a ɔŋŋiyɛ, ma waakɛnda buagɔn topti ɛkɛti. Ɔci ne ɛkkɛn topti ɛkɛtiyɛ, gɔ ɛkkɛn waakɛn pwadkin waakɛnda ɔɔn. 20Ɔci Yaccu ñamɛ yalnɛ maka laldɛ ɛkɛti, ɔci gɔkcin ɛkkɛnti agi, “Ɛkkɛ maka bɔwanyɛ, ɛkkɛ yomgɔ pwanna pwanno, acaan Jwaŋa Tolanyɛ, aga Ciɛggɔn ɛkkɛ awarɛ. 21Ɔci ɛkkɛ maka amɛ koñ accayɛ, ɛkkɛ yomgɔ pwanna pwanno, acaan ne baaṭi ɛkkɛ omdɛ ne pwadan. Ɔci maka wiak accayɛ, ɛkkɛ yomgɔ pwanna pwanno, acaan ne baaṭi ɛkkɛ lɛɛrtɛ ne tolan te yom ñɔɔno. 22Kan ma yookɔn te ɛkkɛ, ɔci kan ɛkkɛn gɔki agi ɛkkɛ kɛɛpcɛ jitin iki ɛkkɛnyɛ, ɔci kan ɛkkɛn wooki ɛkkɛyɛ, ɔci kan ɛkkɛn ɛkkɛ toottɛ ñin te jiek mati acaan ɛkkɛ aŋŋɛ ma ‘ya ma Kaci Ma Baanyɛ, ɛkkɛ yomgɔ pwanna pwanno. 23Maka noŋi ne yaayan neeniyɛ, yɔrg ɛkkɛn bala noŋi a ɔɔn te ñamu maka a bɔwan Jwaŋa Tolanti doki. Te oŋŋa wannayɛ, dala ɛkkɛ yomgɔ ñɔya ne tolan, acaan ne ɛkkɛ ooddɛ ñaalɔ pɔlijiyɛ, waka pwadin yuardɛ ɛkkɛ te taab ɛkkɛ neeni. 24Yeti, hay! Ɛkkɛ maka cyɛgan, yom yoñ bala kɛɛy ɛkkɛ acaan acca ɛkkɛ balkɛ waka ɛkkɛ yomgɔ ñɔɔki doki! 25Hay, ɛkkɛ maka omi ne pwadan acca nɛ! Ne baaṭi ɛkkɛ amdɛ koñ dita. Hay, ɛkkɛ maka lɛɛṭi ne tolan acca nɛ! Ne baaṭi ɛkkɛ wiaktɛ a joono. 26Hay, ɛkkɛ! Kan ma waakɛnda gɔki ne pwadan te ɛkkɛ a ɔɔnyɛ, dala ɛkkɛ woŋgɔ tiittɛ, acaan te baaṭi yɔrg ɛkkɛn bala gɔki a ɔɔn bɔwan jomi jiektiy. 27“Yeti tieŋdɛ ‘ya gɔkka ɛkkɛ maka tyeŋi jyek ‘ya neeniti, dala ɛkkɛ andɛ maka yookɔn te ɛkkɛ neeni. Ɔci dala ɛkkɛ noŋdɛ ne pwadan maka yookɔn te ɛkkɛ neeniti. 28Maka ḍor ɛkkɛ neeniyɛ, dala ɛkkɛ gɔktɛ ne pwadan ɛkkɛnti. Ɔci dala ɛkkɛ cɔktɛ Jwaŋa Tolanti te maka noŋi ne yaayan ɛkkɛti neeni. 29Kan men gɛɛl i jyɛbdi taaŋɔtiyɛ, dala i taaŋŋa parɛ yalja daŋkun aŋka dala jyɛbdɛ ɛkɛ moki. Ɔci kan men gɛɛl bworŋ i bworŋ jwami eedɛ iirdɛ a iirŋ, ɔci kan ɛkɛ buagɔn bworŋa parɛ eedɛyɛ, dala eedɛ ɛkɛ daŋkun. 30Kan ma tootti ɛkkɛti te waakyɛ, dala ɛkkɛ ɛkkɛn ‘wondɛ waka taatan ɛkkɛn neeni. Kan men gɛɛl gen i gɛɛl luldɛ budanyɛ, naa i gɔkca ɛkɛti agi ɛkɛ gen dɔɔdɛ iti moki bɛɛ. 31Kan ɛkkɛ buagɛ ma noŋdi ne pwadan ɛkkɛti ba naŋka ɛkkɛ buagɛyɛ, dala ɛkkɛ noŋdɛ a ɔɔn ɛkkɛnti daŋkun. 32“Kan i an mena an iyɛ, a ɔɔn a genga boki? I gena pwadan gɛɛl yuara te anna neeni boki? Maka nɔɔtkyɛ, ɛkkɛn yaakinti naŋka neeni daŋkun. 33Ɔci kan i noŋja ne pwadan men gɛɛlti mena noŋi ne pwadan iti te ñamu neeniyɛ, a ɔɔn a genga boki? I gena pwadan gɛɛl yuara te anna neeni boki? Maka nɔɔtk yaakinti naŋka neeni daŋkun. 34Kan ɛkkɛ wak ɛkkɛ dɛɛndɛ a maka yaakinti ɛkkɛ dɔɔktɛ wak ɛkkɛ neeni bora dɔki pookɛny, oŋ ba pwani naŋki ɛkkɛ neeni bɛɛ? Naŋka neeni yɔmjin bɛɛ. Acaan maka yeyin daŋkun maka yeyin ba ɛkkɛnyɛ, dɛɛntan waako, ɔci waak dɔki dɔɔtan ɛkkɛn bora te ɛkkɛnti a ɔɔn. 35Dala ɛkkɛ andɛ maka yookɔn te ɛkkɛ. Dala ɛkkɛ noŋdɛ ne pwadan ɛkkɛnti. Dala ɛkkɛ ma ɔɔttɛ waako, ɔci naa ɛkkɛ yomgɔ wiakti te waka neeni bɛɛ. Ɔci a ɔɔnyɛ, ɛkkɛ ‘wondɛ Juaŋ waka pwadin. Ɔci ɛkkɛ agdɛ kɛɛgin Jwaŋa Tolan ñaalɔ. Naŋki ɛkɛ bala a ɔɔn daŋkun. Maka gɔki a pwatcin bɛɛ, ɔci maka noŋi ne yaayanyɛ, Juaŋ yomɛ pwad pwad ɛkkɛnti ɔɔn. 36Dala ɛkkɛ yomgɔ pɔktɛ mati daŋkun ba naŋki Wey ɛkkɛ ne ɛkɛ yomɛ pɔŋnɛ matiy.” 37Yaccu bala gɔki mati men agi, “Gɔṭṭɛ, naa ɛkkɛ wookɛ ma maka pookɛnti aŋka ɛkkɛ da waagdɛ Jwaŋa Tolan bɛɛ. Ɔci naa ɛkkɛ jiek oldɛ ma wyetkɛnti aŋka Jwaŋa Tolan daŋkun jiek oldɛ ɛkkɛ wyetkɔti bɛɛ. Dala ɛkkɛ ma bɔɔktɛ te naŋki ɛkkɛn aŋka ɛkkɛ da bɔɔktɛ Jwaŋa Tolan. 38Dala ɛkkɛ ma ‘wondɛ waak aŋka ɛkkɛ da ‘wondɛ Jwaŋa Tolan waak daŋkun. Ɛkkɛ ‘wondɛ Jwaŋa Tolan waak ne pwadan. Kan gen kuumiyɛ, waka ɛkɛ konɛti tantan ma iñɔ ɔci ɛkkɛn gen wuktanyɔ ɔci kuomtan moki ne waak ŋɛnti iñɔ ɔɔn. Awarɛ, kan i ma ‘woñga a ɔkiyɛ, ɔci i da ‘wondi Jwaŋa Tolan a ɔɔn daŋkun.” 39Ɔci ɛkɛ ɛkkɛn myennɛ te jwalla a caagɔn gɛɛl agi, “Dala ikin jiek jitkɛn yuartin ñamu lakun hayya ikin oŋ lortin ma oŋo. Kan ikin jiek jitkɛn yuartin bɛɛyɛ, ikin baltin ba maka ullin. 40Mena laltan ma te jiekyɛ, ɛkɛ bala ñamu te mena loṭi ɛkɛ boki? A’a, yeti kan men gɛɛl lallɛ mena parɛ ne pwadan, ɔci kan ɛkɛ jiek ḍaaŋŋɛ waakɛndayɛ, mena neeni oŋ yoomdi i mena loṭi ɛkɛ neeni oŋo. 41“Te gena yeti i gɔr gena ḍiɛran neeni mod ɛkkɛ waŋɛti, ɔci gena tolan dalja i waŋuti niin a ɔɔn wannay? 42Te gena yeti i gɔk mod ɛkkɛti agi ɛkɛ bɛya wɛnni aŋka i gena bala ɛkɛ waŋɛti ḍiɛran neeni owwa bora, ne jana tolan bala niin i waŋuti men ɔɔny? I a laaban hay! Ba i paru gena tolan i waŋuti neeni ood bora ñamu bɛɛ? Ɔci ne i noon yuartiyɛ, i oŋ gena bala mod ɛkkɛ waŋɛti neeni owwa bora oŋo. 43“Jana pwadanyɛ, ɛkɛ jieda ṭɔlga yeyin bɛɛ. Ɔci jana yaayan daŋkunyɛ, ɛkɛ jieda ṭɔlga pwadin bɛɛ. 44Jang waakɛnda ŋeecɔn ma ne pwatki, walla ne yieki, te ṭɔlga jiettan ɛkkɛny. Çuap ṭɔlgɛn pwontan ma te toonti bɛɛ. Ɔci luutkin moki pwontan ma te jana ḍuulan jana warɛ a kuwiti bɛɛ. 45Jyek ma daŋkun bala ba jyek janga neeni. Mena pwadanyɛ, ɛkɛ balki paŋŋa pwadan yomɛti, ɔci naŋki ɛkɛ naŋka pwadin bɛya bora te ɛkɛ yomɛti. Ɔci moki mena yaayanyɛ, ɛkɛ balki paŋŋa yaayan yomɛti. Ɔci naŋki ɛkɛ naŋka yeyin bɛya bora te ɛkɛ yomɛti daŋkun. Jyeka bala ma tuggɛntiyɛ, gena paŋŋa coŋin paŋŋa bala ɛkkɛn yomgɛnti te ñamuy. 46“Te gena yeti ɛkkɛ boṭɛ ‘ya a Ciɛggɔn, ne ɛkkɛ noŋɛ ba jyeka ɛkkɛ myettin ‘ya neeni bɛɛy? 47Gɔṭṭɛ, kan mena bɛya ‘yati, ɔci kan ɛkɛ bala tyeŋi jyeka guagdi ‘ya, ɔci kan ɛkɛ noŋi ba jyeka neeniyɛ, ‘ya ɛkkɛ myettin ne ɛkɛ baali a ɔkiy. 48Ɛkɛ bala ba mena ‘uan mena cɔti ony. Ɔci ‘wana neeni on jiɛrŋɛ eññɛ ne iñɔ. Ɔci jali yoŋŋin ɔci on jaannɛ, yeti on bala yɔɔd ne tɛyan men ɔɔn, acaan ɛkɛ on cɔnnɛ ne pwadan. 49Ɔci gɔṭṭɛ daŋkun, mena tyeŋi jyek ‘ya, oŋ yeti ɛkɛ noŋi ba jyeka neeni bɛɛyɛ, ɛkɛ bala ba ‘wana parɛ ‘wana cɔti ony. Ɛkɛ on jiɛrŋɛ eññɛ iñɔ bɛɛ, ɛkɛ on dammɛ. On ŋwayɛ tɛy tɛy bɛɛ. Ɔci jali yoŋŋin ɔci on jaannɛ. Ɔci on ḍɛmmin iñɔ ne pɛñan, ɔci on ḍakcin warda doki.”

will be added

X\